‘त्यागी’ र तरुणको भिडन्त

जनक नेपाल, तुलाराम पाण्डे

कालीकोट — वाम गठबन्धनका तर्फबाट माओवादी केन्द्रका उम्मेदवार दुर्गाबहादुर रावत ३५ वर्षदेखि कम्युनिस्ट राजनीतिमा निरन्तर छन् । उनलाई चुनौती दिँदै छन्, कांग्रेसका ३५ वर्षीय तरुण नेता भूपेन्द्रजंग शाही । एउटै निर्वाचन क्षेत्र रहेको जिल्लामा त्यागी नेताको परिचय बनाएका रावत र सम्भावना बोकेका युवा नेता शाहीको प्रतिस्पर्धा रोचक बनेको छ ।

फरक विचार र अनुभव बोकेका यी प्रतिस्पर्धीबीच एउटै समानता छ, दुवै १४ वर्षको कलिलै उमेरमा विद्यार्थी राजनीतिमा तानिए । एमाले–माओवादी गठबन्धनका उम्मेदवार रावत दुवै दलका समर्थकको मन जित्न गाउँ पुगिरहेका छन् । गाउँ तथा नगरस्तरीय कार्यकर्ता भेला गरिरहेका छन् । उनी जन्मजात खुट्टाको अपाङ्ग छन् । तर, पैदल उकालोओरालो गर्दै मतदाता भेट्न व्यस्त छन् ।

उनी माओवादी र एमाले नेतासहित कालीकोटको प्रदेश (ख) का ४ वटा पालिकास्तरीय संयुक्त भेला सकेर मान्म फर्किएका छन् । अपांगताका कारण रावत दैनिक २/३ घण्टाभन्दा धेरै पैदल हिँड्न सक्दैनन् । ‘चुनावी दौडधुप गर्न खुट्टाले केही समस्या पारेको छ,’ उनले भने, ‘साथीहरूले कतै घोडा व्यवस्था गर्छन् । बाटो पुगेका ठाउँमा गाडी खोजेर पठाउँछन् । उनी बिहीबारदेखि प्रदेश (क) का चुनावी सभामा जाँदैछन् । कांग्रेस भातृसंगठन तरुण दलका महासचिव शाही ०७० को संविधानसभा निर्वाचनका पनि प्रत्याशी हुन् । चुनावमा पराजित भए पनि बारम्बार मतदाताकहाँ पुगिरहेकाले प्रचारप्रसारका लागि घरदैलो भने नगर्ने उनले बताए । ‘अघिल्लो चुनावमा मैले हारे पनि जित्नेभन्दा धेरै पटक गाउँ आउने प्रतिबद्धता गरेको थिएँ,’ शाहीले भने, ‘बितेको चार वर्षभरि मैले घरदैलो गरिरहेको छु । त्यसैले चुनावमा कार्यकर्ता परिचालनमा जोड छ ।’ उनले बरु सामाजिक सञ्जाल, एफएम रेडियो लगायतका नयाँ प्रविधिलाई भरपूर उपयोग गरेका छन् ।

नेमकिपाको राजनीतिसँगै ०४२ देखि ०५४ सम्म प्रावि तहको शिक्षक रावल स्थायी जागिर छाडेर माओवादी ‘जनयुद्ध’मा सामेल भए । एरिया इन्चार्ज, जिल्ला जनसरकार उपप्रमुख हुँदै ०६४ यता माओवादी जिल्ला संयोजकको जिम्मेवारीमा छन् । नेतृत्वमा रहेर ०६४ र ०७० को निर्वाचनमा माओवादीलाई जिताएका रावतसँग आफैं प्रत्यक्ष उम्मेदवार बनेको अनुभव छैन । कांग्रेसका शाही भने अघिल्लो संविधानसभा निर्वाचनका प्रत्याशी हुन् ।

फरक पुष्ठभूमिका दुई उम्मेदवारका चुनावी नारा पनि फरक छन् । रावल कालीकोटका अरू धेरै सम्भावनासँगै युद्ध पर्यटनलाई महत्त्व दिन्छन् । शाही भने सुन्दर र समृद्ध कालीकोटको नारालाई अभियानमा बदल्ने बताउँछन् । ०७० को संविधानसभा चुनाव र ६ महिनाअघि सम्पन्न स्थानीय चुनावलाई आधार मान्दा लोकतान्त्रिक गठबन्धनको तुलनामा वाम गठबन्धनको मत झन्डै दोब्बर देखिन्छ । तर, यो चुनावलाई दुवै उम्मेदवारले विभिन्न कोणबाट सहज र कठिन आकलन गरेका छन् । माओवादी उम्मेदवार रावत वाम गठबन्धनको मत जोगाउन सके सहज जित हुनेमा ढुक्क छन् भने शाहीलाई विगतमा एमाले र माओवादीबीच कालीकोटमा रहेको द्वन्द्वका कारण एमालेको भोट तान्ने रणनीति बुन्दै छन् ।

०४८ मा कांग्रेस, ०५१ र ५६ मा एमाले, ०६४ र ७० मा माओवादीले चुनाव जितेको कालीकोटमा यस पटक भने दलहरू दुई कित्तामा उभिएका छन् । एक प्रतिनिधिसभा र दुई प्रदेश सदस्यका लागि १३ जना उम्मेदवार चुनावी प्रतिस्पर्धामा भए पनि वाम गठबन्धनका रावत र कांग्रेस, दुई राप्रपा र नयाँशक्तिबीचको लोकतान्त्रिक गठबन्धनका शाहीबीच मुख्य भिडन्त हुने देखिएको छ ।

रावत ०४७ पछि सधैंजसो सत्तामा रहेको कांग्रेसबाट परिवर्तन नहुने भएकाले वाम गठबन्धनको सरकार बनाउन आफूले जित्नुपर्ने बताउँछन् । भौगोलिक कठिनाइ भए पनि ३ हावापानी रहेकाले कृषि पर्यटन, पिली र कोटवाडालाई युद्ध पर्यटकीय क्षेत्र बनाउने उनको प्रतिबद्धता छ । ‘निर्वाहमुखी कृषि प्रणालीलाई सुधार गर्दै व्यावसायिक खाद्यान्न उत्पादन तथा तरकारी खेती, पशुपालनलाई जोड दिनेछु,’ उनले भने ।

कांग्रेस उम्मेदवार शाही कर्णालीबाट नेविसंघ र तरुण दलको केन्द्रीय तहमा पुग्ने पहिलो नेता हुन् । ‘तपाईं मलाई भोट दिनुहोस्, म सुन्दर र समृद्ध कालीकोट दिन्छु’ जस्ता आकर्षक नारासहित उनी मैदानमा छन् । कालीकोटलाई समृद्ध बनाउने आफूसँग योजना रहेकाले मतदाताले विश्वास गर्ने अपेक्षा राखेको उनले बताए । विगतमा हुने कांग्रेसको गुटबन्दीको पूर्णरूपले अन्त्य हुनु, माओवादी र एमालेका नेता/कार्यकर्ताबीचको अन्तरविरोध, दुई राप्रपा र नयाँ शक्तिसमेतको साथले आफूलाई चुनाव जित्न सजिलो हुने उनको दाबी छ ।

प्रकाशित : कार्तिक २५, २०७४ ०६:४२
ADVERTISEMENT
प्रतिक्रिया
पठाउनुहोस्
ADVERTISEMENT

विद्यालयमै सभा

मन्त्रीकै उपस्थितिमा आचारसंहिताविपरीत सभा
कक्षा बने भान्छाकोठा
अवधेशकुमार झा

खुरहुरिया (सप्तरी) — कांग्रेसले निर्वाचन आचारसंहिता विपरीत विष्णुपुर गाउँपालिकाको खुरहुरिया चौकस्थित जनता माध्यमिक विद्यालय परिसरमा सभा गरेको छ । मूल ढोकामा पार्टी झन्डा टाँगेर चौरमा सभा गरिएको हो । सभामा आएका पाहुनालाई भोज दिन कक्षाकोठालाई भान्छाका रूपमा प्रयोग गरिएको छ ।


प्रधानाध्यापक सूर्यनारायण यादवको सहमतिमै कांग्रेसले बृहत् पार्टी प्रवेश कार्यक्रम गरेको स्रोतले जनायो । ‘शुक्रबार भएका कारण चार घण्टीको पढाइपछि विद्यालयमा छुट्टी भयो । त्यसपछि स्पिकर बज्न थाल्यो । हिन्दी फिल्मी गीत घन्किए,’ एक सहभागीले भने ।
कक्षाकोठाभित्र माछा र चिया पकाइएको थियो । कांग्रेस सप्तरीका सभापति तथा क्षेत्र ३ का प्रतिनिधिसभा सदस्य उम्मेदवार दिनेशकुमार यादव आउनेबितिकै कार्यक्रम सुरु गरिएको थियो । प्रधानाध्यापक यादव अतिथिको लहरमा थिए । उनले कांग्रेसका पक्षमा भोट माग्दै भाषण गर्न भ्याए । 
कार्यक्रममा उपस्थित हुन संस्कृति पर्यटन तथा नागरिक उड्डयनमन्त्री जितेन्द्रनारायण देव बा२झ १९४७ नम्बरको सरकारी गाडीमा आए । उनले प्रमुख अतिथिका रूपमा कार्यक्रममा सहभागिता जनाए । साँझ विद्यालय परिसरमै माछा र चिउराको भोज भयो । खुरहुरियास्थित जनता माविमा कार्यक्रम हुनुअघि मन्त्री देवसहितको टोलीले पत्थरगाडामा रहेको अर्को एउटा विद्यालयमै चुनावी सभा गरेका थिए । निर्वाचन आचारसंहिताविपरीत जिल्लाका दुई विद्यालयमा चुनावी सभा भएका हुन् । सप्तरीका प्रमुख जिल्ला अधिकारी भागिरथ पाण्डेले निर्वाचन आचारसंहिताविपरीत कुनै पनि दलले विद्यालयमा सभा गर्न नपाउने बताए । ‘सबै दलले निर्वाचन आचारसंहिता पालना गर्छु भनेर प्रतिबद्धता जनाएका छन् । त्यस विपरीत जान मिल्दैन,’ उनले भने । आचारसंहिता विपरीत कार्यक्रम भए/नभएका विषयमा जानकारी लिएपछि मात्र थप कुरा बताउन मिल्ने प्रतिक्रिया उनले दिए ।
विद्यालय व्यवस्थापन समिति अध्यक्ष जयनारायण यादवले आचारसंहिता र विद्यालय शान्ति क्षेत्रको मर्मविपरीत विद्यालयमै माछा–चिउराको भोज र चुनावी सभा गरिनु जायज नभएको बताए । ‘मलाई यो कार्यक्रमबारे कुनै जानकारी छैन । अनुमति दिनेउपर कारबाही हुनुपर्छ,’ उनले भने । प्रधानाध्यापक यादवले आफू कार्यक्रमको अतिथि र वक्ता भएको स्विकारे । उनले आफ्नो अनुमतिबेगरै विद्यालयमा मञ्च बनाइसकेकाले रोक्न नसकिएको जिकिर गरे । ‘विद्यालयमै थिएँ । आसन ग्रहण र बोल्नका लागि समय दिएकाले उपस्थिति जनाएँ,’ उनले भने ।
पर्यटनमन्त्री देवले विद्यालयमा सभा भएकोबारे आफू अनभिज्ञ रहेको बताए । उनले भने, ‘कार्यक्रम विद्यालयमा हुनु हुँदैन, विद्यालयमा भइरहेको हो भन्ने कुरा मलाई जानकारी नै भएन ।’ 
भोट माग्दै रेडक्रस सभापति
यी दुवै विद्यालयमा आयोजित चुनावी सभाका अर्का अतिथि थिए, नेपाल रेडक्रस सोसाइटी सप्तरीका सभापति जोगेन्द्र भगत । उनले पत्थरगाडास्थित सखुवामा आयोजित सभालाई सम्बोधन गर्दै अहिले आचारसंहिता लागू भएकाले बाढीपीडितलाई राहत वितरण गर्न समस्या भएको सुनाए । उनले आफू व्यक्तिगत रूपमा कांग्रेस उम्मेदवारका लागि मत मागिरहेको प्रतिक्रिया दिए । 

 

प्रकाशित : कार्तिक २५, २०७४ ०६:४२
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT