तनहुँमा बल्ल आइपुग्यो मतदाता शिक्षा सामग्री

कान्तिपुर संवाददाता

काठमाडौं — तनहूँमा मतदाता शिक्षा सामग्री आइपुगेको छ । एक हप्ता अगाडि आउनुपर्ने मतदाता शिक्षा सामग्री ढिलाई गरी आइपुग्दा गाउँ गाउँमा मतदाता शिक्षा कार्यक्रम सञ्चालनमा ढिलाई भएको छ ।

निर्वाचन आयोगले ढिलाई गरी निर्वाचन शिक्षा सामग्री पोस्टर, नमुना मतपत्र, आचारसंहिताका पुस्तक तथा पोस्टरलागयत आवश्यक सामग्री जिल्ला निर्वाचन कार्यालय तनहुँमा आएको निर्वाचन अधिकारी बाबुराम घिमिरेले बताए । कार्तिक २१ गतेबाट मतदाता शिक्षा स्वंसेविकालाई प्रशिक्षण दिएर गाउँमा खटाउनु पर्ने हो उनले भने, 'मतदाता शिक्षा सामग्री ढिलाई गरी आएकाले मतदाता शिक्षा सञ्चालनमा ढिलाई भएको छ ।'
 
कार्तिक २७ देखि २९ गतेसम्म मतदाता शिक्षा स्वंसेविकालाई तालिम सञ्चालन गर्ने निर्वाचन कार्यालयका सूचना अधिकारी अशोक नेपालीले जानकारी दिए । 'तालिमलगत्तै निर्वाचन शिक्षा कार्यकर्तालाई तनहुँको सबै गाउँपालिका र नगरपालिकामा खटाउर्छौ', उनले भने, 'प्रत्येक मतदान केन्द्रमा एक जनाको दरले २ सय ६५ जना निर्वाचन शिक्षा कार्यकर्ता खटाउने छ ।'

निर्वाचन शिक्षा कार्यकर्ताले गाउँ गाउँमा गएर निर्वाचनसम्बन्धी पोस्टर टाँस्ने, मतदाताको घरदैलोमा पुगी नमुना मतपत्र प्रयोग गरी मतदातालाई मतदान गर्न सिकाउने तथा उत्प्रेरणा गर्नेकार्य गर्न लगाउने छ । 

तनहूँ निर्वाचन क्षेत्र नम्बर १ मा १ लाख ५ हजार ५ सय ७२ जना र निर्वाचन क्षेत्र नम्बर २ मा १ लाख ५ हजार ८ सय २४ जना मतादातासहित कुल २ लाख ११ हजार ३ सय ९६ जना मतदाता रहेको जिल्ला निर्वाचन कार्यालय तनहूँले जनाएको छ । 

प्रकाशित : कार्तिक २६, २०७४ १६:२८
ADVERTISEMENT
ADVERTISEMENT
प्रतिक्रिया
पठाउनुहोस्

रोल्पामा चुनावी टोलीमाथि ९ राउन्ड गोली प्रहार

प्रहरीबाट ५ राउण्ड जवाफी फायर
काशीराम डाँगी

रोल्पा — चुनावी प्रचार अभियानका क्रममा रोल्पाको इरिबाङ गाउँ पुगेका वाम गठबन्धनका तर्फबाट रोल्पाबाट प्रतिनिधिसभाका उम्मेदवार एवं पूर्वअर्थमन्त्री वर्षमान पुनमगरको टोलीमाथि आइतबार गोली चलाएर अवरोध पुर्‍याइएको छ । अज्ञात समूहले दुईखोली गाउँपालिका ३ स्थित केवरी खोलानजिकै हतियार पड्काएर अवरोध प्रयास गरेको हो ।

प्रहरीका अनुसार पुनसहितको चुनावी अभियान टोली बागमारा पुग्नै लाग्दा केवरीखोला नजिकैको जंगलबाट आइतबार बिहान साढे ११ बजेतिर ९ राउन्ड गोली चलेको सुनिएको थियो । पुनको सुरक्षार्थ साथैमा रहेको प्रहरीले पनि ५ राउन्ड गोली चलाएको थियो । स्थानीयका अनुसार केवरी गाउँ पुग्ने बाटोमाथिको जंगलबाट बन्दुक पड्काइएको आवाज सुनिएको हो । तर, प्रहरीले पुनको टोलीलाई कडा सुरक्षासाथ सकुशल इरिबाङको बागमारा बजार पुर्‍याएको थियो । वाम गठबन्धनका तर्फबाट आइतबार इरिबाङको बागमारा बजारमा चुनावी सभा आयोजना गर्ने पहिलेकै निर्णय थियो । उक्त निर्णयअनुसार प्रहरीको कडा सुरक्षाका साथ पुनसहितका नेता सम्मिलित सभा सञ्चालन भएको छ ।

पुन सवार गाडीमाथि शनिबार मध्याह्नमा माडी-१ को भिताबाङ गाउँ नजिकैको पेदीखोलामा एम्बुस राखिएको थियो । उक्त घटनाबाट जोगिएर राङ्सीमा सभा गर्न पुगेका पुनले यसअघि नै उम्मेदवारको सुरक्षामाथि खतरा उत्पन्न भएको बताएका थिए । पुनसहित वाम गठबन्धनको निर्वाचन टोलीमा प्रदेशसभाका उम्मेदवार दीपेन्द्र पुन, प्रचार अभियानका जिल्ला संयोजक एमाले पोलिटब्युरो सदस्य गोकुल घर्ती, समानुपातिक उम्मेदवारहरु माओवादी केन्द्रका जयपुरी घर्ती, हरिसरा घर्ती, एमालेका कुमार दशौदी र ईश्वरी घर्ती तथा एमाले अध्यक्ष हरिप्रसाद घर्तीलगायतका नेता कार्यकर्ता छन् ।

चुनावी टोलीमाथि अवरोध गर्न अज्ञात समूहले विभिन्न स्थानमा ढुंगा प्रहार एवं सडक अवरुद्ध समेत गरेको छ । पुन बा १५ च ८६२८ नम्बरको स्कारपियो जिपमा सवार छन् । उक्त जिपमाथि लक्षित गरेर शनिबार एम्बुस राखिएको हो ।

जिल्ला प्रहरी कार्यालयका प्रहरी निरीक्षक सुदर्शन पन्थीले गोली प्रहार भएको स्थानलाई नियन्त्रणमा लिएर अनुसन्धान थालिएको बताए ।

प्रमुख जिल्ला अधिकारी डिजन भट्टराईले उम्मेदवारको प्रचार टोलीमाथि सामान्य रुपमा अवरोध गर्न खोजिए पनि सुरक्षाफौजले पुनसहितको टोलीलाई गन्तव्यमा पुर्‍याउन सफल भएको बताए । गोली चलाउने समूहको पहिचान गर्न सुरक्षाकर्मीलाई खटाइएको प्रजिअ भट्टराईले बताए ।

प्रकाशित : कार्तिक २६, २०७४ १६:२८
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT