पुल छ, सडक छैन

डम्बरसिं राई

जालपा(खोटाङ) — धेरै ठाउँ सडक हुन्छ तर पुल हुँदैन । यहाँ भने पुल भएर पनि सडक छैन । हुर्लुङ–जालपा–ऐसेलुखर्क सडकखण्ड अन्तर्गत माक्पा र जालपाको बीचमा पर्ने रावाखोलामा पुल बने पनि सडकको काम पूरा हुन सकेको छैन ।



स्वीस सरकारको करिब साडे चार करोडको लागतमा सम्पन्न उक्त पुल रुपाकोट मझुवागढी नगरपालिका–१२ जालपा र ऐसेलुखर्क गाउँपालिका–७ माक्पा जोडिएको छ । पुलको वल्लो र पल्लोपट्टी (एप्रोच रोड) सडक नबन्दा पुल उपयोग हुन सकेको छैन । पुल बने पनि सडक अपुरै हुँदा सिधा यातायात सञ्चालन हुन सकेको छैन ।

एप्रोच रोडका लागि स्वीस सरकारको सहयोगमा करिब ८५ लाख रुपैयाँको ठेक्का लागेको स्वीस सम्वद्ध कर्मचारी सुशिल श्रेष्ठले बताए । एप्रोच रोडका लागि करिब एक करोडको इस्टिमेट भए पनि घटाघटको बोलपत्रमा ८५ लाखमा फ्युचर–कुवर जेबी कम्पनीले ठेक्का पारेको श्रेष्ठले बताए । श्रेष्ठका अनुसार आगामी पुस–माघभित्र काम सकिने छ ।

‘यो पुलको एप्रोच रोडका लागि ठेक्का लागि सकेको छ,’ श्रेष्ठले भने, ‘अब पुस–माघभित्रमै काम सकिन्छ ।’

त्यसो त हुर्लङ–जालपा–ऐसेलुखर्क ४० किलोमिटर सडकमध्ये माक्पा–ऐसेलुखर्क करिब साडे छ किलोमिटर सडक पनि अपूरै छ । स्वीस सरकारको सहयोगमा निर्माणाधीन सडक स्वीसले अपूरै छाडेकाले अलपत्र परेको छ । हुर्लङ–जालपा–ऐसेलुखर्कसम्मको ४० किलोमिटर सडकका लागि स्वीस सरकारले करिब ८० करोड रकम विनियोजन गरे पनि करिब ३८ करोड मात्र खर्च भएको छ ।

नेपाल सरकार र स्वीस सरकार बीच सडक निर्माणमा काम नगर्ने सहमतिपछि सडक अलपत्र परेको श्रेष्ठको भनाइ छ । ‘नेपाल सरकार र स्वीस सरकारको सहमति अनुसारै सडकसम्वन्धी कामको फ्रेज आउट भएको हो,’ श्रेष्ठले भने, ‘सडकसम्वन्धी कामको फ्रेजआउट भएकाले काम छोड्नु परेको हो ।’

जिल्लास्थित राजनीतिक दलहरुले स्वीस सरकार र नेपाल सरकारसंग अपूरो सडक पूरा गर्न पटक–पटक अनुरोध गर्दा समेत सुनुवाइ नभएको गुनासो गरेका छन् । ‘अपूरो सडक पूरा गर्न हामीले पटक–पटक स्वीस सरकार र नेपाल सरकारसमक्ष अनुरोध गर्‍यौं,’ कांग्रेस महासमिति सदस्य तथा पूर्व जिविस सभापति विष्णुकुमार राईले भने, ‘हाम्रो अनुरोधप्रति सुनुवाइ भएन । स्वीस विकासप्रति भन्दा पनि आफू अनुकूल काम गर्न चाहँदो रहेछ ।’

पूर्व सांसद टंक राईले भने आफूले थालेको काम सक्न स्वीस सरकारको नैतिक जिम्मेवारी भएको बताए । ‘यो विषयमा स्वीसले नैतिक जिम्मेवारी लिनुपर्ने हुन्छ,’ राईले भने, ‘नैतिकवान दातृ निकायले कहिले पनि त्यसरी काम छोड्न मिल्दैन ।’

