कात्तिकसम्ममा साल्मेडाँडाको गोर्खा स्मारक बनिसक्ने 

कान्तिपुर संवाददाता

काठमाडौँ — बेलायतबाट गोर्खा सैनिकमाथि भएको विभेदको प्रतिकका स्याङ्जाको साल्मेडाँडामा निर्माणाधिन गोर्खा स्मारक आगामी कात्तिकसम्ममा पुरा हुने बताइएको छ ।

गोर्खा भूतपूर्व सैनिक संघ (गेसो) का संस्थापक अध्यक्ष तथा गोर्खा स्मारक कोषका अध्यक्ष पदमबहादुर गुरुङले सोमबार पत्रकार सम्मेलन गरी स्मारक बनाउनका लागि आवश्यक प्रक्रिया अघि बढेको भन्दै आगामी कात्तिमसम्ममा बन्ने जानकारी दिएका हुन् ।

उनले स्मारिकाको उद्घाटन नेपालका र बेलायतका प्रधानमन्त्रीले संयुक्त रुपमा उद्घाटन गर्नेसमेत उल्लेख गरे ।

पहिलो र दोस्रो विश्वयुद्धमा नेपालीहरुलाई होमेर बेलायतले मानवअधिकार विरुद्धको काम गरेको भन्दै वीर गोर्खालीको सम्झनामा स्मारक बनाउन लागिएको हो । गोर्खा स्मारक बनाउनका लागि गोर्खाली समुदाय र नेपाल सरकारले सहयोग गर्दै आएको छ ।

गोर्खा स्मारक बनाउनका लागि गेसोका वर्तमान अध्यक्ष कृष्णकुमार राई, देवीमाया पुन र प्रेम गुरुङको अथक मेहनत र परिश्रम रहेको बताउँदै अध्यक्ष गुरुङले यो अभियान सबै गोर्खालीहरुको सामूहिक अभियान भएको स्पष्ट पारे ।

गेसोको निरन्तर २७ वर्ष नेतृत्व गर्दै गोर्खा भूपूहरुलाई समान न्यायका लागि पदमबहादुरले आन्दोलनको नेतृत्व गर्दै आएका थिए । पदमबहादुरले दुई वर्षअघि गेसोका वरिष्ठ उपाध्यक्ष कृष्णकुमार राईलाई नेतृत्व हस्तान्तरण गरका थिए ।

गोर्खालीमाथि भएको विभेद, युद्धमा मारिएका र बेपत्ता पारिएका गोर्खालीहरुको सम्मानका लागि आफूले नयाँ अभियान सञ्चालन गर्ने पनि अध्यक्ष गुरुङले जानकारी दिए ।

प्रकाशित : जेष्ठ २८, २०७५ १७:०८
प्रतिक्रिया
पठाउनुहोस्

रत्न पुस्तक अनलाइन पद्धतिमा

कान्तिपुर संवाददाता

काठमाडौँ — पुस्तक प्रकाशन तथा विक्री–वितरणमा सात दशक लामो इतिहास बोकेको रत्न पुस्तक भण्डारले समयानुकुल बजार प्रबन्ध खोज्दै अनलाइन सेवाबाट अन्तर्राष्ट्रिय बजारमा पुस्तक विक्री वितरण गर्ने भएको छ ।

भण्डारका प्रबन्धक गोविन्दप्रसाद श्रेष्ठका अनुसार, अहिलेसम्म भाषा, साहित्य विधामा मात्रै १ हजारभन्दा बढी टाइटलमा पुस्तक प्रकाशित भैसकेको छ । भण्डारबाट प्रकाशित पाठ्यक्रम पुस्तकको संख्या पनि उत्तिकै छ ।

‘समयानुकुल पद्धतीमा एउटा पाठक पसलसम्म गएर पुस्तक किनिरहनुपर्ने स्थिती र अवस्था अब रहेन’ रत्नबुक डट कम समेत हेर्दै आएका प्रबन्धक श्रेष्ठले भने,‘कुनै पाठकले विश्वको जुनै कुनामा बसेर पनि अब रत्नबुक्सको अनलाइनबाट स्पिड–पोष्टमा चाहेको पुस्तक मगाउन सक्छ ।’

पुस्तक पठाउन लाग्ने शुल्क र पुस्तक मूल्यको न्यूनतम हिसाबमा १ केजीसम्म तौलका किताब मगाउँदा १४ डलर र आधा केजीभन्दा तलका पुस्तक मगाउँदा ११ डलर शुल्क अनलाइनबाट तिर्नुपर्ने प्रबन्ध गरिएको छ । यस्तैगरी, बढीमा ४ कजेसम्मका पुस्तकका लागि ३० डलर शुल्क तिर्नुपर्ने हुन्छ ।

प्रबन्धक श्रेष्ठका अनुसार, हाल देशभित्र भने यो सेवा सञ्चालनमा ल्याइएको छैन । ‘यो सेवा सञ्चालन गरेको पछिल्लो ३ महिनामा अमेरिका, युरोपसहितका २९ देशमा रहेका नेपाली पाठकले नेपाली पुस्तकहरु मगाएका छन् ।

यो सुविधामा रत्नबाट छापिएका र अन्य सबै प्रकाशन गृहबाट प्रकाशित पुस्तकहरु खरिद गर्न सकिनेछ,’श्रेष्ठले भने । नेपाली पुस्तकलाई अन्र्तर्राष्ट्रिय बजारमा पुऱ्याउन र पुस्तक व्यवसायलाई नयाापन दिन यो सेवा सुरु गरिएको हो,’प्रबन्धक श्रेष्ठले भने ।

प्रकाशित : जेष्ठ २८, २०७५ १७:०४
पूरा पढ्नुहोस्
प्रतिक्रिया
पठाउनुहोस्