कमल थापालाई अध्यक्ष बनाउने सहमति तोडियो, लोहनीले गरे उम्मेदवारी घोषणा

कान्तिपुर संवाददाता

काठमाडौं — कमल थापालाई सर्वसम्मत अध्यक्ष बनाउने सहमति तोड्दै राप्रपाका राष्ट्रिय अध्यक्ष प्रकाशचन्द्र लोहनीले उम्मेदवारी घोषणा गरेका छन् ।राप्रपाको एकता महाधिवेशन शुक्रबारदेखि काठमाडौंमा सुरु हुँदैछ ।

कमल थापालाई सर्वसम्मत अध्यक्ष बनाउने सहमति तोड्दै राप्रपाका राष्ट्रिय अध्यक्ष प्रकाशचन्द्र लोहनीले उम्मेदवारी घोषणा गरेका छन् ।

राप्रपाको एकता महाधिवेशन शुक्रबारदेखि काठमाडौंमा सुरु हुँदैछ । एकतन्त्रिय पद्धतिबाट पार्टीलाई कब्जा गर्न खोजिएको भन्दै लोहनीले उम्मेदवारी घोषणा गरेका हुन् ।

पार्टीको चुनावी चिन्ह र शक्ति सन्तुलनप्रति लोहनीको असन्तुष्टि छ । बुधबार साँझ लोकेन्द्रबहादुर चन्दको निवासमा भएको सहमति अनुसार पार्टी चल्ने नदेखेपछि आफूले उम्मेदवारी दिएको उनले बताए । उपाध्यक्ष र महामन्त्री कम्तिमा दुईजना निर्वाचित हुनुपर्ने लोहनीको भनाइ छ ।

‘पहिले चुनावी चिन्ह हलो हुनेछ भनेर सहमति गरियो, आज आएर एकलौटी रुपमा चिन्ह र शक्ति सन्तुलनको विषयलाई वेवास्ता गर्दै अघि जान खोजिएको छ, यसमा मेरो गम्भिर असन्तुष्टि छ,’ महाधिवेशन घोषणा हुने केही घण्टाअघि रिपोर्टर्स क्लवमा शुक्रबार भएको पत्रकार सम्मेलनमा उनले भने, ‘पहिलेको सहमति नमान्ने र पछिल्लो सहमति मात्रै मान्नुपर्छ भन्ने हुन्छ? यस्तो एकतन्त्रिय पार्टीको निर्माण राप्रपाका लाखौँ कार्यकर्ताले चाहेका छैनन् ।’

प्रकाशित : फाल्गुन ६, २०७३ १०:५७
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

पाठशाला बन्यो होमस्टे

प्रतीक्षा काफ्ले

स्याङ्जाको पञ्चमूल ४ सिरुबारीमा २०५४ सालदेखि थालिएको होमस्टे सेवा नेपालकै पुरानो मानिन्छ । चिटिक्क र झुरुप्प परेको गुरुङ बस्तीमा ढुंगा बिछयाएर बनाइएको सफा र फराकिला बाटाघाटा, सहरकै होटलसरह शौचालय, बाथरुम र खानेपानीको सुविधा भएको गाउँमा पर्यटकलाई स्वागत–सत्कार पनि भव्य रूपले गरिन्छ ।

त्यही कारण यो गाउँ विदेशमा समेत चिनिन्छ । सिरुबारी घुम्नलायक उत्कृष्ट ग्रामीण पर्यटन केन्द्र मात्रै बनेको छैन, अनुसन्धान र होमस्टेको तालिम केन्द्रसमेत बनेको छ । 

स्थानीयको आतिथ्य र व्यवस्थापन पक्षका कारण सिरुबारीमा आन्तरिक र बाहय पर्यटकको संख्या बर्सेनि बढ्दो छ । पछिल्लो समय देशका विभिन्न स्थानबाट होमस्टे सञ्चालन तथा व्यवस्थापन पक्षबारे आवश्यक जानकारीका लागि आउने गरेका छन् । सिरुबारीलाई सरकारले ०५४ सालमा ग्रामीण पर्यटन केन्द्र घोषणा गरेपछि यहाँ पर्यटकीय चहलपहल बढेको पर्यटन विकास व्यवस्थापन समिति सिरुबारीका संयोजक जुमबहादुर गुरुङले बताए । तत्कालीन कांग्रेस सांसद रुद्रमान गुरुङको पहलमा सिरुबारीमा होमस्टे सञ्चालनमा आएको हो । आमा समूह, युवा क्लबलगायतको छाता संस्थाको रूपमा रहेको पर्यटन विकास समितिले पर्यटनको सबै काम गर्दै आएको छ । 
अन्यत्रका होमस्टे सञ्चालकहरू आन्तरिक तथा बाहय ब्यवस्थापकीय पक्षको विषयमा जानकारी लिन सिरुबारी आउने गरेका छन् । उनीहरू सिरुबारी अवलोकन गरी पर्यटकको स्वागतदेखि बिदाइसम्मका गतिविधि सिकेर फर्किन्छन् । बास बस्न आएकालाई रैथाने परिकारको स्वाद र स्थानीय सांस्कृतिक कार्यक्रममार्फत स्थानीयले पाहुनालाई स्वागत गर्छन् । 
सिरुबारी पुग्ने पहिलो पर्यटक अस्ट्रेलियाका ग्रामीण पर्यटनविद् डा. टोनी पार्क हुन् । स्थानीय महिलाको उत्साहबाट प्रभावित भई गाउँका अगुवा तथा पूर्वसांसद गुरुङले पार्कलाई सिरुबारी लगेका थिए । पर्यटन कार्यालय पोखराका तत्कालीन प्रमुख पदमबहादुर केसी र टोनीले सिरुबारीको ग्रामीण पर्यटनसम्बन्धी खाका बनाएका थिए । सिरुबारीले सरकारी निकायबाट अहिलेसम्म ६० लाख रुपैयाँ अनुदान पाएको संयोजक गुरुङले बताए । गाउँमा पुग्ने पर्यटकलाई कुन घरमा राख्ने भन्ने समितिले निर्णय गर्छ । मेनुअनुसारको रकम पर्यटकले समितिमा जम्मा गर्नुपर्छ । जम्मा भएको रकम समितिले पछि सञ्चालकलाई बाँडिदिन्छ । 
सिरुबारीमा हाल मासिक करिब ७ सय पर्यटक आउँछन् । दुई दशकको यो अवधिमा ३५ हजारभन्दा बढी पर्यटक आएको रेकर्ड समितिसँग छ । आन्तरिक पर्यटक बढी छन् । गाउँका २७ घरमा होमस्टे सञ्चालनमा ल्याइएको छ । 

प्रकाशित : फाल्गुन ६, २०७३ १०:५७
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT