काजका प्रहरी फिर्ता हुने

उपाध्यायले शान्तिसुरक्षा सम्झौताहीन विषय भएकाले कसैको दबाबमा नपरी काम गर्न आफूमातहत कर्मचारीलाई निर्देशन दिएका छन् । उनले शान्तिसुरक्षालाई मजबुत हुने कुरामा विश्वस्त हुन जिल्लावासीलाई आग्रह पनि गरे । भौतिक संरचना निर्माणले प्रहरीको मनोबल बढ्ने बुझाइ रहेको छ ।

प्रहरी हाताभित्र अधिकृत तथा जवान ब्यारेक निर्माण गरिएको हो । ३ हजार ६ सय ६९ वर्गफिटमा फैलिएको भवन २ करोड २३ लाख ३५ हजारमा बनेको छ । यो साढे दुई तलाको रहेको छ । भवनसँगै एकतले शौचालय पनि यही बजेटबाट निर्माण भएको मुख्य प्राविधिक डीएसपी ईश्वर थापाले जनाए । यसअघि प्रहरी अधिकृत तथा जवान काठ, माटो र ढुंगाले बनेको साँघुरो ब्यारेकमा बस्तै आएका थिए । भवन बनिसकेकाले पुरानो संरचना हटाउने ताप्लेजुङका प्रहरी नायब उपरीक्षक ज्ञानेन्द्रबहादुर बस्नेतले जानकारी दिए । नवनिर्मित भवनमा प्रहरी जवानका लागि दुई, हवल्दारका लागि एक, जुनियर प्रहरी अधिकृतका लागि एक, महिला ब्यारेक कक्ष एक रहेको छ ।

कार्यक्रममा जिल्लाबाट निर्वाचित जनप्रतिनिधिले वडास्तरसम्म प्रहरी एकाइ पुर्‍याउन अनुरोध गरेका थिए । जिसस प्रमुख घनेन्द्र मादेनले गाउँमै सिंहदरबार पुगेको चर्चा चलिरहँदा प्रहरीको उपस्थितिलाई पनि तल्लो तहसम्म पुर्‍याउन आग्रह गरे । फुङलिङ नगरपालिका प्रमुख छत्रपति प्याकुरेलले प्रहरी र नागरिकबीचको सम्बन्ध सुमधुर हुनुपर्ने बताए । प्याकुरेलले आवश्यकताअनुसार प्रहरी जनशक्ति थप गर्न र भएका ठाउँमा आवश्यक उपकरण पुर्‍याउन अनुरोध गरे ।