सिपाघाट (सिन्धुपाल्चोक) — महाभूकम्प आएको कहालीलाग्दो दिनको पीडा सिपाघाट बजारका सुजितश्रेष्ठले अहिलेसम्म भुल्न सकेका छैनन् ।
सम्भवत: उनलाई त्यस कालो दिनको स्मृतिले सधै झस्काइ रहनेछ ।सिंगो मुलुकलाई स्तब्ध पार्ने त्यस भुकम्पले उनको बस्नेबास उठायो नै, त्यसभन्दा बढी पीडा हुने गरी उनको मुटुको टुक्रा छोरीलाई काखबाट चुडेर लग्यो ।
इन्द्रावतीको फाटमा यतिखेर हुर्कदै गरेको बर्खेधानको गाभाले हरियाली छाएको छ । फाटलाई बीच पारेर चिर्ने गरी पूर्वपश्चिम फैलिएको त्यस सुन्दर बजार भने खण्डहरमा परिणत भएको छ । बिनासकारी भुकम्पले सुजित जस्ता धेरैको काख खोसेको छ, केहीले आफ्ना अभिमावक गुमाएका छन् ।
सुजितका ६ जनको सुखि परिवार थियो । घरमै होटल थियो । त्यस दिन उनका बाबु र बहिनी खेतमा काम गर्न गएका थिए । उनकी पत्नि पानी लिन गएकी थिइन् । उनी काम बिशेषले बाहिर निस्केका थिए । उनका छोरा र छोरी भने घरमा खेल्दै थिए । त्यही बेला विनासकारी भुइचालो आयो । त्यसमै ति कलिला बालबालिका पुरिए । ‘भत्केको घरको छेउमै पुरिएकाले छोरालाई त्यही दिन निकाल्न सकियो,’ उनले आशु पुच्दै भने, ‘छोरीलाई कति प्रयास गर्दा पनि भेटिएन । दुइ दिनपछि उनको शव मात्र निकाल्न सकियो ।
एकाएक खण्डहरमा पुरिएको त्यस बजारमा ८ जनाको शब भेटिएको छ । तीबाहेक बाहिरबाट किनमेल गर्न आएका अरु केही ग्राहकसमेत पुरिएको आशंका गरिएको सुजितले बताए । बजारमा २ सय ५३ घर थिए । ती सबै खण्डहरमा परिणत भएका छन् । त्यहा रहेका पक्की घरसमेत कुनै बस्न लायकका नरहेको त्यही १२ बर्षदेखि सैलुन चलाएर बसिरहेका ओकिल महतोले बताए । सडकका दुइ किनाराका घर भत्केर बजारको सिरानदेखि पुछारसम्मै बाटो पूर्णत बन्द भएको थियो । भुकम्प गएको पाचौ दिन बल्ल सेनाको टोलीले डोजर ल्याएर बिहीबार दिउसो बाटो खुलाएको थियो ।
त्यस दिन महत्तो कपाल काट्न ठिक पर्दै थिए । एक्कासी घर हल्लन थाल्यो । त्यतिखेर उनीहरु सडकतिर भागे । सडकसमेत भत्केका घरहरुले पुरिन थालेपछि बजारबासी खेततिर भागेका थिए । उनले देख्दादेख्दै भुकम्पको पहिलै धक्कामा बजारका सबै घर खण्डहरमा परिणत भएका थिए । भवनसगै कैयौं चौपाया थिचिएका थिए । हरिमाया श्रेष्ठको भैसी खुट्टा भाचिएको अबस्थामा भेटिएको थियो । भैसीलाई उनले खुट्टोमा काम्रो लगाइ दिएकी छन् । ‘मान्छे भए अस्पताल लैजानु हुन्थ्यो,’ उनले भनिन्, ‘यस (भैसी)को बिजोग हुने भयो ।’
साहित्यकार रमेश बिकलले चर्चित उपन्यास ‘अबिरल बग्दछ इन्द्रावती’ मा सीपाघाट बजारको बर्णन गरेका छन् । त्यसले यस ठाउलाई मुलुकभर चिनाएको थियो । इन्द्रावती किनारको यो बजार सिन्धुपाल्चोकका भिमटार, सिपा पोखरे, भोटसिपालगातका गाबिसको ब्यापारिक केन्द्र हो । बजारका सबैघरहरु भत्कदा कति क्षति भयो भन्ने कुराको आकलन अझै गर्न सकिएको छैन ।
बजारमा हुने खानेहरुको समेत यतिखेर खुल्ला आकासमुनीको बास भएको छ । उनीहरु अहिलेसम्म ससकारका तर्फबाट केही राहत पाउन नसकेको बताउछन् । पीडित सुजितले आफूहरुले दालमोठ चिउरासमेत अरुसग मागेर सास धान्दै आएको बताए । बिहीबार एउटा कोरियाली सस्था र थाइल्याण्डको स्वास्थ्य मन्त्रालयले उनीहरुलाई त्रिपाल, चाउचाउ, औषधिलगायतका सामग्री वितरण गरेको थियो । आफूहरुलाई सरकार भएको महसुस भने नभएको महतोले बताए ।
ढलेको आफ्नो घर देखाउँदै सुजित श्रेष्ठ । उनकी छोरी यही घरमा पुरिएकी थिइन् । तस्बिर: लीलानाथ घिमिरे/ईकान्तिपुर
प्रतिक्रिया
