देउवाले भने– चुनाव नहुने कुरै छैन, चुनाव हुन्छ, हुन्छ, हुन्छ !

कान्तिपुर संवाददाता

भक्तपुर — नेपाली कांग्रेसका सभापति एवं पूर्वप्रधानमन्त्री शेरबहादुर देउवाले निर्धारित समयमा निर्वाचन हुनेमा शंका नगर्न आग्रह गरेका छन् । कांग्रेस मासिक पत्रिकाले पार्टीका पूर्व सभापति गिरिजाप्रसाद कोइरालाको सातौं स्मृति दिवसको अवसरमा भक्तपुरमा आयोजित कार्यक्रममा बोल्दै सभापति देउवाले निर्वाचन नभए संविधान कार्यान्वयन अवरुद्ध हुने बताए ।

नेपाली कांग्रेसका सभापति एवं पूर्वप्रधानमन्त्री शेरबहादुर देउवाले निर्धारित समयमा निर्वाचन हुनेमा शंका नगर्न आग्रह गरेका छन् ।

कांग्रेस मासिक पत्रिकाले पार्टीका पूर्व सभापति गिरिजाप्रसाद कोइरालाको सातौं स्मृति दिवसको अवसरमा भक्तपुरमा आयोजित कार्यक्रममा बोल्दै सभापति देउवाले निर्वाचन नभए संविधान कार्यान्वयन अवरुद्ध हुने बताए ।

‘गाउँगाउँमा चुनावको माहौल बनेको बनिसकेको छ, निर्वाचन हुन्न कि भनेर शंका नगर्नुस्’, उनले भने, ‘सबै निर्वाचनको तयारीमा लाग्नुस् ।’
कार्यक्रममा सभापति देउवाले सबै मिलेर निर्वाचनलाई सफल पार्नुपर्नेमा जोड दिंदै निर्वाचन पश्चात् संविधान कार्यान्वयन हुने र गणतन्त्रको उपलब्धी मजबुद हुने उल्लेख गरे ।

चुनाव नभए संवैधानिक संकट आउने र यसले प्रजातन्त्र खतरामा पर्ने औल्याउँदै देउवाले भने,‘चुनाव नहुने कुरै छैन, चुनाव हुन्छ, हुन्छ, हुन्छ, यसमा शंका नगर्नुस्, चुनाव नभए संवैधानिक संकट आउँछ, प्रजातन्त्र खतरामा पर्छ ।’

हिमाल, पहाड र तराईलाई फुटाएर विभाजन गरेर यहाँका बासिन्दाको एकता भाड्ने षडयन्त्र भइरहेको बताउँदै देउवाले तराई, पहाड, र हिमालमा बस्ने सबै नेपालीहरु बिच फाटो ल्याउने षडयन्त्र भईरहेको बताए । यसलाई चिर्न पनि कांग्रेसले निर्वाचनलाई सफल पार्नु जरुरी भएको समेत उनले बताए ।

कार्यक्रममा सभापति देउवाले निर्वाचनको वातावरण बनाउन नेकपा एमाले र मधेशवादी दलसँग निरन्तर वार्ता भैरहेको बताएका छन् । कांग्रेस बाहेक सबै सर्वसत्तावादी पार्टी भएको आरोप लगाउँदै देउवाले हिमाल, पहाड र तराईलाई फुटाउने षडयन्त्र कांग्रेसले सफल हुन नदिने बताए ।

प्रकाशित : चैत्र ७, २०७३ १९:०१
प्रतिक्रिया
पठाउनुहोस्

'एक चीन' नीतिविरुद्ध नजान भारतलाई चीनको चेतावनी

बाैद्ध सम्मेलनमा दलाई लामालाई निम्त्याएकाे बिषयमा बिवाद
एजेन्सी

बेइजिङ — भारतीय सरकारले आयोजना गरेको अन्तर्राष्ट्रिय बौद्ध सम्मेलनमा दलाई लामालाई निम्त्याइएको बिषयमा चीनले चर्को असन्तुष्टि व्यक्त गरेको छ ।

सोमबार बेइजिङमा आयोजित पत्रकार सम्मेलनमा चिनियाँ विदेश मन्त्रालयकी प्रवक्ता हुवा छुनयिङले दुई पक्षीय सम्बन्ध नबिगार्ने भए चनिको मुख्य चासो विरुद्ध नजान भारतलाई चेतावनी दिइन् ।

‘केही समयता भारतले चीनको चासोविरुद्ध गएर दलाई लामालाई बौद्ध सम्मेलनमा निम्त्याएको छ’, बेइजिङमा प्रवक्ता हुवाले पत्रकारहरुसँग भनिन् ।

बौद्ध सम्मेलन भारतीय सरकारले आयोजना गरेको थियो । ‘भारत सरकारको निर्णयप्रति चीन असन्तुष्ट छ र यसको कडा प्रतिवाद गर्दछ’, उनले भनिन् ।

‘हामी भारतलाई चीनको मुख्य चासोको सम्मान गर्न र दुई देशको सम्बन्ध बिगार्नेतर्फ कदम नचाल्न आग्रह गछौं’, उनले भनिन् ।

शुक्रबार बिहारमा भएको अन्तर्राष्ट्रिय बौद्ध सम्मेलनको उद्घाटन दलाई लामाले गरेका थिए । उक्त सम्मेलनको क्रममा भएको सेमिनारमा कयौं देशका बौद्ध भिक्षु र अध्येताहरुको सहभागिता छ ।

एक महिना अघि पनि भारतले दलाई लामाले अरुणाञ्चल प्रदेशको भ्रमण गर्न दिएको बिषयमा चीनले असन्तुष्टि व्यक्त गरेको थियो । अरुणाञ्चल तिब्बतसँग नजिक छ ।

प्रकाशित : चैत्र ७, २०७३ १९:०१
पूरा पढ्नुहोस्
प्रतिक्रिया
पठाउनुहोस्