अब सजिलै मुक्तिनाथ

विनोद त्रिपाठी

मुस्ताङ — कागबेनी उकालो लागेपछि धेरै तीर्थालुलाई लाग्थ्यो– अब यो भीर कसरी चढ्ने होला ? यो केही वर्षअघिको कुरा हो । अब भीर देख्नेबित्तिकै आत्तिने दिन गए । सडक सुविधाले यात्रुलाई यो बाटामा सधैं डुलिरहन पाए हुन्थ्योझैं लाग्छ ।

प्राकृतिक रूपमा मनमोहक त छ नै । सफा, शान्त र स्निग्ध पनि छ । त्यसैमा कालोपत्रे सडक मुस्ताङको ‘सुनमाथि सुगन्ध’ जस्तै बनेको छ । विकसित मुलुकको झल्को दिने गरी फनफनी घुमेको छ, मुक्तिनाथ मन्दिर जाने सडक । ३८ ठाउँका ठूला घुम्ती पार गर्दा मन्दिर पुग्ने जोकोहीलाई लाग्छ, कुनै अर्को ग्रहमा पुगिरहेको छु ।

Yamaha

सडकबाट सजिलै उत्तर र दक्षिणतर्फका हिमालय शृंखलाको दृश्यावलोकन गर्न सकिन्छ । दक्षिणतर्फको धौलागिरि हिमाल र उत्तरतर्फका नीलगिरि र थोराङ्लापास शृंखलाले पर्यटकलाई निकै लोभ्याउँछन् । १० वर्ष अघिसम्म सामान बोकेका खच्चडको लर्को देखिन्थ्यो । यात्रु घोडामा ओहोरदोहोर गरेका भेटिन्थे । बेनीदेखि मुक्तिनाथसम्म कच्ची सडक बन्यो । जिप चल्न थाले । अहिले खच्चड देख्नै मुस्किल पर्छ । घुमफिरका लागि आउने पर्यटकले रहरले मात्र घोडा चढ्छन् । जब सडक फराकिलो बन्यो अनि साना सवारी होइन, ठूला बसको यात्राबाटै सजिलै मुक्तिनाथ मन्दिर पुग्ने सुविधा मिलेको छ । यही असोजदेखि सञ्चालनमा आएको कागबेनी–मुक्तिनाथ कालोपत्रे सडकले ठूला सवारी चलाउन झनै सहज बनाइदिएको छ ।

सडक कालोपत्रे भएपछि मन्दिर पुग्ने दर्शनार्थीले सुविधा पाएका छन् । १२ किमि लामो यो खण्ड कुल २१ करोड लागतमा निर्माण भएको हो । दुई खण्डमा विभाजित गरेर काम सम्पन्न भएको जिल्ला प्राविधिक कार्यालयले जनाएको छ । पहिलो खण्डमा एपेक्स जोशी जेभी कम्पनीले ७ किमि सडक निर्माण गरेको हो भने बाँकी ५ किमि एपेक्स अमिक कम्पनीले निर्माण गरेको हो । ०७२ असार २७ देखि काम सुरु भएको सडक निर्माण सम्पन्न गर्न ०७४ को असार २६ गतेसम्म म्याद दिइएको थियो । मन्दिर जाने सडकमध्ये यो खण्ड सबैभन्दा जोखिम मानिन्छ । गत वैशाखमा दर्शनार्थी बोकेको बस दुर्घटना हुँदा ५ जनाको मृत्यु र ३५ जना घाइते भएका थिए ।

जोमसोमदेखि कागबेनीसम्म कालीगण्डकी करिडोरकै मूल सडकबाट सवारी पुग्नेछन् । त्यसपछि सवारी पूर्वतर्फ मोडिएर मुक्तिनाथ जाने ठाडो उकालो सडकतर्फ जानुपर्नेछ । पर्यटक र मन्दिर आउने दर्शनार्थीलाई मध्यनजर गरेर सडक कालोपत्रे गर्ने योजना अघि सारिएको थियो । निकै जोखिम र डरलाग्दो भीर पार गर्नुपर्ने भएकालेकतिपय दर्शनार्थी कागबेनीदेखि हिंडेरै मुक्तिनाथ पुग्छन् ।

‘यो सडकमा निकै जोखिम मोल्नुपथ्र्यो । अहिले ढुक्कले गाडी चलेका छन्,’ बस तथा जिप व्यवसायी समिति अध्यक्ष मीनप्रसाद थकालीले भने । सडक कालोपत्रे भएपछि मुक्तिनाथ पुग्ने दर्शनार्थीको संख्या बढेको उनले सुनाए । कालोपत्रे ३ दशमलव ५ मिटर र सडक ६ दशमलव ५ मिटर फराकिलो छ । ढल, पर्खाल निर्माण गरिएका छन्, सबै सवारीलाई अनुमति दिइएको छ । यो सडक मन्दिरभन्दा अलि वर बसपार्कसम्म पुगेको छ । वातावरण नब्रिगियोस् भनेर मन्दिरको गेटसम्म सवारी लान निषेध गरिएको छ ।

हाल जिप पार्कदेखि मन्दिरसम्म घोडाको प्रयोग हुँदै आएको छ । हिंड्न नसक्नेले घोडा प्रयोग गरे पनि अधिकांश दर्शनार्थी जिप पार्कदेखि १० मिनेट हिँडेरै मन्दिर पुग्ने गर्छन् । कोरलादेखि बेनीसम्मको कालीगण्डकी करिडोर सडकभन्दा अगावै कागबेनीदेखि मुक्तिनाथ पुग्ने बाटो कालोपत्रे गरिएको हो । कागबेनी–मुक्तिनाथ सडक मुस्ताङकै पहिलो कालोपत्रे सडक हो ।
‘तोकिएकै मितिमा सडक निर्माण सक्यौंं, प्राविधिक कार्यालयका प्रमुख इन्जिनियर रवीन्द्र तिवारीले भने, ‘यो सडक नै मुस्ताङको पहिलो कालोपत्रे सडक हो ।’ सडक छिटो सम्पन्न गर्न दुई खण्डमा विभाजित गरेर दुईवटा ठेकेदार कम्पनीलाई निर्माणको जिम्मा दिइएकाले समयमै सकिएको उनले बताए । यो सडकमा वर्षभरि नै सवारी चलाउन सकिने उनले जानकारी दिए ।

प्रकाशित : पुस १७, २०७४ ०८:४१
प्रतिक्रिया
पठाउनुहोस्

निरन्तरको अठोटले जित

विनोद त्रिपाठी

मुस्ताङ — गणतन्त्र आएपछि उनले सांसद बन्न धेरै प्रयास गरेका हुन् । पटक–पटकका चुनाव लड्न पार्टीसँग टिकट मागे । तर, कांग्रेसले उनलाई ०६४ र ०७० सालका संविधानसभाको दुवै चुनावमा टिकट दिन आवश्यक ठानेन ।


उनी ०७० मा कांग्रेसका उम्मेदवारविरुद्ध बागी उठे । १३ मतअन्तरले रोमी गौचन थकालीसँग पराजित भए । बागी उठेपछि उनले फेरि कांग्रेसकै कार्यकर्ता भएर राजनीति गर्ने अवस्था रहेन । 
अन्तत: ४ महिनाअघि मात्रै कांग्रेस छाडेर एमाले प्रवेश गरेका ५५ वर्षीय प्रेमप्रसाद तुलाचन यसपटक प्रतिनिधिसभा सदस्यमा विजयी भएका छन् । निरन्तरको अठोट बिहीबार बिहान उनले चुनावमा पाएको सफलतासँगै साकार भएको छ । उनले ०७० सालका प्रतिस्पर्धी रोमी गौचनलाई नै ३ सय ६३ मत अन्तरले पराजित गरेका छन् । उनको पार्टी फेरबदल अहिले राजनीतिमा सफलताको खुड्किलो जस्तो बनेको छ । 
तुलाचन ०४७ मा कांग्रेसको साधारण सदस्य लिएर राजनीतिमा प्रवेश गरेका हुन् । उनी १० वर्षसम्म पार्टीको जिल्ला कार्यसमिति सदस्य भए । ०५४ मा जिविस सदस्यमा निर्वाचित भए । थाक खेलकुद तथा सांस्कृतिक विकास संघमार्फत जिल्लाको खेलकुद विकासमा उनको योगदान छ । ०५६ मा सरकारले कोरला नाकासम्म सडक लैजाउने चर्चा चलाएपछि कोरला–लोमान्थाङ सडक निर्माण संयोजक बनेर काम गरे । मुस्ताङमा चिनिएका ठेकेदारमा पर्ने उनी राजनीति सँगसँगै ठेक्कापट्टा, ट्राभल एजेन्सी र होटल व्यवसायमा सक्रिय छन् । एमाले अध्यक्ष केपी ओली गत साउन २९ मा जोमसोम आउँदा उनलाई पार्टी प्रवेश गराएका थिए ।
‘मेरो वर्षौंदेखिको सपना पूरा भएको छ, अब जनताको सपना पूरा गर्न खटिनेछु,’ विजयी भएपछि तुलाचनले भने, ‘मेरो जितमा हार्नेले निराश हुनुपर्ने कारण देखेको छैन । म सबैलाइ समेटेर लैजान्छु ।’ उनले तीतामीठा कुरा बिर्सेर जिल्लाको विकासमा लागिपर्ने बताएका छन् । ‘म धेरै बोल्न जान्दिनँ तर बोलेको कुरा पूरा गर्नेछु,’ उनले भने । 
तुलाचनले चुनाव प्रचारमा जिल्लाको विकासका विभिन्न योजना अघि सारेका थिए । ‘कोरलासम्म सडक पुर्‍याउने, नाका खुलाउन पहल गर्ने, पर्यटन आगमनमा वृद्धि गर्ने, पदमार्ग निर्माण गर्ने, मानसरोवर जान सरकारसँग अनुमतिका लागि माग राख्नेलगायत योजनाअनुसार मैले चुनाव जितेको हुँ । यो काम गरेर देखाउनेछु,’ उनले भने ।

 

प्रकाशित : मंसिर २३, २०७४ ०८:२६
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT