मेलम्चीमा ३४ करोड लिटर थपिने

याङग्री र लार्केको डीपीआर तयार
दीपेन्द्र विष्ट

काठमाडौँ — खानेपानी तथा सरसफाइ मन्त्रालयले मेलम्ची खानेपानी आयोजनाअन्तर्गत दोस्रो चरणमा याङग्री र लार्के खोलाको विस्तृत अध्ययन परियोजना प्रतिवेदन (डीपीआर) तयार भएको जनाएको छ । डीपीआर स्पेनको परामर्शदाता कम्पनी इप्टिसाले तयार गरेको हो ।

गतवर्ष आयोजनाले दिएको एक वर्षको समयावधिभित्र परामर्शदाताले डीपीआर तयार गरी बुझाएको हो । ‘अन्तर्राष्ट्रिय विज्ञले यस विषयमा छलफल गरिराखेका छन्,’ खानेपानी मन्त्रालयका सचिव गजेन्द्रकुमार ठाकुरले भने, ‘डीपीआरका सुधार गर्नुपर्ने पक्ष समेटेर स्वीकृत गरिनेछ ।’ नर्वे, क्यानडा, भारतलगायतका मुलुकबाट विज्ञ मगाएर छलफल भइरहेको उनले बताए । तीन महिनाभित्र अन्तर्राष्ट्रिय टेन्डर आह्वानमार्फत काम सुरु गरिने उनले जनाए ।


Yamaha

सिन्धुपाल्चोकको याङग्री र लार्के खोलाबाट ३४ करोड लिटर पानी उपत्यकामा ल्याउने लक्ष्य आयोजनाको छ । यी खोलाबाट थप पानी आपूर्तिका लागि सुरुङको संरचना निर्माण सुरु भइसकेको पनि ठाकुरले बताए । मेलम्चीदेखि लार्केबीच निर्माण गर्नुपर्ने सुरुङको लम्बाइ ११ किमि छ ।


मेलम्चीको अम्बाथान (हेडवर्कस) बाट २ किलोमिटर पर लार्के खोला छ । लार्केबाट याङग्रीको मुहानसम्म २ किलोमिटर सुरुङ बनाएर ल्याइने पानी सिधै मेलम्चीको हेडवर्क अम्बाथानमा ल्याइएर मिसाइन्छ । तीनवटै खोला मेलम्ची, याङग्री र लार्केबाट गरी कुल ५१ करोड लिटर पानी अम्बाथानदेखि २६ किलोमिटर टाढाको सुन्दरीजलमा सुरुङबाट ल्याइनेछ ।


साढे ८ करोड लिटर पानी प्रशोधन गर्न सक्ने केन्द्रको निर्माण सम्पन्न भइसकेको र अर्को प्रशोधन केन्द्र पनि निर्माण भइरहेको मन्त्रालयले जनाएको छ । काठमाडौं उपत्यकामा दैनिक ३८ करोड लिटर पानी आवश्यक भए पनि १२ करोड लिटर मात्र आपूर्ति हुँदै आएको छ ।


बर्खामा भने उपत्यकामा १७ करोड लिटर पानी आपूर्ति हुन्छ । मेलम्ची खानेपानी आयोजनाका प्रमुख सूर्यप्रसाद कँडेलले याङग्री र लार्के खोलासम्म पुग्ने सडक विस्तार तथा स्तरोन्नतिको काम सुरु भइसकेको बताए । २०२१ सम्ममा ३४ करोड लिटर पानी उपत्यकामा ल्याउने लक्ष्य छ । याङग्री र लार्केबाट डाइभर्सन सुरुङमार्फत पानी आपूर्ति गर्न करिब ३० अर्ब रुपैयाँ लाग्ने अनुमान छ । एसियाली विकास बैंक (एडीबी) ले मेलम्चीको दोस्रो आयोजनामा लगानी गर्नेछ ।

पानी ३ महिनामा सुन्दरीजल
त्यसैगरी अम्बाथानदेखि सुन्दरीजलसम्मको २६ किमि सुरुङ ढलान गर्ने काम धमाधम भइरहेको छ । आयोजना प्रमुख कँडेलले ३ महिनाभित्र सुन्दरीजल प्रशोधन केन्द्रमा पानी खसाल्ने बताए ।


यो पानी समानुपातिक ढंगले उपत्यकावासीलाई वितरण गरिनेछ । हाल उपत्यकाका विभिन्न स्थानमा खानेपानीको पाइप बिछयाउने र धारा जोड्ने काम भइरहेको आयोजना कार्यान्वयन निर्देशनालय प्रमुख त्रिरेशप्रसाद खत्रीले बताए ।


खानेपानी वितरणका लागि ८० हजार धारा जडान भइरहेको खानेपानी आयोजना निर्देशनालयका निर्देशक त्रिरेशप्रसाद खत्रीले जानकारी दिए । जसमध्ये ६० हजारभन्दा बढी धारा जडान भइसकेका छन् । मंहाकालचौर, बाँसबारी, पानीपोखरी, बालाजु, खुमलटार, आरुबारी, कीर्तिपुर, कटुञ्जे र भक्तपुरमा रिजर्भ टयांकी निर्माण कार्य भइरहेको पनि उनले बताए ।


६ सय ४० किलोमिटर पाइप बिछयाइसकिएको जनाउँदै उनले सुन्दरीजलदेखि महांकालसम्म १० किमिमा पाइपमा पानी परीक्षण पनि भइसकेको बताए । उनका अनुसार परीक्षणका क्रममा बाग्मतीको प्रशोधित ३ करोड लिटर पानी महाकांल पानी टयांकीमा पठाइएको थियो ।


Esewa Pasal

प्रकाशित : भाद्र ६, २०७५ १०:४३
ADVERTISEMENT
प्रतिक्रिया
पठाउनुहोस्
ADVERTISEMENT

खोलाखोलै सडक सञ्चालन

नुवाकोट–रसुवा तथा अन्तर्राष्ट्रिय नाका खण्डमा कलभर्ट निर्माण सुस्त
कृष्ण थापा

गेर्खुटार (नुवाकोट) — तीन दिनदेखि नुवाकोट–रसुवा पासाङल्हामु मार्ग त्रिशूली–बेत्रावती खण्डको गेर्खुटारमा खोलाबाटै यातायात सञ्चालन गरिएको छ । खोलाको पानी घटेपछि रोकिएका नुवाकोट–रसुवाका सवारी मंगलबार दिउँसोबाट आवतजावत भएका छन् ।

विदुर नगरपालिकाको सिम्बुटार र गेर्खुटार जोड्ने पक्की पुल शनिबार राति बाढीले बगाएपछि यातायात अवरुद्ध भएको थियो । चीन जोड्ने नाकासमेत भएकाले अन्तर्राष्ट्रिय यातायात सम्पर्क नै टुटेको छ । मंगलबारबाट खोलाको बहाव घटेकाले खोलाबाटै सवारी चलाइएको छ । २/३ दिनमा फर्किने गरी गोसाइँकुण्ड यात्रामा निस्केका काठमाडौंका कुमार तामाङले एक दिन बढी लागेको बताए । ‘छिट्टै फर्किने गरी गोसाइँकुण्ड गयौं,’ उनी भन्छन्, ‘सडक अवरोधले चार दिन लाग्यो ।’


पुल भत्केर खोलैखोला चलाउनु पर्दा बढी सास्ती भोग्नुपरेको चालक हीरा तामाङले बताए । पासाङल्हामु मार्गको त्रिशूली खण्डको गेर्खुटार, तिरतिरे भीर, रसुवातर्फको धुन्चेपारि त्रिशूली खोला छेउ, खोप्पाङभीर, लिङलिङ, टिमुरेसम्म ५/७ घण्टा जाम हुने गरेको छ । गेर्खुटारमा अझै यातायातका साधन खोलामा फस्दा स्काभेटरको सहायताले उतारेर पठाउने गरिएको छ । भत्केको पुलदेखि ५० मिटर माथि हयुमपाइप राखेर अस्थायी कल्भर्ट बनाउन थालिए पनि काम निकै सुस्त छ । गल्छी–त्रिशूली–मैलुङ–स्याफ्रुबेंसी–रसुवागढी सडक आयोजनाले सडक छिटो खुलाउने प्रयास नगरेको स्थानीयवासीले आरोप लगाए ।


आयोजनाले हयुमपाइप राखे ठाउँ थोरै कामदार लगाएर जाली भरेको छ । ‘हयुमपाइपमाथि जम्मा गरेको ग्रावेल हाल्नुपथ्र्यो, तर हालेनन्,’ स्थानीय भन्छन्, ‘पिच गर्नलाई भनेर धेरे ग्राबेल थुपारेर राखेको छ, र पनि छिटो सक्ने सोच आयोजनाको छैन ।’


अस्थायी रूपमा खोलिएको बाटो ठूलो पानी परे पुन: बन्द हुने स्थानीय बताउँछन् । ‘हयुमपाइप राखेर पानीका बहाव कम गरी अपराह्नबाट यातायातका साधन रसुवातर्फ पठायौं,’ जिल्ला प्रहरी प्रमुख वसन्तबहादुर कुँवरले भने, ‘निर्वाध सञ्चालन हुन केही दिन लाग्ला ।’ सडक आयोजनाले भत्किएको पुलदेखि ५० मिटर दूरीमा हयुमपाइप, सिमेन्ट र जाली भर्न थालेको छ । भोलिसम्ममा जाली भर्ने काम सकिए गाडी चलाउन पनि सकिन्छ,’ एक कामदारले भने, ‘त्यसपछि यातायात वारपार गर्न सहज हुन्छ ।’


जिल्ला ट्राफिक प्रमुख शम्भुबहादुर अधिकारीका अनुसार ५ देखि ७ बजेसम्ममा सयभन्दा बढी सानाठूला गाडी रसुवातर्फ पठाइएको छ । गोसाइँकुण्डसम्म जाने बस, कन्टेनर, खाद्यान्न, निर्माण सामग्री बोकेका गाडीमात्र छन् । ‘खोलामा फसेका गाडी स्काभेटर र जेसीबीले तानेर आवतजावत गराएका छौं,’ उनले भने, ‘नदीको भेल बढ्यो भने समस्या हुन्छ ।’ यही पुल हुँदै दैनिक साना–ठूला गरी ३ हजारभन्दा बढी सवारी आवतजावत गर्छन् ।


प्रकाशित : भाद्र ६, २०७५ १०:४०
पूरा पढ्नुहोस्
प्रतिक्रिया
पठाउनुहोस्
ADVERTISEMENT