सडकमै पार्किङ

बसपार्कको पर्याप्त ठाउँ नहुँदा सडक किनारामै गाडी पार्किङ  
भक्तपुरका चार नगरपालिकाले विकल्प दिन सकेका छैनन् 
लीला श्रेष्ठ

भक्तपुर — कमलविनायकस्थित जिल्लाको उत्तरपूर्वी क्षेत्रमा चल्ने सार्वजनिक बस सडकमै पार्किङ गरेको छ । उत्तरपूर्वी बस व्यवसायी संघअन्तर्गत नगरकोट, काभ्रेको मण्डन देउपुर, तेलकोट, कलमसीलगायत स्थानमा चल्ने सार्वजनिक बस, भक्तपुर मिनीबस सेवा समितिअन्तर्गत बागेश्वरी, छालिङ चल्ने बसहरू सडकमै रोकिएका हुन्छन् ।

मध्यपुरथिमि नगरपालिकास्थित थिमि चोकको भित्री सडकमा पार्किङ गरिएका गाडी । तस्बिर : हेमन्त श्रेष्ठ/कान्तिपुर

पर्यटकीय गन्तव्य नगरकोटको मुख्य मार्ग कमलविनायकको साँघुरो सडकको दायाँबायाँ असरल्ल राखिएका साना तथा ठूला सवारीसाधनले नगरको सौन्दर्यतामा प्रश्न उठेको व्यवसायी नवीन बज्राचार्य बताउँछन् । सडक किनाराको अघोषित बसपार्कले पैदल मार्ग अतिक्रमण गरेको छ भने, अस्तव्यस्त पार्किङले दिनहुँ घण्टौं जाम हुने गरेको छ ।

कमलविनायक क्षेत्रमै रहेका दुई बसपार्कको अवस्था भने दयनीय छ । खरिपाटी, तेलकोट, नगरकोट, काभ्रे बालुवापाटी देउपुरको अव्यवस्थित साँघुरो बसपार्ककै कारण दिनहुँ सर्वसाधारणले घण्टौं जामको सास्ती व्यहोर्नुपरेको चाँगुनारायण ७ बागेश्वरीका दिपेश खड्का बताउँछन् । कमलविनायक–रत्नपार्क–गोंगबु चल्ने बसपार्क पनि त्यस्तै अस्तव्यस्त छ । बसपार्कको पर्याप्त ठाउँ नहुँदा सडक किनारामै बस पार्किङ हुँदै आएको छ ।

सडकपेटीमा साइकल तथा गाडामा तरकारी, फलफूल, खुल्ला पसल राखेका छन् । सोही सडकको नाली पुरेर पार्किङ स्थल बनाएको र नाली सडकमा खुल्ला छोडिदिँदा सडकमा नाली बग्ने गरेको स्थानीय व्यवसायी नारायणी फुँयाल गुनासो गर्छिन् । भक्तपुर नगरपालिकाले पार्किङ क्षेत्र नतोकिए पनि मुख्य/मुख्य स्थानमा पार्किङ नगर्न अनुरोध गर्दै ब्यानरहरू राखेको स्यानिटेसन शाखा प्रमुख दिलीपकुमार सुवाल बताउँछन् ।

भक्तपुर नगरभित्र मुख्य ६ वटा बसपार्क छन् । तर, जग्गा अभावले कुनै पनि बसपार्कलाई व्यवस्थित गर्न नसकेको नगरपालिकाका जनप्रतिनिधि स्विकार्छन् । नगरपालिकाले बसपार्क व्यवस्थित गर्न नसके पनि कमलविनायक क्षेत्रको अव्यवस्थित मोटरसाइकल पार्किङलाई व्यवस्थित गर्न सरस्वती विद्यागृह अगाडिको चौरमा मोटरसाइकल पार्किङ सेन्टर निर्माण गरेको वडा नम्बर ९ का वडाध्यक्ष रवीन्द्र ज्याख्वले बताए ।

नगरपालिकाले करिब ४ करोड रुपैयाँको लागतमा दुधपाटीस्थित एक्स्प्रेस र पुरानो बसपार्कको स्तरोन्नति कार्यको थालनी गरेको समेत उनले बताए । ब्यासीस्थित पर्यटक बसपार्कको लागि जग्गाको खोजी कार्य भइरहेको नगरपालिकाले जनाएको छ ।

यता मध्यपुर थिमि शंखधरचोकको पार्किङ अवस्था त्यस्तै अस्तव्यस्त छ । साँघुरो सडकको दायाँबायाँ साना तथा ठूला सवारीको अव्यवस्थित पार्किङले सडक अस्तव्यस्त छ । सडकपेटीमा तरकारी, फलफूल, वर्कसप, खुल्ला कपडा पसल यत्रतत्र असरल्ल छ । मध्यपुर थिमि बाहाखा बजार त्यत्तिकै अव्यवस्थित छ ।

भक्तपुरबाट पुरानो थिमि भएर चल्ने लखनखेल, गौशाला, रत्नपार्कको बस बाहाखा बजारमा रोकिने गर्छन् । साँघुरो सडकमा सार्वजनिक तथा निजी साना सवारीसाधनको पार्किङले सडक थप अव्यवस्थित भएको छ । बाहाखा बजारको पुरानो साँघुरो सडक विस्तार गर्ने वर्षौंको योजना स्थानीयको अवरोधकै हुन सकेको छैन ।

बढ्दो सहरीकरण, सवारीे चापका कारण उक्त सडकमा दिनहुँ जाम हुन्छ । मध्यपुर थिमि सुन्दर नगर, गठ्ठाघर, बप्पा महादेव मन्दिर परिसरको अव्यवस्थित पार्किङ हटाउन नगरपालिकाले पटक/पटक सूचना प्रकाशित गरेको नगरप्रमुख मदनसुन्दर श्रेष्ठले बताए ।

त्यसैगरी, यातायात व्यवस्था विभागको कार्यालय जगातीमा दैनिक सयौंको संख्यामा सेवाग्राहीहरूको आवतजावत हुने गर्छ । अरनिको राजमार्ग सडकखण्डअन्तर्गत जगातीस्थित यातायातको कार्यालय आउने सेवाग्राहीले सडकमै पार्किङ गर्नुपर्ने बाध्यता छ ।

आफैं भाडाको घरबाट सेवा दिन बाध्य कार्यालयले पार्किङको व्यवस्था गर्ने अवस्था नभएको विभाग जगाती प्रमुख किरण ढकालले बताए । २०७३ माघमा सञ्चालित कार्यालयले अझै पार्किङमा ध्यान दिन सकेको छैन ।

पार्किङ स्थलको व्यवस्थापन गर्न नसकेको सूर्यविनायक नगरपालिकाले यातायात कार्यालय आउने सेवाग्राहीले सडक किनारामा गरेको सवारीसाधनको शुल्क उठाउने गरेको सेवाग्राहीको गुनासो छ ।

त्यस्तै, सूर्यविनायक नगरपालिका वडा नम्बर ६ र ८ का वडाध्यक्षहरूको समन्वयमा पाण्डुबजार, सूर्यविनायक चोक (ट्रली बस पार्क) हुँदै गणेशस्थानसम्मको सडक अतिक्रमित संरचना, अव्यवस्थित तरकारी बजार, पेटीमा राखेको खुल्ला पसलहरू हटायो । अव्यवस्थित खुल्ला पसल तथा संरचना हटाए पनि सडकको दायाँबायाँ अव्यवस्थित सवारी पार्किङले दिनहुँ जाम हुने गरेको छ ।

दर्जनौं बैंक तथा वित्तीय संस्था, व्यापारिक स्थल भएको सूर्यविनायकमा दैनिक हजारौं सेवाग्राहीको आवातजावत हुने गर्छ । सम्बन्धित निकायले पार्किङको व्यवस्था गर्न नसक्दा सर्वसाधारणले आफूले प्रयोग गर्ने सवारीसाधन सडकमै पार्किङ गर्नुपर्ने अवस्था छ ।

सर्भिस ट्र्याकमै पार्किङ
सूर्यविनायक–तीनकुने सडकखण्डको सर्भिस ट्रयाक पार्किङस्थलका रूपमा परिणत भएको छ । अरनिको राजमार्गअन्तर्गत पर्ने सूर्यविनायक–तीनकुने ६ लेन खण्डअन्तर्गतको ९.१ किमि सडकको दायाँबायाँको करिब १८ किलोमिटर सर्भिस ट्रयाक मुख्य/मुख्य चोकमा दुरुपयोग भइरहेको हो ।

सर्भिस ट्रयाकलाई स्थानीयबासी तथा व्यापारीहरूले पार्किङ र व्यापार गर्ने थलो बनाएका छन् । मध्यपुर थिमि शंखधर चोक (नयाँ थिमि) मा त झन् सर्भिस ट्रयाकलाई नै सूर्यविनायक नगरपालिका–दधिकोट, गाम्चा चल्ने बस, रत्नपार्क चल्ने माइक्रोबस पार्क स्थापित छ । पैदलमैत्री सर्भिस ट्रयाकमै पार्किङ गर्दा सर्वसाधारणले सास्ती झेल्दै आएका छन् ।

प्रकाशित : जेष्ठ ७, २०७६ ०९:५२
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

स्थानीय सरकारको बलमिच्याइँ

कान्तिपुर संवाददाता

१. सरकारले नीति तथा कार्यक्रममा विद्यालय तथा विश्वविद्यालयको खाली जग्गा उपयोग गर्ने बताइरहँदा शिक्षाप्रेमीहरूले शिक्षाको उन्नयनका थप कार्यक्रम खाली जग्गामा हुने र ती विद्यालय र विश्वविद्यालयका विद्यार्थी लाभान्वित हुने आस गरे  ।

२. स्थानीय सरकारले झने विद्यालयको जग्गा धमाधम अतिक्रमण गर्ने काम सुरु गर्नलागेको छ । त्यसमा गैरशैक्षिक त्रियाकलाप गर्ने निर्णय गर्दै शैक्षिक वातावरण धमिलो पार्ने काम गर्दैछ ।
३. बूढानीलकण्ठ स्कुलको जग्गामा बसपार्क बनाउने कुरा हास्यास्पद छ । यसबाट विद्यालयको वातावरण के र कस्तो हुनुपर्ने भन्ने सामान्य ज्ञान पनि स्थानीय सरकारलाई नभएको पुष्टि हुन्छ । खोज्ने हो भने बूढानीलकण्ठ क्षेत्रमा मनग्गे सरकारी जग्गा छ । तिनको उपयोग गरेर बसपार्क बनाउन सकिन्छ ।
४. शिक्षा मन्त्रालयका पदाधिकारी पनि कस्ता ? विद्यालयको जमिन हडपेर स्थानीय सरकारले व्यापारिक प्रयोजनमा लगाउनलाग्दा पनि ‘ठिकै हो’ भनेर स्वीकृति प्रदान गरिरहेछ, लाजै नमानी ।
५. पशुपति विकास कोषले पनि बुझ्दै–नबुझी वेद विद्याश्रम रहेको जग्गा स्थानीय सरकारको कार्यालय बनाउन स्वीकृति दिएको छ । हाँसो उठ्दो कुरा त के भने ‘यो हाम्रै जग्गा हो, त्यसैले स्कुलले गुनासो गर्नु जरुरी छैन’ रे । विद्यालय र सार्वजनिक भिड लाग्ने वडा कार्यालय सँगै राख्दा बालबालिकाको पढाइमा के असर पर्छ भन्ने सामान्य ज्ञान पनि पशुपति विकास कोष र स्थानीय सरकारमा देखिएन ।
६. जुद्धोदय पब्लिक स्कुलको जग्गा प्रधानाध्यापक र विद्यालय व्यवस्थापन समिति मिलेर व्यापारिक भवन ठड्याउन दिएकै कारणले अहिले त्यहाँ पढ्ने गरिब परिवारका विद्यार्थीलाई कति सास्ती भएको छ भन्ने कुरा के स्थानीय सरकारले कहिल्यै बुझ्ने कोसिस गरेको छ ?
७. संविधानले हामीलाई विद्यालय शिक्षाको एकल अधिकार प्रदान गरेको छ भन्ने झ्याली पिट्ने तर विद्यालयको जमिन गैरशैक्षिक क्रियाकलापमा लगाउन बलजफ्ती गर्ने स्थानीय सरकारको हर्कत असह्य रूपमा बाहिर आइरहेछन् ।
८. के बूढानीलकण्ठ स्कुलको ५७० रोपनी जग्गालाई विकास गरेर प्राविधिक र व्यावसायिक शिक्षा दिने प्रादेशिक विश्वविद्यालय खोल्न सकिन्न ? के सरकारको प्राथमिकता विद्यालयको जग्गा व्यापारिक प्रयोजनमा लगाई नाफा खाने माक्रै हो ?
९. शिक्षण संस्थालाई दिइएको जग्गा सरकारले जबर्जस्ती अतित्रमण गर्दै जाने हो र विद्यालय र विश्वविद्यालयलाई साँघुरो वातावारणमा निसास्सिन बाध्य पार्ने हो भने यो सरकारले शिक्षाको नाममा व्यापार गर्ने उद्देश्य लिएको छ । शैक्षिक उन्नयन उसको प्राथमिकतामा पर्दैन भनेर बुझ्ने हो ?
१०. विद्यालय र विश्वविद्यालयहरूले नाफा लिने ऊद्देश्यले निर्माण गरेका सटरसमेत हटाई विद्यार्थीका लागि खेल मैदान र अन्य अतिरिक्त त्रियाकलाप गर्ने वातावरण बनाउने कि स्थानीय सरकारले बलमिच्याइँ गरी आफैं व्यापार चलाउने ?
– मनप्रसाद वाग्ले, मीनभवन, काठमाडौं

प्रकाशित : जेष्ठ ७, २०७६ ०९:५२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT