२१ पदमा १५५ उम्मेदवार भिड्दै

पहिलो चरणको चुनाव
१४ मध्ये ७ जिल्लामा मतदान हुँदै
१४२ मतदानस्थल ‘अति संवेदनशील’
करिब ४० हजार सुरक्षाकर्मी परिचालन
देवनारायण साह

मोरङ — प्रदेश १ का ७ जिल्लामा आइतबार पहिलो चरणमा हुने चुनावको तयारी पूरा भएको छ । ताप्लेजुङ, पाँचथर, संखुवासभा, भोजपुर, खोटाङ, ओखलढुंगा र सोलुखुम्बुमा प्रतिनिधि र प्रदेशसभा सदस्यका लागि मतदान हुँदै छ ।

शुक्रबार पूर्वका मतदानस्थलबाट मतदाता परिचयपत्र वितरण गरिएको छ । शनिबार पनि यो क्रम जारी थियो । ७ जिल्लाको ६ सय ९६ मतदान स्थलस्थित १ हजार २५ केन्द्रमा ८ हजार ९६ कर्मचारी खटिएका छन् । सातै जिल्लाका ७ लाख १९ हजार ३ सय १ मतदाताले प्रत्यक्ष निर्वाचनबाट प्रतिनिधिसभा सदस्यका लागि ७ र प्रदेशसभा सदस्यका लागि १४ जना छनोटका लागि आइतबार (आज) मतदान गर्नेछन् । सातै जिल्लामा प्रतिनिधिसभा सदस्यका लागि ६२ र प्रदेशसभा सदस्यका लागि ९३ गरी १ सय ५५ उम्मेदवार प्रतिस्पर्धामा छन् । 
१ नम्बर प्रदेशमा प्रतिनिधि र प्रदेशसभा चुनाव सुरक्षाका लागि सशस्त्र, नेपाल र म्यादी प्रहरी गरी ३९ हजार ८ सय बढी सुरक्षाकर्मी परिचालन गरिएको छ । सुरक्षाका दृष्टिकोणले १ सय ४२ अति संवेदनशील, २ सय ७२ संवेदनशील एवं २ सय ८२ मतदानस्थललाई सामान्य मानिएको प्रहरीले जनाएको छ ।
प्रदेश १ का १४ जिल्लामध्ये पहिलो चरणमा हिमाली र उच्च पहाडी गरी ७ जिल्लामा आइतबार हुने चुनावमा सशस्त्र, नेपाल र म्यादी प्रहरी गरी १३ हजार ३ सय बढी सुरक्षाकर्मी परिचालन गरिएको छ । सशस्त्र प्रहरी पूर्वक्षेत्रीय मुख्यालय बराह बाहिनी पकलीका प्रमुख प्रहरी नायब महानिरीक्षक जानकीराज भट्टराईले पहिलो चरण चुनावमा करिब ३ हजार सशस्त्र प्रहरी खटिएको जानकारी दिए ।
प्रदेश १ का प्रहरी अतिरिक्त महानिरीक्षक पशुपति उपाध्ययले सुरक्षाका लागि ५ हजार बढी नेपाल प्रहरी र ५ हजार ३ सय म्यादी प्रहरी परिचलन गरिएको बताए । उनले विगतमा जस्तै यसपटकको चुनावमा पनि जिल्ला सुरक्षा योजनाअनुसार ती जिल्लाको सुरक्षा व्यवस्था मिलाइएको सुनाए । उनले पहिलो चरणमा निर्वाचन हुने हिमाली जिल्लामा भौगोलिक विकटता बढी भएकाले सोहीअनुसार सुरक्षा व्यवस्था मिलाइएको बताए । उपाध्ययले भने, ‘ताप्लेजुङ र सोलुखुम्बुका धेरै मतदान केन्द्र र स्थलमा भौगोलिक विकटता छ, त्यस्ता स्थानमा अन्य सुरक्षा निकायको समन्वयमा सुरक्षाको प्रबन्ध मिलाएका छौं ।’ 
उनले पहिलो चरणमा चुनाव हुने हिमाली एवं पहाडी जिल्लासँग जोडिएका स्थान र विगतका अपराध भएका ठाउँका मतदान केन्द्रलाई संवदेनशीलमा राखिएको बताए । एउटा मतदानस्थलमा कम्तिमा २० देखि ४९ सम्म जनपथ र आवश्यकताअनुसार म्यादी प्रहरी परिचालन गर्ने योजना छ । त्यसमा प्रहरीकै मोबाइल टोली, सशस्त्रको टोली र सेनाको संयुक्त टोलीसमेत परिचालन गरिनेछ ।
सुरक्षाको दृष्टिकोणले ताप्लेजुङमा अतिसंवेदनशील २२, संवेदनशील २० र सामान्य ३१, पाँचथरमा अतिसंवेदनशील २०, संवेदनशील ६६ र सामान्य १४, संखुवासभामा अतिसंवेदनशील ३४, संवेदनशील ५७ र सामान्य १२ मतदानस्थल छन् । भोजपुरमा अतिसंवेदनशील १७, संवेदनशील २४ र सामान्य ४६, सोलुखुम्बुमा अतिसंवेदनशील २०, संवेदनशील ४४ र सामान्य ५४, ओखलढुंगामा अतिसंवेदनशील १, संवेदनशील ८ र सामान्य ६९ र खोटाङमा अतिसंवेदनशील २८, संवेदनशील ५३ र ५५ को सामान्य अवस्था रहेको १ नम्बर प्रदेश प्रहरी कार्यालयले जनाएको छ । ताप्लेजुङमा ७४ मतदानस्थल र १ सय १४ मतदान केन्द्र छन् । त्यहाँ ७८ हजार ३ सय ९७ मतदाता छन् । जिल्लाभर मतदान अधिकृत, सहायक अधिकृतलगायत गरी ९ सय २ कर्मचारी खटिएको जिल्ला निर्वाचन कार्यालय ताप्लेजुङले जनाएको छ । प्रतिनिधिसभा सदस्यका लागि ८ र प्रदेशसभा सदस्यका लागि १५ उम्मेदवार प्रतिस्पर्धामा छन् । 
पाँचथरमा सय मतदान स्थल र १ सय ६५ केन्द्र छन् । १३ सय १७ कर्मचारी खटाइएको निर्वाचन कार्यालयले जनाएको छ । उक्त जिल्लामा १ लाख २५ हजार २ सय १९ मतदाता छन् । प्रतिनिधिसभा सदस्यका लागि ९ र प्रदेशसभा सदस्यका लागि १६ जना चुनावी प्रतिस्पर्धामा छन् । यस्तै, संखुवासभाका १ सय ३ मतदानस्थल र १ सय ५३ केन्द्रमा १ हजार २ सय १६ कर्मचारी खटिएका छन् । १ लाख ५ हजार ८५ मतदाता रहेको यो जिल्लामा प्रतिनिधिसभामा ११ र प्रदेशसभामा १६ उम्मेदवार प्रतिस्पर्धामा छन् । ८७ मतदानस्थल, १ सय ४८ केन्द्र र १ लाख १३ हजार ७ सय ४५ मतदाता रहेको भोजपुरमा चुनाव सम्पन्न गराउन ११ सय ८४ कर्मचारी खटिएका छन् । जिल्लामा प्रतिनिधिसभामा ८ र प्रदेशसभामा १३ उम्मेदवार प्रतिस्पर्धामा छन् । यस्तै खोटाङमा १ सय ३६ मतदानस्थल र १ सय ७९ केन्द्र कायम गरिएको छ । यसका लागि १४ सय ३२ कर्मचारी खटिएका छन् । जिल्लामा १ लाख २५ हजार १ सय ८३ मतदाता छन् । प्रतिनिधिसभामा १० र प्रदेशसभामा ९ उम्मेदवार छन् । ७८ मतदानस्थल, १ सय ४१ केन्द्र रहेको ओखलढुंगामा ११ सय २७ कर्मचारी खटिएका छन् । १ लाख २ हजार २ सय ५० मतदाता रहेको यो जिल्लामा प्रतिनिधिसभामा ९ र प्रदेशसभामा ११ जना उम्मेदवार प्रतिस्पर्धामा छन् । यसैगरी सोलुखुम्बुमा १ सय १८ मतदानस्थल र १ सय २५ केन्द्र छन् । ९ सय १८ कर्मचारीले त्यहाँ चुनाव सम्पन्न गराउनेछन् । ६९ हजार ४ सय २२ मतदाता छन् ।
नेकपाका १११ पक्राउ
चुनाव बिथोल्ने गतिविधिमा संलग्न भएको आशंकामा प्रहरीले शुक्रबारसम्म १ सय ११ जनालाई नियन्त्रणमा लिएको जनाएको छ । सबभन्दा बढी मोरङमा १९ र कम खोटाङमा २ जनालाई नियन्त्रणमा लिइएको १ नम्बर प्रदेश प्रहरी कार्यालय विराटनगरले जनाएको छ । कार्यालयका अनुसार चुनाव बिथोल्ने कार्यमा उनीहरू संलग्न रहेको आशंकामा नियन्त्रणमा लिएको हो । एक नम्बर प्रदेशका भोजपुर, इलाम, सुनसरी, धनकुटाबाट उनीहरूलाई नियन्त्रणमा लिएको प्रहरीले जनाएको छ ।

प्रकाशित : मंसिर १०, २०७४ ०७:५२
प्रतिक्रिया
पठाउनुहोस्

अख्तियारद्वारा छानबिन

कान्तिपुर संवाददाता

इटहरी — कोटेसनमार्फत इटहरी उपमहानगरपालिकाले सीएफएल बल्ब र होल्डर बजार मूल्यभन्दा बढीमा खरिद गरेको सार्वजनिक भएपछि अख्तियार दुरुपयोग अनुसन्धान आयोगले छानबिन सुरु गरेको छ । उपमहानगरले बल्ब र होल्डर ९३ लाखमा खरिद गरेको थियो ।


शुक्रबार बसेको कार्यपालिकाको बैठकले पनि दुई साताभित्र प्रतिवेदन पेस गर्ने गरी उपमहानगरको लेखा समिति संयोजक दीपक गौतमको संयोजकत्वमा छानबिन समिति बनाएको छ । नगर प्रमुख द्वारिकलाल चौधरीले बल्ब खरिदको टेन्डर प्रक्रिया सुरु भएपछि तत्कालका लागि आवश्यक बल्बको आपूर्तिका लागि कोटेसनमार्फत भएको र भुक्तानीबारे आफूलाई जानकारी नभएको बताए ।
तत्कालीन कार्यकारी अधिकृत सागर मिश्र र स्टोर किपरले तत्कालको माग पूर्ति गर्न कोटेसनपछि खरिद गरिएको बल्ब बजार मूल्यभन्दा केही महँगो देखिएको चौधरीले बताए । चौधरीले कर्मचारी र केही व्यापारी मिलेर अनियमितता गरेको आशंका जनाए ।

प्रकाशित : मंसिर १०, २०७४ ०७:५२
पूरा पढ्नुहोस्
प्रतिक्रिया
पठाउनुहोस्