स्मार्ट लाइसेन्स १७ महिना कुर्दा पनि नपाएको सेवाग्राहीको गुनासो

दीपेन्द्र विष्ट

काठमाडौँ — लमजुङका राम गुरुङले सवारी स्मार्ट लाइसेन्सका लागि आवेदन दिएको १५ महिना भयो । बल्लबल्ल गत महिना प्रिन्ट भएको सवारी अनुमति कार्यालय सानो भर्‍याङले उनलाई जानकारी गरायो । तर, प्रिन्ट गर्दा नाम फरक परेको देखियो । त्यसपछि पुनः छाप्ने आश्वासन उनलाई दिइयो । रामेछापका सानु मगरले स्मार्ट लाइसेन्स कार्डका लागि आवेदन दिएको १७ महिना भयो । उनको पनि नाम छपाइ फरक परेको यातायात कार्यालय भक्तपुरले जानकारी दियो । 

पछिल्लो पटक कार्डमा तस्बिर, हस्ताक्षरलगायत विभिन्न कुरा स्पष्ट नदेखिएको जनगुनासो बढ्न थालेको छ । कहिले मेसिनको गडबडी र कहिले प्रिन्ट गल्तीले गर्दा ढिलाइ भएको यातायात व्यवस्था विभागले सेवाग्राहीलाई जवाफ दिँदै आएको छ । ‘यो त साह्रै सास्ती दिने काम भयो, स्मार्ट लाइसेन्स लिन एक वर्ष कुर्नपर्छ भने, १७ महिना भइसक्यो पाएको छैन, अरू त यो मुलुकबाट के आशा गर्नु ?’ विभागको कार्यालयमा भेटिएका सानु मगरले भने, ‘प्रिन्ट भयो भन्ने थाहा पाएँ तर मेरो नाम नै गलत प्रिन्ट भएको रहेको छ ।’ पछिल्लो पटक विभागले मद्रास सेरी प्रिन्टिङले कार्ड छपाइमा ढिलाइ गरेको भन्दै मालिका प्रिन्टिङ प्रालिलाई जिम्मा दिएको छ । मालिकाले २० हजार स्मार्ट कार्ड छपाइमा गल्ती गरेको छ । ती कार्डलाई रिप्रिन्ट गर्न ढिलाइ भइरहेको जानकारी विभागका एक अधिकारीले दिए ।

Citizen


‘सेवाग्राही प्रत्येक दिन आउँछन्, निकै समस्या भएको छ, निर्णय गर्न नै समय लाग्लाजस्तो छ,’ ती अधिकारीले भने, ‘सेवाग्राहीलाई सास्ती छ, चाँडै निर्णय गरे राम्रो हुन्छ ।’ कार्डको माग र आपूर्तिबीच असन्तुलन हुँदा हालसम्म पनि ट्रायल पास अथवा नवीकरण गरेको १७ महिनासम्म स्मार्ट कार्ड कुर्नुपर्ने अवस्था रहेको ती अधिकारीको भनाइ छ ।

गत असोजमा निजी कम्पनी मालिका इन्कर्पोरेट प्रालिलाई थर्मल प्रिन्टिङ (सामान्य लेखाइ) विधिबाट ५ लाख कार्ड ४५ दिनभित्र प्रिन्ट गर्ने गरी सम्झौता गरेको थियो । उक्त सम्झौताअनुसार मालिकाले कात्तिक ४ गतेदेखि कार्ड प्रिन्ट सुरु गरेको हो । मालिकाले ३ लाख ५० हजार स्मार्ट लाइसेन्स छापेको विभागका प्रवक्ता गोकर्ण उपाध्यायले बताए । ‘मालिकाले छपाइमा गल्ती गरेकाले समस्या आएको छ, गल्ती छापिएका कार्ड संख्या बुझाउन निर्देशन दिइसकेका छौं,’ उनले भने, ‘पुसदेखि मालिकासँग गरेको सम्झौता पनि समाप्त भइसकेको छ ।’ जनगुनासो बढेकाले छिटोछरितो गर्न निजी कम्पनीलाई छाप्ने जिम्मा दिए पनि केही प्राविधिक समस्या आएको उपाध्यायले बताए ।

