सुरु भयो स्मार्ट पार्किङ

दुई पांग्रे सवारीको पार्किङ शुल्क प्रतिघण्टा २५ रूपैयाँ र चार पांग्रेका लागि ८० रूपैयाँ तोकिएको महानगरपालिकाले जनाएको छ ।
शिल्पा कर्ण

काठमाडौँ — काठमाडौं महानगरपालिकाले अव्यवस्थित पार्किङको समस्या समाधानका लागि आइतबारदेखि स्मार्ट पार्किङ सुरु गरेको छ । बढी अव्यवस्थित पार्किङ हुने तथा कारबाहीमा पर्ने स्थान वीर अस्पताल र न्युरोड क्षेत्रमा एपबाटै बुकिङसमेत गर्न सक्नेगरी निश्चित संख्यामा पार्किङको व्यवस्था गरिएको महानगरले जनाएको छ । हील्स ट्रली योर्स नामक संस्थासँगको सहकार्यमा स्मार्ट पार्किङ सुरु गरिएको हो ।

काठमाडौंको न्युरोडस्थित विशाल बजार परिसरमा स्मार्ट पार्किङ सेवा परीक्षण गरिँदै । तस्बिर : बिजु महर्जन/कान्तिपुर

हाल न्युरोडमा सुरु गरिएको यो सेवा बिस्तारै प्युखा, खिचापोखरी, पाकोलगायत खाली स्थानमा पनि विस्तार गरिनेछ । हाल योजनामा रहेका सबै स्थानमा पार्किङ सुरु भए ८ सय वटा मोटरसाइकल र ४० चारपांग्रे पार्किङ गर्न सकिने एप डेभलपर संस्थाले जनाएको छ । पहिल्यै बुकिङ नगरेकाले पुगेपछि खाली ठाउँ हेरेर त्यहीअनुसार पार्किङ गर्न सक्नेछन् । त्यहाँका गतिविधि आवाजसहित रेकर्ड गरिनेछ साथै शुल्क तिर्नेले पनि बिल प्राप्त गर्ने हुँदा राजस्व छली तथा बढी शुल्क उठाउने समस्या नहुने महानगरको भनाइ छ ।

हालका लागि दुई पांग्रे सवारीको पार्किङ शुल्क प्रतिघण्टा २५ रुपैयाँ र चार पांग्रेका लागि ८० रुपैयाँ तोकिएको महानगरपालिकाले जनाएको छ ।

स्मार्ट पार्किङका लागि एन्ड्रोइड तथा आईओएस दुवै अपरेटिङ सिस्टम भएका स्मार्टफोन प्रयोगकर्ताले ‘केटिएम एप’ डाउनलोड गरेर सेवाग्राहीले पार्किङ स्थल बुक गर्न सक्छन् । फोनमार्फत कन्फर्म गरेको १५ मिनेटभित्र सवारीसाधन बुकिङ गरिएको ठाउँमा पुग्नुपर्ने हुन्छ । अन्यथा बुकिङ रद्द हुने एप विकासकर्ताको भनाइ छ । पार्किङको चाप र अवस्थाबारे ट्राफिक प्रहरी, महानगरपालिका र एप निर्माता तीनैले चाहेका बेला हेर्न सक्नेछन् । सुरक्षाका लागि ४८ सीसीटीभी जडान गरिएको छ ।

गत वर्षकै नीति तथा कार्यक्रममा स्मार्ट पार्किङ राखिए पनि यस वर्षको अन्त्यमा मात्र कार्यान्वयनमा आएको हो । गत वर्ष बहुतले भवनमा पार्किङ मात्र हुने खालको पार्किङ निर्माण गर्ने भनिए पनि अहिलेसम्म त्यो भएको छैन । प्राविधिक कारणले सुरुहुन नसकेको महानगरले जनाएको छ । एक कार्यक्रमबीच महानगरका मेयर विद्यासुन्दर शाक्यले स्मार्ट पार्किङको उद्घाटन गरे ।

मेयर शाक्यले ‘पीओएस’ भन्ने उपकरणबाट ‘क्यू आर कोड’ सहितको बिल प्रिन्ट गरेर यसको उद्घाटन गरेका हुन् । उनले महानगरभित्र तत्कालको आवश्यकता पूर्तिका लागि मात्र यसको सुरुवात भएको तर दीर्घकालीन रूपमा भने भूमिगत वा बहुतले पार्किङ नै उपयुक्त विकल्प रहेको बताए ।

प्रकाशित : असार २, २०७६ ०७:३०
प्रतिक्रिया
पठाउनुहोस्

चोभारमा मञ्जुश्रीको प्रतिमा

कान्तिपुर संवाददाता

काठमाडौँ — मञ्जुश्रीले काठमाडौं उपत्यका दह भएका बेला यहाँको पानी बगाएको भन्ने मिथकलाई दर्साउन चोभारमा मञ्जुश्रीको प्रतिमा स्थापना गरिएको छ ।

कीर्तिपुर नगरपालिका वडा नं. ६ मा पर्ने जलविनायक सामुदायिक वनमा ३३ फिटको प्रतिमा राखिएको वन उपभोक्ता समितिका अध्यक्ष इन्द्रबहादुर महर्जनले जानकारी दिए । वनभित्रको मञ्जुश्री पार्कमा मूर्ति राखिएको छ ।

‘यसमा सम्पूर्ण लागत स्थानीयको छ । सुरुमा सामान्य मानवको उचाइको प्रतिमा बनाउने भनिए पनि विज्ञसँग छलफल गरी ३३ फिटको राख्ने निर्णय भयो,’ मञ्जुश्री प्रतिमा निर्माण समितिका कोषाध्यक्ष सुजीन्द्र महर्जनले भने । मूर्ति निर्माणमा हालसम्म ३ करोड ३५ लाख रुपैयाँ खर्च भएको उनले जानकारी दिए । विभिन्न दाताबाट १ करोड ७० लाख र मूर्ति निर्माणार्थ आयोजना गरिएको सप्ताहबाट ४० लाख रुपैयाँ संकलन भएको उनको भनाइ छ ।

उनले क्षेत्र नं. १० का सांसदबाट १० लाख र वडास्तरीय बजेटबाट ३७ लाख ५० हजार रुपैयाँ जम्मा भएको जनाए । सिंचाइ तथा ऊर्जा मन्त्रालयबाट ४५ लाख प्राप्त भएको उपभोक्ता समूहले जनाएको छ ।

शनिबार एक कार्यक्रमबीच मूर्ति अनावरण गरिएको हो । ‘अझै १४ करोड रुपैयाँ हाराहारी खर्च लाग्नेछ,’ उपभोक्ता समिति अध्यक्ष इन्द्रबहादुर महर्जनले भने, ‘प्रवेशद्वारसहितको कम्पाउन्ड वाल, पार्कभित्र अपांगमैत्री बाटोलगायत संरचना बनाउन बाँकी नै छ ।’ उनका अनुसार उक्त पार्कमा सूचना पाटी, आराम स्थल निर्माण, पानी तथा बत्तीको व्यवस्था, अध्ययन केन्द्र, कफी सप, शौचालयजस्ता संरचना निर्माण गर्ने योजना छ । हिमाल सिमेन्ट कारखानाले उजाड बनाएको र भित्रका गुफा तहसनहस बनाएकाले पर्यटक घटे पनि अब क्रमशः बढ्नेमा आफू विश्वस्त रहेको उनले बताए ।

चक्रपथभित्रको एकान्तकुनाबाट ३ किलोमिटरको दूरीमा पर्ने जलविनायक मन्दिर तथा चोभारको गल्छीसँगै प्रतिमा राख्दा उपत्यकाको इतिहासबारे सबैले जानकारी पाउने इन्द्रबहादुरले बताए । प्राचीनकालमा ठूलो दहका रूपमा रहेको काठमाडौं उपत्यकालाई मञ्जुश्रीले चन्द्रहंस खड्गले काटेर यहाँको पानीलाई गल्छी हुँदै निकास दिएका थिए । त्यसपछि मात्र उपत्यका बस्न योग्य भएको स्वयम्भू पुराणमा उल्लेख पाइन्छ । चरम सहरीकरणबीच यस्ता पार्क निर्माण तथा हरियाली प्रवर्द्धनले पर्यटन बढ्ने र सहरी कोलाहलबाट स्थानीयलाई राहत मिल्ने अध्यक्ष महर्जनको भनाइ छ ।

यो पार्क तथा सामुदायिक वनभित्र १ सय १७ वर्ष पुरानो झोलुंगे पुल, साढे १२ सय मिटर लामो गुफाका साथै मौसम सफा भए हिमाल पनि देख्न सकिन्छ । वरपर आदीनाथ, जाल्पादेवी, विष्णुदेवी मन्दिरजस्ता संरचनाले धार्मिक पर्यटक पनि तान्ने र प्रतिमा निर्माणपछि पर्यटक बढ्ने अपेक्षा राखेको अध्यक्ष महर्जनको भनाइ छ ।

प्रकाशित : असार २, २०७६ ०७:२९
पूरा पढ्नुहोस्
प्रतिक्रिया
पठाउनुहोस्