मोर्चा असन्तुष्ट

स्थानीय तहको प्रतिवेदन
कान्तिपुर संवाददाता

काठमाडौं — आफ्नो सहमतिबिनै स्थानीय तह पुन:संरचना आयोगको प्रतिवेदन बुझेको भन्दै मधेसी मोर्चा प्रधानमन्त्री पुष्पकमल दाहालसँग असन्तुष्ट भएको छ ।

आयोगको कार्यविधिबारे मोर्चासँग छलफल नगरेको, समान जनसंख्याको अनुपातमा स्थानीय तहको संख्या र सिमाना किटान नगरेको, संघीय प्रदेशको मातहत स्थानीय तह नराखेकामा असन्तुष्ट मोर्चाले प्रधानमन्त्रीलाई भेटेर छलफल गर्ने निर्णय गरेको छ । मोर्चा स्रोतका अनुसार जिल्लाको भ्रमण सकी बुधबार राजधानी फर्केका तमलोपा अध्यक्ष महन्थ ठाकुरलगायत मोर्चाका उच्च नेताले बिहीबार दाहाललाई भेटी असन्तुष्टि राख्ने तयारी छ ।

‘संशोधन विधेयक टेबल भएपछि एक पटक फेरि हामी बस्ने कुरा भएको थियो, अहिलेसम्म समय मिलिसकेको छैन, तर हामी प्रधानमन्त्री भेट्छौं,’ तमलोपा उपाध्यक्ष वृषेशचन्द्र लालले भने, ‘स्थानीय तह पुन:संरचना आयोगको प्रतिवेदनबारे हाम्रो असन्तुष्टि छ । त्यो पनि प्रधानमन्त्रीसमक्ष राख्छौं ।’

यसअघि मोर्चाकै असन्तुष्टिलाई कारण देखाएर आयोगको प्रतिवेदन टार्दै आएका प्रधानमन्त्री दाहालले पुस २२ मा स्थानीय विकासमन्त्रीमार्फत बुझेका थिए । मोर्चा स्रोतका अनुसार त्यस बेला उनले अनौपचारिक कुराकानीका क्रममा भनेका थिए, ‘अहिले प्रतिवेदन बुझिहालौं । बुझ्दैमा केही हँुदैन । त्यसपछि पनि हामी छलफल गरेर एउटा टुंगोमा पुगौंला ।’ त्यसयता दाहालसँग कुराकानी हुन नसकेको भन्दै तमलोपा नेता लालले आगामी बैठकमा कुरा उठाउने बताए । मोर्चाले स्थानीय तहको पुन:संरचनालाई जोडतोडले उठाए पनि मोर्चासमेत आबद्ध संघीय गठबन्धनको बुधबार राजधानीमा बसेको बैठकमा भने उक्त विषयबारे कुरा नउठेको स्रोतले बतायो ।

संघीय समाजवादी फोरम वरिष्ठ नेता अशोक राईले बैठकमा केही नियमित विषयवस्तुमा छलफल चलेको बताउँदै स्थानीय तह, संविधान संशोधनलगायत विषयमा फेरि बसेर छलफल गरिने जानकारी दिए । गठबन्धन बैठकले शनिबार राजधानीमा संविधान संशोधनको विषयमा अन्तक्र्रिया गर्ने भएको छ । नयाँ शक्ति पार्टीका नेता बाबुराम भट्टराईलगायत नेता बोलाएर कार्यक्रम गर्ने निर्णय भएको रामसपा महासचिव केशव झाले बताए । स्रोतका अनुसार गठबन्धन संयोजक उपेन्द्र यादवले भट्टराईलाई मुख्य वक्ता बनाउनुपर्ने प्रस्ताव बैठकमा राखेका थिए । 

प्रकाशित : पुस २८, २०७३ ०७:४७
ADVERTISEMENT
प्रतिक्रिया
पठाउनुहोस्

छोटकरी

कान्तिपुर संवाददाता

काठमाडौं — थाइल्यान्डका राजा मह वजिरालङक्रोनले धुलिखेल अस्पतालका प्रमुख डा. रामकण्ठ माकाजुलाई मानार्थ विद्यावारिधि उपाधि प्रदान गरेका छन् ।

डा. माकाजुलाई मानार्थ विद्यावारिधि

काठमाडौं (कास)– थाइल्यान्डको चियाङ राय राजभाट युनिभर्सिटीको दीक्षान्त समारोहमा उनलाई नेपालको शैक्षिक क्षेत्रको उन्नतिमा विशेष योगदान पुर्‍याएबापत उपाधि दिइएको हो । काठमाडौं विश्वविद्यालयका पूर्वउपकुलपति डा. माकाजुले ‘गरिबका लागि गुणस्तरीय स्वास्थ्य सेवा’ र ‘नेतृत्वका लागि गुणस्तरीय शिक्षा’ मार्फत नयाँ पुस्ताका नेतृत्व विकास गरी देशका पिछडिएका वर्गलाई लाभ दिलाएर नमुना कार्य गरेको उक्त विश्वविद्यालयले उल्लेख गरेको छ ।                    
विद्यालय पुनर्निर्माणका लागि ८० लाख
काठमाडौं (कास)– हेल्प नेपाल नेटवर्क नामक संस्थाले भूकम्पबाट क्षतिग्रस्त विद्यालय पुनर्निर्माणका लागि ८० लाख रुपैयाँ हस्तान्तरण गरेको छ । उक्त संस्थाले बुधबार राजधानीमा सिन्धुपाल्चोकको ठोकर्पा मावि र दोलखाको राजकुलेश्वर निमाविका प्रतिनिधिलाई रकम हस्तान्तरण गरेको हो । संस्थाले ‘नेपालका लागि एक महिनामा एक डलर कोष’ नामक विश्वव्यापी स्वयंसेवी अभियानबाट रकम उठाइएको जनाएको छ । परम्परागत वास्तुकला र भूकम्प प्रतिरोधात्मक प्रविधिमा दुई विद्यालय निर्माण गरिने संस्थाका संस्थापक अध्यक्ष रवीन्द्र मिश्रले जानकारी दिए । उनले पुनर्निर्माणका लागि अब विदेशी दातामा भर नपरी राज्यले नै पहल गर्नुपर्ने बताए । 
सार्वजनिक बिदा पुनरावलोकन हुने
काठमाडौं (कास)– सरकारले राष्ट्रिय पर्व र सार्वजनिक बिदाको पुनरावलोकन गर्ने भएको छ । बुधवार बसेको मन्त्रिपरिषद बैठकले गृह मन्त्रालयलाई एक महिनाभित्र बिदा पुनरावलोकन गरी प्रस्ताव गर्न निर्देशन दिएको छ । ‘कतिपय राष्ट्रिय पर्व र बिदा विवादमा परेका, कतिपय थपघट गर्नुपर्ने भएकाले पुनरावलोकनका लागि गृह मन्त्रालयलाई निर्देशन दिने निर्णय भएको हो’, बैठकपछि सरकारका प्रवक्ता एवं सञ्चारमन्त्री सुरेन्द्र कार्कीले भने ।

प्रकाशित : पुस २८, २०७३ ०७:४७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT