नापी कार्यालय नहुँदा सेवाग्राही मर्कामा

कान्तिपुर संवाददाता

तेह्रथुम — स्थानीय तह पुन:संरचना कार्यान्वयन गर्ने अख्तियारी पाएलगतै आठराई गाउँपालिका केन्द्र संक्रान्ती बजारमा मालपोत कार्यालय स्थापना भएको छ । मालपोतसँगै नापी कार्यालय नहुँदा भने आठराई यस क्षेत्रका सेवाग्राही मर्कामा परेका छन् ।

भूमिसुधार तथा व्यावस्था मन्त्रालयअन्तर्गत नापीसँगै अख्तियारी पाएको मालपोल स्थापना भए पनि नापी स्थापना हुन सकेको छैन । दुवै कार्यालयले गत कात्तिकमा आठराई केन्द्र साविक संक्रान्ती बजार वडा नं. ६ मा कार्यालय स्थापना गर्ने अख्तियारी पाएका थिए ।

मालपोत र नापीको काम आपसमा सम्बन्धित भएको र नापी स्थापना नहुँदा आफूहरू मारमा परेको स्थानीय अमृत क्षत्रीले बताए । नापीको सेवा लिन ६७ किलोमिटर टाढा म्याङलुङ धाउनुपरेको उनले जानकारी दिए ।

नापी आठराईका लागि खटिएका प्रमुख मिथलेस यादवले संक्रान्ती बजारमा कार्यालय स्थापना हुने निश्चित भए पनि कहिले हुने भन्ने विषयमा आफू अनविज्ञ रहेको बताए । संक्रान्तीमा कार्यालय स्थापना गर्न माघ महिनामै नापीले घरभाडा सम्झैता गरेको थियो ।

संक्रान्तीमा नापी स्थापना भएपछि आठराई गाउँपालिकाको ७ वडा साविक सक्रान्ती, खाम्लालुङ, हाकु, इवा, छातेढुङ्गा, चुहानडाँडा र थोक्लुङ र फेदाव गाउँपालिकाको २ वडा साविक सम्दु र इसिवु गाविसका सेवाग्राहीले सेवा लिन पाउनेछन् ।

प्रकाशित : चैत्र ८, २०७३ ०९:४१
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

परीक्षा दिँदै दृष्टिविहीन

कान्तिपुर संवाददाता

पाँचथर — फिदिम नगरपालिका– ४ स्थित गढी माविमा अध्ययनरत दृष्टिविहीन १६ वर्षीया पञ्चमीला मिफोक लिम्बू माध्यमिक शिक्षा परीक्षा बोर्डद्वारा सञ्चालित परीक्षामा सहभागी भएकी छन् । उनीसँगै अर्का रामकुमार राई पनि परीक्षा दिँदै छन् ।

आङसराङ गाविस ५ की पञ्चमीला र लुङरूपा ३ का रामकुमार जन्मिँदै ज्योतिविहीन थिए । यी दुई विद्यार्थीले सोमबार विज्ञान विषयको परीक्षा दिए । दृष्टिविहीन भए पनि पठनपाठनमा अब्बल उनीहरूले उत्कृष्ट हुने गरी लेखेको दाबी गरे ।

गढी माविमा अध्ययनररत १६ जना दृष्टिविहीनमध्ये दुई एसईईमा सहभागी भएका हुन् । आँखा देख्नेभन्दा नदेख्ने विद्यार्थी अब्बल हुने गरेको विद्यालयका प्रधानाध्यापक मानध्वज थाम्सुहाङले बताए । पञ्चमीला मिफोक गीत, संगीत, गायन, वक्तृत्वकला प्रतियोगितामा समेत अब्बल प्रतिभा रहेको प्रअ थाम्सुहाङले जनाए ।
यहाँ अध्यायनरत दृष्टिविहीन विद्यार्थी पाठ्यक्रमअनुसारको ब्रेल, स्टालस, स्लेट, अडियो रेकर्डर, अडियो सामग्री, ब्रेलपेपर, ब्रेल टाइपराइटर, कम्प्युटर ब्रेल प्रिन्टरलगायत आवश्यक पाठ्यसामग्रीबिना अध्यापनरत छन् ।

ब्रेललिपिमा पाठ्यसामग्री उपलब्ध हुनुपर्ने माग गर्दै आएका उनीहरूले अरू विद्यार्थीसितै मिसिएर सुनेको भरमा छामेर लेखपढ गर्नुपर्ने बाध्यता रहेको गुनासो गर्दै आएका छन् ।

विद्यालयबाट उत्तीर्ण चार उच्च मावितह र चार स्नातक तहमा अध्ययनरत रहेका छन् । यस वर्ष पाँचथरमा ८९ माविबाट २० वटा केन्द्रमा नियमिततर्फ तीन हजार ८ सय ७१ र ४ सय १३ एक्जाम्टेड परीक्षार्थी सहभागी छन् ।

प्रकाशित : चैत्र ८, २०७३ ०९:४१
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT