प्रधानमन्त्री–चिनियाँ राष्ट्रपति भेटवार्ता हुने

भ्रमण दल र तालिका अझै टुंगिएन
चन्द्रशेखर अधिकारी

काठमाडौं — कूटनीतिक कमजोरी र राजनीतिक अस्थिरताको प्रभाव प्रधानमन्त्री पुष्पकमल दाहालको आसन्न चीन भ्रमणमा समेत परेको छ । चीन जानु दुई दिनअघिसम्म पनि प्रधानमन्त्रीको चीन भ्रमण कस्तो हुने भन्ने निर्णय हुन सकेको छैन । नेपाल र चीन दुवै देशले भ्रमण कार्यक्रमसमेत सार्वजनिक गरेका छैनन् ।

प्रधानमन्त्री दाहाल बोआओ एसियन फोरममा भाग लिन बिहीबार चीन जाँदै छन् । तर उनको भ्रमण कुन स्तरको हुने भन्ने टुंगो लाग्न नसकेकाले कार्यक्रम सार्वजनिक गर्न ढिलाइ भएको स्रोतले दाबी गरेको छ । सरकारका प्रवक्ता सुरेन्द्र कार्कीले प्रधानमन्त्री बोआओ फोरममा भाग लिएर बेइजिङ जाने तय भएको जानकारी दिए ।

उनका अनुसार प्रधानमन्त्री दाहाल र चिनियाँ राष्ट्रपति सीबीच औपचारिक भेटसमेत हुनेछ । स्रोतका अनुसार उक्त भेट करिब आधा घण्टा हुने तयारीसहित सबै काम अघि बढेको छ । प्रधानमन्त्रीका रूपमा दाहालको यो दोस्रो चीन भ्रमण भए पनि सीसँगको दुईपक्षीय भेट भने यो तेस्रो हो ।  
चैत १० मा नेपाल भ्रमणमा आउने चिनियाँ रक्षामन्त्री चाङ वाङयुसँग भेटवार्ता गरेर दाहाल त्यही दिन राति बोआओ जाने भएका हुन् । उनी एक साता बोआओ, बेइजिङ, चेन्दु र ल्हासामा रहनेछन् । 

भ्रमण राजकीय बनाउने, चिनियाँ प्रधानमन्त्री ली खछ्याङसँग दुईपक्षीय सम्झौता गर्नेलगायतको तयारी भए पनि कार्यक्रम आकस्मिक रूपमा परिवर्तन भएको हो । प्रधानमन्त्री ली खछ्याङ र विदेशमन्त्री वाङ दुवै जना न्युजिल्यान्डमा हुने भएपछि प्रधानमन्त्रीले दुई दिनअगावै जाने तयारी समेत गरेका थिए । तर त्यसमा चीनले सहमति जनाएन । अन्तत: उनी चैत १० मा नै त्यसतर्फ गई बोआओमा सम्बोधन गर्ने र १२ गते बेइजिङ पुग्ने गरी तालिका तय भएको छ । उनका साथमा परराष्ट्रमन्त्री प्रकाशशरण महत पनि जानेछन् । 

प्रधानमन्त्रीको चीन भ्रमणको गृहकार्य परराष्ट्र मन्त्रालयले अझै पूरा गर्न सकेको छैन । भ्रमणका क्रममा वान बेल्ट वान रोडदेखि अन्य सम्झौता गर्ने विषय पनि अझै टुंगोमा पुग्न सकेको छैन । पुराना सम्झौता कार्यान्वयन गर्ने प्रतिबद्धता र चीनको सहयोग घोषणामात्र यो भ्रमणमा हुनसक्ने अधिकारीहरूले बताए । 

व्यस्त हुनेछन् प्रधानमन्त्री
बेइजिङ (कास)– प्रधानमन्त्री पुष्पकमल दाहाल बिहीबार ग्वान्जाओ हुँदै हैनान पुग्ने भएका छन् । उनले शुक्रबार बिहान चिनियाँ उपप्रधानमन्त्री चाङ काउलीसँग भेटवार्ता गर्नेछन् भने शनिबार बोआओ फोरमलाई सम्बोधन गर्नेछन् । 

सम्बोधन सकिएपछि उनी बेइजिङ प्रस्थान गर्नेछन् । बेइजिङस्थित नेपाली दूतावासले शनिबार साँझ आयोजना गर्ने रात्रिभोजमा सहभागी भएर पुराना राजदूत, थिंकट्यांक, प्राध्यापक र नेपालीलाई भेट्ने कार्यक्रम छ । उनी चैत १३ गते दिउँसो बेइजिङ वैदेशिक अध्ययन विश्वविद्यालयमा आयोजित गोष्ठीमा ‘नेपाल चीन सम्बन्ध : विकास र समृद्धिको अभिलाषा’ विषयमा मन्तव्य राख्नेछन् ।

चीनका लागि राजदूत लीलामणि पौडेलले प्रधानमन्त्री दाहालको टोलीको टुंगो लागिनसकेको बताए । परराष्ट्र मन्त्रालयसँग समन्वय गरी टुंगोमा पुगिने पौडेलको भनाइ छ । प्रधानमन्त्री चैत १४ गते अपराह्न बेइजिङबाट चेन्दु प्रस्थान गर्नेछन् भने १५ गते ल्हासा जानेछन् । ल्हासामा केही महत्त्वपूर्ण भेटघाट गर्ने र १६ गते स्वदेश फर्कने कार्यक्रम छ । 

प्रकाशित : चैत्र ८, २०७३ ०९:३६
प्रतिक्रिया
पठाउनुहोस्

प्रस्तावित राजदूतको सुनुवाइ सुरु

कान्तिपुर संवाददाता

काठमाडौं — व्यवस्थापिका संसद्को संसदीय सुनुवाइ विशेष समितिले प्रस्तावित राजदूतहरूको सुनुवाइ सोमबारदेखि सुरु गरेको छ । सरकारले १२ मुलुकमा राजदूतको नाम सिफारिस गर्दै संसद्मा सुनुवाइको लागि पठाएको थियो । राजदूतमा बिचौलियाहरू परेको भन्दै लामो बहस भएपछि सरकारले दुई साता ढिलाइ गरी संसद्मा प्रस्तावित नाम पठाएको हो ।

खासगरी यूएई, ओमान र कतारमा प्रस्तावित राजदूत क्रमश: आशा लामा, शर्मिला पराजुली र रमेश कोइरालाको नाममा विवाद भएको थियो । म्यानपावरसँग जोडिएका व्यक्तिलाई राजदूत बनाउँदा स्वार्थ बाझिने र व्यापार समेत गर्ने भन्दै सरकारको आलोचना भएको थियो । 

दूतावास नै नभएको मुलुकमा समेत राजदूत सिफारिस र म्यानपावरमा संलग्न व्यवसायी तथा बिचौलियालाई पनि राजदूत सिफारिस गरेको भन्दै सरकारको आलोचनापछि मन्त्रिपरिषद्ले दुई राजदूतको नाम फिर्ता गरेको थियो । तर फोरम लोकतान्त्रिकको दबाबपछि ओमानको राजदूतमा सिफारिस पराजुलीको नाम भने पुन: सुनुवाइका लागि पठाइएको हो । सरकारले कांग्रेसको कोटामा राजदूत सिफारिस आशा लामाको नाममात्र फिर्ता लियो । मन्त्रिपरिषद्मा रहेर सिफारिस गरेको व्यक्ति नै सुनुवाइ समितिको सदस्य छन् । प्रस्ताव उठाउने परराष्ट्रमन्त्री प्रकाशशरण महत नै सुनुवाइ समितिमा सदस्य छन् । 

सरकारले लक्की शेर्पा (अस्ट्रेलिया), प्रतिभा राणा (जापान), निरञ्जनकुमार थापा (इजरायल), युवनाथ लम्साल (डेनमार्क), विश्वम्भर प्याकुरेल (श्रीलंका), शर्मिला पराजुली (ओमान), रमेशप्रसाद कोइराला (कतार), पदम सुन्दास (बहराइन), अर्जुन जंगबहादुर सिंह (गणतन्त्र कोरिया), चोपलाल भुसाल (बंगलादेश), भीमकृष्ण उदास ( म्यान्मार) र महेन्द्रप्रसाद सिंह राजपुत (साउदी अरेबिया) का लागि राजदूतमा सिफारिसको टुंगो लगाएर संसदीय सुनुवाइका लागि पठाएको थियो । उजुरीको म्याद राखेर सुनुवाइ प्रक्रिया अघि बढेको थियो । सरकारले स्पेनका लागि प्रस्ताव गरेको रमेश रायमाझीको नाम भने सुनुवाइमा पठाएको छैन । त्यहाँ दूतावास खोल्ने प्रक्रिया पूरा गरेर मात्र उनको नाम सुनुवाइमा पठाउने बताइएको छ । 

प्रस्तावित राजदूतमध्ये पराजुली र कोइरालाविरुद्ध चार वटा उजुरी परेका छन् । समितिले आज उजुरीकर्तालाई बोलाएर उजुरीमा उल्लेख भएका विषयवस्तुको वास्तविकताबारे जानकारी लिएको थियो । दुई बेनामे उजुरीका बारेमा भने समिति स्वयंले बुझेर सुनुवाइमा सोध्ने बताइएको छ ।

समितिले राजदूतमा सिफारिस भएकामध्ये अस्ट्रेलियाका लागि प्रस्तावित शेर्पाको सोमबार संसदीय सुनुवाइ गरेको थियो । उनी विरुद्ध कुनै उजुरी नभए पनि उनलाई सांसदहरूले जिज्ञासा राखेका थिए । उनले आर्थिक कूटनीतिलाई जोड दिने बताइन् । समितिले मंगलबार विवादमा परेका कोइराला र पराजुलीसहित ६ जनाको संसदीय सुनुवाइ गर्नेछ । उनीहरूको उजुरीका विषयमा छलफल भए पनि त्यसमा सुनुवाइपछि नै निर्णय लिने बताइएको छ । 

 

प्रकाशित : चैत्र ८, २०७३ ०९:३६
पूरा पढ्नुहोस्
प्रतिक्रिया
पठाउनुहोस्