भोट माग्न गाउँमा

कान्तिपुर संवाददाता

मुगु — कांग्रेसले जिल्लामा चुनावी अभियान सुरु गरेको छ । सिफारिस सूची केन्द्रमा पठाइएसँगै सम्भावित उम्मेदवारहरू भोट माग्न खत्याड गाउँपालिकातर्फ गएका छन् । उनीहरू घरदैलो, भेटघाट र गाउँभेलाजस्ता कार्यक्रम गर्दै छन् ।

जिल्लाबाट प्रतिनिधिसभामा सिफारिस गरिएका हस्तबहादुर मल्ल, प्रदेश सभाका लागि क्षेत्र नं. २ मा सिफारिसमा परेका खड्गबहादुर शाहीलगायतको टोली खत्याडमा खटिएको छ । टोलीले गाउँपालिकाको माझचौर, रातापानीमा, श्रीकोटलगायत स्थानमा चुनावी सभा आयोजना गरेको छ ।

‘प्रत्येक घरदैलो पुगेर भोट माग्न सुरु गरेका छौं,’ मल्लले भने, ‘खेतीपातीको समय भएकाले भोट माग्न खेतबारीमै जानुपरेको छ ।’ क्षेत्र नम्बर १ बाट सिफारिसमा परेका तिलकबहादुर मल्लले पनि मतदातासँग भेटघाट बढाएको जनाएका छन् । बिहीबारदेखि रोवामा घरदैलो गरिने उनले बताए । एमाले र माओवादीबाट सिफारिसमा परेकाहरू भने टिकट आफ्नो पक्षमा पार्न राजधानीतिर लागेका छन् ।

माओवादीबाट एमालेमा
म्याग्दीमा माओवादी केन्द्रका केन्द्रीय सदस्य कुलवीर राम्जाली, जिल्ला सदस्य बुद्धि पुनलगायत नेता एमाले प्रवेश गरेका छन् । अन्नपूर्ण गाउँपालिका–६ पोखरेबगरमा बुधबार आयोजित कार्यक्रममा एमाले केन्द्रीय सदस्य भूपेन्द्रबहादुर थापाले उनीहरूलाई टीका लगाइदिई एमालेमा भित्र्याए । एमालेबाट छुट्टिएको माले हुँदै माओवादीमा पुगेका राम्जाली पुन: एमाले फर्किएका हुन् ।

प्रकाशित : आश्विन २६, २०७४ ०७:४३
प्रतिक्रिया
पठाउनुहोस्

‘वाम गठबन्धनले कांग्रेसलाई फाइदा’

कान्तिपुर संवाददाता

काभ्रे — रक्षामन्त्री भीमसेनदास प्रधानले वाम गठबन्धन कांग्रेसका लागि सुवर्ण अवसर भएको बताएका छन् ।

 

नेपाल प्रेस युनियनद्वारा बुधबार धुलिखेलमा आयोजित ‘वर्तमान राजनीतिक अवस्था, संविधान कार्यान्वयन र सञ्चार क्षेत्रको भूमिका’ विषयक अन्तरक्रियामा उनले गठबन्धनले सरकार बनाउन सहयोग गरे पनि ती पार्टीको संगठनका लागि त्यो घातक भएको तर्क गरे । ‘६०/४० को भागबन्डाका कारण दुई दलमा विवाद सुरु हुन्छ,’ उनले भने, ‘त्यसले कांग्रेसलाई नै फाइदा पुग्ने हो ।’ 

युद्धबाट सत्ता कब्जा सफल नभएपछि माओवादी एमालेसँग मिलेर साम्यवाद लाद्ने सोचमा लागेको प्रधानले आरोप लगाए । एमाले अध्यक्ष केपी ओलीको बोली जनताले नरुचाएको भन्दै उनले जिम्मेवार व्यक्ति अखिल क्रान्तिकारीको नेताजस्तो देखिएको तर्क गरे । ‘पुष्पकमल दाहाल एमालेमा छिर्नु एमालेमा धमिरा लाग्नु हो,’ उनले भने, ‘दुवैको मिलन देखावटी मात्रै हो ।’ 

सञ्चार राज्यमन्त्री तप्तबहादुर विष्टले वाम गठबन्धन सरकारका लागि नभई साम्यवाद लाद्नलाई भएको दाबी गरे । 

‘बहुमत ल्याई संविधान र निर्वाचन प्रणाली फेरेर तानाशाह लाद्ने खेलमा लागेका छन्,’ उनले भने, ‘लोकतन्त्र कमजोर भए पहिलो निसानामा सञ्चार क्षेत्र पर्ने भएकाले सचेत रहन आवश्यक छ ।’

प्रकाशित : आश्विन २६, २०७४ ०७:४३
पूरा पढ्नुहोस्
प्रतिक्रिया
पठाउनुहोस्