डेनिस राजकुमार गाउँ घुम्दै

आश गुरुङ

पाचोक (लमजुङ) — पाचोकको वाकस्वाँराका सीता गुरुङले पहिलोपटक विदेशी राजकुमार देखिन् । बिहान ७ बजेदेखि कुरेर बसेकी उनले डेनमार्कका राजकुमार फ्रेडरिक हेर्न चार घण्टा समय बिताइन् ।

‘हाम्रो राजकुमार देख्न नपाएपनि विदेशको राजकुमार देखेँ’ नौथर र पाचोकको सीमा साँधीखोलामा कुर्दै गरेका उनले भनिन्, ‘अब बल्ल घर गएर भात खाने हो ।’ भूकम्पले घर भत्काएपछि नौथर ५, जितौरेस्थित आफन्तको शरणमा बसेकी छन् । सदरकुकाम बेसीशहरबाट ५ घण्टाको सवारी यात्रा पछि डेनिस राजकुमार फ्रेडरिक एन्ड्रे हेनरकको टोली शुक्रबार मध्यान्ह दुर्गम गाउँ पाचोक पुगेका हुन् ।

वाकस्वाँरास्थित आमा समूहका अध्यक्ष टौमाया गुरुङले स्वागतस्वरुप स्टीलको गिलासबाट दूध खुवाउन खोज्दा उनले मानेनन् । नेपाली सहयोगीले यहाँको ‘कल्चर’ यही हो भनेपछि उनी मुसुक्क हाँसे । उनी दूध खान राजी भए । लगत्तै उनलाई वडा नागरिक मञ्चका संयोजक शेरबहादुर गुरुङले ढाका टोपी लगाइदिए । केही उकालो बाटोमा उनको खुट्टा केही लर्बराए । पञ्चेबाजासहित फूलमालाले स्वागत गरेका उनको टोलीलाई केहि परसम्म स्थानीयले हिँडेरै पुर्‍याए ।

पाचोकको करेँदीबेसीस्थित किसेदी खोलाको पूल तर्ने वित्तिकै उनीसहित टोलीलाई नै पाचोक गाविसले स्वागत गर्‍यो । पाचोक गाविसका सचिव दिवाकर वाग्लेको नेतृत्वमा फूलमाला र ढाकाटोपीले स्वागत गरे । राजकुमार फ्रेडरिकलाई स्वागत गर्न बारीगाउँबाट ८० बर्षीया मंगली गुरुङदेखि प्ल्हेँस्वाँराबाट ९२ बर्षीया विवि तामाङ समेत हातखुट्टा गरेर २/३ घण्टा हिँडेर करेँदी दोभान झरेका थिए । राजकुमार फ्रेडरिकले संक्षिप्त प्रतिक्रिया दिँदै उनले भने, ‘बाटो खराब भएपनि यहाँका मान्छे र चलन राम्रो रहेछ ।’

उनले पहिलो पटक नेपाल र त्यहीपनि लमजुङको दुर्गम गाउँ आएको खुलाए । क्याम्पमा खान खाएपछि उनको टोलीलाई आमा समूहले फेरि स्वागत गर्‍यो । पाचोक ७, तल्लो पाचोककी ८० बर्षीया मनमाया घलेले राजकुमार फ्रेडरिकलाई चिनो स्वरुप खुकुरी नै दिइन् । ‘हामी नेपालीको चिनो नै खुकुरी हो । हामी शत्रुलाई खुकुरी देखाउँछौँ । मित्रुलाई खुकुरी चिनो दिन्छौँ ।’ उनले भनिन्, ‘मेरो देशलाई नबिर्सनु होला । फेरि फेरि आउँदै गर्नुहोला ।’ उनी बेलायती सेनाका भूपू हवल्दार मेजर स्व.मनबहादुर घलेका पत्नि हुन् ।

केही महिलाले उनीसंग सेल्फी खिच्न भ्याए । स्वागतका लागि देखाइएको घ्याब्रेपच्युको नाचलाई उनले आफ्नो मोवाईलमा कैद गरे । भूकम्पबाट भत्किएको पाचोक माविको भग्वानशेष भवन अवलोकन गरे । विद्यालयका विद्यार्थीले उनलाई स्वागत गरे । उनले विद्यार्थीलाई स्टेशनरी सामग्री प्रदान गरे । कार्यक्रममा बोल्दै उनले भने, ‘विद्यार्थी भाइबहिनी राम्रोसंग पढ्नु होला । बाबाआमाले पनि आफ्नो छोराछोरीलाई राम्रोसंग पढाउनुपर्छ ।’

राजकुमार फ्रेडरिक भूकम्पपीडितलाई भेट्न लमजुङ आएका हुन् । पाचोकका विभिन्न गाउँ घुम्दै शुक्रबार उनी पाचोकको करेँदी दोभानमा बनाइएको क्याम्पसमा बास बसे । उनले आफ्नो विशुद्ध नीजि भ्रमण भएको बताएकाले अनौपचारिक हिसावमै गाउँ घुमेको बताएका छन् । भूकम्पले भत्किएका घर र पीडितको टहरा हेरेपनि उनले डेनिस रेडक्रसमार्फत थप सहयोगका कार्यक्रम ल्याउने आश्वासन दिए ।

आफूलाई कुनै सुरक्षा नचाहिने बताएपनि इलाका प्रहरी कार्यालय भोटेओडारका प्रहरी निरीक्षक हेमन्तकुमार थापाको नेतृत्वमा सुरक्षा टोली खटिएको छ । कोपनहेगनबाट बिहीबार काठमाडौं आएर बेसीशहर बस्न आएको उनको टोलीले शनिबार ढोडेनी र फेलेनी गाविसका केही गाउँमा पुगेर भूकम्प पछिको अवस्था बुझ्ने र भूकम्पपीडितसंग भेट्ने कार्यक्रम रहेको डिनिस रेडक्रसको नेपालस्थित कार्यालयका कार्यक्रम ब्यवस्थापक प्रकाश अर्यालले बताए ।

उनका अनुसार राजकुमारसहित डेनिस रेडक्रसको महामन्त्री एन्ड्रस ल्यण्डकार्ल, एसिया क्षेत्रका निर्देशक, डेनिस दुतावास, परराष्ट्र मन्त्रालयका प्रतिनिधि लगायत १५ जनाको टोली रहेका छन् । डेनिस रेडक्रसले भूकम्पबाट प्रभावित पाचोक, ढोडेनी, फलेनी, बन्सार, नौथर र हिलेटक्सार गाविसका भूकम्पपीडितलाई तत्काल टहरा बनाउन सहयोग गरेको छ ।

प्रकाशित : आश्विन १, २०७२ २०:०४
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

संविधानमा हस्ताक्षर गरेको क्षण.... (फोटो फिचर)

कान्तिपुर संवाददाता

काठमाडौं — संविधानसभाले शुक्रबारसम्म नयाँ संविधान निर्माणको सम्पूर्ण प्रक्रिया पुरा गरेको छ ।संविधानसभा अध्यक्ष सुवासचन्द्र नेम्वाङले शुक्रबारै प्रमाणिकरण गरेको ‘नेपालको संविधान’ आइतबार साँझ राष्ट्रपति रामबरण यादवले जारी गरेपछि लागू हुन्छ ।

संविधानसभाले शुक्रबारसम्म नयाँ संविधान निर्माणको सम्पूर्ण प्रक्रिया पुरा गरेको छ ।

संविधानसभा अध्यक्ष सुवासचन्द्र नेम्वाङले शुक्रबारै प्रमाणिकरण गरेको ‘नेपालको संविधान’ आइतबार साँझ राष्ट्रपति रामबरण यादवले जारी गरेपछि लागू हुन्छ । संविधानसभा भवन नयाँ बानेश्वरको ल्होत्से हलमा सभाध्यक्षले संविधान प्रमाणिकरण गर्दा प्रधानमन्त्री सुशील कोइराला, एमाले अध्यक्ष केपी ओली, एमाओवादी अध्यक्ष पुष्पकमल दाहाल, पूर्व प्रधानमन्त्री माधबकुमार नेपाल, शेरबहादुर देउवा सहितका नेता तथा सभासद्हरुको खचाखत उपस्थिति थियो ।

जनताको ब्यापलक सहभागिता र छलफलबाट संविधान बनेको उल्लेखगर्दै सभाध्यक्ष नेम्वाङले जनप्रतिनिधिमुलक संस्थाले निर्माण गरेको संविधानलाई संवृद्धि पार्दैजाने प्रक्रियामा जुट्न आह्वान गरे । ‘संविधानसभाले प्रगतिशील, लोकतान्त्रिक र उत्कृष्ट संविधान निर्माण गरेको छ,’ नेम्वाङले भने, ‘संविधानमा सबैका सबै कुरा समेट्न सम्भव थिएन । यसले अहिलेसम्मका आन्दोलनबाट प्राप्त उपलब्धीलाई सरेको छ ।’ संसोधनको प्रक्रियाबाट असन्तुष्ट पक्षलाई समेटै जान सकिने उल्लेखगर्दै नेम्वाङले सबै पक्षलाई संवादमा फर्कन आह्वान गरे ।

लोकतन्त्रका लागि तीन/चार पुस्ताले गरेको संघर्षको उपलब्धीका संस्थागत भएको उल्लेख गर्दै प्रधानमन्त्री कोइरालाले संविधानसभाबाट पातिर। संविधानको सबैले स्वागत गर्ने विश्वास ब्यक्त गरे । ‘यो महान उपलब्धी प्राप्त भएको छ,’ उनले भने, ‘प्रक्रियाबाट भएको यो उपलब्धिलाई लोकतन्त्रमा विश्वास राख्ने सबै विदेशी मित्रहरुले समर्थन जनाउनुहुन्छ ।’ संविधानले संघीय लोकतान्त्रिक गणतन्त्र, समावेसिता र समुदायगत अधिकार सुरक्षित गरेको उल्लेखगर्दै प्रधानमन्त्री कोइरालाले प्राप्त उपलब्धीको विरोध नगर्न असन्तुष्ट पक्षसँग आग्रह गरे । आफुपनि मधेशी भएको उल्लेखगर्दै कोइरालाले द्वन्द्व र हिंसाले प्राप्त उपलब्धि गुम्ने खतराप्रति सचेत रहन आन्दोलनरत पक्षसंग आग्रह गरे । ‘धैर्य राख्न नसके मुलुकले दु:ख पाउछ,’ उनले भने ।

प्रमाणिकरण अघि संविधानसभाका ५ सय ३७ सभासद्हरुले संविधानका ५/५ प्रतिमा हस्ताक्षर गरेका थिए । विहान नौ बजेदेखि अपरान्ह तीन बजेसम्मका लागि तोकिएको समयमा कांठमाडौ– ३ बाट निर्वाचित सभासद् रामेश्वर फुयालले पहिलो हस्ताक्षर गरेका थिए । प्रधानमन्त्री कोइरालासहित प्रमुख दलका शीर्ष नेताहरुले भने हस्ताक्षरका लागि पौने तीन बजेमात्रै संविधानसभा भवन पुगेका थिए ।

सार्वभौम नेपाली जनताका तर्फबाट निर्मित संविधानमा हस्ताक्षर गर्न पाएकोमा सभासद्हरु हर्षित र उत्साहित देखिन्थे । हस्ताक्षर पछि एक(आपसमा बधाई साटासाट गरी हर्षोल्साह मनाएकामध्ये अधिकांश सभासद् सभाध्यक्षले संविधान प्रमाणिकरण गर्नेबेलासम्म पनि संविधानसभा भवन परिसरमै थिए ।

सचिवालयको अब्यवस्थापनका कारण सभासद्हरुको सामुहिक फोटो सेसन भने प्रभावकारी हुन सकने । हस्ताक्षरका लागि उपस्थित सभासद्हरु सुरुदेखिनै ब्यक्तिगत र सामुहिकरुपमा फोटो खिच्न/खिचाउन ब्यस्त थिए ।

प्रकाशित : आश्विन १, २०७२ १९:३८
पूरा पढ्नुहोस्
प्रतिक्रिया
पठाउनुहोस्
ADVERTISEMENT