एमालेका दुवै सचिव विजयी

घनश्याम गौतम

गुल्मीे — प्रतिनिधिसभा क्षेत्र १ मा एमाले सचिव प्रदीप ज्ञवाली विजयी भएका छन् । आइतबार सार्वजनिक मतपरिणामअनुसार ३७ हजार ८ सय १४ मत ल्याएर उनले तेस्रोचोटि संसदीय यात्रा पक्का गरेका हुन् ।

 
२०५६ मा पहिलो पटक निर्वाचित हुँदा उनले कांग्रेसका चन्द्र केसीलाई हराएका थिए । दोस्रोपटक २०६४ मा चन्द्र भण्डारीलाई पराजित गरेका ज्ञवाली २०७० मा भने उनैसँग पराजित भए । यसपालि फेरि भण्डारीलाई ७ हजार ५ सय ५८ मतले पछि पारे । 
भण्डारीले आइतबार बिहानै ज्ञवालीलाई भेटेर बधाइ र शुभकामना दिए । टीका र खादा लगाइदिँदै अँगालो हाले । ‘ल बधाई र शुभकामना छ,’ उनले भने, ‘जित र हार नै लोकतन्त्रको सुन्दरता हो, पहिले मैले जितें, अहिले तपाईंले ।’ आफू पराजित भए पनि वाम गठबन्धनको चुनावी परिणामअनुसार ५ वर्ष स्थिर सरकार निर्माण हुने भएकाले निकै खुसी लागेको उनले बताए । 
यी दुई प्रतिस्पर्धीबीचको सौहार्दपूर्ण राजनीतिक संस्कार अन्य नेताले पनि सिक्न जरुरी रहेको कांग्रेस जिल्ला सदस्य अनन्त पौडेलको ठम्याइ छ । ‘चुनावकै बेला पनि हप्तामा एक–दुई पटक टेलिफोनमा कुरा हुन्थ्यो,’ उनले भने, ‘बाहिर प्रतिस्पर्धा भए पनि भित्र सौहार्दपूर्ण सम्बन्ध छ ।’ २०७० मा पराजित भएपछि ज्ञवालीले पनि भण्डारीलाई यसैगरी बधाइ दिएका थिए ।
जिल्लाका प्रतिनिधिसभाका दुवै क्षेत्रमा एमालेकै उम्मेदवार चुनिएका छन् । क्षेत्र २ मा पनि एमालेकै अर्का सचिव गोकर्ण विष्ट ३४ हजार ६ सय १८ मत ल्याएर विजयी भएका छन् । उनका निकटतम प्रतिस्पर्धी कांग्रेसका चन्द्र केसीले २० हजार १ सय ५७ मत पाए । विष्ट २०५६ र २०७० को निर्वाचनमा पनि विजयी भएका थिए । 
त्यस्तै प्रतिनिधिसभा १ को प्रदेश ‘क’ मा माओवादीका सुदर्शन बराल १७ हजार ९ सय २२ मत ल्याएर विजयी भए । उनका प्रतिस्पर्धी कांग्रेसका पृथबहादुर फौदारले १३ हजार २ सय ९९ मत पाए । प्रदेश ‘ख’ मा एमालेका कमल श्रेष्ठले १९ हजार ५ सय ९१ मत ल्याएर कांग्रेसका धनेन्द्र कार्कीलाई १६ हजार ३ सय ७३ मत ल्याई पराजित गरे । क्षेत्र नम्बर २ को प्रदेश ‘क’ मा एमालेका खड्ग केसी १६ हजार १ सय ६५ ल्याएर विजयी भए । कांग्रेसका शालिकराम पन्थीले ११ हजार ६ सय ७३ मत ल्याए । प्रदेश ‘ख’ मा माओवादीका दिनेश पन्थी १७ हजार ६ सय १ मत ल्याएर विजयी भए । उनका प्रतिस्पर्धी कांग्रेसका छन्दबहादुर पहराईले ९ हजार ५ सय ६४ मत ल्याएको निर्वाचन कार्यालयले जनाएको छ ।


समानुपातिकमा माओवादी पहिलो
रुकुमपूर्व – जिल्लाको समानुपातिकतर्फको पनि अन्तिम मतपरिणाम सार्वजनिक भएको छ । जसअनुसार प्रतिनिधि तथा प्रदेशसभा दुवैतर्फ माओवादी केन्द्र जिल्लाको पहिलो दल बनेको छ । प्रतिनिधिसभातर्फ माओवादीले ८ हजार ८ सय ९१, कांग्रेसले ३ हजार ६ सय ६८, एमालेको पक्षमा ३ हजार र नयाँ शक्ति पार्टीले ३ सय ४३ मत प्राप्त गरेका छन् । कुल १८ हजार १ सय ३२ मत खसेकामा १६ हजार ४ सय ४३ मत सदर भयो भने १ हजार ६ सय ८९ मत बदर भयो ।
त्यस्तै प्रदेशसभा तर्फ पनि माओवादी नै पहिलो दल बनेको छ । माओवादीले ८ हजार ३ सय ७२, कांग्रेसको ३ हजार २ सय ६१, एमालेले ३ हजार ३४ र नयाँ शक्तिको २ सय ९० मत आएको छ । प्रदेशसभातर्फ पनि १८ हजार १ सय ३२ मत खसेको थियो । खसेको कुल मतमध्य १५ हजार ३ सय ९३ मत सदर भयो भने २ हजार ७ सय ३९ मत बदर भएको मुख्य निर्वाचन अधिकृतको कार्यालयले जनाएको छ । यसअघि नै मत परिणाम सार्वजनिक भइसकेको प्रत्यक्षतर्फको प्रतिनिधिसभा सदस्य तथा प्रदेशसभा सदस्य दुवै क्षेत्रमा माओवादी केन्न्द्रका उम्मेदवार निर्वाचित भएका छन् ।

 

प्रकाशित : मंसिर २५, २०७४ ०८:१९
ADVERTISEMENT
ADVERTISEMENT
प्रतिक्रिया
पठाउनुहोस्

सप्तरीमा मधेसकेन्द्रितकै वर्चस्व

कान्तिपुर संवाददाता

राजविराज — जारी निर्वाचनको आइतबार साँझसम्म सार्वजनिक परिणामअनुसार अधिकांश सिटमा मधेसकेन्द्रित दलले जित हासिल गरेका छन् । प्रतिनिधिसभाका चार क्षेत्रमध्ये दुईवटामा संघीय समाजवादी फोरम नेपाल र एक स्थानमा राजपा नेपालका उम्मेदवारले बाजी मारेका हुन् । एउटा क्षेत्रमा भने गणना जारी छ ।


क्षेत्र नम्बर १ मा संघीय फोरमका सूर्यनारायण यादवले वाम गठबन्धन उम्मेदवार माओवादी केन्द्रका अशोककुमार मण्डलाई पराजित गरे । यादवले २१ हजार ७ सय १२ मत ल्याउँदा मण्डलको भागमा १८ हजार २ सय २५ मत मात्र पर्‍यो । यादव वरिष्ठ बालरोग विशेषज्ञ हुन् । पारिवारिक पृष्ठभूमि राजनीति भए पनि उनी यसअघि राजनीतिमा सक्रिय थिएनन् । सप्तरी डिमनका यादवका भाइ चन्द्रनारायण संविधानसभाको दोस्रो निर्वाचनमा फोरम नेपालका तर्फबाट उम्मेदवार थिए ।
क्षेत्र नम्बर २ मा संघीय समाजवादी फोरम नेपालका अध्यक्ष उपेन्द्र यादव प्रतिनिधिसभा सदस्य चुनिएका छन् । यादवले निकटतम प्रतिद्वन्द्वी माओवादी केन्द्रका उमेशकुमार यादवलाई १० हजार ४० मतान्तरले पछि पारे । उपेन्द्रले २१ हजार ६ सय २० मत प्राप्त गरे ।
क्षेत्र नम्बर ३ बाट प्रतिनिधिसभामा राजपा नेपालका चन्द्रकान्त चौधरी २२ हजार पाँच सय ८५ मत ल्याई विजयी भएका छन् । उनका निकटतम प्रतिद्वन्द्वी कांग्रेस जिल्ला सभापति दिनेशकुमार यादवले १९ हजार ४ सय मत मात्र पाए ।


प्रदेशसभामा पनि मधेसी
प्रदेशसभाका ८ क्षेत्रमध्ये आइतबार साँझसम्म ५ वटाको अन्तिम परिणाम घोषणा भएको छ । संघीय समाजवादीले २ र राजपाले एक गरी मधेसवादी गठबन्धनले ३ स्थानमा जित निकालेको छ । नेपाली कांग्रेस र एमाले एक एक स्थानमा विजयी भएका छन् । क्षेत्र नम्बर १ को ‘क’ मा संघीय समाजवादीका शैलेन्द्रप्रसाद साह १० हजार ५ सय ७० मत ल्याई विजयी भए । उनका प्रतिद्वन्द्वी माओवादी केन्द्रका सरोज मण्डलले ७ हजार ५ सय ९३ मत मात्र ल्याए ।
क्षेत्र नम्बर ४ को ‘ख’ मा पनि संघीय समाजवादीकै अभिषेक यादव ९ हजार ६०५ मत ल्याई विजयी भएका छन् । उनका निकटतम प्रतिद्वन्द्वी कांग्रेसका विवेकानन्द झाले ७ हजार
३३६ मत पाए । क्षेत्र नम्बर ३ को ‘ख’ मा राजपाका विन्देश्वर यादव १० हजार ३ सय २८ मत ल्याई विजयी भए । प्रतिद्वन्द्वी कांग्रेस उम्मेदवार भगवती यादवको भागमा ६ हजार २ सय १२ मत पर्‍यो ।
क्षेत्र नम्बर ३ ‘क’ मा कांग्रेसका मो समिम विजयी भए । उनले ११ हजार ६ सय २८ मत ल्याउँदा निकटतम प्रतिद्वन्द्वी राजपा नेपालका दिनेश यादवले ९ हजार ९ सय ७९ मत मात्र पाए ।
क्षेत्र नम्बर ४ को ‘क’ मा एमाले जिल्ला अध्यक्ष गोविन्द न्यौपाने १५ हजार १ सय १३ मत ल्याई विजयी भए । निकटतम प्रतिद्वन्द्वी कांग्रेसका सीताराम साहले ११ हजार ३ सय ९५ मत पाए ।

प्रकाशित : मंसिर २५, २०७४ ०८:१८
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT