समाचारले बन्यो घर, बेलायतका नेपालीद्वारा वाढी पीडितलाई घर

पर्वत पोर्तेल

वुद्धशान्ति (झापा) — गत साउन अन्तिमको वाढीवाट श्रीमती र छोरी गुमाउनुका साथै घर वगाएको पीडा भुल्न सकेका छैनन् झापा सिमलबारी ३ का टेकबहादुर दर्नालले । उनको पीडामा थोरै भएपनि मल्हम लगाइदिएको छ वेलायतको क्याट्रिकमा बसोबास गर्ने नेपालीहरुको साझा संगठन ब्रिटिश गोरखा नेपलिज कम्युनिटीले ।

वाढीवाट श्रीमती र नावालिका छोरीसहित घर गुमाएको खवर कान्तिपुर दैनिक र ईकान्तिपुरले ‘श्रीमती र छोरी गुमाएँ, घर बगायो’ शीर्षकमा प्रकाशित गरेको थियो । उक्त समाचार पढेर वेलायतका नेपालीहरुले विकको घर वनाइदिने योजना बुनेका हुन् । ‘समाचार पढेपछि गह भरिएर आयो’, वेलायतको व्रिटिस गोर्खा र नेपाली कम्युनिटीका सदस्य ज्ञानेन्द्र आलेले भने,‘विकको घर वनाउन सहयोग गर्ने योजना बन्यो ।’ खासगरी वेलायतका नेपालीहरुले नेपालमा हुने वाढी, पहिरो, भुकम्प जस्ता विपत्तीमा परेका नेपालीहरुलाई सहयोग गर्दै आएको छ ।

व्रिटिस गोर्खा र नेपाली कम्युनिटीले उपलव्ध गराएको अढाई लाख रुपैयाँको लागतमा विकका लागि झापा वुद्ध शान्ति गाउँपालिका ३ किनारा वस्तीमा तीन कोठे पक्की घर निर्माण गरिएको छ । नवनिर्मित घर व्रिटिस गोर्खा र नेपाली कम्युनिटीका सदस्य चूणा लिम्वुले विहीवार वाढी पीडित विकलाई हस्तान्तरण गरे । नयाँ घर पाएपछि विक खुसीले गदगद भएका थिए । नयाँ घर पाएपछि विकले हर्ष व्यक्त गरे,‘घर वनाइदिन सहयोग गर्ने वेलायतका सवै नेपालीहरुप्रति ऋणि छु ।’ विकको घर निर्माणमा वुद्धशान्ति ३ का स्थानीय प्रेम ल्वागुन नि:स्वार्थ रुपमा खटेका थिए । ‘सवैको सहयोगवाट विकले नयाँ घर पाएका हुन्’, घर निर्माणमा अहोरात्र खटेका ल्वागुनले भने,‘सवैको साथ र सहयोगवाटै यो सम्भव भएको हो ।’

नेपाली भाषा संस्कृतिको जगेर्ना र आपसी सद्भाव कायम गर्ने उद्देश्य राखेर स्थापित कम्युनिटीले बाढी पीडितलाई सहयोग गर्न ज्ञानेन्द्र आलेको संयोजकत्वमा समिति वनाएको थियो । सोही समितिको सक्रियतामा रकम जुटाइएको हो ।

कम्युनिटीले चितवनस्थित राप्ति नगरपालिका १३ की ६० वर्षीय मैया माया चेपाङको समेत घर निर्माण गरिरहेको छ । कम्युनिटीका अध्यक्ष रामबहादुर मल्लले झापाका वाढी पीडित विक र चितवनकी मैयामाया चेपाङलाई अढाई /अढाई लाख रुपैयाँ उपलव्ध गर्ने निर्णय भएको जनाए । कम्युनिटीले यसअघि भूकम्प पीडितका लागि करिब ३० लाख नेपाली रुपैयाँ बराबरको सहयोग हस्तान्तरण गरेको थियो ।

यसैवीच जर्मनीमा वसोवास गर्ने सुरज सुनार घतानीले समेत वाढी पीडित विकलाई नगद ३० हजार रुपैयाँ सहयोग गरेका छन् । उक्त रकम कलाकारद्धय विल्सन विक्रम राई र राजेश घतानीले विकलाई हस्तान्तरण गरेका छन् । सुनचाँदी व्यवसायी संघ झापाका अध्यक्ष राजु घमलाले समेत पीडित विकलाई १५ हजार प्रदान गरेका थिए ।

प्रकाशित : मंसिर १५, २०७४ २०:५०
प्रतिक्रिया
पठाउनुहोस्

महेशलाई ‘नेपालगन्ज स्पोर्ट्स’ सम्मान

कान्तिपुर संवाददाता

काठमाडौं — राष्ट्रिय क्रिकेट टोलीका विकेटकिपर/ब्याट्सम्यान महेश क्षेत्रीलाई शुक्रबार ‘नेपालगन्ज स्पोर्ट्स’ बाट सम्मानित गरिएको छ । उनलाई सम्मानस्वरुप शुक्रबार राजधानीमा सुजुकी स्विस स्कुटर प्रदान गरियो ।

क्रियटिभ ह्यान्डसले नेपालगन्जमा जन्मिएर नेपाली क्रिकेटको विकासमा योगदान दिएको भन्दै सम्मान गरेको हो । ६ वर्षअघि यस संस्थाले नेपालगन्जकै अर्का क्रिकेटर नेरी थापामगरलाई स्कुटरसहित सम्मान गरेको थियो ।

यूएईमा सन् २००२ मा भएको एसीसी यू–१५ देखि महेशले अन्तर्राष्ट्रिय क्रिकेट प्रतियोगिता खेल्दै आएका छन् । नेपालमा २००५ मा भएको एसीसी यू–१९ खेलेका उनले त्यसपछि २००६ र २००८ मा गरी दुईपल्ट आईसीसी यू–१९ विश्वकप खेले । २००६ मा मलेसियामा भएको एसीसी ट्रफीबाट ‘डेब्यू’ गरेका महेश हाल भने नेपाली टोलीमा छैनन् । सन् २०१५ मा स्कटल्यान्डमा उनले स्कटल्यान्डविरूद्ध विश्व क्रिकेट लिग च्याम्पियनसिपमा पछिल्लोपल्ट नेपाली टोलीबाट खेलेका थिए ।

महेशले आफूले खेलजीवनको सबैभन्दा ठूलो सम्मान पाएको बताए । उनले भने, ‘खेलजीवनमा मैले ठूलो संघर्ष गरेको छु । निकै दु:ख पाएँ तर आज सम्मानित हुँदा निकै उर्जा प्राप्त भएको छ । देशका लागि अझै मिहिनेत गर्नेछु ।’

राष्ट्रिय खेलकुद परिषदा सदस्यसचिव केशवकुमार विष्ट, सशस्त्र प्रहरी बलका पुर्व महानिरिक्षक शैलेन्द्र श्रेष्ठ, नेपाली सेनाका महासेनानी तथा पुर्व राष्ट्रिय भलिबल खेलाडी मीनध्वज खडा, क्रियटिभ ह्यान्डसका अध्यक्ष टीएस ठकुरी, राष्ट्रिय तथा अन्तराष्ट्रिय खेलाडी संघका अध्यक्ष दीपक श्रेष्ठ, मध्यपश्चिम क्षेत्रीय खेलकुद विकास समिती कोषाध्यक्ष मेनुका पछाईलगायतले सम्मान गरे ।

नेपालगन्जबाट क्रिकेट करिअर सुरु गरेका महेशले बाँके, मध्यपश्चिमको कप्तान भएर घरेलु प्रतियोगितामा खेलेका थिए । हाल उनी त्रिभुवन आर्मी क्लबबाट खेल्छन् । मध्य तथा सुदूरपश्चिम क्षेत्रबाट खेल करिअर सुरु गरेर राष्ट्रिय तथा अन्तराष्ट्रिय स्तरमा महत्त्वपूर्ण सफलता पाएका खेलाडीलाई क्रियटिभ ह्यान्डसले सम्मान दिँदै आएको छ ।

क्रियटिभ हयान्डसले नेपालगन्जमा म्याराथन, अन्तर्राष्ट्रिय फिल्म फेस्टिबल गर्दै आएको छ । संस्थाले प्रधानमन्त्री कप राष्ट्रिय महिला भलिबल प्रतियोगितामा मुख्य प्रायोजकको रूपमा सहयोगसमेत गर्दै आएको छ ।

प्रकाशित : मंसिर १५, २०७४ २०:३०
पूरा पढ्नुहोस्
प्रतिक्रिया
पठाउनुहोस्