भक्तपुरमा प्रदेश राजधानी, पूर्वाधार पर्याप्त : टोली

प्रदेश राजधानीका लागि सानोठिमीस्थित शिक्षा विभाग र कृषि विकास बैंकको तालिम केन्द्रको प्रस्ताव आएपछि सहरी विकास मन्त्रालयले डिभिजन कार्यालयका इन्जिनियर उद्धव गुरागाईंसहितको टोलीलाई अध्ययन गर्न पठाएको थियो । 
प्राविधिकका अनुसार शिक्षा विभाग र तालिम केन्द्रमा तत्कालै मुख्यमन्त्री, मन्त्रालय र सचिवालयलगायत स्थापना गर्न सकिन्छ । ‘भौतिक संरचना हेर्दा मन्त्रालय र सचिवालय दुवै तत्कालै राख्न सकिन्छ,’ डिभिजन कार्यालय प्रमुख मिलन आचार्यले भने, ‘केन्द्रका लागि आवश्यक पूर्वाधार तयार छ ।’ टोलीले संरचना निर्माण, भौतिक सेवासुविधा (शौचालय, खानेपानी, पार्किङस्थल, सडक, बत्ती, सभाहल) लगायतको अध्ययन गरेको छ । टोलीका अनुसार विभागको भुइँतलामै ३० वटा सुविधासम्पन्न कोठा रहेको र साढे दुईतले भवनमा पर्याप्त कोठा, बैठक हल, क्यान्टिनको व्यवस्था छ । तालिम केन्द्रमा अत्याधुनिक सुविधायुक्त आवासलगायत ५ वटा ब्लकको व्यवस्था भएको इन्जिनियर संगीता बरालले बताइन् । केन्द्रमा एटयाच बाथरुमसहितको होस्टेल, क्यान्टिनको व्यवस्था छ । टोलीले सहरी विकास मन्त्रालय, जिल्ला प्रशासन कार्यालय र जिसस भक्तपुरलाई प्रतिवेदन पेस गरेको छ । प्रजिअ द्रोण पोखरेलले प्रदेशको केन्द्रका लागि संरचना तयार भएको र स्थायी नभए पनि अस्थायी रूपमा तत्कालै मन्त्रालय स्थापना गर्न सकिने पूर्वाधार तयार रहेको बताएका छन् । जिससले भने प्रधानमन्त्री शेरबहादुर देउवालाई प्रदेशको राजधानी बनाउन सकिने आधारसहितको प्रस्ताव पेस गरेको प्रमुख नवराज गेलालले बताए ।