गणना आजदेखि

कान्तिपुर टिम

पोखरा — प्रदेश ४ का ५ जिल्लामध्ये पूर्वी नवलपरासीमा सर्वाधिक ७१ प्रतिशत मतदान भएको छ । कास्कीमा ६७ प्रतिशत मत खसेको प्रारम्भिक अनुमान गरिएको क्षेत्रीय निर्वाचन अधिकारी गंगालाल सुवेदीले बताए । उनका अनुसार स्थानीय तहको निर्वाचनमा भने ७५ प्रतिशत मत खसेको थियो ।

तीन प्रतिनिधि र ६ प्रदेशसभाका लागि भएको निर्वाचन कास्कीमा शान्तिपूर्ण रूपमा सम्पन्न भयो ।

कास्कीमा १ सय ५० मतदानस्थलमा ३ सय १७ मतदान केन्द्र कायम गरिएको थियो । कास्कीमा शुक्रबार बिहानमात्रै मतगणना हुने भएको छ । सबै मतदानस्थलबाट राति अबेरसम्म मतपेटिका आइसक्ने र सबै कर्मचारी निर्वाचनमा खटिएकाले तत्काल सम्भव नभएको भन्दै जिल्ला सुरक्षा समिति र मुख्य निर्वाचन अधिकृतको कार्यालयले राजनीतिक दलसँग समन्वय गरी शुक्रबार मतगणना थाल्ने जनाएका हुन् । छोम्रोङ, सिकलेस, मिजुरेलगायत टाढाका मतदानस्थलबाट राति ११ बजेसम्ममा मतपेटिका गणनास्थलमा आउने प्रमुख जिल्ला अधिकारी तारानाथ अधिकारीले बताए । मतगणनाका लागि शुक्रबार बिहान ८ बजे सर्वदलीय बैठकको आयोजना गरिएको छ । 
जिल्ला समन्वय समिति, क्षेत्रीय शिक्षा निर्देशनालय र डिभिजन सहकारी तथा प्रशिक्षण कार्यालयमा मतगणनास्थल तोकिएको छ ।
नवलपरासीमा उत्साहजनक 
पूर्वी नवलपरासीमा ७१ प्रतिशत मत खसेको प्रारम्भिक अनुमान गरिएको छ । धेरै मतदाता रहेको स्थलमा साँझ ७ बजेसम्म पनि मतदान जारी थियो । जिल्लाका सबै मतदान केन्द्रबाट मध्यरातसम्म आइपुग्ने र त्यसपछि मतगणनाका लागि आवश्यक प्रक्रिया अघि बढाइने मुख्य निर्वाचन अधिकृतको कार्यालयले जनाएको छ ।

पहाडी भेगका मतपेटिका ल्याउन कच्ची सडकका कारण ढिलो हुने भएकाले ठूलो संख्यामा सुरक्षाकर्मी परिचालन गरिएको प्रहरीले जनाएको छ । पूर्वी नवलपरासीमा २ लाख २१ हजार ७ सय १४ मतदाता रहेका छन् । 
पर्वतमा ६५ प्रतिशत 
पर्वतमा ६२ देखि ६५ प्रतिशत मत खसेको अनुमान छ । सदरमुकाम आसपासमै सबैभन्दा कम मत खसेको छ । सहायक मुख्य निर्वाचन अधिकृत विष्णुप्रसाद भुसालका अनुसार १ लाख ७ हजार ३ सय मतदाता भएको जिल्लामा करिब ६४ देखि ६८ हजार मतदाताले मतदान गरेको अनुमान छ । सबैभन्दा बढी मोदी ७ राम्जामा ६८ प्रतिशत मत खसेको छ । वैशाखमा सम्पन्न स्थानीय निर्वाचनमा ७३ प्रतिशत मत खसेकोमा यो पटक करिब १० प्रतिशत मत कम खसेको हो । पर्वतमा पनि शुक्रबार दिउँसोमात्र मतगणना सुरु हुने मुख्य निर्वाचन अधिकृतको कार्यालयले जनाएको छ । जिल्लाभरका मतपेटिका सदरमुकाम ल्याउँदा मध्यरात हुने भएकाले मतगणनामा ढिलाइ हुने भएको हो । प्रमुख जिल्ला अधिकारी राजेश पन्थीले सुरक्षा र पायक दुवै हिसाबले सहज हुने गरी मतपेटिका ल्याउन सवारीको व्यवस्था गरिएको बताए । मुख्य निर्वाचन अधिकृत ध्रुवप्रसाद सापकोटाले शुक्रबार बिहान सर्वदलीय बैठक सकेर सोही बैठकको निर्णयअनुसारको समयबाट गणना सुरु गर्ने बताए ।
मतपेटिका ओसारिंदै 
स्याङ्जा मुख्य निर्वाचन अधिकृतको कार्यालयका प्रवक्ता यामप्रसाद रेग्मीले यहाँ ६७ प्रतिशत मत खसेको बताए । मतदाता परिचयपत्रका कारण फर्जी मत खस्ने सम्भावना कम भएकाले पनि प्रतिशत कम भएको उनको भनाइ छ । जिल्लाका १ सय ९९ मतदान स्थानमा रहेका २ सय ९५ मतदान केन्द्रमा २६ सय कर्मचारी र करिब ३२ सय सुरक्षाकर्मी खटेका थिए । २ लाख १० हजार ३८ मतदाता रहेको स्याङ्जामा १ लाख ४२ हजार ८ सय ५२ जनाले मतदान गरे । 
तनहुँमा ६५ प्रतिशत 
तनहुँमा करिब ६५ प्रतिशत मत खसेको प्रारम्भिक अनुमान छ । जिल्लाका दुर्गम कोटा, बैदी, छिपछिपे, देवघाटबाट मतपेटिका शुक्रबार बिहानसम्म सदरमुकाम दमौलीमा ल्याइपुर्‍याउने र त्यसपछिमात्रै मतगणना हुने मुख्य निर्वाचन अधिकृत अर्जुनप्रसाद कोइरालाले बताए । शुक्रबार सर्वदलीय बैठक बसी मतगणना सुरु गरिने उनको भनाइ छ । 

 

प्रकाशित : मंसिर २२, २०७४ ०७:३६
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

छरितो मतपत्रले सहज

भवानी भट्ट

कञ्चनपुर — विगतका निर्वाचनमा एउटै मतपत्रमा धेरै उम्मेदवार र चुनाव चिह्न समावेश हुँदा मतदाता समस्यामा पर्थे । ठूलो मतपत्रमा आफुले चाहेको चिह्न खोज्न, छाप लगाउन र पट्याउनसमेत झन्झट थियो ।

विगतका निर्वाचनमा एउटै मतपत्रमा धेरै उम्मेदवार र चुनाव चिह्न समावेश हुँदा मतदाता समस्यामा पर्थे । ठूलो मतपत्रमा आफुले चाहेको चिह्न खोज्न, छाप लगाउन रपट्याउनसमेत झन्झट थियो ।
यसपटक भने छरितो मतपत्रका कारण मतदान सहज भएको मतदाताको प्रतिक्रिया छ । सानो मतपत्रमा चुनाव चिह्न खोज्न, छाप लगाउन र पट्याउन सजिलो भएको उनीहरूले बताए । ‘यसपाला धेरै सजिलो भयो,’ भीमदत्त नगरपालिका ९ का ६५ वर्षीय देव धामीले भने, ‘सानो मतपत्र, थोरै चुनाव चिह्न भएका कारण चाँडै भेटियो ।’ विगतका निर्वाचनमा ठूलो मतपत्रमा टुप्पोदेखि फेदसम्म हेर्दा पनि चुनाव चिह्न भेट्टाउन गाह्रो पर्ने गरेको उनले बताए ।

प्रतिनिधिसभा र प्रदेशसभा प्रत्यक्षतर्फको मतपत्रमा जति उम्मेदवार छन् त्यतिमात्रै चिह्न राखिएको छ । तीन निर्वाचन क्षेत्र रहेको कञ्चनपुरमा यी दुई मतपत्रमा ५ देखि ९ चुनाव चिह्न मात्र छन् । यसपटक दलहरूको चुनावी गठबन्धनले उम्मेदवार कम हुँदा पनि मतपत्र सानो भएको हो । समानुपातिकतर्फ प्रतिनिधि र प्रदेशसभा दुवैको मतपत्र एउटै पानामा रहेको र धेरै दलको चुनाव चिह्नले प्रत्यक्षतर्फको तुलनामा केही ठूलो भए पनि मतदाताले विगतमा जस्तो असहज महसुस गरेनन् ।

‘मतदान गर्न सजिलो र समय पनि कम लाग्यो,’ भीमदत्त नगरपालिका–१० का ६० वर्षीय जगन्नाथ पन्तले भने, ‘बूढापाकालाई पनि सजिलो भएको छ ।’ उनले ३–४ मिनेटमै तीनवटै मतपत्रमा मतदान सकिएको बताए । मतपत्र छरितो भए पनि कतिपय ठाउँमा मतदाता शिक्षा अभावका कारण मतदातालाई समस्या परेको देखिन्थ्यो । खासगरी वृद्धवृद्धाहरू बढी अलमलमा थिए । मतपत्र सहज भएकाले गणना पनि छिट्टै सकिने जिल्ला निर्वाचन कार्यालयका प्रमुख केशव भण्डारीले बताए ।

शान्तिपूर्ण मतदान
प्रदेश ७ का ५ जिल्लामा बिहीबार शान्तिपूर्ण रूपमा मतदान भएको छ । सबैभन्दा बढी तराईको कञ्चनपुरमा ६९ प्रतिशत मतदान भएको छ । डोटीमा ५५ प्रतिशत हाराहारी मात्रै मतदान भएको छ । कैलालीमा करिब ६५ प्रतिशत मत खसेको छ । अछाममा ६० प्रतिशत मत खसेको अनुमान छ । यहाँको चौरपाटी गाउँपालिका ५ लुंग्राको दयापीपलतोला माविको मतदान केन्द्रमा कांग्रेस र वाम गठबन्धनका कार्यकर्ताबीच झडप भएपछि स्थिति नियन्त्रणमा लिन प्रहरीले ३ राउन्ड अश्रुग्यास प्रहार गरेको थियो ।

प्रकाशित : मंसिर २२, २०७४ ०७:३६
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
ADVERTISEMENT