प्रधानसेनापति बन्न थापालाई बाटो खुला

कान्तिपुर संवाददाता

काठमाडौं — रथी पूर्णचन्द्र थापालाई नेपाली सेनाको प्रधानसेनापति बन्ने बाटो खुलेको छ । मन्त्रिपरिषद्को बिहीबारको बैठकले दुवै रथी थापा र बलदेवराज महतको एक/एक वर्ष म्याद थप्ने निर्णय गरेसँगै थापा प्रधानसेनापति बन्ने प्रस्ट भएको हो । प्रधानसेनापति राजेन्द्र क्षत्रीले रक्षा मन्त्रालयमा पठाएको म्याद थप्ने प्रस्ताव मन्त्रालयमार्फत मन्त्रिपरिषद् बैठकमा पेस भई स्वीकृत भएको हो ।

प्रधानसेनापति क्षत्रीको २०७५ भदौ २४ मा अवकाशसँगै करिब ९६ हजार सैनिक रहेको संगठनको थापा प्रमुख हुनेछन् । सैनिक ऐन २०६३ मा रथीको म्याद दुई वर्ष र उमेरको हद ५८ वर्ष हुने व्यवस्था छ । तर ५८ वर्ष पूरा नहुँदै दुईवर्षे कार्यकाल सकिएमा सेनालाई आवश्यक भएको मनासिव आधार र कारण खोली प्रधानसेनापतिले सरकारसमक्ष सिफारिस पठाएमा एक वर्ष थपिने व्यवस्था छ ।

दोस्रो वरीयतामा रहेका बलाधिकृत रथी महतको २०७४ साउन ७ मा सकिने दुईवर्षे कार्यकालमा एकवर्षे म्याद थप मन्त्रिपरिषद्बाट स्वीकृत भए पनि कात्तिक १७ गते ५८ वर्ष पुगेसँगै उनले अवकाश पाउने छन् । एकवर्षे थप अवधि सुरु भएको तीन महिनामै उनले सेवा छाडनुपर्नेछ । यसपछि तेस्रो वरीयतामा रहेका थापा दोस्रो वरीयतामा पुग्नेछन् र भावी प्रधानसेनापतिका रूपमा रहनेछन् ।

बलाध्यक्ष रथी थापाको दुईवर्षे कार्यकाल २०७४ असोज १५ मा सकिँदै छ । थापा २०७५ भदौ २५ मा ५८ वर्ष पुग्नेछन् । प्रधानसेनापति क्षत्रीले २०७५ भदौ २४ मा आफ्नो तीनवर्षे कार्यकाल पूरा गरी अवकाश पाउने छन् । एक दिनको संयोगले थापा प्रधानसेनापति बन्नेछन् र तीन वर्ष नेपाली सेनाको नेतृत्व गर्नेछन् । सरकारले एक महिनाअघि नै नयाँ प्रधानसेनापतिको घोषणा गर्ने र १५ दिनअघि बहालवाला प्रधानसेनापति बिदामा बस्ने प्रचलन छ ।

कात्तिकमा महतले अवकाश पाएपछि उपरथी हेमन्त कुँवर रथीमा बढुवा हुनेछन् । र, थापा सेनाका दोस्रो वरीयतामा पुग्नेछन् । सेनामा यसअघि रथीहरूमा बालानन्द शर्मा, कृष्णनारायणसिंह थापा, रघुचन्द्रबहादुर सिंहलगायतको पदावधि थपिएको थियो । प्रधानसेनापति क्षत्रीले नेपालभूषण चन्दको भने नौ महिनाको उमेर हद बाँकी रहे पनि एकवर्षे कार्यकाल थप गरेका थिएनन् । उमेरको हदले तीन महिनामात्र कार्यकाल बाँकी रहेका महतको पनि रथीमा म्याद थपिनुको मुख्य कारण थापालाई मात्रै प्रधानसेनापति बनाउनकै लागि म्याद थप्नुपरेको भन्ने आरोप नलागोस् भनेर हो ।

प्रधानसेनापति क्षत्रीले रथी थापालाई भावी प्रधानसेनापति बनाउन यस अघिदेखि नै पहल गर्दै आएका थिए । रथी हुँदा थापा राष्ट्रसंघअन्तर्गत इजरायल–प्यालेस्टाइन सीमा क्षेत्र (गोलनहाइट) स्थित डिसइन्गेजमेन्ट (अनडफ) को फोर्स कमान्डरका रूपमा कार्यरत थिए । मिसनमा थापाको पदावधि थप अर्को वर्ष लम्बिन सक्थ्यो । तर एक वर्ष कार्यकाल सकिनेबित्तिकै बलाध्यक्ष रथीको जिम्मेवारी सम्हाल्न नेपाल फर्किए । उनलाई जंगी अड्डामा छिटो ल्याएर जिम्मेवारी सम्हाल्न लगाउनुमा भावी प्रधानसेनापतिका रूपमा अघि बढाउन खोजेको प्रस्ट थियो ।

प्रकाशित : जेष्ठ ५, २०७४ ०८:३२
प्रतिक्रिया
पठाउनुहोस्
ADVERTISEMENT
ADVERTISEMENT

थप दुई गाउँपालिकामा नेतृत्व चयन

कान्तिपुर संवाददाता

काभ्रे — अन्तिम मत परिणाम आएका महाभारत र भुम्लु गाउँपालिकामा क्रमश: माओवादी केन्द्र र एमालेले जित हात पारेका छन् । महाभारतको अध्यक्षमा कान्छालाल जिम्बा २ हजार ३ सय ४२ र उपाध्यक्षमा माओवादीकै चेतकुमारी माझी २ हजार ३ सय मत ल्याएर विजयी भए ।


प्रमुख पदमा निकटतम प्रतिद्वन्द्वी कांग्रेसका रकमसिं घलानले २ हजार २ सय ३६ र उपप्रमुखमा विष्णुमाया पुलामीले २ हजार २ सय १० मत ल्याएका छन् । वडामा भने मिश्रित परिणाम छ । १ मा माओवादीका कान्छामान जिम्वा, २ मा लालबहादुर पाख्रिन, ५ मा रविन मोक्तान र ६ मा रमेश लुंगेली वडाध्यक्ष चुनिए । कांग्रेसतर्फबाट ३ मा ज्ञानबहादुर लामा, ४ मा दिलबहादुर वाइवा र ७ मा जगतबहादुर योञ्जनले वडाध्यक्ष जितेका छन् । एमालेका टंकबहादुर आले ८ नम्बर वडाको अध्यक्ष छन् ।
भुम्लु गाउँपालिकाको अध्यक्ष र उपाध्यक्षमा एमाले उम्मेदवार विजयी भएका छन् । अध्यक्षमा गुमानध्वज कुँवर ३ हजार ५ सय ४८ र उपाध्यक्षमा कल्पना श्रेष्ठ ३ हजार ५ सय ९६ मत ल्याएर विजयी भए । अध्यक्ष पदका निकटतम प्रतिद्वन्द्वी कांग्रेसका तस्बिर लामाले २ हजार ९ सय ४९ र उपाध्यक्षमा शान्ता थापा क्षत्रीले २ हजार ८ सय ३० मत प्राप्त गरे ।
वडा नं २ मा एमालेका कृष्णकुमार कार्की, ४ मा लोकबहादुर कुँवर, ६ मा भरतबहादुर शिवभक्ति, ७ मा रमेशराज खरेल र ८ मा मोतीलाल तामाङ वडाध्यक्ष चुनिएका छन् । कांग्रेसका अञ्चलकुमार लामाले ५, दलबहादुर तामाङले ९ र चित्रबहादुर लामाले १० नं वडामा जित हात पारे । १ नं वडामा माओवादी केन्द्रका खिरबहादुर श्रेष्ठ र ३ नम्बरमा स्वतन्त्र उम्मेदवार ज्ञानबहादुर तामाङ विजयी भएका छन् । यो नतिजासँगै काभ्रेमा ३ गाउँपालिका कांग्रेस, २ नेकपा एमाले र १ नेकपा माओवादी केन्द्रले जितेको छ ।

मन्थलीमा एमाले विजयी
रामेछाप– मन्थली नगरपालिकामा एमाले उम्मेदवार रमेशकुमार बस्नेत मेयर निर्वाचित भएका छन् । उनले ६ हजार ५ सय २९ मत प्राप्त गरे । उनलाई पछ्याएका कांग्रेसका विनोद कार्कीले ५ हजार ३ सय ७९ मत मात्र ल्याउन सके । कार्की नेपाली कांग्रेसका क्षेत्रीय सभापति हुन् । त्यसैगरी उपप्रमुख पदमा एमालेकै माया कार्की निर्वाचित भएकी छन् । उनले ६ हजार ५ सय ७ मत ल्याइन् । प्रतिस्पर्धी नेपाली कांग्रेसकी गंगा अधिकारीले ५ हजार ३ सय ६२ मत पाएकी छन् ।
बस्नेत २०५४ सालमा जिल्ला विकास समितिमा उपसभापति निर्वाचित भएका थिए । उनी राजाको प्रत्यक्ष शासनकालमा जिविस सभापति थिए ।
कार्की पनि लामो समयदेखि राजनीतिमै संलग्न छिन् । उनी जिल्लाका नेत्रीहरूको सूचीमा अगुवा मानिन्छिन् ।
त्यसैगरी दोरम्बा गाउँपालिकाको प्रमुखमा माओवादी केन्द्रका कमानसिं लामा विजयी भएका छन् । उनले ४ हजार २ सय ४१ मत पाए । लामालाई पछ्याइरहेका एमालेका प्रेम लामाले ३ हजार ७ सय ४५ मत मात्र ल्याउन सके ।
उपप्रमुखमा माओवादीकै कृशला घिसिङ विजयी भएकी छन् । उनले ४ हजार ३ सय ८९ मत ल्याएकी छन् । उपप्रमुख पदकी प्रतिद्वन्द्वी एमालेकी शुभद्रा पाठक कँडेलले ३ हजार ५ सय ९९ मत मात्र ल्याउन सकिन् ।
लामा तत्कालीन जनमुक्ति सेनाको कमान्डर हुन् । उनी सेना समायोजनपछि खुला राजनीतिमा आएका हुन् ।

दुई तिहाइ वडामा एमाले
पर्वत– यहाँका दुई नगरपालिका र पाँच गाउँपालिकाका ६१ वडामध्ये एमालेले करिब दुई तिहाइमा जित हात पारेको छ । एक नगरपालिका र तीन गाउँपालिकामा एमाले तथा कांग्रेसले एक नगर र दुई गाउँपालिकामा जित हात पारेका छन् ।
एमालेले ३७ जना वडाध्यक्ष पाएको छ । २० वडामा कांग्रेस र चारमा माओवादी केन्द्रका उम्मेदवार विजयी भएका छन् । वडाका हिसाबले दुई तिहाइमा जिते पनि एमालेले जिल्लाकै महत्त्वपूर्ण र सदरमुकाम रहेकै नगरपालिकामा हार व्यहोरेको छ । नगरमा हार्नुको प्रमुख कारण पार्टीको आन्तरिक सुदृढीकरणको खाँचो रहेको एमाले अध्यक्ष पदम गिरीले औंल्याए । ‘पार्टीको आन्तरिक सुदृढीकरणमा केही चुकेको महसुस भएको छ,’ उनले भने, ‘अब धेरै सुधार्नु जरुरी छ ।’ नगरपालिकासहित जिल्लाका अधिकांश वडामा जितेका कारण हरेक विकासमा एमालेको सक्रिय भूमिका रहने गिरीले बताए ।

प्रकाशित : जेष्ठ ५, २०७४ ०८:३२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT