सूची नपठाउँदै जिम्मेवारी

वन मन्त्रालयले सूची तयार गरिरहेकै बेला गण्डकी प्रदेश प्रमुखको निर्णयपछि उद्योग, पर्यटन, वन तथा वातावरण मन्त्रालयले प्रदेशका सबै कार्यालयमा कर्मचारी खटाएको छ
कान्तिपुर संवाददाता

काठमाडौँ — संघीय वन तथा वातावरण मन्त्रालयले सातवटै प्रदेशमा खटाइने उपसचिव (डिभिजनल वन अधिकृत) को सूची तयार पारिरहँदा गण्डकी सरकारले भने उनीहरूलाई आफूखुसी जिम्मेवारी तोकिरहेको छ ।

संघीय वनमन्त्री शक्तिबहादुर बस्नेत, सचिव विश्वनाथ ओली, मन्त्रालयको प्रशासन महाशाखा प्रमुख चन्द्रमान श्रेष्ठ र वन तथा भूसंरक्षण विभागका महानिर्देशक रामप्रसाद लम्सालले ७७ वटै जिल्लाका डिभिजन वन कार्यालयमा खटाइने उपसचिवको सूची तयार पारिरहेका छन् ।

संघीय मामिला तथा सामान्य प्रशासन मन्त्रालयले कर्मचारी समायोजन नभएसम्म उपसचिव वा सोसरह तथा त्यसभन्दा मुनिका कर्मचारीको एकमुष्ट सूची मुख्यमन्त्री तथा मन्त्रिपरिषद् कार्यालय पठाउन ३० साउनमा केन्द्रका मन्त्रालयलाई पत्राचार गरेको थियो ।

Yamaha

वन मन्त्रालयले उपसचिवको सूची तयार गरिरहेकै बेला गण्डकी प्रदेशका प्रमुख सचिव नारायणप्रसाद बिडारीको निर्णयअनुसार उद्योग, पर्यटन, वन तथा वातावरण मन्त्रालयले भदौ ६ मा प्रदेशका ११ वटै जिल्लाका डिभिजन वन कार्यालयमा डिभिजनल वन अधिकृत (प्रमुख) खटाएको हो ।

मनाङ डिभिजन वन कार्यालयमा भने उपसचिवको दरबन्दी नभएकाले त्यहाँ कार्यरत अजय कार्कीलाई प्रदेश वन मन्त्रालय, पोखरामा हाजिर हुन ६ भदौमा पत्र दिइएको छ । अरू १० वटा जिल्लामा तत्कालीन जिल्ला वन कार्यालयका वन अधिकृत (डीएफओ) लाई नै प्रदेश वन मन्त्रालयले प्रमुखका रूपमा खटाएको हो ।

संघीय वन मन्त्रालयका प्रशासन महाशाखा प्रमुख चन्द्रमान श्रेष्ठले भने सातवटै प्रदेशमा खटाइने उपसचिवको सूची तयार भइसकेको अवस्थामा प्रदेशले एक्कासि जिम्मेवारी दिँदा अन्योल सिर्जना भएको बताए । ‘हुन त उहाँहरूले अधिकार प्रयोग गर्नुभएको होला,’ श्रेष्ठले भने, ‘यता हामीले चाहिँ प्रदेशमा खटाइने सबै उपसचिवको सूची तयार गरिसकेका छौं ।’

गण्डकीको वन मन्त्रालयका सचिव बुद्धिसागर पौडेलले ‘पुरानो कार्यालय रूपान्तरण, स्थापना, सञ्चालन र व्यवस्थापन गर्नू’ भनी संघीय वन मन्त्रालयले पत्राचार गरेकाले प्रदेश प्रमुख सचिवको निर्णयअनुसार कर्मचारीलाई अख्तियारी दिइएको प्रतिक्रिया दिए । ‘रूपान्तरण र व्यवस्थापन गर्नु भनेकाले हामीले कर्मचारीलाई पनि जिम्मेवारी दिएका हौं,’ उनले भने, ‘तलब खुवाउनुपर्ने भएकाले पनि जिम्मेवारी त दिनै पर्‍यो ।’ यो अस्थायी व्यवस्थापन भएको पनि उनले प्रस्ट्याए ।

संघीय वन मन्त्रालयले सातवटा प्रदेशका मुख्यमन्त्री र मन्त्रिपरिषद् कार्यालयलाई केही दिनभित्रै उपसचिवको सूची पठाउने भएको छ । ‘अब केही दिनमै नाम टुंगो लगाएर प्रदेशमा पठाइनेछ,’ प्रशासन महाशाखा प्रमुख श्रेष्ठले भने ।

कामविहीनलाई नगरपालिकामा खटाइने
नयाँ स्वीकृत संगठन संरचनाअनुसार शिक्षा, विज्ञान तथा प्रविधि मन्त्रालयमा कामविहीन भएका मध्ये २ सय ४५ उपसचिवलाई नगरपालिकामा खटाइने भएको छ । संघीय मामिला तथा सामान्य प्रशासन मन्त्रालयले उनीहरूलाई नगरपालिकाको शिक्षा, युवा तथा खेलकुद शाखा प्रमुखका रूपमा खटाउन लागेको हो ।

मन्त्रिपरिषद् बैठकले स्थानीय तहको अन्तरिम संगठन संरचना तथा स्थानीय तहमा सेवा प्रवाहसम्बन्धी व्यवस्था–२०७४ संशोधन गरी शिक्षाका कर्मचारीलाई काम दिने निर्णय गरेको छ । यसअघि २५ देखि ७५ हजारसम्म जनसंख्या भएका २ सय ४५ नगरपालिकामा शिक्षाका अधिकृत स्तरका कर्मचारी खटाउने संरचना तयार भएको थियो ।

शिक्षा मन्त्रालयमा खपत भएर बाँकी रहेका उपसचिवलाई सामान्य प्रशासन मन्त्रालयको जिम्मा लगाइने सहसचिव बालकृष्ण पन्थीले जानकारी दिए । ‘पहिले शिक्षा मन्त्रालयमा पदस्थापन गर्छौं,’ उनले भने, ‘अन्यलाई सामान्य प्रशासन मन्त्रालयमार्फत नगरपालिकाहरूमा पठाइन्छ ।’ स्थानीय तहमा जान चाहने कर्मचारीलाई प्राथमिकता दिइने उनले बताए । मन्त्रालयका अनुसार नगरपालिका पठाउने उपसचिवहरूको सूची तयार भइरहेको छ ।

स्वीकृत संरचनाअनुसार शिक्षा मन्त्रालयमा स्थायी र अस्थायी गरी १९२ उपसचिवको मात्र दरबन्दी छ । तर, मन्त्रालयसँग ४८७ उपसचिव छन् । दरबन्दीभन्दा बढी २ सय ९५ उपसचिव व्यवस्थापन गर्ने निकाय नहुँदा उनीहरू महिनौंदेखि जिम्मेवारीविहीन थिए । २०६९ मा शिक्षाका कर्मचारी समायोजन गर्दा नै उपसचिव दरबन्दीभन्दा बढी भएका हुन् । उनीहरूलाई बिनादरबन्दी विभिन्न निकाय र जिल्ला शिक्षा कार्यालयमा उपजिल्ला शिक्षा अधिकारीको जिम्मेवारी दिएर खटाइएको थियो ।

गत चैत २८ मा जिल्ला शिक्षा कार्यालय खारेज भएपछि जिम्मेवारीविहीन उपसचिवको संख्या झनै थपिएको हो । शिक्षा कार्यालय खारेज गरेर शिक्षा विकास तथा समन्वय इकाई बनाइएको छ । ४१ जिल्लामा मात्रै उपसचिवको दरबन्दी छ । जिल्ला–जिल्लामा शाखा अधिकृत इकाई प्रमुख छन् । ६ महानगरपालिका र ११ उपमहानगरपालिकाको शाखा प्रमुखमा यसअघि नै उपसचिव पठाउन थालिएको छ ।

Esewa Pasal

प्रकाशित : भाद्र ११, २०७५ ०८:५१
ADVERTISEMENT
प्रतिक्रिया
पठाउनुहोस्
ADVERTISEMENT

सिँगारिँदै राजधानी

कान्तिपुर संवाददाता

काठमाडौँ — एक नम्बर सडक डिभिजन कार्यालय प्रमुख मुकुन्द अधिकारी आइतबार मीनभवनस्थित कार्यालयमा असिनपसिन अवस्थामा देखिन्थे । आफूमातहत कर्मचारीलाई सडक मर्मत तथा सुधार चाँडो गर्न निर्देशन दिँदै थिए ।

काठमाडौंमा भदौ १४ र १५ मा हुने बिमस्टेक सम्मेलनको तयारीका लागि तीनकुनेमा बनाइएका चित्र । तस्बिर : इलिट जोशी

‘खाने पनि फुर्सद छैन,’ उनले भने, ‘वर्षा भइरहेको छ, कालोपत्रे गर्न गाह्रो छ । बिहान कालोपत्रे गर्‍यो, दिउँसो उप्किन्छ ।’

काठमाडौंमा हुने बिमस्टेक सम्मेलन तयारीका लागि सडक विभाग र काठमाडौं महानगरले सडक मर्मत तथा सुधारलाई तीव्रता दिएका छन् । डिभाइडरहरू रातारात रंगाएर टिलिक्क पारिएको छ । सडकका खाल्डाखुल्डी पुरिएको छ । जेब्रा क्रसिङ, पुल तथा भीआईपी आवतजावत गर्ने रुटमा साजसज्जा गरिएको छ ।

एयरपोर्ट–महाराजगन्ज, गौशाला–एयरपोर्ट, नारायणगोपाल चोक–बालुवाटार–शीतल निवासलगायत खण्डका सडक मर्मतको काम भइरहेको १ नम्बर डिजिभन सडक कार्यालयका प्रवक्ता सुशीलराज भण्डारीले बताए । एयरपोर्ट–नयाँ बानेश्वर–माइतीघर–त्रिपुरेश्वर हुँदै सोल्टीमोडसम्म मर्मत तथा सुधार कार्य भइरहेको उनले बताए । ‘खाल्डा पुर्नेलगायत काम गर्दैछौं, नियमित बजेटमै काम भइरहेको छ तर बिमस्टेक बैठकका लागि तयारी गरेजस्तो भइरहेको छ,’ उनले भने, ‘वर्षातमा कालोपत्रे गर्दा छिटो उप्किने भएकाले निकै समस्या छ ।’

वर्षमा दुईपटक मर्मत तथा सुधार गरिने भन्दै उनले भीआईपीको रुटभन्दा अन्य ५ स्थानमा पनि सडक मर्मत तथा सुधार भइरहेको बताए । पुरानो बानेश्वर–नयाँ बानेश्वर, ज्ञानेश्वर–चारखाल–जैन भवनलगायतका सडक पनि मर्मत भइरहेको उनले जानकारी दिए । ‘यी सडक नियमित मर्मत तथा सुधार गरिएको छ,’ उनले भने ।

इमल्सन प्रविधिबाट कालोपत्रे गरिएको भन्दै उनले चिसोमा अफसाल्टबाट कालोपत्रे नगरिने बताए । ‘इमल्सनमा ६० प्रतिशत बिटुमिन र ४० प्रतिशत पानी मिश्रण गरिएको हुन्छ,’ उनले भने, ‘त्यो केहीबेर सुक्नुपर्छ, वर्षा र चिसोमा यो उपयुक्त हुन्छ ।’ २ नम्बर सडक डिभिजन कार्यालयका प्रमुख देवकुमार तामाङले आफ्नो कार्यक्षेत्रभित्र भीआईपीको बाटो नपरेको बताए ।

ठमेलस्थित सञ्चयकोष भवन अगाडि, सोल्टीमोडबाट सोल्टी होटलसम्म र नारायगोपाल चोकबाट स्वयम्भूसम्मको सडक मर्मत तथा सम्भार गर्ने काम भइरहेको उनले बताए । त्यसैगरी चाबहिलबाट गोकर्ण रिसोर्टसम्मको सडक खण्ड मर्मत तथा सम्भार गर्ने काम भइरहेको छ । बिमस्टेक सम्मेलनमा सहभागी हुन आउने पाहुनालाई स्वागत गर्न अहिले उपत्यकाका विभिन्न स्थानमा गेट तथा सडक सिँगारिएका छन् ।

प्रकाशित : भाद्र ११, २०७५ ०८:५०
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT