‘मेडिकल हब’ बनाउने साझा एजेन्डा

देवनारायण साह

मोरङ — प्रतिनिधि र प्रदेशसभा चुनाव नजिकिँदै जाँदा यहाँका उम्मेदवारहरू विराटनगरलाई ‘मेडिकल हब’ बनाउने मुख्य नारासहित घरदैलो गरिरहेका छन् । उम्मेदवारहरूले सरकारी स्तरबाटै स्वास्थ्य उपचारमा हालसम्म उपलब्ध सेवा सुविधा विराटनगरमै उपलब्ध गराउने प्रतिबद्धता गर्दै मतदाता फकाउन मदतातासमक्ष पुगेका छन् ।


वर्षौंदेखि अव्यवस्थित तथा जनशक्ति र प्रविधि अभावमा थलिँदै गएको कोसी अञ्चल अस्पताललाई शिक्षण अस्पताल बनाउने यहाँका सबै दल र उम्मेदवारको प्रतिबद्धता छ । पूर्वाञ्चल विश्वविद्यालयको सुन्दरहरैंचा नगरपालिकास्थित ८ सय ५० बिघा जमिन उपयोग गरी मेडिकल कलेज सञ्चालन गर्ने पनि सबैले चुनावी नारा बनाएका छन् । प्रदेश २ को धनुषा, सिरहा, सप्तरी र प्रदेश १ का बिरामीलाई रेफरल सेन्टरका रूपमा विराटनगरको स्वास्थ्य संस्थाहरू छन् । यहाँ नोबेल र विराट मेडिकल कलेज, रानीस्थित आँखा अस्पतालमा एमडी अध्ययन गर्ने सुविधा छ ।
विराटनगरमा निजीस्तरबाट सञ्चालन भइरहेका स्वास्थ्य संस्थाहरूमा स्वास्थ्योउपचारका साथै मेडिकल अध्ययनका लागि विदेशीसमेत आउन थालेका छन् । यस्तै, यहाँका न्यूरो, गोल्डेन, म्याक्स इन्टरनेसनल एन्ड ट्रमा सेन्टरलगायत दर्जन बढी सुविधा सम्पन्न निजी अस्पतालहरू सञ्चालनमा भए पनि सरकारी स्तरबाट अहिलेसम्म केही हुन सकेको छैन । भएको अञ्चल अस्पताल पनि थलिएको अवस्थामा छ । विराटनगरसँग जोडिएको क्षेत्र ४, ५ र ६ का कांग्रेस, वाम गठबन्धन र मधेसवादी दलका उम्मेदवारहरूले अहिले जोडतोड साथ मेडिकल हबको नारा दिइरहेका छन् ।
क्षेत्र ६ का कांग्रेसबाट प्रतिनिधिसभा उम्मेदवार शेखर कोइरालाले कोशी अञ्चल अस्पताललाई शिक्षण अस्पताल बनाउने र पूर्वाञ्चल विश्वविद्यालयको मेडिल कलेज तत्काल सञ्चालन गर्ने चुनावी एजेन्डा बनाएका छन् । उनीका प्रतिस्पर्धी एमालेका लालबाबु पण्डितले उक्त नाराका साथै विपन्न, गरिबलाई स्वास्थ्य सेवाको पहुँचमा ल्याउने मतदातासँग प्रतिबद्धता जनाएका छन् ।
यस्तै, क्षेत्र ४ का कांग्रेसबाट प्रतिनिधिसभा उम्मेदवार महेश आचार्यले विराटनगरलाई मेडिकल हब बनाउन आफूले कुनै कसर बाँकी नराख्ने प्रतिबद्धता जनाइरहेका छन् । मेडिकल हबको फाइदा अब चाँडै यहाँका जनताले पाउने उनले विश्वास दिलाइरहेका छन् । उनीसँग चुनावी प्रतिस्पर्धामा रहेका वामगठबन्धनका अमनलाल मोदीले सरकारी स्तरबाट विराटनगरलाई मेडिकल हब बनाएर तल्लो तहका सर्वसाधारणलाई स्वास्थ्यसम्बन्धी हरेक सुविधा उपलब्ध गराउने चुनावी नारा बनाएका छन् ।
यस्तै, क्षेत्र ५ का कांग्रेसबाट प्रतिनिधिसभा उम्मेदवार अमृत अर्याल, वामगठबन्धनका शिवकुमार मण्डल र संघीय समाजवादीका राजकुमार यादवको पनि चुनावी नारा पनि मेडिकल हब बनेको छ । क्षेत्र ३ का कांग्रेसबाट प्रतिनिधिसभा उम्मेदवार सुनील शर्मा तथा उनका प्रतिस्पर्धी वामगठबन्धनका भानुभक्त ढकालले पनि यही नारालाई अघि सारेका छन् ।
मतदाताको चित्त दुखाइ
मोरङ बाहुनीका मतदाताले प्रत्येक चुनावमा नयाँ उम्मेदवारलाई भोट हालेर जिताउँदै आएका छन् । जितेपछि नेताहरूले अर्कै क्षेत्र रोजेपछि त्यहाँका मतदातालाई हेरिदिने कोही भएनन् । त्यही भएर गाउँलेले प्रतिनिधि र प्रदेशसभा चुनावका उम्मेदवारसँग आफूहरूलाई छाडेर अर्को क्षेत्र जान नपाउने प्रतिबद्धता गराइरहेका छन् । आफूहरूको सुखदु:खमा साथ रहने उम्मेदवारलाई नै रोजेर यसपालि मत दिने यहाँका बासिन्दा बताउँछन् । बेलबारी ६, बाहुनीका ६४ वर्षीय नारायण गिरीले आफूहरूले जसलाई जिताए पनि फर्केर नआएको गुनासो गरे ।
‘जिताएका उम्मेदवार अर्कै क्षेत्र रोज्दै आएका छन्,’ उनले भने, ‘०४८ मा एमालेका हर्कमान तामाङ, ०५१ मा एमालेकै कमल कोइराला, ०५६ मा कांग्रेसका महेश आचार्य, ०६४ मा माओवादीका सावित्रीकुमार काफ्ले, ०७० मा कांग्रेसका दिलीप गच्छदारलाई जितायौं तर फर्केर आएनन् ।’ उनले आफूहरू २०४८ देखि ०५६ को चुनावसम्म क्षेत्र ५ मा र २०६४ र ०७० मा क्षेत्र ३ र अहिले क्षेत्र ४ मा रहेको बताए ।
आफूहरूले जिताएका नेता स्थायी नभएकाले विकास निर्माणको काम अगाडि बढन नसकेको उनको बुझाइ छ । ‘बाटोघाटो, सडक, शिक्षा, स्वास्थ्य, रोजगारी, कृषिलगायत सबै क्षेत्रको अवस्था उस्तै छ,’ उनले भने, ‘आफूहरूले विकासको प्रत्याभूति गराउने नेतै पाएनौं । अहिलेसम्म मत दिएका सबै नेता भगौडा भइदिए ।’
स्थानीय इन्दिरा गच्छदारले महिलाहरूको समस्या समाधान गर्ने नेता नभएको सुनाइन् । ‘महिलाहरूको समग्र आर्थिक, सामाजिक, राजनीतिक रुपमा सशक्त बनाउने उम्मेदवार आफूहरूको रोजाइ हो,’ उनले भनिन्, ‘जितेर गएपछि फर्केर अर्को चुनावमा पनि नआउने उम्मेदवारभन्दा आफूहरूको सुखदु:खमा साथ रहने प्रतिबद्ध उम्मेदवारलाई यसपालि भोट हाल्छौं ।’
उनले यसपाली कांग्रेसबाट महेश आचार्य आफ्नो क्षेत्रमा दोहोरिएर उम्मेदवार बनेको उनले सुनाइन् । उनका अनुसार वाम गठबन्धनबाट उम्मेदवार बनेका अमनलाल मोदी भने नयाँ अनुहार हुन् । बाहुनी र सँगै जोडिएका कसेनीका बासिन्दाले सडकसँगै लोहन्द्रा खोलाको बाढीले भत्काएको नहर र पुल बनाइदिन माग उम्मेदवारसँग गरेका छन् । कांग्रेसका आचार्यले चालु आवमै नहर र पुल निर्माण गर्ने, वैज्ञानिक तरिकाले व्यावसायिक कृषि प्रणालीको योजना लागू गरी गाउँमै रोजगारीको सिर्जना गरी विदेश पलायन हुनबाट युवा शक्ति रोक्ने प्रतिबद्धता जनाएका छन् ।
‘सबै जातजाति, धर्म, समुदायको भाषा, धर्म, संस्कृतिको संरक्षण गर्छौं,’ उनले भने, ‘यहाँका सामुदायिक विद्यालयमा गुणस्तरीय व्यवासायिक शिक्षा र स्वास्थ्यको प्रबन्ध गर्छौं ।’ उनले स्थानीय विकासका र राष्ट्रिय मुद्दा मतदातालाई सुनाएर रिझाइरहेका छन् । अब यो क्षेत्र छाडेर अन्यत्र नजाने आश्वासन पनि मतदातासमक्ष बाँडिरहेका छन् ।
वाम गठबन्धनका मोदीले सम्पूर्ण शोषित, उत्पीडित जनताको मुक्ति, विकास र समृद्धि आफ्नो मुख्य एजेन्डा भएको मतदातामाझ सुनाउने गरेका छन् । मोदीले पटक–पटक मन्त्री भएका हेभिवेटविरुद्ध युवा पुस्ताको आफ्नो उम्मेदवारी भएको बताए । ‘पुरानाले काम गरेको धेरै हेरें अब नयाँ पुस्ताको युवा उम्मेदवारलाई काम गर्ने अबसर जनताले दिनेमा आफू विश्वस्त छु,’ उनले भने, ‘जमिनदारको कामतबाट राजनीतिलाई निम्न वर्गीय जनताको छोराको हातमा पुर्‍याउन आफ्नो उम्मेदवारी हो ।’ आफ्नो जित युवाको जित हुने उनको भनाइ छ ।
‘रंगेली, विराट चोक, इटहरीलाई जोडेर सुशासन भएको वृहत विराटनरको ५ वर्षभित्र निर्माण गर्छु,’ आचार्य भन्छन्, ‘बृहत विराटनगरअनुसारको सडक सञ्जाल, खानेपानी, अन्र्राष्ट्रिय खेलकुदको संरचना, मेडिकल सिटी, सामुदायिक विद्यालयमा निजीभन्दा उच्च गुणस्तरीय शिक्षा, व्यवस्थित र सुरक्षित बसोबासका लागि फुसको छानोलाई जस्ताको छानो हाल्ने मेरो एजेन्डा हो ।’ मोदीले १ नम्बर प्रदेशको राजधानी विराटनगर, चक्रपथ निर्माण, अन्तर्राष्ट्रिय विमानस्थल, रोजगारी सिर्जना, व्यवस्थित यातायातका साथै रेल सेवा सञ्चालन, सुकुम्बासी समस्या समाधानलगायत एजेन्डा उठाएका छन् ।

 

प्रकाशित : मंसिर १७, २०७४ ०८:२९
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

नयाँ र पुरानाबीच प्रतिस्पर्धा

कान्तिपुर संवाददाता

तेह्रथुम — प्रदेशसभाका उम्मेदवारहरूले जिल्लामा चुनाव प्रचार अभियानलाई तीव्र बनाएका छन् । उम्मेदवार र दलका नेता कार्यकर्ताले मुख्य रूपमा स्थानीय विकास निर्माणका योजनालाई प्रमुख चुनावी मुद्दा बनाएका छन् ।

प्रदेशसभातर्फ दुवै क्षेत्रमा कांग्रेस र वाम गठबन्धनका उम्मेदवारबीच मुख्य प्रतिस्पर्धा छ । दुवै तर्फका उम्मेदवारले आफू विजयी हुने दाबी गरेका छन् । प्रदेशसभा क्षेत्र २ मा वामगठबन्धनले एमाले पूर्वजिल्ला अध्यक्ष तेजमान कन्दङवालाई उम्मेदवार बनाएको छ । उनीसँग पूर्वजिविस उपसभापति भएर जिल्लामा विकास निर्माणको काम गरेको अनुभवसमेत छ । कांग्रेसले जिल्लाको राजनीतिमा नयाँ अनुहारलाई उम्मेदवार बनाएको छ । प्याब्सन केन्द्रीय अध्यक्ष रहेका विजय सम्बाहाम्फेलाई कांग्रेसले माओवादीबाट भित्र्याएर उम्मेदवार बाएको हो । काठमाडौंलाई कार्यक्षेत्र बनाएका सम्वाहाम्फेलाई दल बदलु नेता भनेर विपक्षीले आलोचना गरिरहेका छन् ।
जिल्ला तहको राजनीतिमा चर्चा कमाएका एमाले अध्यक्ष र कांग्रेस सभापति प्रदेशसभा क्षेत्र १ तर्फ एउटै क्षेत्रमा आमनेसामने भएका छन् । पार्टीका दुई अध्यक्ष एउटै क्षेत्रमा प्रतिस्पर्धामा होमिएपछि जिल्लामा चुनावी माहोल रोचक बनेको छ ।
क्षेत्र १ बाट प्रदेशसभा चुनावमा एमाले अध्यक्ष लक्ष्मण तिवारी र कांग्रेस सभापति गोविन्द ढुंगानाले एउटै क्षेत्र रोजेर उम्मेदवारी दर्ता गराएका हुन् । दुवैले चुनावी प्रचार–प्रसारलाई आक्रामक बनाएका छन् । लालीगुराँस, म्याङलुङ नगरपालिका र छथर गाउँपालिका प्रदेशसभा क्षेत्र १ मा पर्छन् । स्थानीय तह चुनावमा म्याङलुङ नगरपालिका र छथर गाउँपालिकामा एमालेले जितेको थियो । 
लालीगुराँस नगरपालिकामा भने कांग्रेसले जित हात पारेको थियो ।
दुवै नेताले जिल्लाको विकास निर्माणको क्षेत्रमा लामो समयदेखि उल्लेख्य काम गरेकाले पनि मतदाता कुन उम्मेदवारलाई छान्ने भन्ने अन्योलमा छन् । दुई ठूला पार्टीका जिल्ला अध्यक्षको चुनावी प्रतिस्पर्धालाई धेरैले प्रतिष्ठाको विषय बनाएर हेरेका छन् । आफूले लामो समयदेखि जिल्लाका विकासे कामको अगुवाइ गरेकाले पनि मतदाताले यसपटक विश्वास गर्ने तिवारी र ढुंगानाको दाबी छ । 
तिवारीले जिल्लाको पर्यटन, कृषि, सडक सञ्जाल, जलविद्युत्, शिक्षा, स्वास्थ्यजस्ता क्षेत्रको विकासका मुद्दा उठाएका छन् । कांग्रेस उम्मेदवार ढुंगानाले पनि यिनै विकासे मुद्दालाई अघि सारेका छन् । लामो समयदेखि आफू जनतामाझ पुगिरहने गरेकाले मतदाताको मन जित्न आफू सफल हुने ढुंगानाको दाबी छ ।
पाँचथर र ताप्लेजुङसँग सीमा जोडिएको आठराई क्षेत्रका तेजमान कन्दङवालाई मतदाताले चतुर लिम्बू भनेर व्यंग्य गर्छन् । आठराई क्षेत्रमै बसेर जिल्लाको विकास निर्मााणका काममा आफूले उल्लेख्य योगदान पुर्‍याएकाले पनि २ नम्बर क्षेत्रमा आफ्नो जित निश्चित रहेको कन्दङवाको भनाइ छ ।
‘मसँग पहिले जिविस उपसभापति भएर जिल्लामा धेरै काम गरेको अनुभवसमेत छ,’ कन्दङवाले भने, ‘आठराई क्षेत्रको विकासमा मेरो योगदान ठूलो भएकाले पनि मतदाता मप्रति आकर्षित छन् ।’ आठराई, फेदाप र मेन्छेयायाम गाउँपालिका रहेको २ नम्बर क्षेत्रमा स्थनीय तह चुनावमा एमालेले जित हात पारेको थियो । एमाले एक्लैले चुनाव जित्दै आएको तेह्रथुममा माओवादीसमेत थपिएपछि वाम गठबन्धन झन बलियो भएको कन्दङवा बताउँछन् ।
आफू लामो समय जिल्लाबाहिर बसे पनि आफ्नो क्षेत्रका समस्यालाई नजिकबाट बुझेकाले ती समस्या समाधान गर्ने उपायसहित आफूले उम्मेदवारी दिएको कांग्रेस उम्मेदवार विजय सम्वाहाम्फे बताउँछन् । जिल्लाको विकास निर्माणसहित शिक्षा क्षेत्रको विकासको योजना आफूसँग भएकाले मतदाताले विश्वास गरी भोट दिने सम्वाहाम्फेले बताए ।

 

प्रकाशित : मंसिर १७, २०७४ ०८:२९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
ADVERTISEMENT