कोठा खाली गराउने उजुरी धेरै

कान्तिपुर संवाददाता

काठमाडौँ — गत वर्ष काठमाडौं महानगरको न्यायिक समितिमा कोठा खाली गराउन माग गरिएका उजुरी धेरै पर्ने गरेका छन् । गत वर्ष सबैभन्दा बढी कोठा खाली गराउन १२३ उजुरी दर्ता भएको न्यायिक समितिले जनाएको छ, जसमा ५४ वटाको निर्णय भइसकेको छ भने ४३ ओटा विचाराधीन छन् । 

त्यसमध्ये २० ओटा तामेलीमा र ६ ओटा मेलमिलाप गरी फर्स्योट गरिसकेको छ । गत वर्ष न्यायिक समितिमा १ सय ९८ उजुरी दर्ता भएको थियो भने ०७४/०७५ बाट दायित्व सरेर आएको ९५ उजुरी गरी जम्मा २ सय ९३ उजुरी रहेको थियो, जसमध्ये १ सय ९९ उजुरी फर्स्योट भएको छ ।

त्यसमध्ये ९४ उजुरी विचाराधीन छन् । गएको आर्थिक वर्ष ०७४/०७५ को अन्त्यसम्मा १८४ उजुरी दर्ता भएको थियो । बाटो खुलाई पाउन १६ उजुरी परेको र अन्तरिम संरक्षणात्मक आदेश जारी पाउन भनी २ उजुरीमा आदेश जारी गरी निर्णय गरेको न्यायिक समितिले जनाएको छ ।

घरभाडा भाग लगाई पाउन, घर बहाल बुझाएर मालसामान फिर्ता दिलाई पाउन, मेलमिलाप गराई पाउन, व्यवसाय सञ्चालनमा अवरोध हटाई पाउन, नक्साविपरीत निर्माण हुँदै गरेका टहराको निर्माण कार्य रोकी पाउन, बिनाकारण घरभाडाबाट हटाउन लागेकाले त्यस्तो कार्य रोक्का गरी पाउन, बस्ने कोठा उपलब्ध गराई पाउन भनी एकएक वटाउजुरी परेका थिए ।

केहीमा आदेश र केहीमा निर्णय भएका छन् । कुटपिट गरेकाले कारबाही माग गर्दै परेका २ वटा उजुरीमध्ये एउटा जिल्ला अदालतमा सिफारिस गरियो भने अर्को तामेलीमा राखिएको छ ।

कानुन अधिकृत हरिमाया घिमिरेका अनुसार एक वर्ष कैद हुन सक्ने फौजदारी मुद्दा, मेलमिलाप हुन सक्ने देवानी मुद्दा, २५ लाख रुपैयाँसम्म बिगो भएको घरबहाल र घरबहाल सुविधा भएको मुद्दा न्यायिक समितिकोजिम्मेवारीमा पर्छन् ।

यसरी पर्ने गरेका उजुरीको प्रमाण जुटाउनुपर्ने, मेलमिलापका लागि प्रयत्न गर्नुपर्ने भएकाले फर्स्योट हुन समय लागे पनि कानुनले तोकेका समय सीमाभित्र किनारा लगाउने गरिएको समितिको दाबी छ ।

नेपाल संविधानको धारा २१७ मा न्यायिक समितिसम्बन्धी व्यवस्था गरिएको छ । समितिको कार्यसम्बन्धी व्यवस्था, कर्तव्य र क्षेत्राधिकार स्थानीय सरकार सञ्चालन ऐन २०७४ को परिच्छेद ८ मा उल्लेख छ । उक्त व्यवस्थाबमोजिम महानगरमा गठन भएको न्यायिक समितिले २०७४ कात्तिक २८ गते पहिलो बैठक बसेर काम थालनी गरेको थियो ।

पहिलो इजलास भने मंसिर १० गते सञ्चालन गरिएको थियो । समितिले स्थानीय सरकार सञ्चालन ऐन २०७४ को दफा ४७ अनुसार न्यायिक समितिको क्षेत्राधिकार, दफा ४८ अनुसार अधिकार क्षेत्रको प्रयोग, दफा ४९ अनुसार न्याय सम्पादनका प्रक्रिया सञ्चालन गर्ने छ । काम सुरु गरेदेखि अहिलेसम्ममा न्यायिक समितिको ४४ वटा बैठक बसिसकेको छ ।

यस अवधिमा परेका ३ सय ५६ वटा उजुरीमध्ये २ सय ६१ वटा उजुरी फर्स्योट भइसकेको छ भने हाल ९५ वटा विचाराधीन छन् । फर्स्योट भएका उजुरीमध्ये कार्यान्वयन गरी पाऊँ भनी निवेदन परेका सबै निर्णय कार्यान्वयन भइसकेका छन् ।न्यायिक समितिका अतिरिक्त भवन निर्माणको मापदण्डका विषय प्रमुखको इजलासबाट हेरिन्छ भने भवन निर्माण इजाजतसम्बन्धी विषय प्रमुख प्रशासकीय अधिकृतको इजलासबाट हेरिन्छ ।

प्रकाशित : श्रावण २१, २०७६ ०८:१२
ADVERTISEMENT
प्रतिक्रिया
पठाउनुहोस्
ADVERTISEMENT

प्रिमियर लिगका चार प्रत्याशी

इंग्लिस प्रिमियर लिग
कान्तिपुर संवाददाता

काठमाडौँ — गत सिजनको प्रदर्शन आधार मानेर भन्ने हो भने अरू अधिकांश क्लब एकातर्फ रहे । च्याम्पियन म्यानचेस्टर सिटी र लिभरपुल अर्कोतर्फ रहे । यी दुई क्लबको प्रदर्शन बेग्लै रह्यो । त्यसपछि त्यस्ता चार क्लब पनि रहे, जसले यी दुई टिमलाई चुनौती दिन सक्ने छाँट देखाए ।

सम्भवतः यस सिजन पनि यस्तै हुनेछ, एकातर्फ सिटी र लिभरपुलको दोहोरो भिडन्त हुनेछ भने उनीहरूलाई समाउने प्रयासमा हुनेछ यी चार क्लब । शुक्रबार लिभरपुल र नर्विचबीचको खेलसँगै प्रिमियर लिगको सिजन सुरु हुनेछ । फ्रान्सेली समाचार संस्था एएफपीको विश्लेषण :

चेल्सी
चेल्सीले गत सिजन प्रिमियर लिगको तेस्रो स्थानमा रहे पनि लन्डन प्रतिद्वन्द्वी आर्सनललाई हराएर युरोपा लिग जितेको थियो । तर प्रशिक्षक माउरिसियो सारीले क्लब छाडेर युभेन्ट्स गएको समर्थकलाई अझै पचेको छैन । सारी फेरि इटालीमै फर्कने भएपछि क्लबका लागि एउटै राहत भनेको प्रशिक्षक पदमा फ्रान्क लाम्पार्डको पुनरागमन नै हो । चेल्सीका खास समर्थकका लागि लाम्पार्ड फेरि क्लबमा आउनु भनेको उनीहरूका लागि सपना पूरा गरेजस्तै हो ।
च्याम्पियनसिप टोली डर्बीमा एक सिजनमात्र बिताएयता उनी चेल्सी आएका हुन् । चेल्सीमा नायकको छवि छ लाम्पार्डको । उनले कीर्तिमानी गोल गोल गर्ने क्रममा चेल्सीमा १३ वर्ष बिताए । त्यसबीच उनले तीन लिग उपाधि, चार एफए कप र सन् २०१२ मा पहिलोपल्ट युरोपेली च्याम्पियन्स लिग जिते । क्लब मालिक रोमन एब्राहिमोभिचले ४१ वर्षीय लाम्पार्डको नियुक्तिलाई निकै जोखिमका रूपमा लिने पनि छन् ।

