आक्रमणको अनुसन्धान जारी : देउवा

कान्तिपुर संवाददाता

नेपालगन्ज — प्रधानमन्त्री शेरबहादुर देउवाले प्रतिनिधिसभा तथा प्रदेशसभा निर्वाचन प्रचारका क्रममा उम्मेदवारमाथि भएका आक्रमण घटनाको अनुसन्धान भइरहेको बताएका छन् । त्यस्ता घटना हुन नदिन सुरक्षा अधिकारीलाई निर्देशन दिएको उनले बताए ।

नेपालगन्जमा भएको सुरक्षा भेलालाई सम्बोधन गर्दै उनले मंसिर १० र २१ मा हुन लागेको निर्वाचन भयरहित र शान्तिपूर्ण रूपमा सम्पन्न गर्न कडा सुरक्षा व्यवस्था मिलाइएको बताए । देउवाले सुरक्षा व्यवस्था चुस्त पार्न पनि निर्देशन दिएका छन् ।

उनले सीमित स्रोत र साधनको उपयोग गर्दै निर्वाचन सुरक्षामा लाग्न सुरक्षा अधिकारीसँग आग्रह गरे ।

प्रकाशित : कार्तिक २९, २०७४ ०७:०७
प्रतिक्रिया
पठाउनुहोस्

प्रदेश ३ का २४७ मतदानस्थल ‘अति संवेदनशील’

कान्तिपुर संवाददाता

हेटौंडा — सुरक्षा निकायले प्रदेश ३ का १० जिल्लामा २ सय ४७ मतदानस्थललाई अति संवेदनशील सूचीमा राखेको छ । प्रदेश ३ का प्रहरी प्रमुख अतिरिक्त महानिरीक्षक केशरीराज घिमिरेले भौगोलिक विकटता, विगतमा भएको चुनावी झडप र माओवादीको विप्लव समूहको हिंसात्मक गतिविधिका कारण ती मतदानस्थललाई अति संवेदनशील सूचीमा राखिएको जानकारी दिए ।

यस्तै, सुरक्षा निकायले ३ सय ८७ मतदानस्थललाई संवेदनशीलमा राखेको छ ।
 
३ प्रदेशका १० जिल्लामा १ हजार २ सय ५१ मतदानस्थल छन् भने मतदान केन्द्र २ हजार ५ सय ६८ छन् । ‘अति संवेदनशीलको सुरक्षाका लागि फरक ढंगले व्यवस्था गरेका छौं,’ घिमिरेले भने, ‘थ्रेटका आधारमा सुरक्षा प्रबन्ध मिलाएका छौं ।’ प्रदेश ३ को मतदानस्थलको सुरक्षाका लागि ९ हजार ५ सय प्रहरी र १२ हजार ५ सय म्यादी गरी २२ हजार सुरक्षाकर्मी खटाइने जनाइएको छ । यस्तै, सुरक्षाका लागि सशस्त्र बल र नेपाली सेना पनि रहनेछ । मतदानस्थलको पहिलो घेरामा नेपाल प्रहरी, दोस्रोमा सशस्त्र र तेस्रो अर्थात् बाहिरी घेरामा नेपाली सेना रहने व्यवस्था छ । 

३ नम्बर प्रदेशमा १८ प्रतिनिधिसभा र ३६ प्रदेशसभा सदस्यका लागि निर्वाचन हुँदै छ । १० जिल्लामध्ये ६ जिल्लामा मंसिर १० मा र ४ जिल्लामा मंसिर २१ मा चुनाव हुनेछ । 

प्रकाशित : कार्तिक २९, २०७४ ०७:०७
पूरा पढ्नुहोस्
प्रतिक्रिया
पठाउनुहोस्