तीन नगरका दोस्रो नगरसभा सम्पन्न

कान्तिपुर संवाददाता

काठमाडौँ — जिल्लाका तीनवटा नगरपालिकाले दोस्रो नगरसभा सम्पन्न गरेका छन् । तारकेश्वर, नागार्जुन र शंखरापुर नगरपालिकाले हिउँदे नगरसभा गरी विभिन्न निर्णय तथा कानुन निर्माण गरेको जनाएका छन् ।

नागार्जुनकी प्रमुख प्रशासकीय अधिकृत लक्ष्मी पाण्डे गौतमले पुसको पहिलो सातामै दोस्रो नगरसभा सम्पन्न गरी विषयगत शाखा गठन गरिएको जानकारी दिइन् । उनले भनिन्, ‘नगरपालिकामा समायोजन भएका कार्यालयहरूको शाखा गठन गरियो । पहिले निर्देशन नआइसकेकाले शाखाहरूका लागि बजेट छुट्याइएको थिएन, त्यो पनि छुट्याइयो ।’ कर तथा राजस्वको दायरासमेत घटबढ भएको उनले बताइन् ।

तारकेश्वर नगरपालिकाले पनि यो नगरसभाबाट समिति गठन र दुईवटा ऐन संशोधन गरेको जनाएको छ । नगर कार्यपालिका प्रवक्ता विदुर सापकोटाले कार्यान्वयनका क्रममा देखिएका अप्ठ्याराले गर्दा विनियोजन र आर्थिक ऐन संशोधन गरिएको जानकारी दिए । माघ १२ गते सार्वजनिकीकरण कार्यक्रममा बोल्दै सापकोटाले भने, ‘विषयगत कार्यालयबाट आएका कर्मचारी र जनप्रतिनिधि सम्मिलित १० समिति गठन गर्‍यौं ।’

शंखरापुर नगरपालिकामा दोस्रो नगरसभाबाट न्यायिक समिति गठन हुनुका साथै आवश्यक कानुन पारित भएपछि योजना सम्झौता भई विकास निर्माणका कार्य अघि बढिरहेको उपप्रमुख शुक्रलक्ष्मी श्रेष्ठले बताइन् । ‘माघ ३ गते नै हिउँदे नगरसभा सम्पन्न गरिसक्यौं,’ श्रेष्ठले भनिन्, ‘केही विषयमा बजेट विभाजन गर्‍यौं । जसले फोहोरमैला व्यवस्थापनदेखि महिलालक्षित कार्यक्रममा पनि बजेट खर्च गर्न सहज भएको छ ।’ केही नगरले भने दोस्रो नगरसभाको विषयमा निर्णय लिएका छैनन् । बूढानीलकण्ठ नगरपालिकाकी उपप्रमुख रमा राईले नगरसभा कहिले गर्नेबारे निर्णय भइनसकेको बताइन् । चन्द्रागिरीमा पनि नगरसभा कहिले गर्ने टुंगो लाग्न सकेको छैन । ‘कहिले गर्ने ठेगान छैन,’ उपमेयर लिसा नकर्मीले भनिन् ।

कीर्तिपुरमा २९ गते गर्नेबारे छलफल भइरहेको उपमेयर सरस्वती खड्काले जानकारी दिएकी छन् । दक्षिणकालीमा फागुन सुरुआततिर गर्ने तयारी भइरहेको छ । कार्यपालिकाको बैठक शुक्रबार बस्ने र यस विषयमा निर्णय लिइने उपप्रमुख वसन्ती डंगोल तामाङले बताइन् । फागुन मध्यमै गर्ने गरी गोकर्णेश्वरले तयारी थालेको यद्यपि औपचारिक निर्णय नभएको नगरपालिकाले जनाएको छ । कानुन नभएकाले योजना सम्झौता नभएकाले यथाशीघ्र नगरसभा गरिने उपमेयर शान्ति नेपालले बताइन् । टोखा नगरपालिकामा भने दोस्रो नगरसभाबारे अन्योल छ । ‘हामीले पहिलो असारमा गर्‍यौं । विशेष नगरसभा भदौमा गरिसकेका छौं । त्यसैले दोस्रो गर्नैपर्छ कि नगर्ने भन्ने विषयमा छलफल हुन बाँकी नै छ,’ उपमेयर ज्ञानमाया डंगोलले भनिन् । कागेश्वरी मनोहरामा अहिले दोस्रो नगरसभाबारे कुनै छलफल नभएको नगरपालिकाले जनाएको छ । उपमेयर बिन्दु पुडासैनी सिंखडाले भनिन्, ‘कार्यपालिका बैठकबाटै आवश्यक कार्य भइरहेका छन् । नगर्दा पनि हुन्छ भन्ने बुझेकाले खासै आवश्यकता महसुस गरेका छैनौं ।’

स्थानीय सरकार सञ्चालन ऐनमा वर्षमा दुईपल्ट नगरसभा गर्नुपर्ने उल्लेख छ । संघीय मामिला तथा स्थानीय विकास मन्त्रालयका प्रवक्ता रुद्रसिंह तामाङले पहिलो वर्षे नगरसभाबाट बजेट पास गर्ने र हिउँदेबाट आवश्यक विधेयक पास गरिने बताए । ‘जतिपल्ट सभा गर्‍यो उति नगरपालिकालाई नै सजिलो हुने हो,’ प्रवक्ता तामाङले भने, ‘एकातिर नगरपालिकालाई चाहिएको कानुन छैन भन्ने र अर्कोतिर कानुन पास गराउन आवश्यक पर्ने सभा पनि नगर्ने भन्नुभएन ।’ संघ र प्रतिनिधिसभा झैं कम्तिमा पनि दुईपल्ट सभा डाक्नुपर्ने तामाङले बताए ।

प्रकाशित : माघ २६, २०७४ ०८:२५
प्रतिक्रिया
पठाउनुहोस्

संसदीय दलको नेता : माओवादी र कांग्रेसले टुंग्याए, एमालेमा सकस

प्रताप विष्ट, नगेन्द्र अधिकारी

हेटौँडा — माओवादी केन्द्र र नेपाली कांग्रेसले प्रदेश नम्बर ३ को संसदीय दलको नेता सर्वसम्मत चयन गरे पनि ठूलो दल नेकपा एमालेलाई भने सकस भएको छ । माओवादीले पोलिटब्युरो सदस्य धादिङका शालिकराम जमकट्टेललाई संसदीय दलको नेता चयन गरेको छ ।

दलको उपनेतामा पोलिट ब्युरो सदस्य मकवानपुरकी कुमारी मोक्तान छनोट भएकी छन् । कांग्रेसले ३ नम्बर प्रदेश संसदीय दलको नेता सर्वसम्मत टुंग्याएका छन् ।

दुवै दलको काठमाडाैंमा बिहीबार बसेको संसदीय दलको बैठकले दलको नेता छनोट गरेको हो । पार्टी कार्यालयमा बसेको बैठकले प्रमुख सचेतकमा बुद्धिमान माझी र सचेतकमा प्रतिमा श्रेष्ठलाई चयन गरेको सांसद मोक्तानले जानकारी दिइन् । ३ नम्बर प्रदेशमा माओवादी केन्द्रका २३ जना सांसद छन् ।

कांग्रेसले ३ नम्बर प्रदेशको संसदीय दलको नेतामा इन्द्रबहादुर बानियाँलाई सर्वसम्मत चयन गरेको छ । बिहीबार बसेको बैठकले बानियाँलाई सर्वसम्मत दलको नेता चयन गरेको हो । बानियाँ मकवानपुर क्षेत्र नम्बर २ अन्तर्गत ‘ख’ बाट निर्वाचित भएका थिए । कांग्रेसले केन्द्रीय सदस्य महालक्ष्मी उपाध्यायलाई प्रदेश नम्बर ३ को संसदीय दल गठन गर्ने जिम्मेवारी दिएको थियो । प्रदेशमा कांग्रेसका २१ सांसद छन् । विधान आएपछि संसदीय दल कार्यसमिति गठन हुने केन्द्रीय सदस्य उपाध्यायले जानकारी दिइन् । पूर्व गृहराज्य मन्त्रीसमेत रहेका बानियाँ कांग्रेस मकवानपुरका सभापति पनि हुन् ।

प्रदेशको ठूलो दल एमालेमा भने संसदीय दलको नेता चयनमा सकस देखिएको छ । संसदीय दलको नेता नै मुख्यमन्त्री हुने भएकाले धेरै आकांक्षी छन् । सर्वसम्मत नभए एमालेले शुक्रबार निर्वाचनमार्फत टुंग्याउने तयारी गरेको काभ्रेका सांसद लक्ष्मण लम्सालले बताए ।

एमालेमा पार्टी उपाध्यक्ष अष्टलक्ष्मी शाक्य, पोलिटब्युरो सदस्य राजेन्द्र पाण्डे, सांसद डोरमणि पौडेल, सानु श्रेष्ठ, केशव स्थापित आकांक्षी छन् । आकांक्षी सबैले आफू नै संसदीय दलको नेता निर्वाचित भएर मुख्यमन्त्री बन्ने दाबी गर्दै आएका छन् । ‘पार्टीमा म नै सिनियर हुँ र प्रदेश संयोजक पनि हो,’ मुख्यमन्त्रीकी दाबेदार रहेकी सांसद अष्टलक्ष्मी शाक्यले भनिन्,‘सर्वसम्मत भए मात्रै पार्टी रप्रदेशलाई पनि राम्रो हुन्छ ।’ एमालेका ५८ सांसदमध्ये अध्यक्ष केपी ओली र वरिष्ठ नेता माधव नेपाल समूहलेआफ्नो बहुमत रहेको दाबी गर्दै आएका छन् ।

नेपाल समूहबाट पार्टी महाधिवेशनमा उपाध्यक्ष उम्मेदवार बनेर पराजित भएका राजेन्द्र पाण्डे पनि मुख्यमन्त्रीको दौडमा छन् । मुख्यमन्त्री बनाएको खण्डमा ‘टिम परिवर्तन’ गर्ने संकेत गरेका पाण्डेले आफूलाई पार्टी अध्यक्ष केपी ओलीको समर्थन रहेकाले जित्ने दाबी गरे । ‘सहमति भएन भने चुनाव लडेर जित्छु,’ पाण्डेले कान्तिपुरसँग भने, ‘मुख्यमन्त्री म नै बन्ने हो, पार्टी अध्यक्षको पनि मलाई नै समर्थन छ ।’

ओली समूहले आफ्नो स्पष्ट बहुमत भएकाले आफूले समर्थन गरेको उम्मेदारले जित्ने दाबी गर्दै आएको छ । अर्का दाबेदार डोरमणि पौडेलले शाक्य र पाण्डेबीच प्रतिस्पर्धा हुँदा त्यसको फाइदा आफूलाई हुने दाबी गरे । ‘दुई जनाको बीचमा प्रतिस्पर्धा हुने हो, मैले चुनाव जित्छु,’ उनले भने, ‘सहमति भयो भने पनि मेरै नाममा हुने हो ।’ दुई जना मात्रै उम्मेदवार हुने स्थितिमा ओली समूह शाक्यबाहेकका उम्मेदवारलाई मतदान गर्नेछन् । सम्मान, भूमिका र हैसियत बराबर हुने भन्दै एक पक्षलेशाक्यलाई सभामुख बन्न आग्रहसमेत गर्दै आएको छ ।

ओलीले पाण्डेलाई समर्थन गरे डोरमणि सभामुख बन्ने स्रोतले जानकारी दिएको छ । सिन्धुपाल्चोकका प्रदेश सांसद अरुण नेपालले संसदीय दलको नेतामा सहमति हुने दावी गर्दर्ै भने, ‘सहमति हुन सकेन भने निर्वाचन हुन्छ ।’

संघीय सचिवद्वारा निरीक्षण
संघीय संसद् सचिवालय काठमाडौंका सचिव हिमलालसुवेदीले ३ नम्बर प्रदेशसभा सचिवालयको बिहीबार निरीक्षणगरेका छन् । हेटौँडा उपमहानगरपालिका–१० स्थित प्रदेशसभा सचिवालयको तयारीका बारेमा निरीक्षण गर्न आएका सुवेदीले संघीय संसद् सचिवालयको भन्दा कुनै पनि कमी नगर्न निर्देशन दिएका छन् । मुख्यमन्त्री कार्यालयका सचिव रमेश सिवाकोटी, संसद् सचिवालय काठमाडौँबाट प्रदेशसभा हलको व्यवस्थापन गर्न आएका सहसचिव डा.रोजनाथ पाण्डे, प्रजिअ चक्रबहादुर बुढा, सहरी विकास तथा अनुसन्धान तालिम केन्द्रका सुदीप आचार्यसँग संसद् सचिवालय, प्रदेश मन्त्रालय र आवासको व्यवस्थापनसम्बन्धी जानकारी लिएका थिए ।

विशेषगरी प्रदेशसभाको सचिवालयको व्यवस्थित ढंगले तयारी गर्न निर्देशन दिएको सहसचिव रोजनाथ पाण्डेले बताए । मध्यमाञ्चल क्षेत्रीय शिक्षा निर्देशनालयको भवनमा सञ्चालित प्रदेशसभा सचिवालयमा शनिबार प्रदेश संसद्को अधिवेशन बस्दै छ । उक्त दिन सभामुखको निर्वाचन गर्ने कार्यक्रम तोकिएको छ ।

प्रकाशित : माघ २६, २०७४ ०८:२४
पूरा पढ्नुहोस्
प्रतिक्रिया
पठाउनुहोस्