मुस्ताङमा मतगणना सुरु

कुनै अवरोध नभए आजै राति १ बजेसम्म सबै परिणाम आइसक्ने
विनोद त्रिपाठी

मुस्ताङ — यही मंसिर १० गते भएको प्रतिनिधि र प्रदेशसभा चुनावको मतगणना मुस्ताङको सदरमुकाम जोमसोममा बिहीबार ५ बजेदेखि सुरु भएको छ । मतगणनामा दलहरुका प्रतिनिधि राखेर कर्मचारीहरु गणना कार्यमा खटिएका प्रमुख निर्वाचन अधिकृतको कार्यालयले जनाएको छ ।

गणनाको लागि मतपेटिका राखिएको स्थान र मतपेटिकाहरु रुजु गर्ने काम भइरहेको छ । जिल्ला समन्वय समितिको कार्यालयमा राखिएका मतपेटिका सबै चेक चलिरहेको र चार समूह बनाएर गणना कार्य सुरु गरिएको प्रमुख निर्वाचन अधिकृत बलराम त्रिपाठीले जानकारी दिए । प्रतिनिधिसभा र प्रदेशसभाको दुई दुई स्थान तोकेर मतगणना चलिरहेको छ । दुबैसभाको गणना सकिएपछि समानुपातिकको गणना हुने अधिकृत त्रिपाठीले बताए । एउटामात्र निर्वाचन क्षेत्र रहेको मुस्ताङमा प्रतिनिधिसभाका लागि २ र प्रदेशसभाका ५ जना गरी ८ जना उम्मेदवार उठेका थिए ।
 
जिल्लाभरिका ३७ वटा मतदान केन्द्रका १ सय ११ वटा मतपेटिका एकसाथ गणना चलिरहेको छ । गणना हुने अघिल्लो दिनदेखि मतदाता र कार्यकर्ताको गणनास्थलमा भीड लागेको छ । भोट गनेको थाहा पाउन उपल्लो मुस्ताङका विकट छोन्हुप, छोसेर, लोमान्थाङ, सुर्खाङ, घमी, चराङ, मुक्तिक्षेत्र र झुसाङ क्षेत्र वरपरबाट दलहरुका कार्यकर्ता सदरमुकाम जोमसोम आएका छन् ।

११ दिनसम्म मतपेटिका राखिएको स्थानमा पहिलो घेरामा प्रहरी, दोस्रोमा सशस्त्र र तेस्रोमा सेनाले पहरा दिएर बसेका थिए । चौथो घेरामा दलहरुका प्रतिनिधिहरु रातभरि चिसोमा मतपेटिका कुरेका थिए । मुस्ताङमा ९ हजार ४ सय २७ मतदातामध्ये ६ हजार ७ सय ७३ जनाले भोट दिएका थिए । यो कुल मतदाताको मतमध्ये ७१ दशमलव ८४ प्रतिशत भोट हो ।

Yamaha

प्रतिनिधिसभाका लागि कांग्रेसबाट रोमी गौचन थकाली, वाम घटकबाट प्रेमप्रसाद तुलाचन, प्रदेशसभाका लागि कांग्रेसका मिक्युर गुरुङ, छिरिङ दावा गुरुङ, एमालेका इन्द्रधारा विष्ट र महेन्द्र थकाली, राप्रपा (प्रजातान्त्रिक)का प्रवीण शेरचन चुनावी मैदानमा छन् । कुनै अवरोध भएन भने राति १ बजेसम्म सबै मतपरिणाम आइसक्ने प्रमुख निर्वाचन अधिकृतको कार्यालयले जनाएको छ । 

मुस्ताङ समन्वय समिति कार्यालयमा राखिएका मतपेटिकाहरु । तस्बिर : विनोद त्रिपाठी/कान्तिपुर । 
 

प्रकाशित : मंसिर २१, २०७४ १७:१३
प्रतिक्रिया
पठाउनुहोस्
ADVERTISEMENT

उजुरी परेकाले मतगणना गर्न आयोगको आदेश कुर्दै

मतपेटिका मुसाले काटेमा छुट दिइने
प्रत्येक वडाको छुट्टै मत गनिने
राजेन्द्र मानन्धर

दोलखा — निर्वाचनसम्बन्धी उजुरी परेकाले दोलखामा मतगणना गर्न निर्वाचन आयोगको निर्णय पर्खनु पर्ने भएको छ । मुख्य निर्वाचन अधिकृतको कार्यालयमा बिहीबार मध्यान्ह भएको सर्वदलीय बैठकले आयोगको निर्णय आएपछि मात्रै मतगणा सुरु गर्ने निर्णय गरेको छ । नेपाली कांग्रेस दोलखाले गौरीशंकर गाउँपालिकाको केही स्थानमा धाँधलीपूर्ण निर्वाचन भएको दाबी गर्दै उजुरी गरेको थियो ।

मुख्य निर्वाचन अधिकृतको कार्यालयबाट आवश्यक प्रमाणहरु गइसकेको भए पनि आयोगले निर्णय नपठाउँदा तोकिएको समयमा मतगणना हुन्छ वा हुन्न भन्ने अन्योल भएको छ । कांग्रेसले आयोगको निर्णयजस्तो आउँछ त्यसलाई स्वीकार्ने तर जबरजस्ती मतगणना गरिए मतगणना बहिष्कार गर्ने बताएपछि निर्णय पर्खने सहमति भएको हो ।

मतपेटिका मुसाले काटेको भए छुट
सर्वदलीय बैठकले दोलखा जिल्ला अदालतका भवनका कोठाहरुमा राखिएका मतपेटिका मुसाले काटेको खण्डमा छुट दिइने भएको छ । लामो समयसम्म राखिएको मतपेटिकाको सिलहरु मुसाले काटेको हुनसक्ने भन्दै मुख्य निर्वाचन अधिकृतको कार्यालयबाट जानकारी गराइएपछि त्यसो भएमा छुट दिइने दल र उम्मेदवारहरुले बताएका हुन् । बैठकले मतपेटिका हल्ला टुटफुट भए, केही सिलहरु चोटपटकले खुस्किएको भए गणना कार्यमा अवरोध नगर्ने निर्णय पनि भएको छ ।

प्रत्येक वडाको छुट्टै गनिने
निर्वाचन आयोगले कुनै पनि संकेतहरु नदेखियोस् भनेर मिसाएर गनिने निर्देशन गरेको भए पनि दोलखामा प्रत्येक वडाहरुको मत छुट्टाछुट्टै गनिने भएको छ ।
जिल्लाको ७४ वटा वडामा के कति मत खसेको रहेछ भनेर आँकलन गर्न सजिलोका लागि सबै दलहरुले छुट्याएर गनिनु पर्ने प्रस्ताव गरेका थिए । सबै दलको सहमति भएकाले त्यसरी मतपत्रहरु गनिने निष्कर्षमा बैठक पुगेको हो ।

दोलखास्थित मुख्य निर्वाचन अधिकृतको कार्यालय परिसरमा मतगणनासम्बन्धी सर्वदलीय बैठक हुँदै । तस्बिर : राजेन्द्र मानन्धर/कान्तिपुर

प्रकाशित : मंसिर २१, २०७४ १७:०१
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT