मतगणनाका लागि धादिङमा कडा सुरक्षा व्यवस्था

हरिहरसिंह राठौर

धादिङ — निर्वाचन आयोगले अति संवेदनशील जिल्लाको सूचीमा राखेको धादिङमा मतगणनाको लागि सुरक्षा व्यवस्था कडा पारिएको छ ।

राजनीतिक दलहरुको सहमति र निर्वाचन आयोगको निर्देशनबमोजिम मतगणनास्थलमा कर्मचारी, उम्मेदवार, प्रतिनिधिहरुको समेत निगरानी र आचारसंहिताबमोजिम मतगणना हुने प्रमुख निर्वाचन अधिकृत उमेश कोइरालाले बताए । ‘मतगणनास्थलमा मोबाइल, क्यामरा लैजान कर्मचारीलगायत सबैलाई प्रतिबन्ध छ, पत्रकारहरुलाई निश्चित समयावधि तोकेर प्रवेश दिइनेछ' प्रमुख निर्वाचन अधिकृत कोइरालाले भने, 'मतगणनाको परिणाम सकेसम्म छिटो जानकारी गराइने छौं ।’उनका अनुसार मतगणना स्थलमा सीसीटीभी पनि जडान गरिनेछ ।

जिल्लाका २ निर्वाचन क्षेत्रका मतपेटिका राखिएका कार्यालयहरुमा गत १० गतेदेखि नै कामकाज ठप्प छ । निर्वाचन क्षेत्र नं १ को कार्यालय रहेको जिल्ला भू-संरक्षण कार्यालय र निर्वाचन क्षेत्र नं २ को कार्यालय रहेको जिल्ला समन्वय समितिको कार्यालय गत १० गतेदेखि नै सुरक्षार्थ घेराबार र ४ तहको सुरक्षा घेरामा छ । कर्मचारीहरु बाहिरै हाजिर गरी घर फर्कने गरेका छन् । निर्वाचन क्षेत्रस्तरीय मतगणनास्थलमा झोलुङ्गे पुलमा प्रयोग हुने कडाखालको फलामे तारजाली राखिएको छ भने उम्मेदवार र प्रतिनिधिहरु साँघुरो स्थानमा बसिसरहेका छन् । ‘उम्मेदवार वा प्रतिनिधिहरुले कुनै पनि हालतमा मतपत्र छुन नसक्ने गरी मतगणना गर्ने व्यवस्था मिलाउने आदेश जारी गरिएको छ,' निर्वाचन क्षेत्र नं १ का निर्वाचन अधिकृत योगनाथ ढकालले भने, 'बिहीबार ५ बजेदेखि नै मतगणना आरम्भ गर्ने तयारीमा छौं ।’

मतपरिणाम सुन्न ग्रामीण भेगबाट दलका कार्यकर्ताहरु बुधबारदेखि नै सदरमुकाम झर्न थालिसकेका छन् ।

प्रकाशित : मंसिर २०, २०७४ १६:३१
प्रतिक्रिया
पठाउनुहोस्

महोत्तरीमा वाम गठबन्धन र फोरम कार्यकर्ताबीच झडप, ३ जना घाइते

रवीन्द्र उप्रेती

महोत्तरी — वाम गठबन्धन र संघीय समाजवादी फोरमका कार्यकर्ताबीच गौशालामा झडप हुँदा ३ जना घाइते भएका छन् । प्रहरीकाअनुसार एकको अवस्था गम्भीर छ । झडपमा वाम गठबन्धनका प्रमोद महतो गम्भीर घाइते भएको प्रहरीले जनाएको छ । टाउकोमा गहिरो चोट लागेको उनको एउटा हात र कम्मर पनि चल्न नसक्ने भएपछि राति नै अञ्चल असपताल पुर्‍याइएको थियो ।

स्थितिमा सुधार नआएपछि काठमाडौं लाने तरखर भइरहेको पारिवारिक श्रोतले जनाएको छ । वाम गठबन्धनकै सामान्य घाइते मनोज सिंह र विपिन सिंहलाई प्राथमिक स्वास्थ्य केन्द्र गौशाला उपचारपछि घर फर्काइएको छ ।

प्रत्यक्षदर्शिकाअनुसार मंगलबार मध्यराततिर सार्वजनिक सडकमै करिब आधा घण्टा झडप भएको थियो । वाम गठवन्धनकाअनुसार ४ वटा जिपमा घरेलु हतियारसहित २०/२२ जनाको संख्यामा आएका फोरम कार्यकर्ताले आफूहरुलाई घेरा हाली कुटपीट गर्न थालेपछि तनाव भएको हो । आक्रमणकारीको नेतृत्व निर्वाचन क्षेत्र नं १ बाट फोरमका प्रतिनिधिसभा उम्मेदवार लक्ष्मी महतो आफैंले गरेको उनीहरुको आरोप छ ।

लक्ष्मी महतोले भने वाम गठवन्धनका सर्मथकले छुरा प्रहार गर्न खोज्दा आफ्ना कार्यकर्ता रक्षात्मक बनेको बताए । आफ्नै सामने कार्यकर्तामाथि आक्रमण र अपमान हुन थालेपछि बाध्य भएर प्रतिकारमा उत्रनु परेको उनले जनाए । 

गौशाला प्रहरीले घटनामा कसैलाई पनि पक्राउ नगरेको जनाएको छ । प्रहरी निरीक्षक भोला भट्टले अहिले गौशालाको स्थिति सामान्य रहेको जनाए । 

प्रकाशित : मंसिर २०, २०७४ १५:५७
पूरा पढ्नुहोस्
प्रतिक्रिया
पठाउनुहोस्