दुर्घटनामा ३ को मृत्यु, १० घाइते

कान्तिपुर संवाददाता

विराटनगर — पूर्वका विभिन्न जिल्लामा भएका दुर्घटनामा गएराति तीनजनाको मृत्यु भएको छ । १० जना घाइते भएका छन् । झापाको कमल गाउँपालिका ५ मा बस पल्टँदा दमककी ३० वर्षीया निता विष्टको मृत्यु भएको छ । गम्भीर घाइते उनको उपचारका क्रममा मृत्यु भएको पूर्वक्षेत्रीय प्रहरी कार्यालयले जनाएको छ ।

विपरित दिशाबाट आइरहेको मोटरसाइकललाई जोगाउने क्रममा पल्टिएको बा ३ ख ७८१५ नम्बरको सो बसमा सवार १० जना घाइते भएका छन् । घाइतेको विराटनगर, दमकलगायत स्थानका अस्पतालमा उपचार भइरहेको छ ।

सप्तरीको कन्चरुपका ना १ क ५२०० नम्बरको ट्रकले ठक्कर दिंदा भारदह २ की १६ वर्षीया नितु ठाकुरको मृत्यु भएको प्रहरीले जनाएको छ । ठक्करले गम्भीर घाइते भएकी उनको उपचारका लागि लैजाने क्रममा मृत्यु भएको थियो ।

सप्तरीकै शम्भुनाथ नगरपालिकामा ना १ क ५३६५ नम्बरको टिप्परले ठक्कर दिंदा साइकलयात्री स्थानीय २३ वर्षीय किसन सदाको मृत्यु भएको प्रहरीले जनाएको छ ।

प्रकाशित : चैत्र ७, २०७३ १२:११
प्रतिक्रिया
पठाउनुहोस्

साउदीद्वारा ९० दिने आममाफीको घोषणा

होम कार्की

काठमाडौं — साउदी अरवले गैरकानुनी हैसियत कामदारलाई बिना सजाय स्वदेश फिर्न पाउने गरी ९० दिनको आममाफीको घोषणा आइतबार गरेको छ । यो मार्च २९ गतेबाट लागु हुनेछ । साउदीका राजकुमारसमेत रहेका उपप्रधान तथा गृहमन्त्री मोहमद विन नैफले ‘उल्लंघन बिनाको देश’ अभियान सुरु गर्दै आममाफी दिएको हो ।

साउदी अरवले गैरकानुनी हैसियत कामदारलाई बिना सजाय स्वदेश फिर्न पाउने गरी ९० दिनको आममाफीको घोषणा आइतबार गरेको छ । यो मार्च २९ गतेबाट लागु हुनेछ ।

साउदीका राजकुमारसमेत रहेका उपप्रधान तथा गृहमन्त्री मोहमद विन नैफले ‘उल्लंघन बिनाको देश’ अभियान सुरु गर्दै आममाफी दिएको हो । सरकारले तीन वर्ष अगाडि पनि आममाफी दिएको थियो । त्यतिखेर ३५ हजार नेपाली स्वदेश फिर्न पाएका थिए ।

साउदी अरवका कम्पनी छाडेर गैरकानुनी हिसाबले अर्को कम्पनीमा काम गरिरहेका, कम्पनीले भिसा नलगाई राखेका, कम्पनी बन्द भई स्वदेश फिर्न नपाएका जस्ता कामदारहरु आममाफीको कार्यक्रममा फाइदा लिन सक्ने नेपाली दूतावासले जनाएको छ ।

राजकुमार नैफले घर फिर्न चाहनेलाई सहजीकरण गर्न तोकिएको निकायलाई ब्यवस्था मिलाउन निर्देशन दिइसकेको बताएको स्थानीय सञ्चारमाध्यमहरुले जनाएको छ । आन्तरिक मन्त्रलायका प्रवक्ता मान्सअवर अल–तुरकीले यो अभियानमा सहभागी कामदारलाई सहजीकरण गर्नको लागि १९ वटा निकायहरु तोकिएको बताए । ‘हज र उमराहको लागि आउदा बसेका देखि कुनै प्रकारका भिसाका आप्रबासीलाई पनि सहयोग गर्नेछौं,’ उनले भने ।

ती कामदार स्वदेश फिर्नको लागि दूतावासले ट्राभल डकुमेन्ट जारी गनुपर्ने जनाएको छ । साउदीको राहदानी तथा अध्यागमन विभागले सबै तयारी पुरा गरिसकेपछि मात्रै ती कामदार स्वदेश फिर्न पाउने उनले बताए । ‘जो कामदारसँग आफ्नो आवासीय अनुमति छैन । उनीहरु तुरुन्तै नजिकको राहदानी बिभागमा सम्र्पक गर्न सक्नेछन्,’ उनले भने ।

साउदीका लागि कार्यबाहक राजदुत आनन्दराज शर्माले नेपालमा म्यानपावर कम्पनीसँग गरेको सम्झौता अनुसार तलब, काम र सेवा सुविधा नपाउँदा कामदारहरु भाग्ने प्रवृत्ति रहेको बताए । ‘यहाँ पीडित कामदारलाई स्वदेश उद्धार गर्न हामी प्रयासरत छौं । सम्र्पकमा आएकालाई कम्पनी नछोड्न अनुरोध गर्दछौं,’ उनले भने, ‘तैपनि कामदारहरु चाहेको जस्तो नदेखेपछि भागिरहेका हुन्छन् ।’

भागेका कामदार जेल बसेर स्वदेश फिर्न निकै कठिन भोग्दै आएका छन् । साउदीबाट जेल बसेर हरेक दिन जसो दुई दर्जन नेपाली फर्किरहेका हुन्छन् । तीन बर्ष अघि साउदीको आममाफीमा झण्डै २५ लाख आप्रवासी सहभागी भएका थिए ।

प्रकाशित : चैत्र ७, २०७३ १२:११
पूरा पढ्नुहोस्
प्रतिक्रिया
पठाउनुहोस्