तराई जलमग्न, ३४ को मृत्यु

कैयौं बेपत्ता, सयौं विस्थापित
कान्तिपुर संवाददाता

अविरल वर्षाका कारण शुक्रबारदेखि आएको बाढीपहिरोमा परी देशका विभिन्न भागमा कम्तीमा ३४ जनाको मृत्यु भएको छ । गृह मन्त्रालयका अनुसार कति बेपत्ता भएका छन् भन्ने यकिन छैन । जिल्ला तहमा प्रशासन, प्रहरी र सुरक्षा निकायले भने यी सबै संख्या पुष्टि गरिसकेका छैनन् । कतिपय जिल्लामा गृहले घोषणा गरेको तथ्यांकभन्दा बढी मृत्यु भएको पाइएको छ ।

सबैभन्दा बढ्ता जनधनको क्षति पूर्वी मधेसका जिल्लामा भएको छ । विभिन्न नदी–खोलामा आएको बाढीका कारण सयौं परिवार विस्थापित बनेका छन् । पहाडी जिल्लामा पहिरोका कारण पुरिएर कतिपयको मृत्यु भएको छ ।

सुनसरीको बूढीखोला र अन्य खोलामा डुबेर ७ जनाको मृत्यु भएको छ । मृत्यु हुनेमा भोजपुर घर भई इटहरी बस्दै आएकी माया राई, ८ वर्षीया छोरी रूपसनी राई, ३ वर्षका छोरा रूपेश राई, इटहरी–४ आइतबारेका ४० वर्षीय ईश्वर सुनुवार, अनिता धिमाल, चन्दा तामाङ र ३० वर्षीया माला राई रहेको प्रहरीले जनाएको छ ।

मोरङको बक्राहा र नुनसरी खोलामा डुबेर दुईजनाको मृत्यु भएको छ । मृत्यु हुनेमा मिक्लाजुङ– २ का ३२ वर्षीय गंगाराम खतिवडा र केराबारी गाउँपालिका–९ का मीनबहादुर थापा रहेको प्रहरीले जनाएको छ । पहिरोले घर पुरिँदा मोरङको लेटाङ नगरपालिका–१ की ४० वर्षीया गोपीमाया तामाङको मृत्यु भएको छ । उनकी ९० वर्षीया सासू टुलकीमाया तामाङ, श्रीमान् ५० वर्षीय टंक र १० वर्षीय छोरालाई भने स्थानीय बासिन्दाले उद्धार गरेका थिए ।

झापामा रतुवा, कमल, बनियानी, झिलझिले, सतासी, कन्काई, विरिङ, अदुवा, देउनिया, निन्दा, मेचीलगायत नदी र खोलामा आएको बाढीले जिल्लाका दर्जनौं गाउँ डुबानमा परेका छन् । सयौं घरपरिवार विस्थापित भएका छन् । खोलाले बगाउँदा जिल्लामा तीन जनाको मृत्यु भएको प्रहरीले पुष्टि गरेको छ । झापा गाउँपालिका–३ की कमला दर्लामी, २ की धनमाया घोर्साने र शिवसताक्षी नगरपालिका–१ का लेखनाथ पाण्डेको मृत्यु भएको हो । गृह मन्त्रालयको घोषणाअनुसार झापाका बाँकी २ जनाको विवरण भने उपलब्ध हुन सकेको छैन ।

कन्काई नदीको बाढीले बगाउँदा झापा गाउँपालिका–२ कै कालीप्रसाद राजवंशीसहित उनको चार जनाको परिवार बेपत्ता छ । दमकस्थित दीपिनी खोलाले बगाउँदा भारत बिहार घर भई हाल दमकमा ज्याला मजदुरी गर्ने २५ वर्षीय कपोस मण्डल बेपत्ता छन् । उनको पनि खोजी भइरहेको दमक प्रहरीले जनाएको छ ।


एकै परिवारका ४ जना परे
सिन्धुली सदरमुकाम सिन्धुलीमाढीमा पहिरोले पुरिएर एकै परिवारका चार जनाको मृत्यु भएको छ । कमलामाई नगरपालिका–६ को २ नं बजारमा जनसेवा पुस्तकालय र पत्रकार महासंघको जग्गामा अस्थायी टहरोमा बसोबास गर्दै आएका एकै परिवारका आमा र तीन छोराछोरीसहित चारको शनिबार बिहान करिब २ बजे खसेको पहिरोमा पुरिएर मृत्यु भएको हो । मृत्यु हुनेमा ३२ वर्षीया आमा दुर्गाकुमारी खड्का, १५ वर्षीया छोरी शोभा खड्का, छोराहरू १० वर्षीय अनिश र ७ वर्षीय मनीष छन् । सुतिरहेका दुर्गाकुमारीका श्रीमान् उदयबहादुर भने भागेर ज्यान जोगाउन सफल भएका छन् ।

बाँकेको राप्तीसोनारी–४ लालपुरमा एकै परिवारका तीन जनाको मृत्यु भएको छ । शुक्रबार राति बाढी पसेर घर भत्किँदा कविराज थारूका छोरीहरू १२ वर्षीया अञ्जु, ९ वर्षीया सरिता र, ७ वर्षीया सुस्मिताको ज्यान गएको हो ।

सर्लाहीमा बाढी पसेर घर भत्किँदा र खोलाले बगाएर दुई जनाको मृत्यु भएको छ । धनकौल गाउँपालिका– १ मानपुरका ७५ वर्षीय किशोरी रायको घरले थिचेर ज्यान गएको हो । त्यस्तै बरहथवा नगरपालिका–१० सीतापुरका १७ वर्षीय राकेशकुमार साहलाई सोती खोलाले बगाएको प्रहरीले जनाएको छ । अपराहन वागमती नदीले बगाएर ल्याएको एक शव फेला परेको छ । मृतकको सनाखत हुन सकेको छैन ।

बारामा बाढीले दुइटा कच्ची घर भत्किँदा दुई जनाको मृत्यु भएको छ । आदर्श कोतवाल गाउँपालिका–९ बलधुसवास्थित वृद्धाश्रमको घर भत्किँदा ७० वर्षीय ब्रहमदेव महतो र सिम्रौनगढ नगरपालिका–८ कचोर्वाका रामविलास पासवानकी ४५ वर्षीया पत्नी गहनीदेवीको मृत्यु भएको हो ।

दाङमा बाढीले बगाउँदा दुई जनाको मृत्यु भएको छ । तुलसीपुर उपमहानगरपालिका–१३ सिमगैरीकी ४८ वर्षीया भगवती सुनार र वडा ४ का ५८ वर्षीय नरबहादुर रावतको मृत्यु भएको हो ।

राप्ती नदीको बाढीले बाँकेको डुडवा गाउँपालिकास्थित बेतहनी पुल भत्काएपछि अलपत्र सर्वसाधारण । थप तस्बिर र समाचार भित्री पृष्ठहरूमा । फोटो फिचर पृष्ठ २२ मा ।तस्बिर : ठाकुरसिंह थारू/कान्तिपुर

कोहलपुर–लमही खण्डअन्तर्गत बाँकेको गुन्दली खोलामा भत्किएको पुल


नवलपरासीको दाउन्नेमा भासिएको सडक

धरान–धनकुटा सडकखण्डको निसान खोलामा भत्किएको सडक


नवलपरासीको प्रतापपुरमा डुबानमा परेको बस्ती


झापाको कन्काई नदीमा आएको बाढी


चितवन माडीको चिते खोलामा बाढीले भत्काएको पुलबाट हिँड्दै स्थानीय,


दाङको बबई नदीमा आएको बाढी


चितवनको माडीमा बाढीले भत्काएको सडकमा हिँड्दै स्थानीय



बाराको निजगढस्थित जमुना पैनीमा आएको बाढीले अवरुद्ध राजमार्ग


बबई नदीमा आएको बाढीले जलमग्न गुलरिया–नेपालगन्ज सडक


विराटनगरको जलमग्न सडकमा एम्बुलेन्स चलाउने प्रयास गरिँदै

चितवनको माडीमा घर डुबानमा परेपछि पीडित परिवार

सिन्धुलीको कमलामाई २ बजारनजिक शनिबार आएको पहिरोले टहरा पुरेपछि उद्धार गरिँदै,

बाराको सिम्रौनगढ कचोर्वामा शनिबार भत्किएको रामविलास पासवानको घर ।

तस्बिरहरू : मनोज पौडेल, लक्ष्मी साह, शिव पुरी, नवीन पौडेल, देवनारायण साह, राजकुमार कार्की/कान्तिपुर

प्रकाशित : श्रावण २९, २०७४ ०६:५९
ADVERTISEMENT
प्रतिक्रिया
पठाउनुहोस्
ADVERTISEMENT

मनसुनी रेखा उत्तरतर्फ बढी सर्दा ‘अस्वाभाविक’ वर्षा

अब्दुल्लाह मियाँ

काठमाडौं — पानी पार्ने न्यून चापीय मनसुनी रेखा नेपालको चुरे पहाडी क्षेत्रसम्मै आएपछि शनिबार देशैभर भीषण वर्षा भएको छ । जल तथा मौसम पूर्वानुमान महाशाखाका मौसमविद् सुवास रिमालले न्यून चापीय रेखा औसतभन्दा बढी उत्तरतिर सरेकाले शुक्रबारदेखि नै देशैभर ‘अस्वाभाविक’ वर्षा भएको बताए ।

‘मनसुन चाहेभन्दा बढी सक्रिय भएको अवस्था हो यो,’ रिमालले शनिबार कान्तिपुरसँग भने, ‘सोमबार बेलुकीसम्म मुलुकका धेरै भागमा भीषण वर्षा हुने देखिन्छ ।’

सामान्यतया दक्षिण (भारतीय क्षेत्र) मा सक्रिय रहने न्यून चापीय रेखा सर्दै शुक्रबार बिहान नेपालको चुरे र पहाडी क्षेत्रसम्मै पुगेपछि भीषण वर्षा सुरु भएको हो । ‘एक्कासि मनसुन सक्रिय भएपछि देशैभर भीषण वर्षा भयो,’ उनले भने, ‘पूर्वी क्षेत्रमा आज (आइतबार) देखि मनसुनी प्रभाव रोकिन्छ ।’ मुलुकको मध्य र पश्चिम भागमा भने सोमबारसम्म मध्यमदेखि भीषण वर्षा हुने महाशाखाको अनुमान छ । 
न्यून चापीय प्रणाली मध्य तथा आसपासका भागमा विद्यमान रहेका कारण मनसुन बिहीबार रातिदेखि एक्कासि सक्रिय भएको महाशाखाद्वारा शनिबार जारी विशेष बुलेटिनमा उल्लेख छ । शनिबार राति पनि मुलुकका विभिन्न भागमा भीषण वर्षा हुने र नदी–जलाधारमा पानीको सतह बढ्ने भएकाले सतर्क रहन विशेषज्ञहरूले सुझाएका छन् । 
‘सोमबारदेखि मनसुनी रेखा दक्षिणतिर सर्दै जानेछ,’ मौसमविद् रिमालले थपे, ‘त्यसपछि नेपालमा मनसुन अलि निष्क्रिय हुनेछ ।’ सामान्यतया जुलाईमा मनसुन सक्रिय भएर बढी वर्षा हुनुपर्नेमा यस पटक त्यस्तो भएन । ‘जुलाईमा बढी पानी पर्नुपर्ने हो,’ काठमाडौं विश्वविद्यालयमा मौसम विज्ञानका अध्यापक मणिरत्न शाक्यले भने, ‘पछिल्ला केही वर्षदेखि अगस्ट तेस्रो सातापछि मनसुन कमजोर बन्दै गएको देखिन्छ ।’ दक्षिण एसियाका मौसमविद्ले यो वर्ष नेपालमा पश्चिममा भन्दा पूर्वी भागमा बढी वर्षा हुने पाँच महिनाअघि नै प्रक्षेपण गरेका थिए । यसपटक मनसुनको अन्त्यतिर बढी वर्षा हुनेसमेत मौसमविद्हरूले अनुमान गरेका थिए । 
भीषण वर्षाका कारण नदी–जलाधारमा पानीको सतह बढ्ने भएकाले सतर्कता अपनाउन जल तथा मौसम विज्ञान विभागको बाढी पूर्वानुमान शाखाले सचेत गराएको छ । शाखाले विशेष बुलेटिन निकालेर पानीको सतह बढेर बस्तीमा पस्न सक्ने भएकाले सतर्क रहन गृह मन्त्रालयअन्तर्गतको राष्ट्रिय आपतकालीन केन्द्र, विभिन्न जिल्लाका प्रशासनलगायतलाई जानकारी गराएको छ । शाखाले शनिबार राति पनि पूर्वी नेपालमा भीषण वर्षा हुने जनाएको छ । शाखाले पूर्वको झापा, इलाम, सुनसरी, मोरङ, सप्तरी, उदयपुर, धनकुटा, मध्यको रौतहट, सर्लाही, पर्सा, बारा, मकवानपुर, चितवन, नवलपरासी, रूपन्देही, कपिलवस्तुलगायत क्षेत्रका जलाधारमा पानीको सतहले खतराको तह पार गर्ने चेतावनी दिएको छ । 
शाखाले पश्चिमको कञ्चनपुर, कैलाली र बर्दियाका चुरे र महाभारतबाट प्रवाह हुने नदीहरूमा पानीको सतह बढ्ने जानकारी दिएको छ । मेची, निन्दा, बिरिङ, कन्काई, पथरी, त्रियुगा, बुढी खोला, वागमती, पूर्वराप्ती, रिउखोला, विनयखोला, अरुण खोला, तिनाउ, वाणगंगा र पश्चिमका मछेली, मोहना, बबईलगायत नदी जलाधारमा आइतबारसम्मै पानीको सतहले खतराको तह पार गर्ने भएकाले सचेत रहन अनुरोध गरिएको छ । 

वर्षामापन केन्द्रै डुब्यो
विराटनगरमा वर्षामापन केन्द्र नै डुबानमा परेको छ । विराटनगर एयरपोर्टस्थित वर्षामापन केन्द्र नै डुबेका कारण उक्त क्षेत्रमा कति पानी परेको छ, मापन गर्न सकिएको छैन । जल तथा मौसम पूर्वानुमान महाशाखाका मौसमविद् रिमालले भने, वर्षामापन केन्द्र नै डुबेपछि वर्षामापन गर्न नसकिएको बताए । ‘विराटनगरमा मापनकेन्द्र नै डुबेपछि वर्षा मापन गर्नै सकिएको छैन,’ रिमालले भने, ‘विराटनगरमा बढी नै वर्षा भएको हाम्रो अनुमान छ ।’ बिहीबार रातिदेखि शुक्रबार बिहानसम्म विराटनगरमा ५७ मिलिमिटर वर्षा भएको थियो । रिमालले शुक्रबार रातिदेखि भीषण वर्षा भएकालेविराटनगरलगायत पूर्वी क्षेत्र डुबानमा परेको बताए ।

प्रकाशित : श्रावण २९, २०७४ ०६:५९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT