धावन मार्गमै बटुवा र चौपाया

कान्तिपुर संवाददाता

मुगु — एक साताअघि रारा विमानस्थलबाट उडान भर्न लागेको नेपाल एयरलाइन्सको विमानमा कुकुर ठोक्कियो । चालकको सावधानीले दुर्घटना भएन । गत बिहीबार पनि चालकले कुकुरबाट जहाजलाई जोगाएका थिए ।

जिल्लाको एकमात्र रारा विमानस्थलमा तारजाली नलगाउँदा विमान उडान भर्ने र अवतरण गर्ने समयमा सुरक्षाकर्मीले निकै सास्ती खेप्नुपर्छ । विमान कम्पनीको प्रतिस्पर्धाले हवाई उडानमा वृद्धि भए पनि तारबार नहुँदा सुरक्षामा चुनौती थपिएको हो ।

तारबार र पर्खाल नहुँदा धावनमार्गबाटै बटुवा, विद्यार्थी र चौपाया ओहोरदोहोर गर्छन् । उडान र अवतरणको समयमा चौपाया र बटुवालाई रोक्न प्रहरीलाई धौ–धौ पर्ने गरेको छ । 

विद्यार्थी पनि विमानस्थलकै बाटो हुँदै आवत–जावत गर्छन् । जहाजले अवतरण र उडान गर्ने बेला विद्यार्थीलाई बीच बाटामै रोक्नुपर्ने बाध्यता छ । यसले विद्यार्थीको पठनपाठनमा समेत अवरोध पुर्‍याएको छ । स्थानीयले प्रयोग गर्दै आएको मुख्य बाटोले विमानस्थल वारपार गर्छ । वन/जंगलबाट घाँस, दाउरा लिएर आउने स्थानीय पनि त्यहींबाट आउजाउ गर्छन् । 

विमानस्थल कालोपत्रे भए पनि वरिपरि अझै घेराबार भएको छैन । तारजाली नहुँदा चौपाया पनि पस्ने गरेको प्रहरीले जनाएको छ । मुगुमा तारा, गोमा, सीता, मकालु र नेपाल एयरलाइन्सले उडान भर्ने गरेका छन् । सुर्खेत र नेपालगन्जबाट दैनिक पाँचदेखि सात वटासम्म उडान हुने गरेको विमानस्थल कार्यालयले जनाएको छ । 

सुरक्षा चेकजाँच गर्ने भवनसमेत निर्माण नहुँदा थप समस्या भएको कर्मचारी बताउँछन् । काठको टहरामै सुरक्षा चेकजाँच पोस्ट बनाइएको छ । रारा नागरिक उड्डयन कार्यालयका प्रमुख विशाल पाण्डेयले खुला विमानस्थलमा जहाज अवतरण गर्दा समस्या हुने गरेको जनाए ।

प्रकाशित : फाल्गुन ६, २०७३ १८:१४
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

चिनियाँद्वारा नेपालमा तीन खर्ब लगानीको प्रतिवद्धता

'नेपालमा लगानीको अवसर' सेमिनारमा चीनका उत्कृष्ट कम्पनीहरुको सहभागिता
चेतनाथ आचार्य

बेइजिङ — चिनियाँ लगानीकर्ताहरुले झण्डै तीन खर्व नेपाली रुपैयाँ (१८ अर्ब ५० करोड चिनियाँ युआन) को लगानी प्रतिबद्धता जनाएका छन् । बेइजिङस्थित नेपाली दूतावासले आयोजना गरेको एक सेमिनारमा उनीहरुले उत्साहका साथ उक्त रकम बराबरको लगानी प्रतिबद्धता जनाएका हुन् ।

दूतावासले विश्वकै उत्कृष्ट पाँच सय ठूला कम्पनीहरुमा सूचिकृत चिनियाँ कम्पनीहरुलाई सहभागी गराउँदै शुक्रबार ‘नेपालमा लगानीको अवसर’ विषयमा एक सेमिनारको आयोजना गरेको थियो । सेमिनारमा वर्षौंदेखि नेपालमा लगानी गरिरहेका कम्पनीहरुदेखि चीनका ख्यातिप्राप्त कम्पनीका प्रतिनिधिहरु सहभागी थिए ।

नेपालमा लगानी गरिरहेका पावर चाइना, गेजुवा कम्पनी, जेडटिईलगायत चीनकै प्रख्यात चाइना इन्जिनियरिङ कर्पोरेसन, चाइना रेलवे कन्ट्रक्सन कम्पनी, एभिक कम्पनी, युन्नान कन्ट्रक्सन कम्पनी, साइनो पेक, इनर्जी चाइनालगायतका कम्पनीले सेमिनारमा भाग लिएका थिए ।

पावर चाइना इन्टरनेसनल ग्रुप (तत्कालीन सिनो हाइड्रो) ले नेपालका विभिन्न जलविद्युत आयोजनामा लगानी गरेको छ । नेपाल टेलिकमसँग व्यावसायिक साझेदारी गर्दै आएको जेडटिई, विभिन्न पूर्वाधार क्षेत्रमा काम गर्दै आएको गेजुवा कम्पनीले नेपालमा लगानी गरिरहेको छ ।

लीलामणि पौडेल राजदूत भएर आएपछि दूताबासले विभिन्न गतिविधिहरु संचालन गर्दै आएको छ । यसभन्दा अगाडि पनि एम्बेसडर फोरमसँग मिलेर दूताबासले नेपालमा लगानी गर्न इच्छुक चिनियाँ लगानीकर्तालाई लक्षित यस्तै प्रकारको सेमिनारको आयोजना गरेको थियो । त्यसैगरी नेपालको पर्यटन प्रवर्धनलगायतका कार्यक्रमहरु पनि आयोजना गर्दै आएको दूतबासले जनाएको छ ।

सेमिनारमा सहभागीहरुलाई स्वागत गर्दै नेपालमा चिनियाँ लगानीको अवस्थाका बारेमा राजदूत पौडेलले प्रकाश पारेका थिए । चीनले अगाडि सारेको ‘बेल्ट एन्ड रोड इनिसिएटिभ’ भित्र नेपाल पनि पर्ने भएकाले नेपाल चिनियाँ लगानीकर्ताका लागि उत्कृष्ट क्षेत्र रहेको उनले प्रकाश पारे । दूताबासका इकोनोमिक मिनिष्टर बिनोद आचार्य र प्रथम सचिव साबित्रा ओलीले नेपालमा चिनियाँ लगानीको संभावनामाथि श्रव्यदृश्य सामग्री प्रस्तुत गरेका थिए ।

सेमिनारमा नेपालका लागि पूर्व चिनियाँ राजदूत सुन हपिङले नेपालमा लगानी गर्नु चिनियाँका लागि सुनौलो अवसर रहेको बताए । उनले आफ्नो कार्यकालमा नेपालमा चिनियाँ लगानी उल्लेख्य बढेको बताउँदै चिनियाँ प्रविधि र पूँजी नेपालको पूर्वाधार क्षेत्रमा अत्यन्त्य अनुकूल रहेको उल्लेख गरे । नेपाली जलविद्युत उद्योगमा चिनियाँ लगानीलाई आकर्षित गर्न नेपाल सरकारले विभिन्न अनुकूल नीतिहरु बनाएको उल्लेख गर्दै सुनले चिनियाँ लागनीकर्ताले चाँडै प्रतिफल प्राप्त गर्ने औल्याए ।

त्यसैगरी पावर चाइना इन्टरनेसनल ग्रुप लिमिटेडकी वाणिज्य प्रवन्धक ये फानले नेपालमा लगानी गरेको आफ्नो कम्पनीको २० वर्षको अनुभव व्यक्त गर्दै नेपालको जलविद्युत र पूर्वाधार क्षेत्र चिनियाँ लगानीका लागि उत्कृष्ट स्थान रहेको बताइन् ।

चिनियाँ लगानीकर्ताहरुको सेमिनारमा चीनका विभिन्न सरकारी कार्यालयका प्रतिनिधिको पनि उपस्थिति थियो । वैदेशिक लगानी प्रवर्द्धनमा चिनियाँ परिषद ‘सीसीपीटीआई’ हबेइ प्रान्तका प्रतिनिधिसहित चिनियाँ वाणिज्य मन्त्रालयका प्रतिनिधि र हबेइ प्रान्तको वैदेशिक मामिला कार्यालयका अधिकारी सहभागी भएर उनीहरुले आफ्नो क्षेत्रका कम्पनीहरुलाई नेपालमा लगानी गर्नका लागि प्रोत्साहित गर्ने बताएका छन् ।

चिनियाँ कम्पनीहरुले नेपालले आयोजना गर्न लागेको लगानी सम्मेलनमा भाग लिन पनि रुचि देखाएका छन् । सेमिनारमा उनीहरुले लगानी सम्मेलनमा नेपालका एजेन्डा तथा चीनले गर्न सक्ने लगानीका क्षेत्रमा समेत चासो राखेका थिए । सेमिनारमा विभिन्न कम्पनीका ६४ प्रतिनिधिहरुले भाग लिएका थिए । सेमिनारमा भाग लिएका मध्ये १८ कम्पनीका ५१ जना प्रतिनिधिहरुले नेपालले आगामी मार्च २ र ३ मा गर्ने भनेको लगानी सम्मेलन भाग लिने बताएका थिए ।

प्रकाशित : फाल्गुन ६, २०७३ १८:१४
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT