प्याब्सन केन्द्रीय अध्यक्ष सम्बाहाम्फेलाई हराउँदै एमाले पूर्व अध्यक्ष कन्दङवा विजयी

चन्द्र कार्की

तेह्रथुम — तेह्रथुम निर्वाचन क्षेत्र नम्बर १ प्रदेशसभा (ख) बाट वाम गठबन्धनका उमेदवार एमाले पुर्व अध्यक्ष तेजमान कन्दङवा विजयी भएका छन् । वाम गठबन्धनमा नेकपा एमालेबाट उम्मेदवार बनेका कन्दङवाले १० हजार ३ सय २ मत ल्याएर विजयी भएका हुन् ।

कन्दङवाले व्याव्सन केन्द्रीय अध्यक्ष समेत रहेका कांग्रेस उमेदवार विजय सम्बाहाम्फेलाई २ हजार २ सय २२ मत अन्तरले पराजित गरेका हुन् । उनका निकटतम प्रतिद्वन्द्वी सम्बाहाम्फेले ८ हजार ४७ मत प्राप्त गरेका छन् ।

प्रदेशसभा (क) मा पनि वाम गठबन्धनका उमेदवार एमाले अध्यक्ष लक्ष्मण तिवारी ११ हजार ७ सय २६ मत प्राप्त गरी विजयी भइसकेका छन् । तिवारीका निकटतम प्रतिद्वन्द्वी कांग्रेस जिल्ला सभापती गोविन्द ढुंगानाले १० हजार २ सय ६० मत प्राप्त गरेका छन् ।

त्यस्तै प्रतिनिधिसभा तर्फ वाम गठबन्धनबाट उमेदवार बनेका निवर्तमान सभासद तथा एमाले पुर्व अध्यक्ष भवानी खापुङले अग्रता लिइरहेका छन् । पछिल्लो मत परिणाम अनुसार खापुङले १७ हजार १ सय ५९ मत प्राप्त गरेका छन् । उनलाई भौतिक पुर्वाभार तथा यातायात राज्यमन्त्री तथा कांग्रेस केन्द्रीय सदस्य समेत रहेका उम्मेदवार सिता गुरुङले १४ हजार ६ सय १५ मतका साथ पछ्याइरहेकी छिन् ।

प्रकाशित : मंसिर २४, २०७४ १८:३९
प्रतिक्रिया
पठाउनुहोस्

नेपाल मेडिकल हब बन्न सक्छ : ओली

अतुल मिश्र

काठमाडौं — एमाले अध्यक्ष केपी शर्मा ओलीले नेपाल चिकित्सा क्षेत्रका लागि मेडिकल हब बन्न सक्ने बताएका छन् । सडक विस्तार, मेलम्ची आयोजनाको पाइप बिछ्याउने आदिले काठमाडौंमा धूलो, धूवाँ भए पनि यसलाई नियन्त्रण गर्न समय नलाग्ने बताउँदै उनले भने, ‘यसपछि मुलुकको वातावरण अत्यन्त सुन्दर हुन्छ, यहाँ बिहान हिमाल हेर्दै उपचार गर्न पाउनु जोसुकैले रुचाउँछन् ।’

नेपाल मेडिसिटी अस्पतालको अवलोकनपछि आइतबार अस्पताल परिसरमा ओलीले मेडिसिटीजस्ता अस्पतालले मुलुकलाई मेडिकल हब बनाउन सघाउने बताए । अस्पतालका अध्यक्ष उपेन्द्र महतोले उपचारका लागि विदेश जानु नपर्ने विश्वास दिलाउन मेडिसिटी सञ्चालनमा ल्याएको जानकारी दिए ।

३५० शय्याको सुपर स्पेसियालिटी अस्पतालमा अत्याधुनिक उपकरण, प्रविधिसँगै सबै विधाको विशेषज्ञता सेवा रहेको जनाउँदै महतोले भने, ‘मेडिसिटी अस्पताल होइन अभियान हो, अत्यन्त ठूलो भवन अत्याधुनिक उपकरण सेवा सुविधा भए पनि सेवा शुल्क सर्वसाधारणले तिर्न सक्नेछ ।’ अस्पतालका निर्देशक डा. सुनिलकुमार शर्माले अत्याधुनिक उपकरण र प्रविधिले चिकित्सा विज्ञानको सबैजसो विधामा अन्तर्राष्ट्रिय गुणस्तर सेवा मेडिसिटीले दिइरहेको दाबी गरे । उनले भविष्यमा अस्पताललाई ७ सय ५० शय्यामा विस्तार गरिने जानकारी दिए ।

अस्पताल आउने बिरामीको खल्तीमा नभई रोगको उपचारमा चिकित्सकले ध्यान दिनुपर्ने आवश्यकता औंल्याएका छन् । ‘कतिपय अस्पतालमा इमर्जेन्सी पुग्ने बिरामीको धरौटी खोजिन्छ, नभए फिर्ता पठाइन्छ,’ एमाले अध्यक्ष ओलीले भने, ‘मैले पनि धरौटीबिना उपचारमा ढिलाइ भएको अनुभव गरेको छु भने सर्वसाधारणको स्थिति के होला ?’ आकस्मिक उपचारका लागि आउनेलाई अस्पतालले सबैभन्दा पहिला ज्यान जोगाउनेतर्फ लाग्न उनले आग्रह गरेका छन् ।

विदेश भ्रमणताका एक्कासि आफू न्युयोर्क अस्पताल भर्ना भएको प्रसंग उठाउँदै उनले भने, ‘५ दिनको उपचार क्रममा मलाई कहिले शुल्कबारे सोधिएन, निको भएर हिँड्ने बेलामा निजी अस्पतालमा शुल्क लाग्छ भनियो ।’

प्रकाशित : मंसिर २४, २०७४ १८:३९
पूरा पढ्नुहोस्
प्रतिक्रिया
पठाउनुहोस्