अख्तियारको निर्देशन अवज्ञा गर्दै उल्टै पत्र

एमयू सहायक डिन नियुक्ति विवाद
उपकुलपति उपेन्द्रकुमार कोइरालाले नियमविपरीत उपप्राध्यापक तहका वीरेन्द्र खड्कालाई सहायक डिन बनाएपछि अख्तियारमा उजुरी परेको थियो 
प्रकाश अधिकारी

सुर्खेत — इन्जिनियरिङ संकायको सहायक डिन नियुक्ति प्रक्रिया सच्याउन अख्तियार दुरुपयोग अनुसन्धान आयोगको निर्देशन अवज्ञा गर्दै मध्यपश्चिमाञ्चल विश्वविद्यालय (एमयू) ले उल्टै अख्तियारलाई पत्र पठाएको छ ।

आयोगको सुर्खेतस्थित कार्यालयलाई पत्राचार गर्दै निर्देशन नमान्ने जवाफ फर्काएको विश्वविद्यालयले नियुक्ति प्रक्रियाको सम्मान गर्नसमेत आग्रह गरेको छ ।
‘विश्वविद्यालय स्वायत्त र स्वतन्त्र संस्था हो । सहायक डिन नियुक्तिको स्पष्ट योग्यता अन्य विश्वविद्यालयसँग पनि छैन,’ पत्रमा भनिएको छ, ‘विश्वविद्यालयको मर्म र भावना बुझेर निर्णयलाई सम्मान गर्न अनुरोध छ ।’
उजुरी परेको झन्डै १० महिनापछि आयोगले विश्वविद्यालयलाई डिन नियुक्ति प्रक्रिया सच्याउन निर्देशन दिएको हो । एमयू कार्यकारी परिषद्ले आवश्यक पदहरूको योग्यतालाई विनियम, निर्देशिका र कार्यविधि बनाई व्यवस्थित गर्नुको साटो पटके निर्णयका आधारमा फेरबदल गर्दै इन्जिनियर वीरेन्द्र खड्कालाई सहायक डिन नियुक्त गरेको आयोगको ठहर छ ।
कार्यकारी परिषद्ले २०७३ फागुन २ गते
खड्कालाई दुई वर्षका लागि सहायक डिन नियुक्त गरेको थियो । सरकारी विश्वविद्यालयमा कम्तीमा १० वर्ष शिक्षण सेवा गरी अनुसन्धानरत काम गरेको र सहप्राध्यापक तहको व्यक्ति हुनुपर्ने प्रावधान कुल्चँदै उपकुलपति प्राडा. उपेन्द्रकुमार कोइरालाले दलीय भागबन्डा मिलाउन तत्कालीन काठमाडौं इन्जिनियरिङ कलेजका उपप्राध्यापक खड्कालाई सहायक डिन बनाएका थिए । खड्काले सन् २०१६ मा इन्जिनियरिङमा स्नातकोत्तर (एमई) गरेलगत्तै त्यसको एक वर्षपछि अर्थात् २०१७ फेब्रुअरीमा नियुक्ति पाएका थिए । अख्तियारले व्यक्तिअनुकूल मापदण्डको सट्टा साझा मापदण्ड बनाउनुपर्ने जनाएको छ । ‘यस किसिमको क्रियाकलापले संस्थामा स्थिरिता नहुने र स्वेच्छचारिता बढ्ने हुनाले कार्यकारी परिषद्को उक्त निर्णय संशोधन गर्न आग्रह गर्दछौं,’ अख्तियारको पत्रमा उल्लेख छ । मध्यपश्चिमाञ्चल विश्वविद्यालयको संगठन तथा शैक्षिक प्रशासनिक नियमावली ०५९ को नियम १६५ मा डिनको योग्यतासँग अनुकूल हुने गरी सहायक डिनको नियुक्ति हुनुपर्नेमा नियमावलीविपरीत नियुक्ति भएकोमा उक्त निर्णय संशोधन गर्न सुझाव दिएको हो । यसअघि विश्वविद्यालय पदाधिकारीले सहायक डिन नियुक्ति वैधानिक भएको जिकिर गर्दै आएका थिए ।
अख्तियारको निर्देशन नटेरेको भन्दै आन्दोलनरत विद्यार्थी संगठनले विश्वविद्यालयप्रति आपत्ति जनाएका छन् । अनेरास्ववियुका जिल्ला अध्यक्ष धुपेन्द्र शाहीले स्वायत्त संस्थाका नाममा एमयू पदाधिकारीले मनोमानी गरेको आरोप लगाए । इन्जिनियरिङ संकायका विद्यार्थी निकुञ्ज पाण्डेले अख्तियारले स्पष्ट रूपमा सहायक डिन हटाउन भनिसक्दासमेत विश्वविद्यालय पदाधिकारीले अटेरी गरेको भन्दै आक्रोश पोखे । ‘लाखौं तिरेर इन्जिनियरिङ पढ्ने विद्यार्थीको भविष्यलाई पदाधिकारीले आफ्नो स्वार्थपूर्तिको माध्यम बनाएका छन्,’ पाण्डेले भने ।

प्रकाशित : पुस २९, २०७४ ०७:३८
प्रतिक्रिया
पठाउनुहोस्

घटेन चिसो

कठ्यांग्रिएर रौतहट, सप्तरी र धनुषामा थप ११ को मृत्यु
कान्तिपुर टिम

काठमाडौँ — पछिल्ला दुई दिनमा रौतहटमा जाडोले कठ्यांग्रिएर थप पाँच जनाको मृत्यु भएको छ । माधवनारायण–४ बिसुनपूर्वा निवासी विक्रम राय यादवकी एक वर्षीया छोरी रेखाकुमारी, कटहरिया नगरपालिका–६ बस्दै आएकी धुपलीदेवी साह, बौधीमाई नगरपालिका–९ अजगैबीका ५५ वर्षीय रामचन्द्र साह, गढीमाई नगरपालिका–९ धरमपुरका ७४ वर्षीय रामवृक्ष साह र सोही नगरपालिका–७ धनाडीका ६५ वर्षीय भिक्षु ठाकुरले ज्यान गएको हो ।

न्यानो लुगा माग्दै शुक्रबार जिल्ला समन्वय समिति आइपुगेका रौतहटको गौर नगरपालिका–९ सिरिसियाका बासिन्दा ।

यी पाँचैजनाको कठ्यांग्रिएर मृत्यु भएको जिल्ला प्रहरी कार्यालयका प्रवक्ता डीएसपी रामकुमार दानीले जानकारी दिए । योसहित दुई सातायता जिल्लामा चिसोकै कारण १६ जनाले ज्यान गुमाएका छन् । मृतकमध्ये अधिकांश बाढीले घरबारविहीन बनेकाहरू छन् । ‘बाढीले घरबारविहीन बनेकाहरू जाडोको मारमा परेका हुन्,’ डीएसपी दानीले भने, ‘बाढीले दिएको पीडाबाट सम्हालिन नपाउँदै उनीहरू जाडोको सिकार बन्न बाध्य भए ।’
जाडोले सबैभन्दा बढी दलित समुदाय मारमा परेको गौर–९ सिरिसियाकी मोहरमतीदेवी पासवानले बताइन् । ‘सबै विपत् हामीमाथि नै आइलागेको छ,’ उनले भनिन्, ‘बाढीले सबै बगायो । एक जोर कपडासमेत बचेन । अहिले जाडोले कामिरहेका छौं ।’ अहिलेसम्म कतैबाट राहत पाउन नसकेको उनको गुनासो छ । शुक्रबार दिनभरि पनि यहाँ शीतलहर हटेन । चिसोकै कारण सर्वसाधारण घरबाहिर निस्कन सकेका छैनन् ।
यसैबीच प्रशासनले जाडोकै कारण ज्यान गुमाउनेका परिवारलाई १ लाख रुपैयाँ राहत दिने भएको छ । केन्द्रकै निर्णयमा पीडित परिवारलाई उक्त रकम दिन लागिएको निमित्त प्रजिअ गणेश अधिकारीले जानकारी दिए । बाढीपीडितलाई तत्कालीन राहत स्वरूप २५ हजार रुपैयाँका दरले उपलब्ध गराउने गरी केन्द्रले परिपत्र गरेको पनि उनले बताए ।
‘पीडितलाई जोगाउन हामी गम्भीर छौं,’ उनले भने, ‘न्यानो कपडा गाउँमा पुर्‍याउने काम भइरहेको छ ।’ शुक्रबार जिल्लाका १८ वटै स्थानीय तहलाई १ सय ५५ वटाका
दरले ज्याकेट पठाइएको र केन्द्रबाट थप २ हजार ८ सय थान ज्याकेट आउने अधिकारीले जानकारी दिए ।
रोकिएन शीतलहर
सप्तरीमा बिहीबार र शुक्रबार गरी थप पाँच जनाको चिसोकै कारण मृत्यु भयो । ज्यान गुमाउनेमा सुनसरीको इनरुवा–१ घर भएका ४० वर्षे ढुण्डीराज पोखरेल, तिलाठी कोइलाडी–४ की ७० वर्षीया श्यामादेवी सिंह, छिन्नमस्ता–२ की ५२ वर्षीया सरोदेवी मुखिया, सोही स्थानकी ७० वर्षीया सरस्वतीदेवी साह र हनुमाननगर कंकालिनी–१ की ६० वर्षीया शान्तिदेवी यादव छन् ।
पोखरेल शुक्रबार बिहान हनुमाननगर कंकालिनी–१ कोसी ब्यारेजमा जाडोले कठ्यांग्रिएर मृत अवस्थामा फेला परेको प्रहरी निरीक्षक हेमन्त भण्डारीले जानकारी दिए । बिहीबार साँझसम्म स्वस्थै रहेकी सिंहपनि बिहान मृत फेला परेको तिलाठी कोइलाडी गाउँपालिकाका अध्यक्ष सतीशकुमार सिंहले बताए । बाँकी तीनको पनि कठ्यांग्रिएरै ज्यान गएको प्रहरी निरीक्षक भण्डारीले जनाए ।
योसहित जिल्लामा चिसोले ज्यान गुमाउनेको संख्या २५ पुगेको छ । शुक्रबार केहीबेर मधुरो घाम लागे पनि चिसो हावा चल्ने क्रम नरोकिएकाले शीतलहरको प्रभाव कायमै रह्यो । प्रजिख भागीरथ पाण्डेले जनचेतना अभावमा जाडोका कारण ज्यान गुमाउनेको संख्या बढिरहेको बताए । घरमा भएका लुगा पनि नलगाउने, पातलो लुगा लगाएर चिसो हावामा बाहिर निस्कने गरेकाले पनि जाडोको चपेटामा पर्ने गरेको उनले जनाए । ्
जाडोबाट जोगिन जनचेतना जगाउनका लागि स्थानीय तहका प्रतिनिधहिरूलाई आग्रह गरिँदा उनीहरूले वास्ता नगरेको पाण्डेको गुनासो छ । ‘विपन्न बस्तीमा दैनिक न्यानो कपडा वितरण जारी छ,’ उनले भने, ‘विभिन्न संघसंस्थाको सहयोगमा हालसम्म १० हजार थान ब्लाङकेट बाँडिसकिएको छ ।’ मौसममा सुधार नभएपछि मानिससँगै पशु चौपायाको पनि बिजोग भएको छ । ‘एक सातादेखि गाईबस्तु चराउन लग्न सकिएको छैन,’ तिलाठी कोइलाडी–८ का शिवकुमार मण्डलले भने, ‘गोठमै थन्किएका छन्, चिसो हावाका कारण बाहिर निस्कने अवस्था छैन ।’ राजविराजस्थित गजेन्द्रनारायण सिंह सगरमाथा अञ्चल अस्पताल र ग्रामीण क्षेत्रका स्वास्थ्यचौकीमा चिसोका बिरामीको चाप बढेको छ । दैनिक १५ जना भन्दा बढी चिसोका बिरामी आउने गरेको अञ्चल अस्पतालले जनाएको छ । बिरामी पर्नेमा बालबालिका बढी छन् ।
छैन ठोस योजना
धनुषामा पनि जाडोले कठ्यांग्रिएर थप एकको मृत्यु भएको छ । धनुषाधाम नगरपालिका–९ नौसयबिघाकी २२ वर्षीया मञ्जु यादवका चार महिने छोराको मृत्यु भएको हो । बालकलाई आमाले पिठ्युँमा बोकेर धारापानीबाट नौसयबिघा ल्याउँदै गर्दा बाटैमा मृत्यु भएको प्रहरी उपरीक्षक चक्रबहादुर सिंहले जानकारी दिए ।
तीन सातादेखि जारी शीतलहर, हुस्सु र पश्चिमी हावाका कारण जिल्लाको जनजीवन कष्टकर बन्दै गए पनि सरोकारवाला निकायले ठोस योजना अघि सार्न सकेका छैनन् । केही गाउँपालिका र नपाले पीडितहरूका बस्तीछेउ घुर बाल्ने व्यवस्थासम्म गरेका छन् । आगो ताप्ने क्रममा जीउमा सल्किँदा बिहीबार कमला नपा–३ की ६० वर्षीया मनोरिया देवी साह तथा हंसपुर नपा–८ की २३ वर्षीया सुजान महरा घाइते भएका छन् । उनीहरूलाई जनकपुर अञ्चल अस्पताल भर्ना गरिएको छ । एसपी सिंहका अनुसार सुजानको अवस्था चिन्ताजनक छ ।
चिसोका कारण बजार सुनसान छन् । चार दिनदेखि जनकपुर हवाई अडामा कुनै पनि विमान अवतरण गरेका छैनन् । हवाई अड्डास्थित जल तथा मौसम विज्ञान विभाग फिल्ड अफिस जनकपुरका अनुसार एक सातायता यहाँको न्यूनतम तापक्रम ५ देखि ८ डिग्री तथा अधिकतम १५ डिग्री सेल्सियसको बीचमा रेकर्ड गरिएको छ ।

प्रकाशित : पुस २९, २०७४ ०७:३८
पूरा पढ्नुहोस्
प्रतिक्रिया
पठाउनुहोस्