मतदान गर्न एक रात बास

कान्तिपुर संवाददाता

डडेलधुरा — परशुराम नगरपालिका–७ मलास बतासेका विनोद बोहराको परिवार बिहीबार हुने प्रतिनिधिसभा र प्रदेशसभा निर्वाचनमा मतदान गर्न बुधबार साँझै आफ्नो वडाको मतदान केन्द्र रहेको सादनी गाउँ आइपुगेको छ।

बोहरा परिवारसँगै बतासे गाउँका अधिकांश मतदाता बुधबारै सादनी गाउँ आइपुगेर बास बसेका छन्।

‘केही पुरुष मतदाता भोलि बिहानै आउँछन् होला,’ बोहराले भने, ‘महिला र बूढापाका सबै आजै आइसकेका छन्।’ उनले मतदानकै दिन बिहान आउने मतदाता मतदान गरेर त्यही दिन फर्कन 

मुस्किल पर्ने पनि सुनाए। उनका अनुसार मतदान केन्द्र रहेको स्थलबाट बतासे गाउँ पुग्न करिब ७ घण्टा लाग्छ। उक्त क्षेत्रबाट बरु कञ्चनपुरको महेन्द्रनगर २ घण्टामै पुग्न सकिन्छ। 

नगरपालिकाको ७ नम्बर वडाको एउटा बतासे गाउँ मात्र होइन, एक दर्जनभन्दा बढी गाउँ विकट छन्। वडाध्यक्ष केशवसिंह बोहराका अनुसार मलास, बड्डिमलास, कसान, पीपलकोट, तालीगाडा, 

भुमिथाला, जामिरगाड, बस्नौटा र ददिगैरका मतदाता भोट हाल्न बास बस्ने गरी एक दिन पहिल्यै आउने गरेका छन्।

‘यी गाउँका बासिन्दालाई मतदान गर्न मात्रै होइन, अन्य सेवासुविधाका लागि समेत वडा सदरमुकाम आएर फर्कन बास बस्नैपर्छ,’ बोहराले भने, ‘नगरपालिकाको सदरमुकाम जोगबुढा आउनुपर्दा 

त कम्तीमा ३ दिन खर्च हुन्छ।’ मतदानका लागि अघिल्लो दिनको साँझ पुग्ने मतदाताहरू आफन्तको घरमा बास बसेका छन्। बोहराका अनुसार बतासेमा मात्रै अढाई सय मतदाता छन्।
 
‘भोट हाल्न ६/७ घण्टा पैदल हिँडेर आउँछौं, चुनावपछि गाउँठाउँको विकास होला भनेर,’ बड्डिमलासका धनबहादुर धामीले भने, ‘तर हाम्रा दु:ख जसाका तसै रहन्छन्।’ खानेपानी र 

बाटोघाटोलगायत विभिन्न योजना पुर्‍याउने नेताका प्रतिबद्धता विश्वास गरी बास बसेर भोट हाल्न आएको कसानका हरिलाल धामीले बताए। 

परशुराम नगरपालिका–८ को साइसन र घुम्तेगडाका बासिन्दाले पनि मतदानका लागि कम्तीमा ५/७ घण्टा हिँड्नुपर्छ। वडा नम्बर ११ का सिमलबन्डा, पलकाडी, पेउलीबन्दा, सुवाखान र पातलीका मतदाता पनि बुधबारै वडा सदरमुकाम वरपरका गाउँ आइपुगेका छन्।

प्रकाशित : मंसिर २१, २०७४ ०७:४८
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

मतदान गर्न फर्किनेको ताँती

अखण्ड भण्डारी, राजकुमार कार्की

खनियाखर्क (सिन्धुली) — ‘रिजर्भ’ लेखिएको बस बुधबार दिउँसो खनियाखर्कको एउटा खाजा पसल अघिल्तिर रोकियो । एक युवाले अघि–अघि लागेर सबैलाई आउन इसारा गरे । समूहमा खाजा खान बसेका सप्तरीका रामनारायण यादवले भने, ‘पार्टीको खाइँदैछ ।’

सामाजिक सञ्जालमा चिनजानका राजनीतिक कार्यकर्ताले राखेको सूचना उनले पछ्याए । त्यसमा लेखिएको थियो, ‘सप्तरी फर्कन चाहनेहरूले फलाना नम्बरमा सम्पर्क गर्नुहोला । बसमा आउने, जाने, खाने व्यवस्था गरिएको छ ।’ उनले त्यसमै फोन गरे । राजनीतिक आस्था सोधियो । मिल्यो । उनलाई कोटेश्वर बोलाइयो । उनीजसरी नै भेला पारिएका व्यक्तिले बस भरिभराउ थियो । उनीहरू गाडी व्यवस्था गर्ने दललाई मतदान गर्ने विश्वास दिलाएर सित्तैमा गाउँ फर्किइरहेका थिए ।
बीपी राजमार्गमा काठमाडौंतिरबाट जाँदा सबैभन्दा डाँडामा पर्ने यो सानो सुन्दर बजारमा १ घण्टा बस्दा ‘रिजर्भ’ लेखिएका दुई दर्जनभन्दा बढी बस पार भए । ती सबैमा भरिएका यात्रु भोट हाल्न गाउँ फर्किइरहेका थिए । अर्को बसबाट झापा दमक जाँदै गरेका लक्ष्मण हुमागाईंले सुनाए, ‘घर जान बिहानै कोटेश्वर आएको, कुनै गाडीमा टिकटै पाइएन । होस् भनेर फर्किन लागेको चिनेको साथी भेट्टाएँ । उनी पार्टीले व्यवस्था गरेको बसमा आउन लागेका रहेछन् । मलाई पनि त्यसमै जाउँ भने । सित्तैमा आउन पाइयो । मिलीजुली बसेर आइँदैछ ।’
पूर्वी जिल्लाहरूलाई राजधानीसँग जोड्ने सबैभन्दा छोटो र सजिलो यस मार्गबाट घर फर्कनेको चाप तीन दिनयता गुणौं बढेको छ । सिन्धुलीका जिल्ला ट्राफिक प्रमुख चन्द्र श्रेष्ठका अनुसार अरू दिन औसत दुई हजारका हाराहारीमा चारपाङ्ग्रे यात्रुवाहक सवारी यस रुटमा चल्छन् । बुधबार बिहानदेखि साँझ ७ बजेसम्म करिब ९ हजार गाडी यहाँबाट अघि बढेका छन् । मंगलबार ६ हजार ६ सय र सोमबार ७ हजार ६ सय गाडी सिन्धुली हुँदै पूर्वतिर गएको उनले जानकारी दिए । यस रुटबाट जाने हरेक गाडीको नम्बर सिन्धुली बजारमा ट्राफिकले इन्ट्री गर्ने गरेको छ । ‘आवागमनलाई चुस्त बनाउन सक्दो पहल गरेका छौं’, उनले भने, ‘सकेसम्म नरोकी परैबाट नम्बर टिप्ने गरिएको छ ।’
सिन्धुलीका प्रमुख जिल्ला अधिकारी जनकराज दाहालले मतदान गर्न घर फर्किनेको लहरले चुनावप्रति बढ्दो उत्साहलाई संकेत गरेको बताए ।

‘संविधान कार्यान्वयनले पूर्णता पाउने र देश संघीयतामा जाने मुख्य खुडकिलो यही चुनाव भएकाले मतदातामा उत्साह मात्र होइन, उमंग रहेको पाइएको छ,’ उनले भने, ‘बीपी राजमार्ग ताप्लेजुङसम्म जान प्रयोगमा आउँछ । पूर्वको ठूलो भूगोल समेटिने भएकाले यहाँ चाप बढ्नु स्वाभाविकै हो । यहाँबाट जानेको सुरक्षा र सहजतामा हामीले सक्दो प्रयास गरेका छौं ।’
कतिपय मतदाता काम छाडेर हिँडेका पाइए भने कतिपय कार्यालयमा आग्रह गरी बिदा लिएर घर फर्किइरहेका थिए । स्थानीय तहको निर्वाचनमा एकमतको हारजित र गोलाप्रथासमेत भएकाले त्यस्तै भएर आफूलाई पछि थकथक नलागेस् भनी गाउँ गइरहेको विराटनगरका बीएन चौधरीले बताए । उनी राजधानीमा व्यवसाय गरेर बस्छन् । आफूमात्र होइन, टोलका चिनेजानेका धेरै जना धमाधम फर्किइरहेको उनले जानकारी दिए ।
‘छोटो दूरी भएकाले समयमै पुग्न सकिन्छ, त्यही भएर निर्वाचनको अघिल्लो दिन मात्र आएको,’ कमलामाई नगरपालिका–२ को चियाबारीमा खाना खाँदै गर्दा भेटिएका चौधरीले भने, ‘मत हाल्न पाउनु अधिकार हो, मौकाको सदुपयोग किन नगर्ने ? यस्तो मौका सधैं आउँदैन ।’ उनले मत हालेर राम्रो उम्मेदवारलाई जिताउने र घरमा भेटघाटसमेत हुने भएकाले यसलाई ‘चाडका रूपमा लिएको’ खुसी हुँदै सुनाए ।
सुनसरी तरहराका कृष्ण थापाको भनाइ उस्तै छ । वृद्ध उमेरका उनी मतदान गर्नकै लागि राजधानीमा बसेर गरिरहेको औषधि उपचारलाई थाँती राखेर गाउँ फर्किएका हुन् । ‘निर्वाचनमा मतदान गर्ने हो । भोलिपल्ट यही बाटो भएर फर्किएपछि समयमै फेरि पुगिहालिन्छ,’ उनले भने, ‘अर्कोपल्ट कसले देखेको छ र मतदान गर्न पाइन्छ कि पाइँदैन ?’ पूर्वका ताप्लेजुङदेखि रौतहटसम्मका जिल्लाबाट काठमाडौं आउजाउ गर्न बीपी राजमार्ग प्रयोगमा आउँछ । दोस्रो चरणमा चुनाव भइरहेका उदयपुर, खोटाङलगायत जिल्ला जान यही राजमार्ग प्रयोग गरी खुर्कोटबाट मध्यपहाडी लोकमार्गतर्फ लाग्नुपर्छ । त्यसतर्फ जाने गाडीको चाप पनि उत्तिकै बाक्लो रहेको प्रहरीले जनाएको छ ।
तीन दिनयता यात्रुवाहक सवारीको संख्या अत्यधिक बढेकाले दिउँसो मालवाहक सवारीलाई केही समय रोक्नुपरेको जिल्ला ट्राफिक प्रमुख श्रेष्ठले जनाए । ‘भाडाका सवारी साधन त छँदै छन्, रिजर्भ गरेर आउने गाडी पनि उत्तिकै छन्,’ उनले भने, ‘मतदान गर्नकै लागि आएको भनेका छन् । त्यही भएर हामीले सक्दो शक्ति परिचालन गरेर तिनलाई सहजतापूर्वक गन्तव्यतर्फ पठाइरहेका छौं ।’
बुधबार मध्यरातबाट मतदान सम्पन्न नहुन्जेलका लागि राजमार्ग बन्द गरिने भए पनि बीपीमा भिन्दै नियम छ । यस राजमार्गमा यसअघिदेखि नै साँझ ७ बजेबाटै दुर्घटना संवेदनशीलतालाई हेरी स्थानीय प्रशासनले यातायात चल्न दिँदैन । निर्वाचनका बेला त्यही नियम कायम राखिएको छ ।
त्यसैले छिटोछिटो पार हुन साँझपख तीव्र गतिमा हुइँकिने गाडीको बाक्लो चाप देखिइरहेको थियो ।

प्रकाशित : मंसिर २१, २०७४ ०७:४८
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT