वामदेव हारको कारण खोज्न समिति

कान्तिपुर संवाददाता

गुलरिया — एमाले उपाध्यक्ष वामदेव गौतम आफ्नै क्षेत्रमा थोरै मतान्तरले पराजित हुनुको कारण पत्ता लगाउन छानबिन समिति गठन गरिएको छ ।

एमाले अध्यक्ष हरिप्रसाद ज्ञवालीको संयोजकत्वमा दुई सदस्यीय समिति गठन गरिएको हो । समितिमा क्षेत्र १ माओवादी केन्द्रका नेता भवनकुमार थारू पनि छन् । समितिले ७ दिनभित्र प्रतिवेदन बुझाउने संयोजक ज्ञवालीले बताए । ‘वामपन्थी गढ मानिएको क्षेत्रमा गौतमको पराजयलाई पार्टीले गम्भीर रुपमा लिएको छ,’ उनले भने, ‘यसमा दोषी ठहरिए पार्टीका उच्च तहमा रहेका कुनै पनि नेतृत्वलाई साधारण सदस्य नहरने गरी निष्कासित गरिनेछ ।’ कांग्रेस सभापति एवं सिँचाइमन्त्री सञ्जयकुमार गौतमसित ७ सय ५३ मतान्तरले गौतम पराजित भएका थिए । कांग्रेसका गौतमले ४४ हजार ८ सय २९ मत प्राप्त गरेका थिए । एमालेका गौतमले ४४ हजार ७६ मत प्राप्त गरे ।
एमाले उपाध्यक्ष गौतम ३० हजारभन्दा बढी मतले विजयी हुनेमा ढुक्क थिए । कांग्रेसको बढी मत भएको सदरमुकाम गुलरियामा उनी डेरा लिएर चुनावको अधिकांश समय बिताएका थिए । बढैयाताल गाउँपालिका, बाँसगढी र बारबर्दिया नगरपालिका एमाले र माओवादी गढ मानिएकाले धेरै मत आउनेमा उनी ढुक्क थिए । बारबर्दियाबाट राम्रो मत पाए पनि आफ्नो पकड क्षेत्रमै भने थोरै मत पाएका थिए । उनी चुनाव जित्नेमा ढुक्क थिए तर सञ्जयसित पराजित हुनुपर्‍यो ।
पकड क्षेत्रमा पनि राम्रो मत नआउनु पार्टीभित्र अन्तर्घात भएको मतदाताको बुझाइ छ । प्रदेशसभामा केही शीर्ष नेताले टिकट नपाएपछि उनीप्रति अन्तर्घातको खेल सुरु भएको स्रोतको भनाइ छ । पत्नी तुलसालाई समानुपातिक उम्मेदवार बनाउनु, चुनाव जितेपछि जिल्ला नफर्कनु, माथिल्लो पदमा बस्दा शिक्षित युवा बेरोजगारलाई बेवास्ता गर्नु, बर्सेनि आउने बाढीको समय मतदातामाझ नआउनुले पनि वामदेव हारेको मतदाता बताउँछन् ।
स्थानीय तह चुनावमा क्षेत्र १ स्थित बारबर्दियाका ३ वडा छाडेर एमालेले ३१ हजार २ सय ६०, माओवादी केन्द्रको २४ हजार ४ सय ५२ मत जोडदा ५५ हजार ७ सय १२ मत प्राप्त गरेको थियो । कांग्रेसको २३ हजार ५ सय ३०, फोरम लोकतान्त्रिकको ४ हजार २ सय ५० र राप्रपाको १ हजार ३३ मत जोड्दा २८ हजार ८ सय १३ मत हुन जान्छ । यति ठूलो अन्तरमा वाम गठबन्धनको मत हुँदा पनि वामदेवको पराजयलाई पार्टीभित्रका केही शीर्ष नेतृत्व जिम्मेवार भएको आशंका गरिएको छ ।

प्रकाशित : पुस २, २०७४ १७:५५
ADVERTISEMENT
प्रतिक्रिया
पठाउनुहोस्
ADVERTISEMENT

चिसोले मनाङका सबै विद्यालय बन्द

आश गुरुङ

लमजुङ — हिमाली जिल्ला मनाङका सबै विद्यालय बन्द भएका छन् । अत्याधिक चिसो बढेसँगै मंसिर तेस्रो साता परीक्षा संचालन गरी विद्यालय बन्द भएका हुन् ।

विद्यालय बन्द भएसँगै शिक्षक, विद्यार्थी तथा शिक्षा कार्यालयका कर्मचारी बेंसी झरिसकेका छन् । केही झर्ने क्रममा छन् । मनाङको नेस्याङ गाउँपालिका र नारफू गाउँपालिकाका स्कुलले मंसिर २० सम्म परीक्षा संचालन गरी २१ गते परीक्षाफल प्रकाशित गरेर २२ गतेदेखि विद्यालय बन्द गरेका थिए ।

चामे र तल्लो मनाङको नासोङ गाउँपालिकाका स्कुलले २२ गतेसम्म परीक्षा सक्काएर मंसिर अन्तिम सातासम्म परीक्षाफल प्रकाशित गरी विद्यालय बन्द गराएका छन् । नेस्याङ र नारफू गाउँपालिकाका स्कुल चैत १ गतेदेखि खुल्ने साथै चामे र नासोङ गाउँपालिकाका स्कुल फागुन १ गतेदेखि खुल्ने गरी बन्द भएका शिक्षक तथा स्रोत व्यक्तिहरुले बताएका छन् ।

माथिल्लो मनाङस्थित अन्नपूर्ण माविका प्रधानाध्यापक आनन्दराज घिमिरेले भने, ‘जाडोले पढ्न र पढाउन सकिंदैन् । चैत १ गतेबाट विद्यालय खुल्ने गरी अभिभावकको सहमतिमा विद्यालयमा पठनपाठन बन्द गराएका छौं ।’

उनका अनुसार माथिल्लो क्षेत्रका लागि ३ महिना विद्यालय बन्द हुन्छ । ‘हामीले शनिबारबाहेक अन्य विदा र शुक्रबारका दिन पुरै पठाउने हिसाबले माथिल्लो क्षेत्रका सबै विद्यालयले शैक्षिक क्यालेन्डर निर्माण गरेका छौं । चिसोले यो बेला पढाउन नसकिएपनि पाठ्यक्रम टुंग्याउने हिसाबले ब्यवस्थापन गरेका छौं,’ उनले भने ।

माथिल्लो मनाङस्थित शिक्षा कार्यालयका स्रोतब्यक्ति कृष्णदास कोइरालाले वार्षीक परीक्षा सक्काएर सवै शिक्षकविद्यार्थी बेंसी झरिसकेको बताए । उनका अनुसार कक्षा ८ को जिल्लास्तरीय परीक्षाफल प्रकाशित हुन बाँकी छ । लेटर ग्रेडिङ सिष्टमका कारण जिल्लास्तरी परीक्षाफल प्रकाशित हुन सकेको छैन् । ‘खास विद्यालय बन्द हुने पुस १० गतेदेखि हो । चिसो अत्याधिक बढ्यो । रिजल्ड गरेर खबर गर्नु भनेर विद्यार्थी लिएर अभिभावक हिँड्न थालेपछि बाध्यताले छिटोछिटो रिजल्ट आउट गरिएको हो,’ उनले भने ।

उनले माथिल्लो क्षेत्रमा चैत १ गतेबाट पठनपाठन सूचारु हुने बताए ।

प्रकाशित : पुस २, २०७४ १७:४७
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT