काठमाडौं — ‘मैले विद्रोही नेता र शान्ति सम्झौताको हस्ताक्षरकर्ताको रुपमा धेरै पटक जोखिम लिएको छु’, प्रधानमन्त्रीले भने,‘चुनावको घोषणा गर्दा सबैलाई मान्य नहुन सक्छ । म जोखिम उठाएर कठोर निर्णय गर्नसक्छु ।’
प्रधानमन्त्री पुष्पकमल दाहालले माघ १५ गतेभित्र सरकारले चुनावको मिति घोषणा गर्ने जानकारी दिएका छन् । संसदीय मामिला पत्रकार समाजले राजधानीमा आइतबार गरेको कार्यक्रममा बोल्दै प्रधानमन्त्रीले चुनाव हुन नसके मुलुक २०१७ सालभन्दा पनि जटिल अवस्थामा पुग्ने भन्दै चिन्ता व्यक्त गरे ।
प्रतिपक्षी एमाले र मधेसी मोर्चाले संविधान संशोधनको बिषयमा फरक फरक अडान राखेको बेला प्रधानमन्त्रीले यस्तो धारणा सार्वजनिक गरेका हुन् ।
कार्यक्रममा बोल्दै प्रधानमन्त्रीले संविधान संशोधनको बिषयमा तीन विकल्प भएको धारणा राखे ।
उनले अहिलेको संशोधन विधेयकमा सबै दलको सहमति जुटाउने, संशोधन र अन्य राजनीतिक मुद्दालाई प्याकेजमा सहमति गर्ने वा अर्को संशोधन विधेयक दर्ता गराउने बिषयमा दलहरुबीच सहमति हुनुपर्ने धारणा राखे ।
शनिबार भएको तीन दलको बैठकमा पनि आफूले यी विकल्प अघि सारेको प्रधानमन्त्रीले बताए । शनिबार प्रधानमन्त्री निवास बालुवाटारमा बसेको तीन दलको बैठकले बैशाखभित्र स्थानीय निकायको निर्वाचन गर्न सहमति जुटाएको थियो ।
प्रकाशित : माघ ९, २०७३ १७:५७