‘विश्वशान्तिमा नेपालीको भूमिका छ’

कान्तिपुर संवाददाता

काठमाडौं — प्रधानमन्त्री पुष्पकमल दाहालले विश्वमा शान्ति स्थापनामा नेपाल लागिरहने बताएका छन् । काभ्रेको पाँचखालस्थित वीरेन्द्र शान्ति कार्य तालिम केन्द्रमा ‘अन्तर्राष्ट्रिय शान्ति प्रयास–३ प्रशिक्षण’को सोमबार उद्घाटन गर्दै दाहालले यस्तो बताएका हुन् ।

‘नेपाली भूमि इमान्दारी र शान्तिका लागि प्रख्यात छ । संयुक्त राष्ट्रसंघको सदस्य भएदेखि नै नेपालले विश्वमा शान्ति स्थापनामा सहयोग गर्दै आइरहेको छ । अब पनि गरिरहने छ,’ प्रधानमन्त्री दाहालले भने । उनले नेपालले बृहत् शान्ति सम्झौताबाट शान्तिको बाटो अपनाएको उल्लेख गर्दै शान्तिसुरक्षामा लागिरहने बताए । प्रधानमन्त्री दाहालले विश्वमा शान्ति स्थापना गर्न नेपालीको ठूलो भूमिका भएको भन्दै शान्ति मिसनमा सहभागी हुने नेपाली सैनिकहरूको प्रशंसा गरे ।

संयुक्त राष्ट्रसंघको शान्ति मिसनमा एकीकृत रूपमा काम गर्न सहजताका लागि नेपाली सेनाले यो प्रशिक्षण तेस्रो पटक आयोजना गरेको हो । चैत २१ सम्म हुने प्रशिक्षणमा २८ मुलुकका १ हजार २४ सैनिक प्रशिक्षार्थी र प्रशिक्षक सहभागी हुँदै छन् । जीपीओआई (अमेरिकी सरकारको राजनीतिक–सुरक्षा विभागले शान्ति स्थापना, अन्तर्राष्ट्रिय सुरक्षा क्षमता र क्षेत्रीय सुरक्षा अभिवृद्धि गर्न स्थापित कार्यक्रम) मा रहेका २१ र ७ अन्य मुलुक प्रशिक्षणमा सहभागी छन् । प्रधानसेनापति राजेन्द्र क्षत्रीले १७ वर्ष अघिदेखि सुरु भएको बहुराष्ट्रिय शान्ती प्रयास प्रशिक्षणले शान्ती स्थापनामा शान्ति स्थापनाकर्ता बीचमा मिलेर काम गर्न सहज हुने बताए । नेपालले यसअघि सन् २००० मा पहिलो र २०१३ मा दोस्रो बहुराष्ट्रिय शान्ति प्रयास प्रशिक्षण गरेको थियो ।

कार्यक्रममा नेपालका लागि अमेरिकी राजदूत एलिना बीटेप्लिजले शान्ति स्थापनामा अमेरिकी सरकारले धेरै प्राथमिकता दिएको उल्लेख गर्दै नेपाली सैनिकहरूले विश्वमा शान्ति स्थापनामा खेलेको भूमिकाको प्रशंसा गरिन् ।

प्रकाशित : चैत्र ८, २०७३ ०९:३६
प्रतिक्रिया
पठाउनुहोस्

काठ तस्करीमा प्रहरी संलग्न

कान्तिपुर संवाददाता

धरान — उपमहानगरपालिका–२० विष्णुपादुकास्थित भवानी थान सामुदायिक वनबाट प्रहरीकै संलग्नतामा काठ तस्करी भएको छ । आइतबार राति बलेरो जिपमा काठ लोड गरिरहेका बेला वन उपभोक्ता समितिका पदाधिकारीहरूले नियन्त्रणमा लिँदा प्रहरी नै संलग्न भएको खुलेको हो ।

उपभोक्ता समिति कोषाध्यक्ष राजबहादुर राईका अनुसार विष्णुपादुका अस्थायी प्रहरी पोस्टका इन्चार्ज खेमबहादुर कँुवर, जवान गंगा लिम्बूसहित काठ तस्करी गर्ने धरान १८ का विवेक लिम्बू र गाडी चालक नगेन्द्र किर्कीलाई पक्राउ गरी सेक्टर वन कार्यालयलाई बुझाइएको छ ।

कार्यालय प्रमुख ज्ञानकुमार लामाले तस्करीमा संलग्नलाई पक्राउ गरी कानुनी कारबाही थालिएको बताए ।

प्रकाशित : चैत्र ८, २०७३ ०९:३६
पूरा पढ्नुहोस्
प्रतिक्रिया
पठाउनुहोस्