५ निरीक्षक निष्कासित

कान्तिपुर संवाददाता

सिरहा — केन्द्राध्यक्ष र निरीक्षककै मिलोमतोमा माध्यमिक शिक्षा परीक्षा (एसईई) अमर्यादित बनेको छ । परीक्षा निर्देशिका २०७३ अन्तर्गत परीक्षा अनुशासन पालनका लागि केन्द्राध्यक्षका लागि जारी गरिएको १९ बुँदे निर्देशनविपरीत अमर्यादित क्रियाकलाप गरेको भन्दै परीक्षा अनुगमन समितिले तीन केन्द्राध्यक्षलाई सचेत र ५ निरीक्षकलाई परीक्षा केन्द्रबाटै निष्कासन गरेको छ ।

शिक्षा कार्यालयका  अनुसार परीक्षार्थीलाई गेसपेपर र परीक्षा केन्द्र बाहिरबाट तयार पारिएको फ्ल्याप उत्तरपुस्तिकामा सार्ने वातावरण सिर्जना गरेर परीक्षा अमर्यादित बनाएको भन्दै तीन केन्द्राध्यक्षलाई सचेत र ५ निरीक्षकलाई निष्कासन गरिएको हो ।

जिल्ला शिक्षा अधिकारी अरविन्दलाल कर्णका अनुसार चन्द्रउदयपुर मावि परीक्षा केन्द्रका केन्द्राध्यक्ष परमेश्वर यादव, चन्द्रलालपुर केन्द्रका राजलाल यादव र सोनमती गाढा मावि परीक्षा केन्द्रका केन्द्राध्यक्ष अरविन्दकुमार दासलाई सचेत गराइएको छ । 

परीक्षा अमर्यादित बनाउनमा संलग्न सोनमती गाढा परीक्षा केन्द्रका निरीक्षक देवप्रसाद यादव, शिवप्रसाद साह, रामएकवाल यादव, विनीता र गौरीपुर परीक्षा केन्द्रका तनवीर अन्सारीलाई निष्कासन गरेको छ । 

मुखैले लेखेर ‘एसईई’
पिठुवा (चितवन)– रत्ननगर १६ स्थित खैरेटीका भरत गुरुङका हातखुट्टा चल्दैनन् । उनी हातले जसोतसो डटपेनसम्म समात्न सक्छन् । लुगा लगाउन र शौचालय जान पनि अरूकै सहारा लिनुपर्छ । अपांगता भए पनि उनले हिम्मत हारेका छैनन् । आफ्नै साहसले पढ्न सुरु गरे । उनी अहिले एसईई परीक्षा दिँदै छन् । 

उनी परीक्षामा मुखले कलम च्यापेर लेख्ने गर्छन् । उनको केन्द्र रत्ननगर १४ स्थित पिठुवाको जनजागृति मावि हो । आमा चन्द्रमाया उनलाई परीक्षा केन्द्रसम्म पुर्‍याउँछिन् । घरभन्दा करिब ४ किलोमिटर टाढा केन्द्र भएकाले पुर्‍याउन र लिन चन्द्रमाया आफैं पुग्छिन् । उनलाई विद्यालयको कार्यालय कक्षमै परीक्षा दिने व्यवस्था मिलाइएको छ । ‘उनको साहस ठूलो छ,’ केन्द्रका केन्द्राध्यक्ष विनोदप्रसाद अधिकारीले भने, ‘मुखले लेखेरै परीक्षा दिइरहेका छन् ।’ 

प्रकाशित : चैत्र ८, २०७३ ०९:३६
प्रतिक्रिया
पठाउनुहोस्

साउदीद्वारा ९० दिने आममाफीको घोषणा

होम कार्की

काठमाडौं — साउदी अरबले गैरकानुनी हैसियतका कामदारलाई बिनासजाय स्वदेश फिर्न पाउने गरी आइतबार ९० दिनको आममाफीको घोषणा गरेको छ । यो मार्च २९ गतेबाट लागू हुनेछ । साउदीका राजकुमार, उपप्रधान तथा गृहमन्त्री मोहमद विन नैफले ‘उल्लंघनबिनाको देश’ अभियान सुरु गर्दै आममाफी दिएको हो । सरकारले तीन वर्षअगाडि पनि आममाफी दिएको थियो ।

त्यतिखेर ३५ हजार नेपाली स्वदेश फिर्न पाएका थिए ।

साउदी अरबका कम्पनी छाडेर गैरकानुनी हिसाबले अर्को कम्पनीमा काम गरिरहेका, कम्पनीले भिसा नलगाई राखेका, कम्पनी बन्द भई स्वदेश फिर्न नपाएका जस्ता कामदारहरूले आममाफीको कार्यक्रममा फाइदा लिन सक्ने नेपाली दूतावासले जनाएको छ ।

राजकुमार नैफले घर फिर्न चाहनेलाई सहजीकरण गर्न तोकिएको निकायलाई व्यवस्था मिलाउन निर्देशन दिइसकेको बताएको स्थानीय सञ्चारमाध्यमहरूले जनाएका छन् । आन्तरिक मन्त्रलायका प्रवक्ता मान्सअवर अल–तुरकीले यो अभियानमा सहभागी कामदारलाई सहजीकरण गर्नका लागि १९ वटा निकायहरू तोकिएको बताए । ‘हज र उमराहका लागि आउँदा बसेकादेखि कुनै प्रकारका भिसाका आप्रवासीलाई पनि सहयोग गर्नेछौं,’ उनले भने । 

ती कामदार स्वदेश फिर्नका लागि दूतावासले ट्राभल डकुमेन्ट जारी गनुपर्ने जनाएको छ । साउदीको राहदानी तथा अध्यागमन विभागले सबै तयारी पूरा गरिसकेपछि मात्रै ती कामदार स्वदेश फिर्न पाउने उनले बताए । ‘जो कामदारसँग आफ्नो आवासीय अनुमति छैन, उनीहरूले तुरुन्तै नजिकको राहदानी विभागमा सम्पर्क गर्न सक्नेछन्,’ उनले भने । साउदीका लागि कार्यवाहक राजदूत आनन्दराज शर्माले नेपालमा म्यानपावर कम्पनीसँग गरेको सम्झौताअनुसार तलब, काम र सेवा–सुविधा नपाउँदा कामदारहरू भाग्ने प्रवृत्ति रहेको बताए । ‘यहाँ पीडित कामदारलाई स्वदेश उद्धार गर्न हामी प्रयासरत छौं । सम्पर्कमा आएकालाई कम्पनी नछोड्न अनुरोध गर्दछौं,’ उनले भने, ‘तैपनि कामदारहरू चाहेको जस्तो नदेखेपछि भागिरहेका हुन्छन् ।’

भागेका कामदारले जेल बसेर स्वदेश फिर्न निकै कठिनाइ भोग्दै आएका छन् । साउदीबाट जेल बसेर हरेक दिनजसो दुई दर्जन नेपाली फर्किरहेका हुन्छन् । कार्यवाहक राजदूत शर्माले गैरकानुनी हैसियत भएका कामदारलाई सहजीकरण दूतावासले आवश्यक भूमिका निर्वाह गर्ने बताए । साउदीमा झन्डै ६ लाख नेपाली कार्यरत छन् । त्यसको १० प्रतिशत कामदार गैरकानुनी हैसियतमा रहेको अनुमान गरिएको छ ।

प्रकाशित : चैत्र ८, २०७३ ०९:३६
पूरा पढ्नुहोस्
प्रतिक्रिया
पठाउनुहोस्