भक्तपुरमा शैक्षिक ऋण

कान्तिपुर संवाददाता

भक्तपुर — भक्तपुर नगरपालिकाले उच्च शिक्षाका लागि शैक्षिक ऋण वितरण सुरु गरेको छ । नगरपालिकाले नगर क्षेत्रभित्र स्थायी बसोबास भएका जेहेनदार तथा विपन्न विद्यार्थीलाई शैक्षिक योग्यताको प्रमाणपत्र धितो राखेर सहुलियत ब्याजदरमा ५ लाख रुपैयाँसम्मको शैक्षिक ऋणको व्यवस्था गरेको छ ।

नगरपालिकाले आइतबार एक समारोहबीच शैक्षिक ऋण वितरण कार्यक्रम सुरु गरेको नगरप्रमुख सुनील प्रजापतिले बताए । आर्थिक अभावका कारण कुनै पनि विद्यार्थी पढाइबाट वञ्चित हुन नपरोस् भन्ने उद्देश्यले नगरपालिकाले प्रतिविद्यार्थी ५ लाख रुपैयाँसम्म ६ प्रतिशतको सहुलियत ब्याजदरमा ऋण प्रदान गर्ने व्यवस्था गरेको उनले बताए । नगरका १० वटै वडाबाट वडाध्यक्षको सिफारिसमा वर्षमा १०/१० जना गरिब तथा जेहेनदार विद्यार्थीलाई सहुलियत ब्याजदरमा शैक्षिक ऋण व्यवस्था गर्ने निर्देशिका पारित गरेको शिक्षा, संस्कृति तथा स्वास्थ्य समिति सदस्य एवं वडा नम्बर ९ का वडाध्यक्ष रवीन्द्र ज्याख्वले बताए । विद्यार्थीको रुचिका विषयमा स्नातक, स्नातकोत्तर, एमफिल तथा पीएचडी गर्न चाहने विद्यार्थीका लागि नगरपालिकाले एकमुष्ट अथवा किस्ताबन्दीमा ऋण दिने व्यवस्था गरेको उनले बताए । आइतबार उच्च शिक्षाका लागि सहुलियतको शैक्षिक ऋण लिन नगरक्षेत्रका ३५ विद्यार्थीले नगरपालिकासँग सम्झौता गरेको छ । ‘विद्यार्थीले हातमा पैसा पाउने होइन, अध्ययनरत संस्थाको खातामा ऋण पठाइदिने हो,’ नगरप्रमुख प्रजापतिले भने ।

ऋण लिएर अध्ययन गरेको विद्यार्थीले अध्ययन पूरा गरेको १ वर्षमा २५ प्रतिशत, २ वर्षमा ५० प्रतिशत, ३ वर्षमा ७५ प्रतिशत र ४ वर्षमा ऋण चुक्ता एवं एकमुष्ट ऋण तिर्न सक्ने व्यवस्था गरेको समेत नगरपालिकाले जनाएको छ ।
स्थानीय तह निर्वाचनको दौरानमा घोषणापत्रमा उल्लेख भएअनुसार नगरका गरिब तथा जेहेनदार विद्यार्थीलाई उच्च शिक्षा अध्ययन गर्न सहयोग गर्ने उद्देश्यले शैक्षिक ऋण दिनेसम्बन्धी निर्देशिका पारित गरेको छ ।

प्रकाशित : जेष्ठ २७, २०७६ ०९:३७
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

वीरमा औषधि अभाव

कान्तिपुर संवाददाता

काठमाडौँ — देशकै ठूलो र पुरानो अस्पताल वीरको फार्मेसीमा औषधि अभाव देखिएको छ । औषधि खरिदको टेन्डर प्रक्रिया लम्बिँदा लामो समयदेखि अस्पतालमा औषधि अपुग भएको हो । आकस्मिक, शल्यक्रिया र आईसीयूका बिरामीका लागि प्रयोग हुने औषधिसमेत अभाव हुँदा बिरामीले सास्ती खेपिरहेका छन् ।

वीरको फार्मेसीमा अहिले छाला एलर्जीको आकस्मिक अवस्थामा प्रयोग हुने औषधि ‘हाइड्रोकोर्टिसन’ अभाव छ । कमजोरी र बेहोसी उपचारमा प्रयोग हुने औषधि ‘न्युट्रिडेक्स’ छैन । शल्यक्रिया गरेपछि घाउ सिलाउने धागो (सुचर) सबै किसिमका छैनन् । मिर्गौलामा बिरामीलाई डाइलासिस गर्न प्रयोग हुने पाइप ‘क्याथेटर’ छैन । विष पिएर अस्पताल भर्ना भएका बिरामीको उपचारमा प्रयोग हुने औषधि ‘एट्रोपिन’ पनि अभाव छ । जीवन बचाउने आकस्मिक औषधि त पाइँदैनन् नै, सामान्य खोकी लाग्दा खानुपर्ने ‘बिटाटु’ समेत पाइँदैन वीर अस्पताललको फार्मेसीमा । कलेजो बिग्रिएका बिरामीलाई चाहिने ‘ह्युमन अबलुमिन इन्जेक्सन’ नहुँदा बिरामीले बाहिरको फार्मेसीबाट दोब्बरतेब्बर महँगो मूल्यमा खरिद गरिरहेका छन् । क्यान्सरका बिरामीको पीडा कम गर्ने औषधि ‘मर्फिन’ पनि अभाव छ । बाहिरका फार्मेसीमा पनि सजिलै नपाइने यो औषधि नपाउँदा बिरामी कुरुवा भौंतारिन्छन् । औषधि अभावका यी केही उदाहरण मात्रै हुन् ।

अस्पताल फार्मेसीभित्र औषधि नहुँदा बिरामीहरू बाहिरबाट महँगो शुल्क तिरेर औषधि किन्न बाध्य भइरहेका छन् । विशेष गरी स्वास्थ्य बिमा गरेका बिरामी बढी घाटामा छन् । बिमा गरेका बिरामीले अस्पताल फार्मेसीबाट नि:शुल्क औषधि पाउने व्यवस्था भए पनि औषधि अभावका कारण यो व्यवहारमा लागू हुन सकिरहेको छैन । दैनिक अत्यधिक मात्रामा प्रयोग हुने आकस्मिक औषधिसमेत नहुँदा बिरामीले दु:ख पाइरहेका छन् । सरकारी फार्मेसीमा बिरामीले ३० देखि २ सय प्रतिशतसम्म सस्तो मूल्यमा औषधि पाउँछन् ।

२०७२ देखि सरकारी फार्मेसी स्थापना गर्नुको उद्देश्य पनि औषधिका लागि बिरामीले निजीबाट चर्को मूल्यमा तिर्नु नपरोस् भन्ने नै थियो । टेन्डर प्रक्रिया लम्बिएकै कारण अस्पतालले तीनदेखि पाँच लाख रकम बराबरको आौषधि सिधै खरिद गरेर समेत बेच्ने गरेको छ । सिधै खरिद गर्दा औषधिको मूल्य महँगो हुने हुँदा बिरामीले सस्तो मूल्यमा औषधि पाउन सक्दैनन् । अस्पतालको खरिद एकाइ प्रमुख भगवती थपलियाले औषधि खरिद प्रक्रियाका लागि टेन्डर सम्झौता भइसकेको बताइन् । उनले भनिन्, ‘टेन्डरमा नपरेको औषधि अभाव भएको होला । एक साताभित्रै टेन्डर प्रक्रिया पूरा हुन्छ र औषधि अभाव घट्छ ।’ फार्मेसी निर्देशिका–२०७२ अनुसार सबै सरकारी अस्पतालको आफ्नै फार्मेसी हुनुपर्ने नियम छ । यो नियमअनुसार अस्पतालको फार्मेसी २४ घण्टा खोल्नुपर्ने भनिए पनि वीरमा यो लागू छैन ।

प्रकाशित : जेष्ठ २७, २०७६ ०९:३६
पूरा पढ्नुहोस्
ADVERTISEMENT
प्रतिक्रिया
पठाउनुहोस्