क्लबका स्टार प्लेमेकर इडेन हाजार्डले टिम छाड्नु पनि चेल्सीका लागि अर्को धक्का रहेको छ । उनी रियल म्याड्रिड गए । त्यसमाथि क्लब अझै खेलाडी स्थानान्तरण प्रतिबन्धबाट गुज्रिरहेको छ । त्यसैले टिम व्यवस्थापनमा कम अनुभवी लाम्पार्डका लागि यो दुवै निकै टाउको दुखाइ साबित हुन सक्नेछ । यस्तोमा लाम्पार्ड अधिकांश स्थितिमा आफ्नै युवा खेलाडीमा बढी निर्भर हुनुपर्नेछ । त्यसमा सबैभन्दा अगाडि रहेका छन् कलम हडसन ओडिइ । इंग्ल्यान्डका यी विङ्गर चेल्सीको भविष्यमा राम्रो भूमिका खेल्न सक्ने खेलाडी हुन् । उनले पनि बायर्न म्युनिख जाने इच्छा राखेका थिए, उनको यो अनुरोध पूरा भएन । लाम्पार्डले उनलाई ठूलो भूमिका दिने भनेर फकाएका छन् । चेल्सी दुईपल्टको ‘ट्रान्सफर विन्डो’ प्रतिबन्धबाट गुज्रिरहेको स्थितिमा क्लबमा प्रवेश गरेका एकमात्र नयाँ अनुहार क्रिस्टियन पुलिसिच छन् । उनलाई हाजार्डको स्थानमा राम्रो विकल्प मानिएको छ ।

आर्सनल
युरोपेली च्याम्पियन्स लिगमा छनोट हुन नसक्नु सबैभन्दा ठूलो धक्काका रूपमा छ आर्सनलका लागि । त्यो पनि लगातार तेस्रो सिजन । यसका लागि क्लबको खराब र गलत खेलाडी स्थानान्तरण नीति लिएको छ । यसै कारणले आर्सनलको प्रदर्शन पनि खराब हुने गरेको आरोप छ । अचेल आर्सनललाई लिग उपाधिको बलियो दाबेदार समेत मान्ने गरिँदैन । यसले पनि देखाउँछ, पछिल्लो समय टिमको प्रदर्शन कति धेरै खस्किएको छ भनेर ।
उनाइ इम्रेले इमिरेट्स स्टेडियममा बिताएको पहिलो सिजन आर्सनल पाँचौंमा रह्यो । छिमेकी प्रतिद्वन्द्वी टोटेनहमको तुलनामा १ अंकले पछाडि । युरोपा लिगको फाइनलमा चेल्सीको हातबाट ४–१ ले पराजित रहनु पनि क्लबका लागि उत्तिकै ठूलो धक्का रहेको छ । यो नै क्लबको च्याम्पियन्स लिगमा प्रवेशको अन्तिम बाटो थियो । यसमै क्लब नराम्रोसँग चिप्लियो । आर्सनलले पछिल्लोपल्ट प्रिमियर लिग जितेको पनि १५ वर्ष भइसकेको छ । यसै कारण समर्थक निकै आक्रोशित छन् ।

उनीहरू क्लब मालिक स्टान क्रोन्केको विरोधमा पनि उत्रेका छन् । क्लबले यसपल्ट पनि राम्रो सुरुआत लिन सकेन भने यी समर्थकले इमिरेट्समै चर्को विरोध गर्ने योजना बनाइरहेका छन् । क्लबको निर्णायक समूहमा राम्रो भूमिका खेल्न सक्ने क्रोन्केका छोरा जोसले भने यसपल्ट आर्सनलले उपाधि होडमा सहभागी हुने दाबी गरेका छन् । यसको एउटा ठूलो कारण क्लबले अनुबन्ध गरेका निकोलस पेपे हुन्, त्यो पनि ७ करोड २० लाख पाउन्डमा ।

उनी क्लबमा आए पनि टिमका उत्तिकै महत्त्वपूर्ण खेलाडी आरोन राम्सी भने आर्सनल छाडेर युभेन्ट्स गएका छन् । यसले टिमको मध्यपंक्तिमा राम्रै कमजोरी ल्याउने अनुमान छ । टिमका लागि सबैभन्दा महत्त्वपूर्ण खेलाडी भने पिएरे एमरिक अबामेयाङ नै हुनेछन् । उनले गत सिजन २२ गोल गरेका थिए । उनको व्यक्तित्व पनि खुबै चम्किलो छ । त्यसमाथि उनीसँग त्यसैलाई सुहाउँदो र तीव्र गतिमा खेल्न सक्ने क्षमता पनि छ, त्यसैले उनीबाट धेरै आस हुनेछ ।

टोटेनहम
युरोपेली च्याम्पियन्स लिगको फाइनलमा लिभरपुलको हातबाट पराजित भएयता टोटेनहमका प्रशिक्षक माउरिसियो पोचेटिनोले दाबी गरेका थिए, टिमलाई अझ स्तरीय बनाउने र अझ माथिल्लो स्तरमा पुर्‍याउने । त्यस फाइनल हारपछि उनी आफैं पनि स्तब्ध भएका छन् । यो टोटेनहमको पहिलो च्याम्पियन्स लिग फाइनल पनि थियो । पोचेटिनो चाहन्छन्, यसै उपलब्धिमा टेकेर टोटेनहमले आउने दिनमा अझ राम्रो खेल्न सक्छ । यसमा कुनै शंका छैन ।

अर्जेन्टिनी व्यवस्थापक के पनि मान्छन् भने अब त्यस्तो समय आएको छ, जहाँबाट टोटेनहमले नयाँ युगको सुरुआत लिन सक्छ । टोटेनहमका प्रमुख डानियल लेभी स्वयं भने दोधारमा देखिन्छन् र आफ्ना व्यवस्थापकले मागे जस्तो ठूलो लगानी गर्न तयार देखिएका छैनन् । नयाँ घरेलु मैदानमा प्रवेश गरेयता पोचेटिनोले भनिसकेका छन्, अब क्लब बढी महत्त्वाकांक्षी हुनै पर्छ । यसैको पहिलो खुडकलो छ, फ्रान्सेली टुङगी एनडोम्बेलेसँगको अनुबन्ध ।
क्लबका लागि खुसीको समाचार के पनि छ भने डेनमार्कका क्रिस्टियन एरिक्सनले यो सिजन आफूले अझ एक पाइला अगाडि सरेर खेल्ने दाबी गरेका छन् । उनी खुबै सकारात्मक र उत्साही देखिन्छन् । यसैक्रममा उनले म्यानचेस्टर युनाइटेड र रियल म्याड्रिडको प्रस्ताव समेत अस्विकार्दै टोटेनहममै रहन मानेका छन् । बरु पोचेटिनोले कमजोर प्रदर्शन गरिररहेका डिफेन्डर किरन ट्रिपियरलाई भने एटलेटिको म्याड्रिडलाई बेच्नु नै ठीक मानेका छन् ।

युरोपमा राम्रो गरे पनि टोटेनहमले सिजनको अन्त्यतिर भने उत्तिकै बलियो खेल खेल्न सकेन । टोटेनहमले लिगका पछिल्ला ५ खेलमध्ये एकमा मात्र जित निकालेको थियो । यसबीच निकै दबाबबीच टोली चौथो स्थानमा रहन सफल भयो । केही सिजन अगाडिसम्म यो पनि टोटेनहमका लागि उपलब्धि हुन्थ्यो, अब भने होइन । टोटेनहमले यसपल्ट सबैभन्दा बढी विश्वास गर्ने खेलाडी भने उनै एनडोम्बेले छ । उनका लागि क्लबले ५ करोड ४० लाख पाउन्ड तिरेको छ लियोनलाई ।

म्यानचेस्टर युनाइटेड
म्यानचेस्टर युनाइटेड पछिल्लो ६ सिजन शीर्ष चारबाट चारपल्ट बाहिर छ । सर एलेक्स फर्गुसनले व्यवस्थापकीय जिम्मेवारी छाडेयता क्लब अब त्यस्तो रहन सकेन । जस्तो पहिले थियो । अहिले ओले गनर सोल्सायरको म्यानचेस्टरबाट के अपेक्षा गर्ने हो भनेर पनि भन्न गाह्रो छ । गत सिजन जोसे मोउरिन्होको प्रशिक्षणमा क्लबको प्रदर्शन निकै दयनीय जस्तै थियो । सोल्सायर आएयता एक समय क्लब शीर्ष चारमा आउने छाँट पनि देखिएको थियो ।
तर त्यो भएन । सिजनको अन्तिम दोस्रो खेलमा म्यानचेस्टरले हडर्सफिल्डसँग १–१ को बराबरी खेलेको थियो । यो खेलअघि नै हर्डसफिल्ड रेलिगेसन परिसकेको थियो । अन्तिम खेलमा पनि म्यानचेस्टरलाई कार्डिफले २–० ले हराएको थियो । यो पनि प्रिमियर लिगबाट बाहिरिने क्रममा थियो । लिग विजेता म्यानचेस्टर सिटीबाट ३२ अंकको दूरीमा रहनु छिमेकी म्यानचेस्टर युनाइटेडका लागि वास्तवमै लाजमर्दो स्थिति रह्यो । कतिपयले त केसम्म प्रश्न गरेका छन् भने म्यानचेस्टरका लागि सोल्सायरठीक प्रशिक्षक हुन् कि होइनन् ?

म्यानचेस्टरले यसपल्ट पनि च्याम्पियन्स लिग खेल्ने छैन, बरु बिहीबारको रात युरोपा लिगमै बिताउने छ । क्लबले प्रि–सिजनका खेलमा राम्रो प्रदर्शन गरेपछि टिमले एउटा महत्त्वपूर्ण विषयमा अझै निर्णय गर्न सकेको छैन । त्यो हो पाउल पोग्बाको भविष्यलाई लिएर । गत सिजनकै प्रसंग उप्काउने हो भने क्लबको गोल गर्ने र रोक्ने दुवैमा समस्या छ ।

युनाइटेडले सिटीको तुलनामा ३० कम गोल गर्‍यो भने सिटीकै तुलनामा ५४ बढी गोल पनि खायो । कीर्तिमान २० पल्टको इंग्लिस च्याम्पियनका लागि लिगमा राम्रो सुरुआत निकै महत्त्वपूर्ण रहनेछ । टिममा सकेसम्म चाँडै बलियो आत्मविश्वास फर्काउनु पर्नेछ । टिमको कमजोर रक्षापंक्तिकै कारण सोल्सायरले लेस्टरका ह्यारी मगायरलाई भित्र्याएको छ । तर क्लबलाई बलियो स्थितिमा उभ्याउने हो भने अगाडि खेल्ने १० नम्बर जर्सीका मार्कस रसफोर्डले नै सबैभन्दा मुख्य भूमिका खेल्नुपर्ने हुन्छ ।


मगायर महँगा डिफेन्डर
लन्डन (एएफपी)– लेस्टर सिटीबाट ९७ मिलियन अमेरिकी डलरमा म्यानचेस्टर युनाइटेडमा अनुबन्ध भएपछि ह्यारी मगायर विश्वकै सर्वाधिक महँगा डिफेन्डर बनेका छन् । कमजोर रक्षापंक्तिमा सुधार ल्याएर प्रिमियर लिगमा वर्चस्व फिर्ता लिने लक्ष्यसहित युनाइटेडले २६ वर्षीय इंग्लिस सेन्ट्रल डिफेन्डरको अनुबन्ध गरेको हो ।

जेमी भर्डीले लेस्टरका पूर्व टिमसाथी मगायरको टाउकोको आकारबारे मजाक उडाउन सक्नेछन् । तर यी पूर्व शिक्षकसँग शरीरसँगै तीक्ष्ण दिमाग पनि छ । ‘उनी एक असल शिष्य थिए । जो सधैं हाजिर हुन्थे र धेरै मिहिनेत गर्थे,’ मगायरले अध्यापन गर्ने विद्यालयका उपप्रधानाध्यापक सू कैनले भने । किशोरास्थामा फुटबल खेल्न सुरु गर्दा मगायरले मिडफिल्डरको भूमिकामा आफूलाई सहज मान्थे । रक्षापंक्तिमा उनको क्षमता पहिचान गरी सेफिल्ड युनाइटेड एकेडेमीका प्रशिक्षक जोन पेम्बर्टनले उनलाई सेन्टर डिफेन्सको भूमिकामा ढाले ।

जोन टेरी र उनका अन्तर्राष्ट्रिय सहयात्री रियो फर्डिनान्ड मगायरका प्रेरणास्रोत हुन् । फर्डिनान्डको खेलबाट उनी धेरै प्रभावित थिए । सन् २०१२ देखि ०१४ सम्म उनी हल सिटीमा रहँदा उनले म्यानचेस्टर युनाइटेडमा रहेका फर्डिनान्डसँग खेल्दा बेग्लै अनुभूति भएको र धेरै सिक्न पाएको त्यति बेलै भनेका थिए ।

प्रकाशित : श्रावण २१, २०७६ ०८:०५
पूरा पढ्नुहोस्
प्रतिक्रिया
पठाउनुहोस्
ADVERTISEMENT