सिरहामा माओवादी पहिलो

कान्तिपुर संवाददाता

सिरहा — जिल्लाका १७ वटा स्थानीय तहमध्ये माओवादी केन्द्रले सबैभन्दा बढीमा जित हासिल गरेको छ । आइतबार सम्पन्न मतपरिणामअनुसार पार्टीले चार नगरपालिका र दुई गाउँपालिकाको नेतृत्व पक्का गरेको छ ।

साबिक क्षेत्र नम्बर ५ वामपन्थी पकड क्षेत्रका रूपमा चिनिन्छ । २०७० को दोस्रो संविधानसभा निर्वाचनमा पुष्पकमल दाहाल यहींबाट विजयी भएका हुन् । यहाँ कर्जन्हा, मिर्चैया र गोलबजार गरी तीन नगर मात्र छन्, गाउँपालिका छैनन् । स्थानीय निर्वाचनमा यी तीनै तहमा माओवादी केन्द्रले वर्चस्व कायम गरेको छ । 
कर्जन्हाको मेयरमा गंगा पासवान र उपमेयरमा ज्ञानकुमारी श्रेष्ठ, मिर्चैयामा मेयर श्रवणकुमार यादव र उपमेयरमा जीवछीदेवी र गोलबजार नगरपालिकामा मेयर देवनाथ साह र उपमयेरमा रेशमकुमारी थापा निर्वाचित भए । जिल्लामा ८ नगरपालिका र ९ गाउँपालिका छन् । 

फड्को मार्दै गोलबजार
पूर्व–पश्चिम राजमार्गले दुई भागमा छुट्टयाएको गोलबजार जिल्लामै व्यवस्थित र बढ्दो सहरीकरण उन्मुख नगरपालिकाका रूपमा चिनिन्छ । पञ्चायत कालसम्म गोलबजारले बजारको रूप लिन सकेको थिएन । बहुदल स्थापनापछि भने गोलबजार धीमा गतिमा भए पनि बामे सर्न थाल्यो । 

Yamaha

२००७ सालमा जन्मिएका देवनाथ साहले गोलबजारलाई व्यापारिक केन्द्र बनाउने लक्ष्य लिएर व्यापारीलाई संगठित गरी २०४७ सालमा गोलबजार उद्योग व्यापार संघ गठन गरे । संस्थागत अध्यक्ष रहेका उनले संघलाई २०५१ सालमा विधिवत् रूपमा दर्ता गरी बजारसँगै व्यापार विस्तारको कामलाई २०६४ सालसम्म निरन्तर अघि बढाए । उनै देवनाथ साह माओवादी केन्द्रबाट अहिले गोलबजार नगरपालिकाको मेयर निर्वाचित छन् । 

व्यापार संघको पहलमा २०५२ सालमा पहिलो पटक उनले भीएचएफ टेलिफोन जडान गरी गोलबजारवासीलाई सञ्चार सुविधाको पहुँचमा पुर्‍याएका थिए । भीएचएफ टेलिफोनबाट आम्दानी भएको ८० हजार रुपैयाँ उनले गोलबजारमा क्याम्पस स्थापनाका लागि विद्यालयलाई हस्तान्तरण गरिदिए । 
व्यापार संघको खातामा चार लाख रुपैयाँ जम्मा भएपछि उनले अतिथि सदन निर्माण सुरु गरे । त्यही धर्मशाला गोलबजारको कार्यक्रम, विवाह बटुललगायत विभिन्न संघसंस्थालाई तालिम, गोष्ठी गर्ने थलो बनेको छ । 

गोलबजारका ८ सय घरधुरीलाई खानेपानी पुर्‍याए । साहकै उनकै अध्यक्षतामा खानेपानी उपभोक्ता समिति गठन गरिएको हो । व्यापार समितिमा २ करोडभन्दा बढी आम्दानी रकम खातामा जम्मा भएपछि २०६४ सालबाट नेतृत्व अरूलाई सुम्पिए । 

२०७१ मंसिर १६ मा साबिक असनपुर, जमदह, मुक्सार, लालपुर, चन्द्रलालपुर, चन्द्रोदयपुर, बल्कावा, बेतौना, दुर्गापुरसहित ९ गाविस जोडेर गोलबजार नगरपालिकामा परिणत भएको थियो । १ सय ११ दशमलव ९४ वर्गकिलोमिटर क्षेत्रफलमा फैलिएको गोलबजार नगरपालिका १३ वडामा विस्तार भएको छ । मेयर साहले गोलबजारमा जिल्लामै नभएको स्टेडियम निर्माण, हरित पार्क, एक घर एक बिरुवा अभियान, आर्थिक विकास नै नगरको समृद्धिलगायत काममा अग्रसर हुने प्रतिबद्धता व्यक्त गरे ।

Esewa Pasal

प्रकाशित : आश्विन ९, २०७४ ०८:३५
ADVERTISEMENT
प्रतिक्रिया
पठाउनुहोस्

राजपाका पक्षमा बढ्दै परिणाम

कान्तिपुर संवाददाता

धनुषा — जनकपुर उपमहानगरपालिकाका दुवै मुख्य पद राजपाको पोल्टामा गएको छ । प्रतिद्वन्द्वीलाई ठूलो मतान्तरले हराउँदै लालकिशोर साह मेयर चुनिए । उपप्रमुखमा पनि सोही पार्टीकी रीता झा निर्वाचित भएकी छन् ।

साहले २१ हजार ९ सय ३ मत ल्याउँदा निकटतम प्रतिद्वन्द्वी कांग्रेसका मनोज साहले ११ हजार १ सय ६४ मत मात्र पाए । झाले १७ हजार १ सय ४७ मत ल्याइन् ।

जनकपुरका २५ वडामध्ये १२ वटामा राजपा, ७ वटामा कांग्रेस, ३ वटामा संघीय समाजवादी फोरम, २ वटामा एमाले र एउटा वडामा स्वतन्त्र उम्मेदवार अध्यक्षचुनिएका छन् ।

मेयरमा विजयी साहले नगरको सडक, शिक्षा, स्वास्थ्य, सरसफाइ र विकासलाई प्राथमिकतामा राखेर काम गर्ने बताए । ‘यो राजपाको होइन, आमजनताको जित हो,’ उनले भने, ‘जनकपुरमा मधेस मुद्दाको जित भएको हो ।’ २०४९ सालको स्थानीय निर्वाचनमा कांग्रेसबाट बागी उठेका उनी उपप्रमुखमा निर्वाचित भएका थिए ।

महोत्तरीमा पनि
महोत्तरी जिल्लाका पिपरा गाउँपालिका र मनरा सिसवा नगरपालिकाको नेतृत्व राजपाले गर्ने भएको छ । आइतबार घोषित परिणामअनुसार पिपरामा विनोदकुमार चौधरी अध्यक्ष चुनिएका छन् । उनले ४२३९ मत ल्याउँदा निकटतम प्रतिद्वन्द्वी एमालेका विक्रम चौधरीले १८१७ मत मात्र पाए । उपप्रमुखमा राजपाकै ननुकुमारी दास २५७३ मतसहित विजयी भइन् ।

त्यस्तै मनरा सिसवा नगरपालिकामा राजपाका सञ्जयकुमार सिंह २७७५ मत ल्याएर मेयर चुनिए । निकटतम प्रतिद्वन्द्वी संघीय समाजवादी फोरमका महेन्द्र रायले ३२६१ मत पाए । उपप्रमुखमा पनि रजपाकै रमिता प्रधान ४०५३ मतसहित विजयी भइन् । जिल्लाका १५ स्थानीय तहमध्ये राजपाले सबैभन्दा बढी ७, माओवादी केन्द्रले ४, कांग्रेसले ३ र संघीय समाजवादी फोरमले १ स्थान जितेका छन् ।

सर्लाहीका ६ तहमा राजपा
सर्लाहीका सबै २० तहको मतगणना सम्पन्न भएको छ । आइतबार टुंगिएको मतगणनाअनुसार राजपाले ६ तह, कांग्रेसले ५ तह, एमालेले ४ तह, माओवादीले ३ तह, संघीय समाजवादी फोरम र नेपाल लोकतान्त्रिक फोरमले १/१ स्थानमा प्रमुख जितेका छन् । उपप्रमुखमा भने राजपाले ७ र संघीय फोरमले २ स्थानमा जित हात पारे ।

पछिल्ला ५ स्थानको परिणाममा एमाले २, माओवादी केन्द्र, कांग्रेस र राजपा १/१ स्थानमा विजयी भएका छन् । अन्तिममा गणना सकिएको कविलासी नगरपालिकामा राजपाका उम्मेदवार कौशलकिशोर यादव मेयरमा विजयी भएका हुन् । संघीय समाजवादी फोरमका ब्रह्मदेव राय उनका निकटतम प्रतिस्पर्धी भए । उपमेयरमा भने राजपाकी रामकुमारी देवीलाई पराजित गर्दै फोरमकी राधादेवी विजयी भइन् । सदरमुकाम रहेको मलंगवा नगरपालिकामा कांग्रेसका निरसल साह विजयी बने । उनका निकटतम प्रतिद्वन्द्वी स्वतन्त्र उम्मेदवार नागेन्द्रप्रसाद यादव रहे । राजपाका उम्मेदवार नागेश्वर राय यादव तेस्रोमा सीमित भए ।

उमपेयरमा कांग्रेसकै सवनम मिकरानी विजयी बनिन् । त्यसैगरी ईश्वरपुर नगरपालिकाको मेयरमा एमालेका मनोज देवकोटा विजयी भए । माओवादी केन्द्रका जयप्रकाश चौधरी उनका निकटतम प्रतिद्वन्द्वी थिए । उपमेयरमा एमालेकै एकादशीदेवी चौधरी विजयी बनिन् । हरिपुर नगरपालिकामा पनि एमालेका उम्मेदवार विजयी भएका छन् । मेयरमा जमरुद्धिन मन्सुर विजयी बने । कांग्रेसका उदयनारायण चौधरी दोस्रो स्थानमा रहे । उपमेयरमा एमालेकै रेणुदेवी काफ्लेले जित हासिल गरिन् ।

बरहथवा नगरपालिकामा माओवादी केन्द्रका देवानन्द महतो मेयरमा विजयी भएका छन् । उनलाई कांग्रेसका निरञ्जनप्रसाद दासले पछ्याएका थिए । उपमेयरमा केन्द्रकै सीतादेवी माझीले जित हासिल गरिन् । उनलाई कांग्रेसकी यशोदादेवी निरौलाले पछ्याएकी थिइन् ।

प्रकाशित : आश्विन ९, २०७४ ०८:३५
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT