नेविसंघ कार्यकर्ता कुटिए

खगेन्द्र अवस्थी

बैतडी — कांग्रेसका तर्फबाट मेलौली नगरपालिका प्रमुखका आकांक्षी नेविसंघ पूर्व जिल्ला सदस्य ईश्वर भट्ट कुटिएका छन् । बिहीबार राति सदरमुकाम गोठलापानीस्थित स्टार गेस्ट हाउसमा सुतिरेहका बेला दुई जनाले कुटपिट गरेका प्रहरीले जनाएको छ ।

भट्टको बाँया खुट्टा भाँचिएको, आँखा र छातीमा चोट लागेको छ । राति ११ बजे सुतिरहेका बेला कोठामा पसेका दुई जनाले तानेर सिँढीबाट बाहिर फालेको भट्टले बताए । उनको जिल्ला अस्पतालमा प्राथमिक उपचारपछि काठमाडौं लैजाने तयारी भएको छ ।
 
कुटपिटमा संलग्न वीरेन्द्र चन्द र धिरज चन्दलाई प्रहरीले नियन्त्रणमा लिएको छ । भट्टले चैत अन्तिम साताको कांगेस बैठकमा नगर प्रमुखमा उमेद्वार हुने ईच्छा भएको बताएका थिए । सभापति चन्दले गाउँ समितिमार्फत नाम नआएकाले नाम समावेश गर्न नसकिने धारणा राखेपछि दुवै जनाबीच सामान्य विवाद भएको थियो । कांग्रेस क्षेत्र नं. २ का सभापति तेजबहादुर चन्दविरुद्ध बोलेको भन्दै दुई जनाले राति आएर कुटपिट गरेको भट्टले बताए ।  

प्रकाशित : वैशाख ८, २०७४ १२:२०
ADVERTISEMENT
प्रतिक्रिया
पठाउनुहोस्
ADVERTISEMENT

बालुवाटार बैठक निष्कर्ष : सहमतिको खाकासहित आजै अर्को वार्ता गर्ने

बसन्त बस्नेत

काठमाडौं — संविधान संशोधन र स्थानीय चुनावबारे टुंगो लगाउन सरकार र मधेसी मोर्चाबीच शुक्रबार बिहान बालुवाटारमा बसेको वार्ता भर्खरै सकिएको छ । सरकारका तर्फबाट प्रधानमन्त्री पुष्पकमल दाहालले हिजो पार्टी एकता गर्ने नेताहरुलाई बधाई दिँदै अब वैशाख ३१ को स्थानीय चुनावमा भाग लिन आग्रह गरे ।

मधेसी नेताले धन्यवाद दिँदै संविधान संशोधनको मस्यौदा परिमार्जन र पारित गर्ने पूर्वसहमति सम्झाएपछि दाहालले आजै सत्ता घटकको बैठक बस्ने, त्यसपछि बेलुकी ५ बजे मोर्चासँग फेरि वार्ता गर्ने वचन दिए ।

प्रधानमन्त्रीको सचिवालयका अनुसार बैठकमा संविधान संशोधन प्रस्ताव र स्थानीय तहको निर्वाचनका विषयमा कुराकानी भएको थियो । मोर्चाका नेताहरुले स्थानीय तहको निर्वाचनभन्दा संविधान संशोधनमा मोर्चाको मुख्य चासो भएको भन्दै सरकारद्वारा प्रस्तुत प्रस्तावमा पुनर्विचार गर्न सरकारसँग आग्रह गरे । ‘आज तीन विषयमा केन्द्रित भएर वार्ता भयो, संशोधन विधेयकलाई परिमार्जन कसरी गर्ने, संशोधन विधेयक कसरी पारित गर्ने र चुनाव कसरी गर्ने,’ राष्ट्रिय जनता पार्टीका नेता राजेन्द्र महतोले कान्तिपुरसँग भने,‘सत्ता घटकको कुराकानीपछि हामीसँग आजै ५ बजे अर्को वार्ता गर्ने भन्दै बैठक सकियो ।’

बैठकमा प्रधानमन्त्री पुष्पकमल दाहाल, कांग्रेस सभापति शेरबहादुर देउवा, गृहमन्त्री विमलेन्द्र निधि, कांग्रेस नेताहरु रामचन्द्र पौडेल, शशांक कोइराला, प्रकाशमान सिंह, माओवादी केन्द्रका नेता वर्षमान पुन, मोर्चाका नेताहरु महन्थ ठाकुर, राजेन्द्र महतो, अशोक राई, राजेन्द्र श्रेष्ठ, अनिलकुमार झा, शरतसिंह भण्डारी, महेन्द्रराय यादव, हृदयेश त्रिपाठी लगायत सहभागी थिए ।

प्रकाशित : वैशाख ८, २०७४ १२:२०
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT