यातायात कार्यालयमा घटेन दलालको चलखेल

नियन्त्रण गर्न प्रहरी परिचालन
प्रशान्त माली

ललितपुर — सादा पोसाकका सुरक्षाकर्मीको एउटा टोली एक महिनाअघि यातायात कार्यालय एकान्तकुनामा पुग्यो । दलालको चलखेल बुझ्न परिचय लुकाएर गएको टोलीले कार्यालयअघि भेटिएका दलालसित सवारी अनुमतिपत्र बनाइदिन अनुरोध गर्‍यो । दलालले पनि ग्राहक ठानेर नक्कली होइन सक्कली नै बनाइदिने भन्दै १५ हजार रुपैयाँ लाग्ने बताए ।

लगतै पक्राउ परेका ती दलालले बयानमा सवारी प्रशिक्षण दिने, अनुमतिपत्र मिलाइदिने र सवारी दर्ता किताबको नवीकरण गर्ने गरेको स्विकारे । यो कार्यालयमा दलालको चलखेल कति हुन्छ भन्ने सामान्य उदाहरणमात्र हो ।

दलाल पक्राउपछि एक दिन कार्यालयको स्थिति सामान्य बन्यो । लगतै भालिपल्टदेखि दलालको चलखेल पहिलाको जस्तै हुन थाल्यो । चलखेल अत्यधिक भएपछि अख्तियार दुरुपयोग अनुसन्धान आयोगले छानबिन थाल्यो ।

दलालले अति गर्न थालेपछि जिविस हलमा बुधबार सम्पन्न जिल्लाका प्रमुखहरूको बैठकमा यातायात कार्यालयले प्रहरी प्रशासनलाई हटाउन अनुरोध गरेको छ । यातायात व्यवस्था कार्यालय (सवारी चालक अनुमति पत्र) बागमती एकान्तकुनाका सूचना अधिकारी ईश्वरराज रेग्मीले कान्तिपुरसित भने, ‘कार्यालयमा हामी सुशासन चाहन्छौं ।’

महानगरीय प्रहरी वृत सातदोबाटो र उपमहानगरपालिका नगर प्रहरी बलको संयुक्त टोलीले बिहीबार बिहान कार्यालयमा छडके जाँच गर्‍यो । कार्यालयबाट दलालहरूको भागभाग भयो । दलालहरू पक्राउ गर्न असफल भए पनि कार्यालयअघि राखेको फोटोकपि मेसिन, दर्ता फारमलगायत सामान बरामद गर्न सफल भएको उपमहानगरपालिकाका नगर प्रहरी बल प्रमुख प्रहरी नायव उपरीक्षक कदमलाल महर्जनले बताए । 

‘जनशक्ति अभाव भए पनि यातायात कार्यालयमा नियमित निगरानी गर्न थालेका छौं,’ उनले भने, ‘लगनखेल, मंगलबजार खटाउनुपर्ने प्रहरी नखटाई लगातार चार/पाँच दिन यातायात कार्यालयमा खटाउँछौं ।’

महानगरीय प्रहरी परिसर ललितपुरका एसएसपी पीताम्बर अधिकारीले दलालको चलखेल हटाउन प्रहरीलाई नियमित परिचालन गरिने जानकारी दिए । उपनपामा पनि सामान फिर्ता लैजान आएका दलाललाई नगर प्रहरी बलका प्रहरी नायब उपरीक्षक महर्जनले अब यातायातमा गुन्डागर्डी नचल्ने जवाफ दिएर फर्काएका थिए ।

यातायात कार्यालय सवारी अनुमतिपत्र फाँटबारे जानाकार एक कर्मचारीका अनुसार सवारी अनुमतिपत्र बनाउने क्रममा दलाल र कर्मचारीबीच मिलेमतोमा हुने गरेको छ । मिलेमतोमा राजधानीका केही ड्राइभिङ सेन्टरका सञ्चालकसमेत संलग्न छन् । जिल्ला अनुसन्धान अधिकृत भूमिप्रसाद पाठकका अनुसार केही सक्रिया दलालहरूले कम पढेलेखेका सेवाग्राहीलाई आफ्नो प्रभावमा पारेर एउटा लाइसेन्स बनाएको १२ देखि १५ हजार रुपैयाँसम्म लिने गरेको भेटिएको बताए । 

‘लिखित पास भएर पनि ट्रायलमा फेल भएका व्यक्तिहरू दलालको सम्पर्कमा जाने गरेका छन्,’ उनले भने, ‘सवारी अनुमतिपत्रमा आर्थिक घोटाला र चलखेलको गुनासो आउने गरेको छ ।’

कार्यालयमा चलखेल कम गर्न सिसिटिभी राखे पनि हाल काम नलाग्ने बनाइएको सेवाग्राही बताउँछन् । प्रमुख जिल्ला अधिकारी दीपक काफ्लेले यातायात कार्यालयमा हुने चलखेल अन्त्य गरिने बताए । ‘सुधार गर्नुपर्ने कुरा धेरै छन्,’ उनले भने, ‘क्रमश: सुशासन कायम गर्दै लैजाने छौं ।’

दलालले १० रुपैयाँमा सजिलै पाउने एउटा दर्ता फारमको ३०, लिखित परीक्षाको नतिजा जानकारी गराइदिने भन्दै ३०, लिखित परीक्षामा आउने प्रश्नावली भन्दै केही प्रश्न दिएर ५ सयदेखि हजार रुपैयाँसम्म लिने गर्छन् ।

 

प्रकाशित : माघ ६, २०७३ २०:२२
प्रतिक्रिया
पठाउनुहोस्

गणतन्त्र संस्थागत गर्न निर्वाचन जरुरी : देउवा

'पुनर्संरचना आयोगको प्रतिवेदन पनरावलोकन हुनु जरुरी छ'

भरतपुर — नेपालीका कांग्रेसका सभापति शेरबहादुर देउवाले लोकतन्त्र, गणतन्त्र जोगाउन तीन तहको निर्वाचन आवश्यक रहेको बताएका छन् । ‘स्थानिय, प्रान्तिय र केन्द्रिय निर्वाचन हुन सके मात्र संविधान कार्यान्वयन तथा लोकतन्त्र, गणतन्त्र संस्थागत हुन्छ,’ देउवाले भने, ‘यसका लागि सबै एकजुट हुनुपर्छ ।’

नेपाली कांग्रेस क्षेत्रनम्बर ५ ले जगतपुरमा बिहीबार आयोजना गरेको आमसभामा बोल्दै सभापति देउवाले कुनै पनि हालतमा तीन तहको निर्वाचन गर्नुपर्ने जिकिर गरेका हुन् । उनले यी सबै निर्वाचन हुन सके संविधान पूर्ण कायान्वयन भई नेपालमा लोकतन्त्र गणतन्त्रले पूर्णता पाउने दाबि गरे । देउवाले संविधान संशोधन प्रस्ताव गर्ने जिम्मेवारी कांग्रेसको काँधमा आएको बताए । प्रस्तावका बारेमा एमाले अध्यक्ष केपी ओलीले विभिन्न बखेडा निकालेको उनले आरोप लगाए ।

‘ओलीले सिमांकनका बारेमा पहिले नै हस्ताक्षर गरेका छन्,’ उनले भने, ‘आफैले हस्ताक्षर गरेको सीमांकनको विरोध गर्ने काम भयो ।’

स्थानीय पुनर्संरचनाका बारेमा देशभरीबाट विरोध आएकाले त्यसको पुनरावलेकन हुनुपर्ने उनको भनाई छ । ‘जनतालाई सुविधा भएन भने पुनर्संरचनाको कुनै अर्थ रहँदैन,’ उनले भने, ‘त्यसका लागि विवाद भएको जिल्लाको पुनर्संरचाको पुनरवालोकन हुनु जरुरी छ ।’

शान्तिपूर्ण स्थानिय निकायको निर्वाचनको लागि पनि पुनर्संरचना सच्याउनुपर्ने उनको माग छ । ‘यस बारेमा म पहल गर्छु,’ देउवाले भने, ‘कुनकुन जिल्लामा विवाद छ, पुनर्संरचना आयोगको प्रतिवेदन पनरावलोकन हुनु जरुरी छ ।’ हिमाल, तराई, पहाडका जनताबीच झगडा हुने काम भएको भन्दै उनले त्यसबाट सजग रहन कार्यकर्तालाई अनुरोध गरेका छन् ।

प्रकाशित : माघ ६, २०७३ २०:१२
पूरा पढ्नुहोस्
प्रतिक्रिया
पठाउनुहोस्