भक्तपुरमा चल्यो साझा बस

कान्तिपुर संवाददाता

भक्तपुर — साझा यातायातले भक्तपुरमा साझा बस सेवा सञ्चालनमा ल्याएको छ । करिब दुई महिनादेखि मिनिबस सेवा समितिलगायतका यातायात व्यवसायीको विरोधका कारण रोकिएको रुट परमिट पाएलगत्तै बुधबार बिहान साढे ६ बजेदेखि साझाले सेवा सञ्चालन गरेको हो ।


साझा यातायातका कार्यकारी प्रमुख महेन्द्रराज पाण्डेका अनुसार भक्तपुरमा पहिलो चरणमा २० वटा बस सञ्चालनमा ल्याइएको छ । साझा बसले स्वयम्भूबाट कलंकी, कालीमाटी, त्रिपुरेश्वर, रत्नपार्क, सहिदगेट, माइतीघर, बानेश्वर, कोटेश्वर, जडीबुटी, लोकन्थली, कौशलटार, गट्ठाघर, नयाँठिमी, सृजनानगर, सल्लाघारी हुँदै सूर्यविनायकसम्म सेवा सञ्चालन गरेको छ । साझा बसलाई उपभोक्ता हित संरक्षण मञ्च जिल्ला कार्य समिति भक्तपुरले स्वागत गरेको छ । यातायात व्यवसायीको विरोधको बाबजुद पनि भित्रिएको साझा बसलाई प्रहरीले एस्कर्टिङ गरेर भित्र्याएको छ ।
सूर्यविनायकबाट सोही रुट हुँदै फर्किने बस माइतीघरबाट सिंहदरबार, पुतलीसडक, कमलादी, घण्टाघर, पुरानो बसपार्क, सहिदगेट, त्रिपुरेश्वर, कलंकी हुँदै स्वयम्भू फर्किनेछ । साझाले कोटेश्वरबाट सानोठिमी, पुरानोठिमी, निकोसेरा, सल्लाघारी, भक्तपुर दूधपाटी हुँदै कमलविनायक भएर नयाँ बाटोमार्फत फर्किने गरी रुट मागेको थियो तर, रुट परमिट नपाएको जनाएको छ ।
साझा बस दैनिक बिहान ६ देखि साँझ ९ बजेसम्म सञ्चालन हुनेछन् । यातायात व्यवसायीहरूले भने साझा बस सञ्चालनको विरोध गरिरहेका छन् । सरकारले तोकेको न्यूनतम भाडा दरमा साझा बस सञ्चालन गरिएको कार्यकारी प्रमुख पाण्डेले बताए । ‘सरकारले तोकेको भाडा स्वयम्भूदेखि सूर्यविनायकसम्म अधिकतम २५ रुपैयाँ र नतोकिएको ठाउँमा न्यूनतम १३ रुपैयाँ छ,’ उनले भने ।
साझा यातायातका अनुसार बसमा यात्रुलाई मनोरञ्जनका लागि टीभी र सुरक्षाका लागि सीसीटीभी जडान गरिएको छ । ‘अपांगता भएका व्यक्तिहरूले पनि आरामदायी यात्रा गर्न सक्छन्,’ पाण्डेले भने, ‘एकपटकमा एक सय जनाले यात्रा गर्न सक्छन् ।’ उनका अनुसार प्रत्येक स्टेसनमा १५/१५ मिनेटमा बस पुग्ने व्यवस्था मिलाइएको जनाएको छ । साझाले जिल्लामा बस सञ्चालन गर्न पुरानो र नयाँ बाटो रुटको परमिटका लागि यातायात विभागमा चैत ३० मा निवेदन दिएको थियो । पुरानो बाटोको रुटको अनुमति भने साझाले नपाएको र उपभोक्ताको मागबमोजिम रुट परमिट लिएर सञ्चालन गर्न सकिने जनाएको छ ।
साझा यातायातले भक्तपुरमा साझा बस भित्र्याउनेबित्तिकै सिन्डिकेटको अन्त्य भएको उपभोक्ता हक हित संरक्षण मञ्चका अध्यक्ष ज्योति बानियाँले बताए । उपभोक्ताको सेवाका लागि साझाले सुडालबाट स्वयम्भू, नगरकोट–बसपार्क सम्म बस सञ्चालनका लागि पहल गर्ने समेत उनले बताए । उपत्यकाकै अन्य स्थानमा पनि साझा बसको माग भइरहेको कार्यकारी प्रमुख पाण्डेले बताए ।

प्रकाशित : जेष्ठ ११, २०७४ ०८:४४
ADVERTISEMENT
प्रतिक्रिया
पठाउनुहोस्
ADVERTISEMENT

‘भ्यु टावर’ निर्माण सुरु

दीपेन्द्र विष्ट

काठमाडौं — लामो समयको कानुनी अडचनपछि काठमाडौं महानगरपालिकाले रत्नपार्कस्थित पुरानो बसपार्कमा २९ तले ‘काठमाडौं भ्यु टावर’ निर्माण प्रक्रिया अघि बढाएको छ । निर्माणको जिम्मा पाएको जलेश्वर स्वच्छन्द बिकोई बिल्डर्सले भारत र बंगलादेशबाट दक्ष प्राविधिक तथा कामदार ल्याएर निर्माण सुरु गरेको जनाएको छ ।

पहिलो चरणमा टावरको १२ तला बनाइनेछ । महानगरका सूचना अधिकृत महेश काफ्लेले माटो र पाइल परीक्षणलगायत प्रक्रिया पूरा गरेपछि निर्माण गर्न निर्देशन दिएको बताए । 

भारतीय कम्पनी बालाजी पाइल फाउन्डेसन लिमिटेड र भेलेचा इन्जिनिरियङ लिमिटेड कम्पनीका प्राविधिकले सम्पूर्ण परीक्षण गरिसकेका छन् । ‘भवन निर्माणका लागि पहिलोपटक माटोको प्रेसर परीक्षण गर्न लगाइयो,’ उनले भने, ‘परीक्षण गर्दा उपयुक्त देखियो, निर्माण गर्न भन्यौं ।’ पाँच वर्षअघि निर्माणका लागि ११ वटा कम्पनीले आवेदन दर्ता गराएका थिए । अन्तिम चरणमा तीनवटा पुगेका थिए । निर्माण, सञ्चालन र हस्तान्तरण (बुट) प्रणालीमा टावर निर्माण गर्न महानगरले दुई वर्षअघि निर्माण कम्पनी छनोट गरेको थियो । तर, अख्तियार दुरुपयोग अनुसन्धान आयोगमा उजुरी परेपछि टावर निर्माण अवरुद्ध भएको थियो । अख्तियार र सार्वजनिक लेखा समितिले आवश्यक प्रक्रिया पुर्‍याएर निर्माण गर्न भनेपछि गत वर्ष महानगरले जलेश्वर स्वच्छन्द बिकोई विल्डर्सले अन्तिम सम्झौता गरेको थियो । 

सहरको मुख्य भागमा निर्माण हुने अग्लो व्यावसायिक भवन भएकाले सम्पूर्ण प्राविधिक परीक्षण गर्दा केही ढिलाइ भएको महानगरका प्रवक्ता ज्ञानेन्द्रबहादुर कार्कीले बताए । भ्यु टावरको भूमिगत दुई तलामा पार्किङ, त्यसभन्दा माथि बस, टेम्पो लगायतका सवारी साधन, मोटरसाइकल लगायतका स्टेसन बनाइनेछ । टावरबाट पूरै काठमाडांैको दृश्यावलोकन गर्न सकिनेछ । ‘निर्माण सम्पन्न भएपछि अन्य मुलुकका महानगरमा जस्तै भ्यु टावरले पनि छुट्टै पहिचान दिनेछ, न्युरोड लगायतको ट्राफिक जाम पनि कम हुन्छ,’ उनले भने । न्युरोडसम्म घुम्न र किनमेल गर्न जानेहरूले भ्यु टावरमै गाडी पार्किङको सुविधा पाउने उनले बताए । राजधानीमा पर्यटकीय आकर्षणसमेत बढ्ने विश्वास महानगरको छ ।

टावरलाई व्यापारिक केन्द्रका रूपमा विकसित गरिनेछ । टावरमा प्राचीन कला झल्कने विभिन्न किसिमका डिजाइन निर्माण गर्न लगाइनेछ । टावरमा चारवटा मनोरञ्जन हल, बैंक, अस्पताल, रेस्टुरेन्ट, पुस्तकालयसमेत बनाइनेछ । अत्याधुनिक प्रविधिबाट टावर निर्माण हुने प्रवक्ता कार्कीले बताए । टावरका प्रत्येक तला चौबीसै घण्टा खुला रहनेछन् । पहिलो तीस वर्षसम्म निर्माण कम्पनीले नै टावर सञ्चालन गर्नेछ । त्यसपछि कम्पनीले महानगरलाई टावर हस्तान्तरण गर्नेछ । टावर निर्माण गर्न करिब साढे तीन अर्ब रुपैयाँ लाग्ने अनुमान कम्पनीको छ । जमिनको प्रत्येक वर्ष सत्तरी लाख रुपैयाँ भाडा तिर्नेछ भने त्यो पनि वर्षैपिच्छे दस प्रतिशतका दरले बढ्ने पहिलो चरणको सम्झौता भएको छ । 

  • दुई वर्षभित्र सम्पन्न गरिने 
  • चौबीसै घण्टा खुला रहने 
  • प्रत्येक वर्ष २ करोड ३५ लाख महानगरलाई राजस्व बुझाउने

प्रकाशित : जेष्ठ ११, २०७४ ०८:४४
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT