शृंखलाबद्ध लुटेरा पक्राउ

कान्तिपुर संवाददाता

काठमाडौं — बैंकबाट निकालेको ३ लाख ६० हजार रुपैयाँसहितको झोला काँधमा झुन्डयाएर मनी ट्रान्सफर सञ्चालिका गोंगबुकी यमकला भण्डारी फर्किंर्दै थिइन् ।

मोटरसाइकलमा आएका दुई युवाले उनको काँधबाट झोला यसरी थुते कि त्यसको फितै चुँडियो । यमकला हेरेको हेरयै भइन् । झोलासहित लुटेरा फरार भइसकेका थिए । 

१९ मंसिरमा गोगंबुमा भएजस्तै घटना ५ मंसिरमा भक्तपुरको कटुन्जेमा पनि भएको थियो । मनी ट्रान्सफरबाट ७३ हजार ६ सय ६९ रुपैयाँ निकालेर घर हिँडेकी सुस्मिता सुवेदीको हातैबाट मोटरसाइकलमा आएका लुटेराले रकम खोसेर फरार भए । महानगरीय प्रहरी अपराध महाशाखाले ठयाक्कै यस्तै शैलीमा लुटपाटको धन्दा चलाइरहेका रामेछाप दोरम्बाका सागर भन्ने टीका थापामगरलाई पक्राउ गरेको छ । पछिल्ला ३ वर्षमा उनले यस्तै प्रकृतिका १५ लुटपाट गरेको महाशाखाको रेकर्डमा देखिन्छ ।

एउटै प्रकृतिका लुटपाटका शृंखलाबद्ध घटनापछि महाशाखाले पाँच प्रहरीलाई लुटेराको पहिचान गर्न खटाएको थियो । ३ महिनाको अनुसन्धानपछि प्रहरीले पत्तो लगायो, फरकफरक स्थानमा भएका उस्तै प्रकृतिको लुटपाटका नाइके हुन्, टीका थापामगर । २६ मंसिरमा महाशाखाका प्रहरीले दक्षिण ढोकामा हिँडिरहेको अवस्थामा टीकालाई फेला पारे । तीनतिरबाट घेरेर समात्न खोज्दा टीकाले यति धेरै बल प्रयोग गरे कि, बीच सडकमै एकछिन गतिलै धक्कामुक्का चल्यो । प्रहरीले टीकाको कोठाबाट ३ लाख नगद र ४ थान मोबाइललगायत सामग्री पनि बरामद गरेको छ । पुस २२ मा यिनै टीकाले कौशलटारमा बैंकबाट ६ लाख रुपैयाँ हालेको झोला बोकी गठ्ठाघर हिँडेकी मन्दिरा अधिकारीको लेडिज ब्याग पनि लुटेका थिए । महाशाखा प्रमुख एसएसपी सर्वेन्द्र खनालले भने, ‘उस्तै प्रकृतिको लुटपाटको घटनाले महाशाखालाई पनि गम्भीर बनाएको थियो ।’ २०७२ जेठ ३२ गते बौद्ध भाटभटेनी डिपार्टमेन्ट स्टोरको पार्किङ एरियामा रहेको बोलेरो गाडी चोरेको आरोपसमेत उनीमाथि छ । प्रहरीका अनुसार टीकाले चोरीको बोलेरो मकवानपुरको पदमपोखरीमा लुकाएका थिए ।  

सुन तस्करीका थप दुई पक्राउ
नेपाल प्रहरीको केन्द्रीय अनुसन्धान ब्युरोले गत बिहीबार त्रिभुवन अन्तर्राष्ट्रिय विमानस्थलबाट पक्राउ गरेको ३३ केजी सुन तस्करीको घटनामा थप दुईजनालाई पक्राउ गरेको छ । ब्युरोले बुधबार राति १ बजे काभ्रेको पनौतीबाट उनीहरूलाई पक्राउ गरेको हो । स्रोतका अनुसार पक्राउ पर्नेमा चलाल गणेशस्थानका रामहरि कार्कीसमेत छन् ।

दरबारमार्गमा रोधी क्लब सञ्चालन गर्ने कार्की यसअघि पनि सुन तस्करीकै अभियोगमा पक्राउ परेका थिए । स्रोतका अनुसार विदेशस्थित तस्करले कार्कीलाई नै फोनमार्फत सुन काठमाडौं पुगेको जानकारी दिन्थे र उनले सुन लिएर सम्बन्धित धनीकहाँ पुर्‍याउँथे । 

प्रकाशित : पुस २८, २०७३ ०८:१७
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

नक्सा पासबिनै भवन निर्माण

शिल्पा कर्ण

काठमाडौं — त्रिभुवन विश्वविद्यालयका भवनहरू बिनास्वीकृति निर्माण भइरहेको पाइएको छ । ३ हजार रोपनीभन्दा बढीमा फैलिएको विश्वविद्यालयले उक्त क्षेत्रमा भवनसहितका स्थायी संरचना निर्माण गरिरहेको छ । स्थानीय निकायलाई भौतिक संरचना निर्माणबारे जानकारी भने गराइएको छैन ।

विश्वविद्यालयले कीर्तिपुर नगरपालिकाबाट नक्सापास नगरी त्रिविको हाताभित्र ३ दर्जनभन्दा बढी भवन निर्माण गरिसकेको छ । स्थानीय स्वायत्त शासन ऐन २०५५ र नियमावली २०५६ विपरीत नक्सापास नगरी, सडकको मापदण्ड मिच्दै स्थायी संरचना निर्माण भइरहेको नगरपालिकाले जनाएको छ । २०१६ सालमा स्थापित विश्वविद्यालयल अहिले ८ भवनलगायत स्थायी संरचना बनाइरहेको छ । 

२०५३ सालमा कीर्तिपुर नगरपालिका स्थापना भएदेखि नै त्रिविलाई नयाँ भवन बनाउँदा नक्सापास गराउन पत्राचार गरिँदै आएको छ । नक्सापास नगरी मनोमानी भवन निर्माण गरिरहेको भन्दै कीर्तिपुर नगरपालिकाको अनुगमन कार्यदलले प्रतिवेदन बुझाएपछि आवश्यक कागजातसहित उपस्थित हुन र निर्माण कार्य रोक्न पत्राचार गर्दै आएको छ ।

नगरपालिकाले यस वर्ष जेठयता पनि त्रिविलाई पटकपटक पत्र काटेर सचेत गराएको छ । त्रिविले नयाँ भवन निर्माण प्रक्रिया थालेको भेटिए पनि नगरपालिकालाई जानकारी नगराएको अनुगमन कार्यदलका सदस्य रामकृष्ण महर्जनले बताए । 

‘विश्वविद्यालयलाई २०५४ देखि बिनास्वीकृति भवन निर्माण नगर्न, प्रक्रिया पूरा गर्न ताकेता गरिरहेका छौं,’ नगरपालिकाका सूचना अधिकारी सुजिन्द्र महर्जनले भने, ‘तर प्रक्रियामा आउन नमान्दा अदालतसम्म यो विषय पुग्यो ।’ शैक्षिक संस्था भएकाले संरचना भत्काउनुभन्दा पनि त्रिविले प्रक्रिया पूरा गरी भवन निर्माण गर्न आदेश दिइएको नगरपालिकाको दाबी छ । अहिले पनि आन्तरिक स्रोतबाटै त्रिविमा नयाँ संरचना निर्माण भइरहेकै छन् । अब नगरपालिकाबाट नक्सापास र अन्य प्रक्रिया चाँडै पूरा गरिने त्रिविका प्रवक्ता भोला दाहालले बताए । उनले भने, ‘हामी सबै प्रक्रिया पूरा गर्ने पक्षमा छौं ।’ भूकम्पबाट क्षतिग्रस्त संरचना पुनर्निर्माणका लागि त्रिविलाई सरकारले यस वर्ष ६४ करोड रुपैयाँ उपलब्ध गराउनेछ । २०७२ को भूकम्पले त्रिविका ल्याबलगायत संरचनामा क्षति पुर्‍याएको थियो ।

सरकारी निकायद्वारा नियम उल्लंघन

- प्रशान्त माली
ललितपुर– जनताले नियम मिच्दा कारबाही र न्याय दिने जिल्लाका दुई ठूला निकायले नियमको उल्लंघन गरेका छन् । मानभवनस्थित जिल्ला प्रशासन कार्यालय र हरिहरभवनस्थित उच्च अदालतले नक्सा पास नगरी धमाधम भवन निर्माण गरिरहेका हुन् । जिल्ला प्रशासन परिसरमा निर्मित साढे दुईतले भवन निर्माणका लागि एमके निर्माण सेवाले २०७३ जेठ ६ मा ७ करोड १८ लाख ५४ हजार र उच्च अदालतको भवन युनाइटेड/श्यामसुन्दर/घकुछु जेभीले २५ करोड ठेक्का पाएका छन् । 
स्थानीय स्वायत्त शासन ऐन २०५५ को दफा १५० मा नगरपालिका क्षेत्रमा भवन निर्माण गर्न चाहने व्यक्ति वा सरकारी कार्यालयले नगरपालिकाबाट अनुमति लिनुपर्छ । अनुमतिका लागि भवनको नक्सासहित तोकिएको ढाँचामा नगरपालिकामा दरखास्त दिनुपर्छ । तर, यी दुवै निकायले न दरखास्त दिएका छन् न नक्सा पास गरेका छन् । प्रशासनले भवनको जग राखी पिलरसमेत उठाइसकेको छ भने अदालत भवनको जग खन्ने काम भइरहेको छ ।

प्रजिअ दीपक काफ्लेले आफू भर्खर सरुवा भएर आएकाले यसबारे जानकारी नभएको बताए । ‘भवन निर्माण विभागबाट डिजाइन तयार गरिएको बुझिएको छ,’ उनले भने । उच्च अदालत पाटनका रजिस्ट्रार नारायणप्रसाद पन्थीले भूकम्पअघि निर्माण थालेकाले उपनगरपालिकाबाट स्वीकृति लिनु नपर्ने दाबी गरे । ‘२०७२ मा नयाँ मापदण्ड बनेपछि अहिले नक्सा पास गराउने प्रक्रियामा छौं,’ उनले भने । 

ललितपुर उपमहानगरपालिकाका प्रवक्ता रूद्रप्रसाद गौतमले जावलाखेलको गणेशमान बहुउद्देश्यीय भवनबाहेक अन्य कुनै पनि सरकारी कार्यालयले नक्सा पास गर्ने प्रक्रियामा नआएको बताए । ‘भवन निर्माण गर्दा सँधियारलाई मर्का पर्न सक्छ,’ उनले भने, ‘सजर्मिन नगरीकन त्यसै निर्माण गर्न पाइँदैन ।’ उनले नक्सापासबिना भवन निर्माण थाल्ने सम्बन्धित निकायका प्रमुखलाई कारबाही गर्न सकिने कानुनी व्यवस्था भएको बताए ।

प्रकाशित : पुस २८, २०७३ ०८:१७
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
ADVERTISEMENT