श्लेष्मान्तकमा कंक्रिट: निर्माण रोक्न पुरातत्त्वको निर्देशन

कान्तिपुर संवाददाता

काठमाडौँ — पुरातत्त्व विभागले पशुपति क्षेत्रको श्लेष्मान्तकमा कंक्रिटको पैदल मार्ग निर्माण रोक्न निर्देशन दिएको छ । विभागले बुधबार पशुपति क्षेत्र विकास कोषलाई पत्र लेख्दै तत्काल काम रोक्न निर्देशन दिएको हो ।

यात्रुको सुविधाका लागि भन्दै कोषले दुई साताअघि थालेको पैदल मार्ग (वाक वे) को निर्माण अन्तिम चरणमा पुगेको छ ।

विश्वरूप मन्दिर अगाडिको क्षेत्रमा सिमेन्ट ओछयाएर कुरूप बनाइसकेपछि बल्ल पुरातत्त्व विभागले काम रोक्न पत्राचार गरेको हो । ‘पशुपति संरक्षित क्षेत्रभित्रको विश्वरूप मन्दिर परिसरमा यस विभागको स्वीकृति नलिई मापदण्डविपरीत फुटपाथ निर्माण भइरहेको देखिएको हुँदा उक्त निर्माण कार्य तत्काल रोक्का राखी के–कस्तो निर्माण कार्य गर्न लागिएको हो, यस विभागमा यथाशीघ्र जानकारी गराउनुहुन आदेशअनुसार अनुरोध गर्दछु,’ पुरातत्त्व अधिकृत देवेन्द्र भट्टराईले लेखेको पत्रमा छ ।

Citizen

कोषले पर्यटकलाई मृगस्थली क्षेत्र घुम्न सजिलो होस् भनेर बाटो बनाउन लागेको बताउँदै आएको थियो । २ करोड ९९ लाख रुपैयाँ खर्च गरेर यहाँ पैदल मार्ग बनाउन लागेको समाचार प्रकाशित भएपछि विभागले स्थलगत अध्ययन टोली खटाएको थियो ।

टोलीले प्रतिवेदनसमेत दिइसकेको छ । पुरातत्त्वले तयार पारेको प्रतिवेदनमा ७० मिटर लामो र ४ मिटर चौडाइको बाटोमा, ५/६ इन्चको मोटो ढलान गरेको उल्लेख छ । ‘जमिन सतहबाट एक फिट तलबाट खनेर ढलान गरेको देखिन्छ,’ प्रतिवेदनमा छ ।

विभागले कंक्रिटका सबै संरचना भत्काउन लगाउने जनाएको छ । पहिला बनाउन दिने अनि भत्काउन लगाएर सार्वजनिक सम्पत्तिको नास भएको भन्दै सम्पदा अभियन्ताले आपत्ति जनाएका छन् । ‘यो रानीपोखरीकै अर्काे शृंखला हो,’ सम्पदा अभियन्ता सञ्जय अधिकारी भन्छन्, ‘रानीपोखरीमा पनि कंक्रिट राखुन्जेल पुरातत्त्व मौन रहयो । सम्पदाप्रेमी सडकमा ओर्लिएपछि मात्रै रोक्न पत्राचार गर्‍यो ।’

प्रकाशित : भाद्र २१, २०७५ ०८:४८
ADVERTISEMENT
प्रतिक्रिया
पठाउनुहोस्
ADVERTISEMENT

राजधानीबाहिर स्तनपान कक्ष

कान्तिपुर संवाददाता

हेटौंडा — महिला कर्मचारीको सहजताका लागि हेटौंडामा स्तनपान कक्ष स्थापना गरिएको छ । जिल्लामा पहिलो पटक हेटौंडा खानेपानी व्यवस्थापन बोर्डले कक्ष स्थापना गरेको हो ।

हेटाैंडा खानेपानी व्यवस्थापन बोर्डमा स्थापना गरिएको कक्षमा स्तनपान गराउँदै एक महिला । तस्बिर : नगेन्द्र अधिकारी

बोर्डका कर्मचारी, उपभोक्ता र आसपासस्थित सरकारी कार्यालयका महिला कर्मचारीको सहजताका लागि कक्ष स्थापना गरेको बोर्डका कार्यकारी निर्देशक सुदर्शन ढकालले बताए । बेडसहितको उक्त कक्षमा तातो चिसो पानीको व्यवस्था छ ।

सामाजिक उत्तरदायित्वअन्तर्गत कक्ष स्थापना गरेको बोर्डले जनाएको । हेटौंडा उपमहानगरपालिका प्रमुख हरिबहादुर महतले उद्घाटन गरेका थिए । उनले कक्ष व्यवस्थित गरेकोमा आभार प्रकट गर्दै स्तनपान महिलाको अधिकारको विषय भएको तर्क गरे ।

सरकारले सरकारी तथा गैरसरकारी संस्थाहरूमा स्तनपान कक्ष राख्न निर्देशन गरेको छ । आमाले स्तनपान गराउने र शिशुले स्तनपान गर्न पाउने आधारभूत जन्मसिद्ध अधिकार हो । उक्त अधिकारको सम्मान गर्दै हेटौंडा खानेपानी व्यवस्थापन बोर्डले स्तनपान कक्ष स्थापना गरेको जनाएको छ । प्रदेश ३ को १३ वटा जिल्लामध्ये काठमाडांैस्थित स्वास्थ्य विभागमा स्तनपान कक्ष राखिएको छ ।

प्रकाशित : भाद्र २१, २०७५ ०८:४७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT