दलित अभियन्तालाई ५ लाखको अवार्ड

कान्तिपुर संवाददाता

काठमाडौँ — सुदूरपश्चिमका जिल्लामा सामाजिक न्यायका लागि संघर्षरत बैतडीकी सरस्वती नेपाली अन्तर्राष्ट्रियस्तरको अवार्डबाट बुधबार राजधानीमा सम्मानित भएकी छन् ।

बैतडीकी सरस्वती नेपाली बुधबार ‘सामाजिक न्यायका लागि दर्नाल अवार्ड–२०१८’ ग्रहण गरेपछि । तस्बिर : कान्तिपुर

दशरथचन्द नगरपालिका–४ की उनलाई ५ लाख रुपैयाँ राशिको ‘सामाजिक न्यायका लागि दर्नाल अवार्ड–२०१८’ प्रदान गरिएको हो ।

प्रदेश नम्बर ७ का दलित र महिला अधिकारका लागि उनले नेतृत्वदायी भूमिका निर्वाह गर्दै आएकी छन् । ३७ वर्षीया नेपालीले छुवाछूत प्रथाविरुद्ध कक्षा ५ मा पढ्दा नै विद्रोह थालनी गरेकी हुन् । हलिया आन्दोलन, बालीघरे (खलो) प्रथा र सिनो प्रथा न्यूनीकरण गर्न पनि उनले बैतडी र आसपास जिल्लामा संघर्ष गरिन् । राष्ट्रिय सभागृहमा सम्मान ग्रहण गर्दै उनले भनिन्, ‘समाजमा जातीय विभेद अझै छ । चुप लागेर सहनु वा विद्रोह गर्नुको विकल्प छैन ।’

Yamaha

२०५८ सालमा दलित समुदाय बैतडीको जगन्नाथ बाबाको मन्दिर प्रवेश गर्ने आन्दोलनको उनले अगुवाइ गरेकी थिइन् । मन्दिरमा चढाएको बलिको सिनो दलित समुदायलाई खुवाउने कुप्रथाविरुद्ध आवाज उठाइन् । संघर्ष गर्दै स्नातकसम्मको अध्ययन पूरा गरिन् । ‘मानिसलाई जात, लिंग, वर्ग, भूगोलका आधारमा विभेद गर्न हुँदैन भनेर संघर्षमा जुटें, अझै सक्रिय हुनेछु,’ उनले भनिन्, ‘राज्यले नीति–कानुन बनाएको छ तर प्रभावकारी कार्यान्वयन नहुँदा विभेद र कुप्रथा कायमै छ ।’

दलित आन्दोलनका अगुवा सुवास दर्लानकी आमा सरिताले अवार्ड प्रदान गरेकी हुन् । सुवासको ६ वर्षअघि अमेरिकामा सडक दुर्घटनामा निधन भएको थियो । उनैका नाममा अवार्ड स्थापना गरिएको हो ।

Esewa Pasal

प्रकाशित : श्रावण ३१, २०७५ ०८:२४
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

भारतले अन्तरिक्षमा मानव यान पठाउने

एपी

नयाँदिल्ली — भारतीय प्रधानमन्त्री नरेन्द्र मोदीले सन् २०२२ सम्ममा अन्तरिक्षमा मानव यान पठाउने घोषणा गरेका छन् । स्वतन्त्रता दिवसका अवसरमा बुधबार लालकिल्लाबाट सम्बोधन गर्दै मोदीले स्वतन्त्रताको ७५ औं वर्ष पूरा भएको अवसरमा राष्ट्रिय झण्डासहित भारतीय नागरिकलाई अन्तरिक्षमा पठाउने बताएका हुन् ।

भारतीय प्रधानमन्त्री नरेन्द्र मोदी बुधबार स्वतन्त्रता दिवस समारोहलाई सम्बोधन गर्दै । तस्बिर : रोयटर्स

यसपछि अन्तरिक्षमा मानव पठाउने मुलुकमा भारत चौथो बन्ने उनले बताए । यसअघि रूस, अमेरिका र चीनले अन्तरिक्षमा मानव पठाइसकेका छन् । अन्तरिक्षमा मानव पठाउने यानको केही दिनअघि परीक्षणसमेत गरिसकिएको छ । भारतीय सञ्चारमाध्यमका अनुसार अन्तरिक्ष मिसनका लागि ९ अर्ब रुपैयाँको बजेट तय गरिएको छ ।

यसअघि पहिलो भारतीयका रूपमा राकेश शर्माले सन् १९८४ मा सोभियत रकेटमार्फत अन्तरिक्षको यात्रा गरेका थिए । अन्तरिक्ष कार्यक्रममा भारत सन् १९६० को दशकदेखि सक्रिय रहँदै आएको छ । यो मुलुकले आफ्नो र अन्य देशका लागि थुप्रै भूउपग्रह पठाइसकेको छ । सन् २०१४ मा एउटा भूउपग्रह मंगल ग्रहको कक्षमा समेत सफलताका साथ पठाइसकेको छ । प्रधानमन्त्री मोदीले ४ वर्षमा आफ्नो सरकारले देशको आर्थिक सुधार एवं गरिबी तथा भ्रष्टाचार न्यूनीकरणका लागि गरेका कामको सूची प्रस्तुत गरेका थिए ।

बीबीसीका अनुसार उनले महत्त्वाकांक्षी स्वास्थ्य योजना ‘आयुष्मान भारत’ का बारेमा पनि उल्लेख गरेका थिए । आगामी २५ सेप्टेम्बरबाट सुरु गरिने बिमा आधारित यो योजनाअनुसार करिब १० करोड गरिब परिवार लाभान्वित हुनेछन् । जसअनुसार प्रतिपरिवार ५ लाख रुपैयाँको बिमा गरिने र यसबाट गरिबले सुलभ रूपमा स्वास्थ्य सेवा पाउने उनले बताए ।

यस्तै, भारतीय सशस्त्र सेनामा सर्ट सर्भिस कमिसनका माध्यमबाट नियुक्त महिला अधिकारीलाई पुरुष समकक्षी सरह परीक्षा दिएर स्थायी बनाउने घोषणा पनि मोदीले गरेका छन् । उनले जम्मु कश्मीरमा लामो समयदेखि हुन नसकेको पञ्चायत र निकाय चुनावलाई पनि तत्काल गराइने बताए ।

मोदीले तीन तलाकजस्तो कुरीति अन्त्य गर्न संसद्को चालू अधिवेशनमा विधेयक पेस गरिएको पनि बताए।

प्रकाशित : श्रावण ३१, २०७५ ०८:२२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT