भारतीय दूतावासबाहिर पेट्रोलसहित प्रदर्शन (तस्बिर)
काठमाडौं — काठमाडौंस्थित भारतीय दूतावासले नेपाल आयल निगमसँग इन्धन माग गरेकोमा नेपाली ट्विटर प्रयोगकर्ताहरु दूतावासलाई पेट्रोल ‘दान’ गर्न लैनचौरमा जम्मा भएका छन् । ट्विटरमा आज बिहानै सुरु भएको ह्यासट्याग ‘डोनेट ओयल टु इन्डियन एम्बेसी’ ट्रेन्डिङ भइरहेको छ ।
अघोषित नाकाबन्दी गरेको भारतको काठमाडौं स्थित दूतावासले नेपाल आयल निगमसँग इन्धन माग गरेको भन्दै व्यंग्य स्वरुप तेल दिन लागिए पनि दूतावासले यसरी लगिएको तेल भने लिएन । मिनरल वाटरका बोतलमा तेल लिएर पुगेका प्राय: युवाहरुले ‘ब्याकअफ इन्डिया’, ‘तेल चाहिन्छ लैजाउ, स्वाभिमान दिन्नौं’ लेखिएको पम्पलेट बोकेका थिए । उनीहरुलाई खानी विभागनेर रोकिएपछि राष्ट्रिय गीत गाउँदै सडकमा नै धर्ना दिएका थिए ।
युवाहरुले जम्मा गरेको तेल नलिए पनि नाराहरु लेखिएको पम्पलेट भने दूतावासलाई बुझाइयो । पम्पलेट बुझेका दूतावासका अधिकारले 'हामीले तपाईको समस्या बुझेका छाैं, हामीलाई तेल चाहिदैन आफ्नै जनतालाई बाँड्नुस्' भनेका थिए ।