हुर्लुङ–जालपा–ऐसेलुखर्क सडक पूरा भएपछि जिल्लामा उत्पादित सामग्री निकासीमा सहयोग पुग्ने छ । यो सडक सोलुखुम्बुसम्म जोडिने भएकाले हलेसी, तुवाचुङजायजुम, रुपाकोट, मझुवागढी, कालिका भगवती, बढेश्वरगुफा, भुलभुले, टेम्के, बराहाताल, जन्तेढुङ्गा हुदै तराईसम्म पर्यटन प्रबद्र्धनमा समेत उपयोगी हुने पूर्व सांसद राईले बताए ।

प्रकाशित : भाद्र २६, २०७४ १३:३४
प्रतिक्रिया
पठाउनुहोस्

एमालेले मधेशमा टाउको उठाउन नसक्ने गरी पराजित हुने निधिको दावी

सन्तोष सिंह

धनुषा — नेपाली कांग्रेसका नेता बिमलेन्द्र निधिले संविधान संशोधनमा असहयोग गरेको एमालेलाई मधेशमा शिर उठाउन नसक्ने गरी पराजित गर्न आह्वान गरेका छन् ।

'संविधान संशोधनमा असहयोग गर्दै मधेश विरोधी पार्टी बनेको एमालेलाई टाउको उठाउन नसक्ने गरी पराजित गर्नुपर्छ', सोमबार जनकपुरमा नेपाली कांग्रेस प्रचार प्रसार समिति मिडिया सेन्टर, धनुसाले आयोजना गरेको पत्रकार सम्मेलनमा उनले भने, ‘अहिले एमाले छटपटाएको अवस्था छ ।'

उनले चिनियाँ अधिारीको सल्लाहमा उतर कोरिया जाने एमाले नेता माधवकुमार नेपालभन्दा मधेशी जनता राष्ट्रवादी भएको उल्लेख गर्दै कुनै दलले मधेसीलाई बिदेशी भने कांग्रेसलाई स्वीकार्य नहुने बताए ।

नेकपा एमालेका अध्यक्ष केपी शर्मा ओली चीनमा गएर नेपालमा संघियता आवश्यक नरहेको र नेपालको परराष्ट्र नीति बिपरित एमाले नेता माधव कुमार नेपाल उतर कोरिया गएर गलत गरेको निधिले टिप्पणी थियो ।

कांग्रेसको पहलमा जनकपुरलाई भारतसंग जोड्ने जटही–जनकपुर–ढल्केवर ६ लेन व्यापारिक मार्गसहित भारतको पिपरौनमा नाका खोल्ने कार्य भइरहेको पनि निधिले जानकारी गराए । जनकपुरका व्यापारीलाई कांग्रेसकै पहलमा भिठ्ठामोड र जयनगर गएर भन्सार बुझाउने झन्झटबाट मुक्त गराएको पनि उनको दावी थियो ।

नेपाली कांग्रेसको सक्रियतामा जटही नाका खोलेर भारतमा पिपरौन भन्सार, जटही–जनकपुर–ढल्केवर ६ लेन व्यापारी मार्ग, मधेशको लाइफ लाइनको रुपमा रहेको पूर्व–पश्चिम हुलाकी राजमार्ग खण्डको सप्तरीदेखि पर्सासम्म जोड्ने दुई लेन सडक टेण्डरलगाएर मधेशको विकासमा भुमिका निर्वाह गरेको पनि उल्लेख गरे ।

कांग्रेसको तर्फबाट जनकपुर उपमहानगरपालिकाका मेयरका उम्मेदवार मनोज साह र उपमेयर उम्मेदवार निलम कर्णलाई विजय गराए जनकपुर उपमहानगरपालिका महानगरमा परिणत हुने, धार्मिक नगरी र व्यापारको केन्द्र बन्ने उनले मतदातालाई लोभ देखाए ।

संविधानका कारण मधेशमा बढेको असंतुष्टी सम्बोधन गर्न कांग्रेसले संशोधनका लागि प्रयास गरेपनि एमालेको अवरोधका कारण हुन नसकेको उल्लेख गर्दै निधिले मधेश र मधेसीको भावना कांग्रेसले मात्र समेट्न सक्ने उल्लेख गरे ।

प्रकाशित : भाद्र २६, २०७४ १३:३४
पूरा पढ्नुहोस्
प्रतिक्रिया
पठाउनुहोस्