सेवाग्रहीलाई समस्या भएको भन्दै उनले दुई हप्ताभित्र रिप्रिन्ट गर्न निर्देशन दिने बताए । हाल आफूसँग भएका ८ वटा प्रिन्टरमध्ये ५ वटाबाट मात्र प्रिन्ट गर्दै आएको छ । मालिका इन्कर्पोरेटका प्रबन्ध निर्देशक सुरेन्द्र ढकालले आफूलाई जिम्मा दिएको सबै कार्ड छापिसकेको बताए । ‘लेजर प्रिन्ट गर्नुपर्नेमा थर्मल प्रविधिबाट प्रिन्ट गर्दा २/३ प्रतिशत समस्या देखिएको हो, विभागसँग सम्झौता गर्दा हामीले स्पष्ट रूपमा भनिसकेका छौं,’ उनले भने, ‘त्यो पनि समाधान भइसकेको छ, एक दुई दिनभित्रै सबै समस्या समाधन गर्छौं ।’

प्रकाशित : चैत्र १, २०७५ ०७:५२
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

स्विस प्राध्यापाकलाई मानार्थ विद्यावारिधि

कान्तिपुर संवाददाता

काभ्रे — काठमाडौं विश्वविद्यालय (केयू) ले स्विस फेडेरल इन्स्टिच्युट अफ टेक्नोलजीका वरिष्ठ प्राध्यापक जँ क्लड बाडुलाई मानार्थ विधावारिधि प्रदान गर्ने भएको छ । शुक्रबार धुलिखेलस्थित विश्वविद्यालयमा हुने विशेष दीक्षान्त समारोहमा कुलपतिसमेत रहेका प्रधानमन्त्री केपी ओलीले प्रदान गर्नेछन् । 

केयूले मानार्थ विद्यावारिधि प्रदान गरेको यो चौथोपटक हो । सन् २०११ मा पहिलो पटक संस्कृतविद् तथा लेखक सत्यमोहन जोशीलाई सम्मानार्थ विद्यावारिधि प्रदान गरेको थियो । सन् २०११ मै भारतका विद्वान् तथा राजनीतिज्ञ डा. करण सिंहलाई र भारतका पूर्वराष्ट्रपति प्रणव मुखर्जीलाई प्रदान गरिएको थियो ।

बाडु प्रसिद्ध सिभिल इन्जिनियर हुन् । बाडुले सन् २००३ देखि नेपाल र काठमाडौं विश्वविद्यालयलाई यान्त्रिक, भौतिक, आर्थिक तथा मानव संसाधन क्षेत्रमा सहयोग पुर्‍याउँदै आएको केयूका सूचना संयोजक हेमराज काफ्लेले जानकारी दिए । बायोटेक्नोलजी, जियोम्याटिक्स इन्जिनियरिङ, सिभिल इन्जिनियरिङजस्ता कार्यक्रममा विशेष योगदान पुर्‍याएको विश्वविद्यालयले जनाएको छ । सन् १९९२ देखि २००० सम्म स्विस फेडेरल इन्स्टिच्युट अफ टेक्नोलजीको अध्यक्ष रहँदा बाडुले प्राज्ञिक र औद्योगिक क्षेत्रबीच उच्च सहकार्यको परम्परा आरम्भ गरेका थिए । एकै पटक १ सय ३९ जना औद्योगिक क्षेत्रका विशेषज्ञहरूलाई प्राध्यापन पेसामा सलग्न गराएको पत्रकार सम्मेलनमा जानकारी दिइयो ।

प्रकाशित : चैत्र १, २०७५ ०७:४७
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT